Edwɛkɛsisilɛ Mɔɔ Tɔ Zo Nwiɔ 28:1-27

  • Ehaze, Dwuda belemgbunli (1-4)

  • Seleama nee Yizilayɛma lile ɔ nwo zo konim (5-8)

  • Odɛde bɔle Yizilayɛma kɔkɔ (9-15)

  • Bɛbɛlɛle Dwudama aze (16-19)

  • Ehaze zonlenle awozonle; ye ewule (20-27)

28  Ehaze+ lile ɛvolɛ 20 la yɛɛ ɔrayɛle belemgbunli a, na ɔlile tumi ɛvolɛ 16 wɔ Gyɛlusalɛm. Yeanyɛ mɔɔ le kpalɛ wɔ Gyihova anye zo, kɛ mɔɔ ye nenyia Devidi yɛle la.+  Emomu, ɔluale Yizilayɛ arelemgbunli ne mɔ ndenle nu,+ na bɔbɔ ɔyɛle Beeyale ne mɔ mbulalɛ ananze.*+  Bieko, ɔbɔle afɔle ɔmaanle ɔkpunle esike wɔ Henɛm Ara Ne Bɔnza* ne anu na ɔyelale ɔ mra wɔ senle nu,+ ɔlile bɛkyi nyɛleɛ ne mɔ mɔɔ maanle maanle ne mɔ yɛle+ mɔɔ Gyihova voanle bɛ vile Yizilayɛma anye zo la anzi.  Ɔhɔle zo ɔbɔle afɔle na eza ɔbɔle afɔle ɔmaanle ɔkpunle esike wɔ ɛzonlenlɛ ɛleka ne mɔ,*+ awoka ngyikyi ne mɔ azo yɛɛ baka buzuu biala abo.+  Ɔti Gyihova ye Nyamenle ne vale ye wulale Selea belemgbunli ne asa anu,+ yemɔti bɛlile ɔ nwo zo konim na bɛhyele menli dɔɔnwo na bɛvale bɛ bɛrale Damasekɛse.+ Eza bɛvale ye bɛwulale Yizilayɛ belemgbunli ne asa anu, na ɔhunle ye menli ne dɔɔnwo kpalɛ.  Na Relɛmalaya ara Pikaa+ hunle Dwuda mrenyia mɔɔ bɛlɛ akɛnrasesebɛ la 120,000 wɔ kenle ko pɛ anu, ɔluakɛ bɛkpole Gyihova, bɛ nenyia mɔ Nyamenle ne.+  Na Zekelae, kovolɛ mɔɔ vi Yifelaem la hunle belemgbunli ne ara Meeyasaya nee Azelaekam mɔɔ nea belemgbunli sua nu ɛkɛ ne la nee Ɛlekeena, mɔɔ belemgbunli ne ɛnle ɛkɛ a ɔdaye a ɔwɔ ɛkɛ ne la.  Eza Yizilayɛma hyele bɛ mediema mrenyia ne mɔ anu 200,000 hɔle—mraalɛ, mralɛ mrenyia yɛɛ mralɛ mraalɛ; eza bɛvenle ninyɛne dɔɔnwo kpalɛ, na bɛvale ninyɛne ne mɔɔ bɛvenle la bɛhɔle Samɛlea.+  Noko ɛnee Gyihova ngapezonli bie mɔɔ bɛfɛlɛ ye Odɛde la wɔ ɛkɛ. Ɔvindele ɔhɔyiale sogyama ne mɔɔ vi Samɛlea ɛlɛba la na ɔzele bɛ kɛ: “Bɛnlea! Kɛmɔ Gyihova, bɛ nenyia mɔ Nyamenle ne vale Dwudama anwo ɛya la ati a ɔvale bɛ ɔwulale bɛ sa nu,+ na bɛvale ɛya mɔɔ dwu anwuma nehane la bɛhuhunle bɛ a. 10  Na kɛkala bɛkulo kɛ bɛmaa Dwudama nee Gyɛlusalɛmma yɛ bɛ azonvolɛ mrenyia nee mraalɛ.+ Noko, asoo bɛdabɛ noko bɛnli fɔlɛ wɔ Gyihova bɛ Nyamenle ne anyunlu ɔ? 11  Akee bɛdie me na bɛva bɛ mediema ne mɔ mɔɔ bɛhye bɛ la bɛzia bɛhɔ, ɔluakɛ Gyihova ɛya wuluwulu ne wɔ bɛ nwo zo.” 12  Ɛhye ati Yifelaem mgbanyima bie mɔ, Gyehoheenan ara Azalaya, Mɛhyilɛmɔto ara Bɛlikaya, Hyalɛm ara Gyɛhezekaya yɛɛ Hadelae ara Ameesa hɔyiale bɛdabɛ mɔɔ bɛhɔle konle ne na bɛlɛba la, 13  na bɛzele bɛ kɛ: “Bɛmmafa menli mɔɔ bɛhye bɛ la bɛba ɛke, ɔluakɛ ɔbamaa yɛali fɔlɛ wɔ Gyihova anyunlu. Mɔɔ bɛkulo kɛ bɛyɛ la bamaa yɛ ɛtane ne mɔ nee yɛ fɔlɛlilɛ ne ayɛ kpole, ɔluakɛ yɛ fɔlɛlilɛ ne le kpole dɛba yɛɛ ɛya wuluwulu wɔ Yizilayɛma anwo zo.” 14  Ɔti sogyama ne vale menli mɔɔ bɛhyele bɛ la nee ninyɛne mɔɔ bɛvale la+ maanle mgbanyima ne mɔ nee asafo ne amuala. 15  Akee menli mɔɔ bɛbobɔle aluma bɛyele bɛ la dwazole na bɛvale menli mɔɔ bɛhyele bɛ la, na bɛvale ninyɛne mɔɔ bɛvenle la anu adɛladeɛ ne bie bɛwulale menli mɔɔ lɛ bɛ nwo zɔ la amuala. Yemɔti bɛvale adɛladeɛ nee mgbɔlaboa bɛwulale bɛ, bɛmaanle bɛ aleɛ nee nzule yɛɛ nwole mɔɔ bɛbava bɛakpokpa la. Eza bɛvale bɛdabɛ mɔɔ bɛyɛ bɛtɛɛ la bɛdɛnlɛdɛnlanle asoaso zo na bɛvale bɛ bɛrɛlɛle bɛ mediema mɔɔ wɔ Gyɛleko, mrɛlɛ suakpole ne azo la. Ɛhye anzi, bɛziale bɛhɔle Samɛlea. 16  Zɔhane mekɛ ne Belemgbunli Ehaze hanle kɛ Aselea arelemgbunli ɛraboa ye.+ 17  Na Yidɔmma noko rale Dwuda na bɛtetale ye na bɛhyele menli ne bie mɔ bɛhɔle. 18  Filisitiama+ noko ratetale Dwuda azuamgbole Hyifɛla+ nee Nɛgɛbe na bɛhonle bɛvale Bɛte-hyimɛhye,+ Ayegyalɔn,+ Gɛdilɔto, Soko nee azua mɔɔ zuozua ye,* Temenaa+ nee azua mɔɔ zuozua ye yɛɛ Gemezo nee azua mɔɔ zuozua ye; na bɛdɛnlanle ɛkɛ. 19  Gyihova bɛlɛle Dwudama aze ɔlua Yizilayɛ Belemgbunli Ehaze ati, ɔluakɛ ɔmaanle Dwudama yɛle ɛtane kpole, na yeammaa bɛanli nɔhalɛ fee bɛammaa Gyihova. 20  Awieleɛ bɔkɔɔ ne, Aselea Belemgbunli Tegelate-paelinesɛ+ rale ɔ nwo zo na ɔmaanle ɔ nwo hyelele ye kpalɛ+ dɛlale kɛ ɔkɛmaa ye anwosesebɛ. 21  Ɔluakɛ Ehaze sesale Gyihova sua nu ɛkɛ ne nee belemgbunli sua nu ɛkɛ ne+ yɛɛ mgbanyima ne mɔ sua nu ɛkɛ ne ninyɛne ne mɔ amuala na ɔvale ɔhɔhyɛle Aselea belemgbunli ne; noko ɛhye amboa ye. 22  Na wɔ Belemgbunli Ehaze anwongyelelɛ mekɛ ne anu bɔbɔ, yeanli nɔhalɛ fee yeammaa Gyihova. 23  Ɔbɔle ɔ bo ɔbɔle afɔle ɔmaanle Damasekɛse nyamenle ne mɔ+ mɔɔ lile ɔ nwo zo konim la,+ na ɔhɔle zo ɔhanle kɛ: “Kɛmɔ Selea arelemgbunli ne mɔ nyamenle ne ɛlɛboa bɛ la ati, mebabɔ afɔle meamaa bɛ amaa bɛaboa me.”+ Noko bɛmaanle ɔ nee Yizilayɛma amuala dɔle aze. 24  Eza Ehaze sesale ahyɛnze mɔɔ wɔ nɔhalɛ Nyamenle ne sua nu ɛkɛ ne la; na ɔpepɛle nɔhalɛ Nyamenle ne sua nu ɛkɛ ne ahyɛnze ne mɔ anu azinli azinli,+ ɔtotole Gyihova sua ne nlenkɛ ne mɔ anu,+ na ɔsisile ye afɔlemokyea wɔ Gyɛlusalɛm kodoka ko biala anu. 25  Na ɔsisile ɛzonlenlɛ ɛleka wɔ Dwuda azuamgbole ne mɔ kɔsɔɔti azo ɔmaanle bɛbɔle afɔle bɛmaanle ye esike ne hɔle nyamenle gyɛne ne mɔ ɛkɛ,+ na ɔhanle Gyihova ye nenyia mɔ Nyamenle ne ɛya. 26  Na ɔ nwo tetedwɛkɛ mɔɔ ɛha la, ninyɛne mɔɔ ɔyɛle la amuala ɔvi mɔlebɛbo kɔdwu awieleɛ, bɛhɛlɛ ye wɔ Dwuda nee Yizilayɛ Arelemgbunli Buluku ne anu.+ 27  Akee bɛmaanle Ehaze nee ye nenyia mɔ hɔlale na ɔliele ɔ menle, na bɛziele ye wɔ suakpole ne azo wɔ Gyɛlusalɛm, ɔluakɛ bɛanva ye bɛamba ɛleka mɔɔ bɛsie Yizilayɛ arelemgbunli ne mɔ la.+ Na ɔ ra Hɛzikaya ralile ye agya lile belemgbunli.

Ɔbodwɛkɛ

Anzɛɛ “ananze mɔɔ bɛgua la.”
Nea Edwɛkɛbohilelɛ, “Gehenna.”
Hibulu aneɛ nu, “ɛleka mɔɔ wɔ anwuma.”
Anzɛɛ “ɛbɔ ye ɛyia.”