Edwɛkɛsisilɛ Mɔɔ Tɔ Zo Nwiɔ 24:1-27

  • Gyɛhowahye tumililɛ ne (1-3)

  • Gyɛhowahye yɛle ɛzonlenlɛsua ne boɛ (4-14)

  • Gyɛhowahye ɛkpɔkyelɛ ne (15-22)

  • Bɛhunle Gyɛhowahye (23-27)

24  Gyɛhowahye lile ɛvolɛ nsuu la yɛɛ ɔrayɛle belemgbunli a,+ na ɔlile tumi ɛvolɛ 40 wɔ Gyɛlusalɛm. Ye mame a le Zaebaya mɔɔ vi Biyɛ-hyiba+ la.  Gyɛhowahye hɔle zo yɛle mɔɔ le kpalɛ wɔ Gyihova anye zo la wɔ ɛsɔfo Gyɛhɔyada+ mekɛ zo amuala.  Gyɛhɔyada gyale mraalɛ nwiɔ maanle ye, na ɔwole mralɛ mrenyia nee mralɛ mraalɛ.  Nzinlii Gyɛhowahye nyianle ɛhulolɛ kɛ ɔyɛ Gyihova sua ne boɛ.+  Ɔti, ɔboɔboale ɛsɔfoma nee Livaema ne anloa na ɔzele bɛ kɛ: “Bɛhɔ Dwuda azuamgbole ne mɔ azo na bɛlielie ezukoa bɛvi Yizilayɛma amuala ɛkɛ bɛva bɛyɛ bɛ Nyamenle ne sua ne boɛ+ ɛvolɛ biala; bɛli edwɛkɛ ne anwo gyima ndɛndɛ.” Noko Livaema ne anli nwolɛ gyima ndɛndɛ.+  Ɔti belemgbunli ne vɛlɛle Gyɛhɔyada mɔɔ le kpanyinli la na ɔbizale ye kɛ:+ “Duzu ati a ɛtɛmaanle Livaema ne ɛtɛkɔdieliele adwule nwuanzanwuanza ne mɔɔ Gyihova sonvolɛ Mosisi hanle kɛ bɛdua la+ ɛtɛfile Dwudama nee Gyɛlusalɛmma ɛkɛ, Yizilayɛ asafo ne adwule nwuanzanwuanza ne mɔɔ bɛfa bɛyɛ Daselɛlilɛ ɛdanlɛsua ne+ anwo gyima la ɛtɛbale ɛ?  Ɔluakɛ ɛnee Atalaya,+ zɔhane raalɛ amumuyɛ ne amra ne mɔ ɛhɔ nɔhalɛ Nyamenle ne sua ne anu,+ na bɛva ninyɛne nwuanzanwuanza ne mɔɔ wɔ Gyihova sua ne anu la amuala bɛhɔmaa Beeyale ne mɔ.”  Akee belemgbunli ne maanle bɛbobɔle ɛlɛka bie+ na bɛvale bɛziele alienwo wɔ Gyihova sua ne anlenkɛ kpole ne anloa.+  Ɛhye anzi bɛbɔle nolo wɔ Dwuda nee Gyɛlusalɛm amuala kɛ awie biala ɛradua adwule nwuanzanwuanza ne+ mɔɔ nɔhalɛ Nyamenle ne sonvolɛ Mosisi hanle ye wɔ fienemgbole ne anu kɛ Yizilayɛma ɛdua la ɛmaa Gyihova. 10  Mgbanyima ne mɔ amuala nee menli ne amuala anye liele,+ na bɛhɔle zo bɛvale ndoboa bɛraguale ɛlɛka ne anu too ɔyile.* 11  Mekɛ biala mɔɔ Livaema ne bɛava ɛlɛka ne ara belemgbunli ne ɛkɛ na bɛkɛnwu kɛ ezukoa dɔɔnwo wɔ nu la, belemgbunli kɛlɛhɛlɛvolɛ ne nee ɛsɔfo kpanyinli boavolɛ ne ba na bɛbawola ezukoa ne bɛfi ɛlɛka ne anu,+ na akee bɛava bɛahɔzie ɔ bo zo ne. Bɛyɛle ɛhye alehyenlɛ biala, na bɛboɔboale ezukoa dɔɔnwo kpalɛ anloa. 12  Akee belemgbunli ne nee Gyɛhɔyada fa maa menli mɔɔ ɛlɛnea Gyihova sua ne anwo ɛzonlenlɛ gyima ne azo la, na bɛbɔ menli mɔɔ se awolɛ nee dwinvolɛma ɛkpa kɛ bɛyɛ Gyihova sua ne boɛ,+ eza bɛbɔ menli mɔɔ fa bulalɛ nee kɔbele yɛ gyima la ɛkpa bɛmaa bɛsiezie Gyihova sua ne. 13  Na menli mɔɔ ɛlɛnea gyima ne azo la bɔle ɔ bo, na sua ne ɛziezielɛ gyima ne mɔɔ bɛlɛnea zolɛ la hɔle zo kpalɛ, na bɛmaanle nɔhalɛ Nyamenle ne sua ne ziale yɛle kɛ ye dɛba ne ala la, na ɔ nwo gyinlanle ye kpalɛ. 14  Mɔɔ bɛwiele ala la, bɛvale ezukoa ne mɔɔ hale la bɛrɛlɛle belemgbunli ne nee Gyɛhɔyada, na bɛvale bɛyɛle ahyɛnze bɛmaanle Gyihova sua ne, ahyɛnze mɔɔ bɛfa bɛyɛ ɛzonlenlɛ gyima ne nee mɔɔ bɛfa bɛbɔ afɔle yɛɛ nvutuke nee dwɛtɛ fufule ahanrɛlɛ nee ahyɛnze.+ Na bɛbɔle ɛyelalɛ afɔle+ wɔ Gyihova sua ne anu dahuu wɔ Gyɛhɔyada mekɛ zo amuala. 15  Mɔɔ Gyɛhɔyada yɛle ɛrelera na ɔnyianle ɛvolɛ dɔɔnwo na ɔ kunlu dwole ɔ nwo la, ɔwule; ɔlile ɛvolɛ 130 na yeawu. 16  Ɔti bɛziele ye wɔ Devidi Suakpole ne azo bɛbokale arelemgbunli ne mɔ anwo,+ ɔlua ninyɛne mgbalɛ mɔɔ ɔyɛle ɔmaanle Yizilayɛma,+ nɔhalɛ Nyamenle ne nee Ye sua ne la ati. 17  Gyɛhɔyada wule la anzi, Dwuda mgbanyima rale na bɛbutubutule bɛ nyunlu aze wɔ belemgbunli ne anyunlu, na belemgbunli ne diele bɛ. 18  Bɛkpole Gyihova, bɛ nenyia mɔ Nyamenle ne sua ne na bɛbɔle ɔ bo kɛ bɛsonle ɛzonlenlɛ mbaka* ne mɔ nee ananze ne mɔ, yemɔti Nyamenle ɛya ne rale* Dwuda nee Gyɛlusalɛm anwo zo ɔlua bɛ fɔlɛlilɛ ne ati. 19  Ɔhɔle zo ɔzoanle ngapezoma wɔ bɛ avinli kɛ bɛva bɛ bɛzia bɛrɛla Gyihova ɛkɛ, na bɛhɔle zo bɛbɔle bɛ kɔkɔ,* noko bɛkpole kɛ bɛbadie.+ 20  Nyamenle sunsum ne rale ɛsɔfo Gyɛhɔyada+ ara Zɛkalaya anwo zo, na ɔgyinlanle ɛleka mɔɔ wɔ anwuma la wɔ menli ne anyunlu na ɔzele bɛ kɛ: “Mɔɔ nɔhalɛ Nyamenle ne ɛha la ɛne, ‘Duzu ati a bɛnli Gyihova mɛla ne mɔ azo a? Ɔnrɛwie bɛ boɛ! Ɔluakɛ bɛkpo Gyihova, na ɔdaye noko ɔbakpo bɛ.’”+ 21  Noko bɛvale ɔ nwo adwenle+ na belemgbunli ne maanle bɛzile ye awolɛ wɔ Gyihova sua ne alienwo ɛkɛ.+ 22  Ɛhye ati Belemgbunli Gyɛhowahye angakye ɛlɔlɛ kpundii ne mɔɔ ye papa* Gyɛhɔyada lale ye ali hilele ye la, na ɔhunle ɔ ra ne, mekɛ mɔɔ ɔlɛwu la ɔhanle kɛ: “Gyihova ɛnlea na ɔmaa ɛbu nwolɛ mgbonda.”+ 23  Wɔ ɛvolɛ ne mɔlebɛbo,* Selea ɛlɔnema rale Gyɛhowahye anwo zo, na bɛhonle bɛvale Dwuda nee Gyɛlusalɛm.+ Akee bɛhunle menli ne mgbanyima ne mɔ amuala,+ na bɛvale ninyɛne mɔɔ bɛvenle la amuala bɛhɔmaanle Damasekɛse belemgbunli ne. 24  Ɛlɔnema ekyi bie ala a Seleama vale bɛ rale a, noko Gyihova vale ɛlɔnema mɔɔ bɛzonle kpalɛ la wulale bɛ sa nu,+ ɔluakɛ bɛkpole bɛ nenyia mɔ Nyamenle Gyihova ne; yemɔti bɛvale ndɛnebualɛ bɛrale* Gyɛhowahye anwo zo. 25  Na mɔɔ bɛvile ɔ nwo ɛkɛ ne bɛhɔle la, (ɔluakɛ bɛgyakyile ye la ɛnee yeboda kpole* bie) ɔdaye mumua ne ye sonvolɛma bɔle ɔ nwo adwenle ɛtane ɔluakɛ ɔhanle ɛsɔfo Gyɛhɔyada+ amra* mogya ɔguale. Bɛhunle ye wɔ ye ɛkpa ne azo.+ Yemɔti ɔwule na bɛziele ye wɔ Devidi Suakpole ne azo,+ noko bɛanzie ye wɔ ɛleka mɔɔ bɛsie arelemgbunli ne mɔ la.+ 26  Menli mɔɔ vale ɔ nwo adwenle ɛtane+ ne la ɛne: Amɔnonli raalɛ Hyemɛyate ara Zeebade nee Mowabenli raalɛ Hyemelete ara Gyɛhozabade. 27  Mɔɔ fale ɔ mra ne mɔ nee nrɛlaleɛ dɔɔnwo ne mɔɔ tia ye+ yɛɛ nɔhalɛ Nyamenle ne sua ne boɛyɛlɛ*+ nwo la, bɛhɛlɛ ɛhye mɔ amuala wɔ Arelemgbunli Buluku* ne anu. Na ɔ ra Amazaya ralile ye agya lile belemgbunli.

Ɔbodwɛkɛ

Anzɛɛ ɔkola ɔkile, “hɔkpulale kɛ awie biala vale ye ɛdeɛ rale la.”
Hibulu aneɛ nu, “ɛya bie rale.”
Anzɛɛ “bɛlile daselɛ bɛtiale bɛ.”
Ɛhye kile, Zɛkalaya papa.
Hibulu aneɛ nu, “Ɛvolɛ ne dwule la.”
Ɛhye kile, Seleama vale ndɛnebualɛ rale.
Anzɛɛ “ewule dɔɔnwo wɔ ɔ nwo.”
Anzɛɛ “ara.” Ɔbayɛ kɛ bɛhanle kɛ ɔ mra bɛvale bɛhilele anyunlunyia mɔɔ ɛnee ɔlɛ la.
Hibulu aneɛ nu, “ɛziezielɛ.”
Anzɛɛ “kɛlɛtokɛ; ngilehilenu buluku.”