Edwɛkɛsisilɛ Mɔɔ Tɔ Zo Nwiɔ 23:1-21

  • Gyɛhɔyada vale ɔ nwo liele nu; bɛyɛle Gyɛhowahye belemgbunli (1-11)

  • Bɛhunle Atalaya (12-15)

  • Gyɛhɔyada vale nzenzaleɛ rale (16-21)

23  Wɔ ɛvolɛ nsuu ne anu, Gyɛhɔyada vale akɛnrasesebɛ lile ninyɛne nwo gyima na ɔ nee menli ɛya ɛya nwo zo mgbanyima yɛle ngyekyeleɛ,+ bɛmɛ a le, Gyɛloham ara Azalaya, Gyehoheenan ara Yehyemɛle, Obɛde ara Azalaya, Adaya ara Meeyasaya yɛɛ Zekelae ara Yilaehyafate.  Akee bɛhɔkpɔsale Dwuda na bɛboɔboale Livaema+ mɔɔ wɔ Dwuda azuamgbole ne mɔ azo nee Yizilayɛ mbusua mgbanyima ne mɔ amuala anloa. Mɔɔ bɛrale Gyɛlusalɛm la,  asafo ne amuala nee belemgbunli ne yɛle ngyekyeleɛ+ wɔ nɔhalɛ Nyamenle ne sua nu ɛkɛ, bɛwiele la ɔzele bɛ kɛ: “Bɛnlea! Belemgbunli ne ara bali tumi, kɛ mɔɔ Gyihova bɔle Devidi amra ne mɔ anwo ɛwɔkɛ la.+  Mɔɔ bɛbayɛ la ɛne: Ɛsɔfoma nee Livaema mɔɔ bayɛ gyima+ wɔ Ɛnwomenlelielɛ kenle ne la bahyɛ bɛ nuhua ekpunli nsa na ekpunli ko azinza nlenkɛ ne mɔ;+  ngyɛnu nsa anu ko bazinza belemgbunli sua nu ɛkɛ,+ na ngyɛnu nsa anu ekpunli ko ne mɔɔ ɛha la azinza Adiabo Anlenkɛ Kpole ne, na menli ne amuala bagyinlegyinla Gyihova sua ne alienwo ɛkɛ.+  Bɛmmamaa awie biala wolo Gyihova sua ne anu kyesɛ ɛsɔfoma nee Livaema mɔɔ ɛlɛsonle la ala.+ Menli ɛhye mɔ bahola awolo ɛkɛ ɔluakɛ bɛle ekpunli nwuanzanwuanza, na menli ne amuala bali Gyihova mɛla zo.  Ɔwɔ kɛ Livaema ne dɛ bɛ akodeɛ ne mɔ bɛ sa nu na bɛbɔ belemgbunli ne anwo bɛyia. Bɛhu awie biala mɔɔ kɛwolo sua ne anu la. Bɛli belemgbunli ne anzi wɔ ɛleka biala mɔɔ ɔkɔ la.”*  Livaema nee Dwudama amuala yɛle mɔɔ ɛsɔfo Gyɛhɔyada hanle la pɛpɛɛpɛ. Yemɔti bɛ nuhua ko biala vale ye menli ne mɔɔ ɛlɛyɛ gyima wɔ Ɛnwomenlelielɛ kenle ne la yɛɛ menli mɔɔ ɛnyɛ gyima wɔ Ɛnwomenlelielɛ kenle ne+ la rale, ɔluakɛ ɛnee ɛsɔfo Gyɛhɔyada ɛtɛmaanle ekpunli ekpunli ne mɔ+ ɛtɛkpɔnenle gyima.  Akee ɛsɔfo Gyɛhɔyada vale atwɛ nee enyinlike ngyikyi* nee enyinlike mgbole mɔɔ le Belemgbunli Devidi ɛdeɛ,+ mɔɔ wɔ nɔhalɛ Nyamenle ne sua nu ɛkɛ la+ maanle menli ɛya ɛya nwo zo mgbanyima ne mɔ.+ 10  Akee ɔmaanle menli ne amuala vale bɛ akodeɛ ne mɔ dedɛle bɛ sa nu na bɛgyinlegyinlanle sua ne fema zo nee ye bɛne zo, afɔlemokyea ne anwo nee sua ne anwo amuala na bɛbɔle belemgbunli ne bɛyiale. 11  Akee bɛvale belemgbunli ne ara ne+ bɛvindele na bɛvale belemgbunli kyɛlɛ* ne bɛzoale ye na bɛvale Daselɛlilɛ* ne+ bɛdole ɔ ti zo* na bɛziele ye belemgbunli, na Gyɛhɔyada nee ɔ mra ne mɔ kpokpale ye. Akee bɛhanle kɛ: “Belemgbunli ɛnyi ɛhyɛ!”+ 12  Mɔɔ Atalaya dele menli ne ane kɛ bɛlɛnriandi na bɛlɛye belemgbunli ne ayɛlɛ la, ɛkɛ ne ala ɔrale menli ne anu wɔ Gyihova sua nu ɛkɛ.+ 13  Akee ɔnwunle kɛ belemgbunli ne gyi ye pila ne anwo ɛkɛ wɔ anuhɔlɛ ne. Ɛnee mgbanyima ne mɔ+ nee menli mɔɔ bɔ aweɛne ndendenle ne la wɔ belemgbunli ne anwo ɛkɛ, na ɛnee menli mɔɔ wɔ azɛlɛ ne azo la amuala anye ɛlie+ na bɛlɛbɔ aweɛne ndendenle ne, na ɛnee edwɛndolɛma mɔɔ dedɛ edwɛnebɔlɛ ninyɛne la li bɛ ti* wɔ ayɛlɛyelɛ ne anu. Ɛhye ati, Atalaya suosuanle ye adɛladeɛ ne mɔ anu na ɔdeanle nu kɛ: “Maamɔvo adwenle! Maamɔvo adwenle!” 14  Noko ɛsɔfo Gyɛhɔyada vale menli ɛya ɛya nwo zo mgbanyima, menli mɔɔ bɛkpa bɛ kɛ bɛnlea ɛlɔne ne anwo zo la vindele na ɔzele bɛ kɛ: “Bɛva ye bɛvi sogyama ne anu bɛvinde, na saa awie biala di ɔ nzi a bɛva konle dadeɛ bɛhu ye!” Ɔluakɛ ɛsɔfo ne hanle kɛ: “Bɛmmaku ye wɔ Gyihova sua nu ɛkɛ.” 15  Ɔti bɛhyele ye, na mɔɔ ɔdwule belemgbunli sua nu Ɛkpɔnwɔ Anlenkɛ Kpole ne anloa la, ɛkɛ ne ala, bɛhunle ye wɔ ɛkɛ. 16  Akee Gyɛhɔyada mumua ne nee menli ne amuala yɛɛ belemgbunli ne yɛle ngyekyeleɛ kɛ bɛbahɔ zo bɛayɛ Gyihova menli dahuu.+ 17  Ɛhye anzi menli ne amuala rale Beeyale sua* ne anwo na bɛbubule ye bɛguale aze,+ bɛbubule ye afɔlemokyea ne mɔ nee ye ananze ne mɔ,+ na bɛhunle Beeyale ɛsɔfo Mateyan+ wɔ afɔlemokyea ne mɔ anyunlu ɛkɛ. 18  Akee Gyɛhɔyada vale Gyihova sua ne azo ɛnleanlɛ wulale ɛsɔfoma ne nee Livaema ne asa anu, kɛ mɔɔ Devidi hyehyɛle bɛ nu ekpunli ekpunli kɛ bɛnlea Gyihova sua ne azo na bɛbɔ ɛyelalɛ afɔle bɛmaa Gyihova+ kɛ mɔɔ bɛhɛlɛ ye wɔ Mosisi Mɛla ne anu,+ na bɛva anyelielɛ nee edwɛne bɛyɛ ye kɛ mɔɔ Devidi hilele* la. 19  Eza ɔmaanle nlenkɛ mgbole sinzavolɛma+ gyinlegyinlanle Gyihova sua ne nlenkɛ mgbole ne anwo, amaa awie biala mɔɔ ɔ nwo ɛnde wɔ adenle biala azo la angola anwolo ɛkɛ. 20  Akee ɔvale menli ɛya ɛya nwo zo mgbanyima,+ menli titili ne mɔ, tumivolɛma mɔɔ nea menli ne anwo zo la nee menli mɔɔ wɔ azɛlɛ ne azo la amuala na bɛvale belemgbunli ne bɛvile Gyihova sua nu ɛkɛ ne bɛrale. Akee bɛluale anwuma anlenkɛ kpole ne anu bɛrale belemgbunli sua nu ɛkɛ na bɛvale belemgbunli ne bɛdɛnlanle belemgbunli ebia ne+ azo wɔ belemgbunlililɛ ne anu.+ 21  Ɔti menli mɔɔ wɔ azɛlɛ ne azo la amuala anye liele na suakpole ne azo yɛle dii, ɔluakɛ bɛvale konle dadeɛ bɛhunle Atalaya.

Ɔbodwɛkɛ

Hibulu aneɛ nu, “wɔ ye ɛhɔlɛ nu nee ye ɛralɛ nu.”
Enyinlike ngyikyi mɔɔ ɛdatovoma ta dɛ ye bɛ sa nu.
Anzɛɛ “abotile.”
Ɔbayɛ nwomamobɔleɛ bie mɔɔ Nyamenle Mɛla ne wɔ nu la.
Anzɛɛ “na bɛvale Mɛla ne bie bɛmaanle ye.”
Anzɛɛ “ɛlɛmaa sɛkɛlɛneɛ.”
Anzɛɛ “ɛzonlenlɛsua.”
Anzɛɛ “hanle.”