Edwɛkɛsisilɛ Mɔɔ Tɔ Zo Nwiɔ 18:1-34

  • Gyɛhɔhyafate nee Ehabe yɛle ko (1-11)

  • Maekaya hanle ngapezo kɛ bɛbali bɛ nwo zo konim (12-27)

  • Bɛhunle Ehabe wɔ Releemɔto-geleade (28-34)

18  Gyɛhɔhyafate nyianle anyunlunyia nee anwonyia dɔɔnwo,+ noko ɔmaanle ye sua nu sonla gyale Ehabe sua nu sonla.+  Ɔti ɛvolɛ bie anzi ɔhɔle Ehabe anwo lɔ wɔ Samɛlea,+ na Ehabe vale mboane nee nlankɛ dɔɔnwo bɔle afɔle maanle ɔ nee menli mɔɔ boka ɔ nwo la. Na ɔzile ye adua* kɛ ɔ nee ye ɛhɔ Releemɔto-geleade anwo zo.+  Akee Yizilayɛ Belemgbunli Ehabe zele Dwuda Belemgbunli Gyɛhɔhyafate kɛ: “Ɛ nee me bahɔ Releemɔto-geleade ɔ?” Ɔbuale ye kɛ: “Mele kɛ ɛdawɔ ala la yɛɛ me menli ne le kɛ wɔ menli ne ala la na yɛbaboa wɔ wɔ konle ne anu.”  Noko Gyɛhɔhyafate zele Yizilayɛ belemgbunli ne kɛ: “Mesɛlɛ wɔ, dimoa biza nwolɛ edwɛkɛ wɔ Gyihova ɛkɛ.”+  Ɔti Yizilayɛ belemgbunli ne boɔboale ngapezoma ne anloa, mrenyia 400 na ɔbizale bɛ kɛ: “Yɛ nee Releemɔto-geleade amra ɛhɔho anzɛɛ mengyakyi?” Bɛhanle bɛhilele ye kɛ: “Kɔ, na nɔhalɛ Nyamenle ne bava bɛ awula belemgbunli ne asa anu.”  Akee Gyɛhɔhyafate bizale kɛ: “Gyihova ngapezonli biala ɛnle ɛke ɔ?+ Bɛmaa yɛlua ɔdaye noko ɔ nwo zo yɛbiza.”+  Ɔti Yizilayɛ belemgbunli ne zele Gyɛhɔhyafate kɛ: “Sonla ko tɛbɔ ɛkɛ+ mɔɔ yɛbahola yɛalua ɔ nwo zo yɛabiza Gyihova a; noko mengulo ye edwɛkɛ, ɔluakɛ ɔnga ngapezo kpalɛ ɔnvale me nwo ɛlɛ, emomu dahuu ɛtane ala.+ Yemɔ a le Yemela ara Maekaya.” Noko Gyɛhɔhyafate hanle kɛ: “Ɔnle kɛ belemgbunli ka ye zɔ.”  Ɔti Yizilayɛ belemgbunli ne vɛlɛle suakunlu mgbanyima ne mɔ ko na ɔzele ye kɛ: “Kɔva Yemela ara Maekaya bɛla ndɛndɛ.”+  Zɔhane mekɛ ne, ɛnee Yizilayɛ belemgbunli ne nee Dwuda Belemgbunli Gyɛhɔhyafate wula bɛ belemgbunli adɛladeɛ na biala de ye belemgbunli ebia nu; ɛnee bɛdede ma ɛwosolɛ ɛleka ne mɔɔ wɔ Samɛlea anlenkɛ kpole ne anuhɔlɛ ne la, na ngapezoma ne mɔ amuala ɛlɛka ngapezo wɔ bɛ nyunlu ɛkɛ. 10  Akee Kɛneeyana ara Zɛdikaya vale bulalɛ yɛle mɛne na ɔhanle kɛ: “Mɔɔ Gyihova ɛha la ɛne, ‘Ɛbava ɛhye wɔazuhuzuhu Seleama too wɔabɔ bɛ bo zo.’” 11  Ɛnee ngapezoma mɔɔ ɛha la amuala ɛlɛka ngapezo ko ne ala kɛ: “Kɔ Releemɔto-geleade anwo zo na ɛbali konim;+ Gyihova bava sua ne awula belemgbunli ne asa anu.” 12  Yemɔti soanvolɛ ne mɔɔ hɔle kɛ ɔkavɛlɛ Maekaya la zele ye kɛ: “Nea! Ngapezoma ne mɔ edwɛkɛ ɛyɛ ko na belemgbunli ne anye ɛlie nwolɛ. Mesɛlɛ wɔ, maa wɔ edwɛkɛ ne ɛyɛ kɛ bɛ ɛdeɛ ne la,+ na ka maa ɔ nye ɛlie nwolɛ.”+ 13  Noko Maekaya hanle kɛ: “Mekɛ ala mɔɔ Gyihova de aze la, mɔɔ me Nyamenle ne baha la ala a mebaha a.”+ 14  Akee ɔrale belemgbunli ne anwo ɛkɛ, na belemgbunli ne bizale ye kɛ: “Maekaya, yɛ nee Releemɔto-geleade amra ɛhɔho, anzɛɛ mengyakyi?” Ɛkɛ ne ala ɔbuale ye kɛ: “Kɔ na ɛbali konim; bɛbava bɛ bɛawula ɛ sa nu.” 15  Na belemgbunli ne zele ye kɛ: “Fane nyɛ a memaa ɛha ndane kɛ nɔhalɛ ala a ɛbaha wɔahile me wɔ Gyihova duma nu a?” 16  Ɔti ɔhanle kɛ: “Menwu kɛ Yizilayɛma amuala ɛbɔ asande wɔ awoka ne mɔ azo, kɛ mboane mɔɔ ɛnlɛ neavolɛ la.+ Gyihova hanle kɛ: ‘Ɛhye mɔ ɛnlɛ bɛ menle. Maa bɛ nuhua ko biala ɛzia ɛhɔ ye sua nu anzodwolɛ nu.’” 17  Akee Yizilayɛ belemgbunli ne zele Gyɛhɔhyafate kɛ: “Meanga meangile wɔ kɛ, ‘Ɔnrɛha ngapezo kpalɛ ɔnrɛvale me nwo kɛ ɛtane ngome ala’ ɔ?”+ 18  Akee Maekaya hanle kɛ: “Ɛhye ati, bɛdie Gyihova edwɛkɛ ne: Menwunle Gyihova kɛ ɔde ye belemgbunli ebia nu+ na anwuma ɛlɔne ne amuala+ gyigyi ye fema zo nee ye bɛne zo.+ 19  Akee Gyihova bizale kɛ, ‘Nwane a bahɔyɛ Yizilayɛ Belemgbunli Ehabe koasea amaa yeahɔ Releemɔto-geleade na yeahɔwu a?’ Na mɔɔ ko ɛlɛka edwɛkɛ ɛhye la ɛnee ko noko ɛlɛka edwɛkɛ gyɛne. 20  Akee sunsum* bie+ rale ɔ nyunlu ragyinlanle Gyihova anyunlu ɛkɛ na ɔhanle kɛ, ‘Mebayɛ ye koasea.’ Na Gyihova bizale ye kɛ, ‘Kɛzi ɛbayɛ ye ɛ?’ 21  Ɔbuale kɛ, ‘Mebahɔ na meamaa ye ngapezoma ne mɔ abɔ adalɛ.’* Yemɔti ɔzele ye kɛ, ‘Ɛbayɛ ye koasea, na eza wɔali konim. Finde kɔ na kɔyɛ ye zɔ.’ 22  Ɔti a Gyihova ɛmaa wɔ ngapezoma ɛhye mɔ ɛbɔ adalɛ ɛhile wɔ la,+ noko Gyihova ɛha kɛ ɔmaa munzule ado wɔ.” 23  Akee Kɛneeyana ara Zɛdikaya+ bikyele Maekaya+ na ɔbɔle ɔ nzo nu+ na ɔbizale ye kɛ: “Adenle boni a Gyihova sunsum ne luale zo zenle me nwo na ɔ nee wɔ dendɛle a?”+ 24  Maekaya buale kɛ: “Nea! Ɛbanwu adenle holɛ ko ne wɔ kenle mɔɔ ɛbahɔwolo wɔ suakunlu ɛkɛ ne kɛ ɛkavea la.” 25  Akee Yizilayɛ belemgbunli ne hanle kɛ: “Bɛva Maekaya bɛhɔmaa Emɔn mɔɔ nea suakpole ne azo la nee belemgbunli ara Dwowahye. 26  Bɛha bɛhile bɛ kɛ, ‘Mɔɔ belemgbunli ɛha la ɛne: “Bɛva sonla ɛhye bɛdo efiade+ na bɛva aleɛ ekyi nee nzule ekyi bɛmaa ye kɔkpula kɛ mebazia meara anzodwolɛ nu.”’” 27  Noko Maekaya hanle kɛ: “Saa ɛsia ɛba anzodwolɛ nu a, ɛnee tɛ Gyihova a nee me dendɛle a.”+ Akee ɔvale ɔzɔle zo kɛ: “Bɛ muala bɛyɛ ɛhye nzonlɛ.” 28  Ɔti Yizilayɛ belemgbunli ne nee Dwuda Belemgbunli Gyɛhɔhyafate vole hɔle Releemɔto-geleade.+ 29  Akee Yizilayɛ belemgbunli ne zele Gyɛhɔhyafate kɛ: “Mebahakyi me nwo sonla gyɛne na meahɔ konle ne anloa, noko wɔmɔ wula wɔ belemgbunli tɛladeɛ ne.” Yemɔti Yizilayɛ belemgbunli ne hakyile ɔ nwo sonla gyɛne na bɛhɔle konle ne anloa. 30  Ɛnee Selea belemgbunli ne ɛha ɛhile ye mgbanyima mɔɔ nea ye ehwili ne mɔ azo la kɛ: “Bɛ nee awie biala mmako, ekyi o, kpole o, kyesɛ Yizilayɛ belemgbunli ne ala.” 31  Na mɔɔ mgbanyima mɔɔ nea ehwili ne mɔ azo la nwunle Gyɛhɔhyafate ala la, bɛhanle bɛhilele bɛ nwo kɛ: “Yizilayɛ belemgbunli ne ɛne.” Ɔti bɛhakyile bɛ nye wɔ ɔ nwo ɛkɛ ne kɛ bɛ nee ye kaho; na Gyɛhɔhyafate bɔle ɔ bo kɛ ɔtea nu yeakpondɛ moalɛ,+ na Gyihova boale ye, na ɛkɛ ne ala Nyamenle maanle bɛhwenle bɛ nwo bɛvile ɔ nwo. 32  Mɔɔ mgbanyima mɔɔ nea ehwili ne mɔ azo la nwunle kɛ tɛ Yizilayɛ belemgbunli ne la, ɛkɛ ne ala bɛgyakyile ɔ nzi ɛlilɛ. 33  Noko nrenyia bie dole ye ɛda ne ngyengyenenu bie ala,* na ɔhɔwɔle Yizilayɛ belemgbunli ne wɔ ye konle tɛladeɛ ne ayia ne mɔ bie azo. Yemɔti belemgbunli ne zele ye ehwilikavolɛ ne kɛ: “Kakyi ɛ nwo na ye me fi konle ye anloa,* ɔluakɛ meboda kpole.”+ 34  Konle ne anu yɛle se wɔ kenle ne anu amuala, na ɛnee ɔwɔ kɛ bɛmaa Yizilayɛ belemgbunli ne zo bɛkisa ehwili ne anu mɔɔ ɔ nye gyi Seleama ne anwo too nɔsolɛ nu a; na mɔɔ sɛnzɛne ne kadɔ la yɛɛ ɔwule a.+

Ɔbodwɛkɛ

Anzɛɛ “ɔlile ye adwenle.”
Anzɛɛ “anwumabɔvolɛ.”
Hibulu aneɛ nu, “na meayɛ adalɛ sunsum wɔ ye ngapezoma ne mɔ anloa anu.”
Anzɛɛ “mɔɔ ɛnee ɔ nye ɛnla nwo.”
Hibulu aneɛ nu, “fi azokoɛleɛ ye.”