Edwɛkɛsisilɛ Mɔɔ Tɔ Zo Nwiɔ 17:1-19

  • Gyɛhɔhyafate, Dwuda belemgbunli (1-6)

  • Ngilehilelɛ gyima (7-9)

  • Gyɛhɔhyafate sogyama ne (10-19)

17  Na ɔ ra Gyɛhɔhyafate+ ralile ye agya yɛle belemgbunli, na ɔmianle ye gyinlabelɛ ne anu wɔ Yizilayɛ.  Ɔvale sogyama ɔziele Dwuda azuamgbole mɔɔ bɛlie nwolɛ bane la amuala azo na ɔyɛle sogyama azokoɛleɛ wɔ Dwuda azɛlɛ ne nee Yifelaem azuamgbole ne mɔ mɔɔ ye papa Esa honle vale la azo.+  Gyihova nee Gyɛhɔhyafate hɔle zo luale, ɔboalekɛ ɔvale adenle ne mɔɔ ye nenyia Devidi mɔɔ limoale ɔ nyunlu la vale zo la azo,+ na yeamkpondɛ Beeyale ne mɔ abo zo.  Ɔluakɛ ɔkpondɛle ye papa Nyamenle ne abo zo+ na ɔlile ye mɛla ne azo* na yeanyɛ Yizilayɛma nyɛleɛ ne mɔ bie.+  Gyihova hɔle zo maanle belemgbunlililɛ ne gyinlanle kpundii wɔ ɔ sa nu;+ na Dwudama amuala hɔle zo hyɛle Gyɛhɔhyafate ninyɛne, na ɔnyianle anyunlunyia nee anwonyia dɔɔnwo.+  Ɔnyianle akɛnrazilɛ ɔluale Gyihova ndenle ne mɔ anu, na ɔyeyele ɛzonlenlɛ ɛleka ne mɔ*+ nee ɛzonlenlɛ mbaka* ne mɔ+ bɔbɔ ɔvile Dwuda.  Wɔ ye tumililɛ ne ɛvolɛ mɔɔ tɔ zolɛ nsa la anu, ɔzoanle ɔmaanle bɛhɔvɛlɛle ye mgbanyima ne mɔ, Bɛne-heeyɛle, Obadaya, Zɛkalaya, Nɛtanɛle yɛɛ Maekaya kɛ bɛhɔhilehile wɔ Dwuda azuamgbole ne mɔ azo.  Ɛnee Livaema boka bɛ nwo: Hyɛmaya, Nɛtanaya, Zɛbadaya, Asahɛle, Hyimelamɔto, Gyɛhɔnatan, Adonaegya, Tobaegya yɛɛ Tob-adonaegya, na ɛnee ɛsɔfoma Ɛlehyama nee Gyɛholam boka bɛ nwo.+  Bɛbɔle ɔ bo bɛvale Gyihova Mɛla buluku ne bɛhilehilele wɔ Dwuda,+ na bɛhɔle Dwuda azuamgbole ne mɔ amuala azo bɛhilehilele menli ne. 10  Na Gyihova anwo ɛzulolɛ dɔle azɛlɛ ne azo arelemgbunlililɛ mɔɔ ɛbɛnga Dwuda ɛyia la kɔsɔɔti anwo zo, na bɛ nee Gyɛhɔhyafate ango. 11  Na Filisitiama vale ahyɛlɛdeɛ nee ezukoa rɛlɛle Gyɛhɔhyafate kɛ adwule. Arelabema vale mboane nyinli 7,700 yɛɛ mbɔnkye nyinli 7,700 rɛlɛle ye. 12  Gyɛhɔhyafate hɔle zo nyianle tumi kpole,+ na ɔhɔle zolɛ ɔkyekyele azua mɔɔ bɛlie nwolɛ bane la+ nee azuamgbole mɔɔ bɛfa ninyɛne bɛsiezie zolɛ la+ wɔ Dwuda. 13  Ɔyɛle ninyɛne mgbole dɔɔnwo wɔ Dwuda azuamgbole ne mɔ azo, na ɛnee ɔlɛ sogyama, konle nu katakyiema wɔ Gyɛlusalɛm. 14  Bɛhyɛle bɛ nu ekpunli ekpunli kɛ mɔɔ bɛ papa mɔ sua nu mbusua de la: Dwuda menli apenle apenle nwo zo mgbanyima, Adenaa le kpanyinli yɛɛ konle nu katakyiema 300,000 boka ɔ nwo.+ 15  Na Gyehoheenan mɔɔ le kpanyinli la vea ɔ bo, na menli 280,000 boka ɔ nwo. 16  Na Zekelae ara Amasaya mɔɔ dule ɔ nwo maanle Gyihova ɛzonlenlɛ la noko vea ɔ bo, na konle nu katakyiema 200,000 boka ɔ nwo. 17  Na Bɛngyaman anu,+ Yilayada mɔɔ le konle nu katakyie, na mrenyia 200,000 mɔɔ dedɛ ɛda nee enyinlike la boka ɔ nwo.+ 18  Na ɛnee Gyɛhozabade vea ɔ bo, na mrenyia 180,000 mɔɔ kɔ konle la boka ɔ nwo. 19  Menli ɛhye mɔ sonle belemgbunli ne, bɛ nee menli mɔɔ belemgbunli ne vale bɛ zieziele azuamgbole mɔɔ bɛlie nwolɛ bane azo wɔ Dwuda amuala la.+

Ɔbodwɛkɛ

Hibulu aneɛ nu, “ɔluale nu.”
Hibulu aneɛ nu, “ɛleka mɔɔ wɔ anwuma.”
Hibulu aneɛ nu, “mbɔnkye.” Nea Edwɛkɛbohilelɛ.