Edwɛkɛsisilɛ Mɔɔ Tɔ Zo Nwiɔ 14:1-15

  • Abaegya ewule (1)

  • Esa, Dwuda belemgbunli (2-8)

  • Esa lile Yiteyopeama 1,000,000 anwo zo konim (9-15)

14  Akee Abaegya nee ye nenyia mɔ hɔlale na bɛziele ye wɔ Devidi Suakpole zo;+ na ɔ ra Esa ralile ye agya yɛle belemgbunli. Wɔ ye mekɛ zo azɛlɛ ne liele ɔ menle ɛvolɛ bulu.  Esa yɛle mɔɔ le kpalɛ na ɔtenrɛ wɔ Gyihova ye Nyamenle ne anye zo.  Ɔyeyele nyamenle gyɛne afɔlemokyea+ ne mɔ nee ɛzonlenlɛ ɛleka ne mɔ* ɔvile ɛkɛ, ɔbubule bɛ ɛzonlenlɛ mpila+ ne mɔ na ɔpepɛle bɛ ɛzonlenlɛ mbaka* ne mɔ.+  Eza ɔhanle ɔhilele Dwudama kɛ bɛkpondɛ Gyihova, bɛ nenyia mɔ Nyamenle ne abo zo na bɛli ye Mɛla ne nee mɔɔ yeha yehile bɛ kɛ bɛyɛ la amuala azo.  Ɔti ɔyeyele ɛzonlenlɛ ɛleka ne mɔ nee ayilevuanlɛ afɔlemokyea ne mɔ ɔvile Dwuda azuamgbole ne mɔ amuala azo,+ na belemgbunlililɛ ne nyianle anzodwolɛ wɔ ye tumililɛ bo.  Ɔkyekyele azuamgbole mɔɔ bɛlie nwolɛ bane la wɔ Dwuda,+ ɔluakɛ azɛlɛ ne nyianle anzodwolɛ yɛɛ bɛanva konle bɛandoa ye wɔ ɛvolɛ ɛhye mɔ anu, ɔluakɛ Gyihova maanle ɔliele ɔ menle.+  Ɔzele Dwudama kɛ: “Bɛmaa yɛkyekye azuamgbole ɛhye mɔ na yɛlie nwolɛ bane, yɛsisi tawa yɛbɔ bɛ yɛyia,+ yɛva nlenkɛ mgbole* yɛgua bɛ nloa na yɛva mbulalɛ yɛgua bɛ nzi. Na azɛlɛ ne tɛde yɛ ɛdeɛ, ɔluakɛ yɛkpondɛ Gyihova yɛ Nyamenle ne. Yɛkpondɛle ye na yemaa yɛlie yɛ menle wɔ ɛleka biala.” Ɔti bɛwiele bɛ sua ne si.+  Esa nyianle ɛlɔnema 300,000 mɔɔ bɛvi Dwuda mɔɔ bɛdɛ enyinlike mgbole nee atwɛ. Na ɔnyianle konle nu katakyiema 280,000 mɔɔ bɛsoa enyinlike ngyikyi* na bɛdɛ ɛda bɛ sa nu* la wɔ Bɛngyamanema anu.+  Nzinlii Yiteyopeanli Zila vale ɛlɔnema 1,000,000 nee ehwili 300 hɔle bɛ nwo zo.+ Mɔɔ ɔdwule Malihyaa+ la, 10  Esa vindele hɔyiale ye na bɛhyehyɛle bɛ pɛpɛɛpɛ wɔ Zɛfata Bɔnza ne anu wɔ Malihyaa kɛ bɛkaho. 11  Akee Esa vɛlɛle Gyihova ye Nyamenle ne+ na ɔhanle kɛ: “O Gyihova, saa menli mɔɔ ɛboa bɛ la anwo zonle anzɛɛ bɛnlɛ tumi bɔbɔ a, ɔnyɛ se ɔmmaa wɔ.+ O Gyihova yɛ Nyamenle, boa yɛ, ɔluakɛ yɛva yɛ nwo yɛdo ɛ nwo zo,*+ na yɛra menli dɔɔnwo ɛhye mɔ anwo zo wɔ wɔ duma nu.+ O Gyihova, ɛle yɛ Nyamenle. Mmamaa sonla dasanli di ɛ nwo zo konim.”+ 12  Ɔti Gyihova lile Yiteyopeama ne anwo zo konim wɔ Esa nee Dwudama anyunlu, na Yiteyopeama ne nriandile.+ 13  Esa nee menli mɔɔ boka ɔ nwo la voanle bɛ too hɔdwule Gilaa,+ na Yiteyopeama ne hɔle zo wuwule too mɔɔ ko bɔbɔ anga a, ɔluakɛ Gyihova nee ye ɛlɔne ne zɛkyele bɛ. Ɛhye anzi bɛvenle ninyɛne dɔɔnwo kpalɛ bɛhɔle. 14  Eza bɛzɛkyele azuamgbole mɔɔ ɛbɔ Gilaa ɛyia la kɔsɔɔti, ɔluakɛ Gyihova anwo ɛzulolɛ dɔle bɛ nwo zo; na bɛsesale azuamgbole ne mɔ amuala azo ninyɛne, ɔluakɛ ɛnee ninyɛne dɔɔnwo wɔ zo mɔɔ ɔwɔ kɛ bɛsesa a. 15  Eza bɛzɛkyele menli mɔɔ lɛ nyɛmoa la ɛdanlɛ azua ne mɔ, na bɛnyianle mboane nee afunlumu dɔɔnwo kpalɛ, na bɛwiele la bɛziale bɛrale Gyɛlusalɛm.

Ɔbodwɛkɛ

Hibulu aneɛ nu, “ɛleka mɔɔ wɔ anwuma.”
Hibulu aneɛ nu, “nlenkɛ mɔɔ bɔ nwolɛ nwiɔ.”
Enyinlike ngyikyi mɔɔ ɛdatovoma ta dɛ ye bɛ sa nu.
Hibulu aneɛ nu, “na bɛsua ɛda.”
Hibulu aneɛ nu, “yɛhisa wɔ.”