Edwɛkɛsisilɛ Mɔɔ Tɔ Zo Nwiɔ 12:1-16

  • Hyaehyake tetale Gyɛlusalɛm (1-12)

  • Rilihɔbowam tumililɛ ne awieleɛ (13-16)

12  Mɔɔ Rilihɔbowam belemgbunlililɛ ne gyinlanle kpundii+ na ɔ nwo yɛle se ala la, ɔkpole Gyihova Mɛla ne,+ ɔ nee Yizilayɛma mɔɔ boka ɔ nwo la amuala.  Wɔ Belemgbunli Rilihɔbowam ɛvolɛ mɔɔ tɔ zo nnu la anu, Yigyibiti Belemgbunli Hyaehyake+ rale Gyɛlusalɛm anwo zo, ɔluakɛ bɛanli nɔhalɛ bɛammaa Gyihova.  Ɔvale ehwili 1,200, mgbɔnwɔkavoma 60,000 yɛɛ sogyama mɔɔ bɛngola bɛ tia la ɔvile Yigyibiti a ɔrale a—Lebeyama, Sɛkema, Yiteyopeama.+  Ɔhonle ɔvale Dwuda azuamgbole mɔɔ bɛlie nwolɛ bane la na awieleɛ bɔkɔɔ ne ɔhɔdwule Gyɛlusalɛm.  Ngapezonli Hyɛmaya+ hɔle Rilihɔbowam nee Dwuda mgbanyima mɔɔ Hyaehyake ati ɛnee bɛyia Gyɛlusalɛm la anwo ɛkɛ, na ɔzele bɛ kɛ: “Mɔɔ Gyihova ɛha la ɛne, ‘Bɛkpo me, yemɔti medame noko meye bɛ+ mewula Hyaehyake asa anu.’”  Ɛhye ati, Yizilayɛ mgbanyima nee belemgbunli ne bɛlɛle bɛ nwo aze+ na bɛhanle kɛ: “Gyihova le tenlene.”  Mɔɔ Gyihova nwunle kɛ bɛbɛlɛ bɛ nwo aze la, Gyihova dendɛle hilele Hyɛmaya kɛ: “Bɛbɛlɛ bɛ nwo aze. Menrɛzɛkye bɛ,+ na ɔnrɛhyɛ biala mebalie bɛ. Menrɛlua Hyaehyake anwo zo menrɛwola me ɛya ne menrɛgua Gyɛlusalɛm anwo zo.  Noko bɛbayɛ ye sonvolɛma, amaa bɛanwu ngakyile mɔɔ wɔ me ɛzonlenlɛ nee arelemgbunli* mɔɔ wɔ azɛlɛ ne mɔ azo ɛzonlenlɛ nu la.”  Ɔti Yigyibiti Belemgbunli Hyaehyake rale Gyɛlusalɛm anwo zo. Ɔvale agudeɛ mɔɔ wɔ Gyihova sua ne anu+ nee agudeɛ mɔɔ wɔ belemgbunli ne sua ne anu* la. Ɔvale debie biala, mɔɔ nvutuke enyinlike ne mɔ mɔɔ Sɔlɔmɔn yɛle la noko boka nwo la ɔhɔle.+ 10  Ɔti Belemgbunli Rilihɔbowam yɛle kɔbele enyinlike vale ziele ɔ gyakɛ anu, na ɔvale ɔwulale sinzavolɛ* mgbanyima mɔɔ sinza belemgbunli sua ne anuhɔlɛ ne la asa anu. 11  Mekɛ biala mɔɔ belemgbunli ne ɛlɛba Gyihova sua ne anu la, sinzavolɛma ne ba ɛkɛ ne basoa, na akee bɛava bɛazia bɛahɔ sinzavolɛma ekpumgbunli ne anu. 12  Kɛmɔ belemgbunli ne bɛlɛle ɔ nwo aze la ati, Gyihova ɛya ne vile ɔ nwo zo,+ na yeanzɛkye bɛ bɔkɔɔ.+ Eza bɛnwunle ninyɛne mgbalɛ bie mɔ wɔ Dwuda anu.+ 13  Belemgbunli Rilihɔbowam nyianle tumi kpole wɔ Gyɛlusalɛm na ɔhɔle zo ɔlile tumi; Rilihɔbowam lile ɛvolɛ 41 la yɛɛ ɔyɛle belemgbunli a, na ɔlile ebia ɛvolɛ 17 wɔ Gyɛlusalɛm, suakpole ne mɔɔ ɛnee Gyihova ɛye ɛvi Yizilayɛ mbusua kɔsɔɔti anu kɛ ɛleka mɔɔ ye duma ɛdɛnla ɛkɛ la. Bɛfɛlɛ belemgbunli ne mame Neeyama, ɔle Amɔnonli.+ 14  Noko ɔyɛle ɛtane, ɔluakɛ yeanva yeanzie ye ahonle nu kɛ ɔkpondɛ Gyihova.+ 15  Rilihɔbowam anwo tetedwɛkɛ ne, ɔvi ye mɔlebɛbo kɔdwu ye awieleɛ, asoo bɛtɛkɛlɛle ye wɔ ngapezonli Hyɛmaya+ edwɛkɛ ne nee ɛnyelɛzodeɛnwunlɛnli Yedo+ abusua kɛlɛtokɛ ne anu? Na Rilihɔbowam nee Gyɛlɔbowam honle fane dɔɔnwo.+ 16  Akee Rilihɔbowam nee ye nenyia mɔ hɔlale na bɛziele ye wɔ Devidi Suakpole zo;+ na ɔ ra Abaegya+ ralile ye agya yɛle belemgbunli.

Ɔbodwɛkɛ

Hibulu aneɛ nu, “belemgbunlililɛ.”
Anzɛɛ “belemgbunli sua nu ɛkɛ.”
Hibulu aneɛ nu, “ɛnriandilɛma.”