Edwɛkɛsisilɛ Mɔɔ Tɔ Zo Nwiɔ 11:1-23

11  Mɔɔ Rilihɔbowam dwule Gyɛlusalɛm la, ɛkɛ ne ala ɔboɔboale Dwuda nee Bɛngyaman mbusua ne anu amra,+ kovolɛma 180,000 mɔɔ bɛtete bɛ wɔ konle nu* la anloa kɛ bɛ nee Yizilayɛma kaho na bɛazia bɛalie belemgbunlililɛ ne bɛamaa Rilihɔbowam.+  Na Gyihova zele nɔhalɛ Nyamenle sonla Hyɛmaya+ kɛ:  “Ka kile Sɔlɔmɔn ara Rilihɔbowam, Dwuda belemgbunli ne yɛɛ Yizilayɛma mɔɔ wɔ Dwuda nee Bɛngyaman amuala la kɛ,  ‘Mɔɔ Gyihova ɛha la ɛne: “Ɔnle kɛ bɛkɔ kɛ bɛ nee bɛ mediema ne mɔ kaho. Bɛ nuhua ko biala ɛzia ɛhɔ ye sua nu, ɔluakɛ medame a memaa yera ye zɔ a.”’”+ Ɔti bɛdiele Gyihova edwɛkɛ ne na bɛziale na bɛ nee Gyɛlɔbowam angɔngo.  Rilihɔbowam dɛnlanle Gyɛlusalɛm na ɔkyekyele azuamgbole mɔɔ bɛlie nwolɛ bane la wɔ Dwuda.  Ɔti ɔkyekyele* Bɛtelɛhɛm,+ Yitam, Tɛkowa,+  Bɛte-zɛɛle, Soko,+ Adulam,+  Gate,+ Malihyaa, Zefe,+  Adoleeyem, Leekehye,+ Azika,+ 10  Zola, Ayegyalɔn+ yɛɛ Hibulɔn,+ azuamgbole mɔɔ wɔ Dwuda nee Bɛngyaman mɔɔ bɛlie nwolɛ bane la. 11  Eza ɔmaanle azuamgbole mɔɔ bɛlie nwolɛ bane la anwo mianle na ɔmaanle sogya mgbanyima nleanle ɛkɛ na ɔrɛlɛle bɛ aleɛ nee nwole yɛɛ nwanye, 12  na ɔmaanle azuamgbole ngakyile ne mɔ kɔsɔɔti enyinlike mgbole nee atwɛ; ɔmaanle bɛ nwo mianle kpole kpalɛ. Na Dwuda nee Bɛngyaman yɛle ye ɛdeɛ. 13  Na ɛsɔfoma nee Livaema mɔɔ wɔ Yizilayɛ amuala la vile bɛ azɛlɛ ne mɔ amuala azo rale ye afoa. 14  Livaema gyakyile bɛ adidileka nee bɛ agyapadeɛ+ ne mɔ ɛkɛ na bɛrale Dwuda nee Gyɛlusalɛm, ɔluakɛ Gyɛlɔbowam nee ɔ mra ne mɔ yele bɛ ali kɛ bɛmmasonle kɛ Gyihova ɛsɔfoma bieko.+ 15  Akee Gyɛlɔbowam kpale ɔdaye mumua ne ye ɛsɔfoma ɔmaanle ɛzonlenlɛ ɛleka+ ne mɔ* nee sunsum ɛtane ne mɔ mɔɔ bɛzɔho mbɔnkye*+ yɛɛ nlankɛ mralɛ nyinli ne mɔ mɔɔ ɔyɛle la.+ 16  Na bɛdabɛ mɔɔ bɛvi Yizilayɛ mbusua ne mɔ amuala anu mɔɔ ɔwɔ bɛ ahonle nu kɛ bɛkpondɛ Gyihova, Yizilayɛ Nyamenle ne la lile bɛ nzi hɔle Gyɛlusalɛm hɔbɔle afɔle maanle Gyihova, bɛ nenyia mɔ Nyamenle ne.+ 17  Wɔ ɛvolɛ nsa anu, bɛmianle Dwuda belemgbunlililɛ ne anu na bɛboale Sɔlɔmɔn ara Rilihɔbowam, ɔluakɛ bɛluale Devidi nee Sɔlɔmɔn adenle ne anu too ɛvolɛ nsa. 18  Akee Rilihɔbowam gyale Meehalate mɔɔ le Devidi ara nrenyia Gyɛlimɔto ara raalɛ la nee Abeheli mɔɔ le Gyɛsi ara nrenyia Ɛlayabe ara raalɛ la.+ 19  Nzinlii bɛwole* mralɛ mrenyia: Gyiyɛhye, Hyɛmalaya yɛɛ Zeeham. 20  Yemɔ anzi, ɔgyale Meeyaka mɔɔ le Abesalɛm anlɔnra la.+ Nzinlii ɔ nee ye wole Abaegya,+ Atae, Zaeza yɛɛ Hyɛlomete. 21  Rilihɔbowam hulole Abesalɛm anlɔnra Meeyaka kpalɛ dɛlale ɔ ye mɔ nee ye nwewe* mɔɔ ɛha la amuala,+ ɔluakɛ ɔgyale mraalɛ 18 yɛɛ ye nwewe 60, na ɔwole mralɛ mrenyia 28 yɛɛ mralɛ mraalɛ 60. 22  Ɔti Rilihɔbowam kpale Meeyaka ara Abaegya kɛ ɔ mediema ne mɔ kpanyinli nee bɛ adekilevolɛ, ɔluakɛ ɛnee ɔkulo kɛ ɔsie ye belemgbunli. 23  Noko ɔvale nrɛlɛbɛ* ɔlile gyima na ɔmaanle ɔ mra ne mɔ bie hɔle* Dwuda nee Bɛngyaman azɛlɛ ne mɔ amuala azo, azuamgbole mɔɔ bɛlie nwolɛ bane la amuala azo,+ na ɔmaanle bɛ ninyɛne dɔɔnwo na ɔgyale mraalɛ dɔɔnwo ɔmaanle bɛ.

Ɔbodwɛkɛ

Hibulu aneɛ nu, “bɛkpa.”
Anzɛɛ “ɔliele bane wɔ.”
Hibulu aneɛ nu, “ɛleka mɔɔ wɔ anwuma.”
Hibulu aneɛ nu, “mbɔnkye ne mɔ.”
Ɛhye kile, Rilihɔbowam nee Meehalate.
Nea Gyn 22:24 ɔbdw.
Anzɛɛ “ndelebɛbo.”
Anzɛɛ “hɔdɛnlanle.”