Samoɛle Mɔɔ Limoa 8:1-22

  • Yizilayɛma kpondɛle belemgbunli (1-9)

  • Samoɛle bɔle menli ne kɔkɔ (10-18)

  • Gyihova liele dole nu kɛ ɔbamaa bɛ belemgbunli (19-22)

8  Mɔɔ Samoɛle yɛle ɛrelera la, ɔkpale ɔ mra mrenyia ne mɔ kɛ ndɛnebuavolɛma ɔmaanle Yizilayɛma.  Bɛfɛlɛ ɔ ra kpanyinli ne Dwowɛle yɛɛ bɛfɛlɛ mɔɔ tɔ zo nwiɔ la Abaegya,+ ɛnee bɛle ndɛnebuavolɛma wɔ Biyɛ-hyiba.  Noko ɔ mra ne mɔ anva ɔ gyakɛ; bɛkpondɛle nvasoɛ ɛtane,+ bɛliele belaebo+ na bɛbuale mgbɔvodɛne.+  Mekɛ guale nu la, Yizilayɛ mgbanyima kɔsɔɔti boɔboale bɛ nloa na bɛrale Samoɛle ɛkɛ wɔ Releema.  Bɛhanle bɛhilele ye kɛ: “Nea! Wɔyɛ ɛrelera, yɛɛ ɛ mra ne mɔ anva ɛ gyakɛ. Ɔti ye belemgbunli maa yɛ maa ɔbua yɛ ndɛne kɛ maanle maanle kɔsɔɔti mɔɔ ɛha la.”+  Noko Samoɛle anye anlie nwo* kɛ bɛhanle kɛ: “Maa yɛ belemgbunli maa ɔbua yɛ ndɛne” la. Akee Samoɛle zɛlɛle Gyihova,  na Gyihova zele Samoɛle kɛ: “Edwɛkɛ biala mɔɔ menli ne baha ahile wɔ la tie; ɔluakɛ tɛ ɛdawɔ a bɛkpo wɔ a, medame a bɛkpo me kɛ bɛ belemgbunli a.+  Bɛlɛyɛ mɔɔ bɛyɛle ɔvi kenle mɔɔ menyele bɛ menvile Yigyibiti too badwu ɛnɛ la; bɛkɔ zo bɛkpo me+ na bɛsonle nyamenle gyɛne,+ na zɔhane ala a bɛlɛyɛ bɛahile wɔ a.  Yemɔti tie bɛ. Noko ɔwɔ kɛ ɛbɔ bɛ kɔkɔ ɛsesebɛ; ka mɔɔ belemgbunli ne mɔɔ banlea bɛ nwo zo la banyia adenle ayɛ la kile bɛ.” 10  Ɔti Samoɛle hanle Gyihova edwɛkɛ ne amuala hilele menli mɔɔ ɛlɛkpondɛ belemgbunli la. 11  Ɔhanle kɛ: “Debie mɔɔ belemgbunli ne mɔɔ banlea bɛ nwo zo la banyia adenle ayɛ la ɛne:+ Ɔbava bɛ mra mrenyia+ yeagua ye ehwili nu+ na yeamaa bɛaha ye mgbɔnwɔ,+ na bie mɔ banriandi ali ye ehwili ne anyunlu. 12  Na ɔbakpa mgbanyima mɔɔ nea menli apenle apenle+ nee abulanlu abulanlu nwo zo la+ yeamaa ɔ nwo, na bie mɔ bɛavundu ye azɛlɛ,+ bie mɔ ade ye ma,+ na bie mɔ ayɛ ye akodeɛ nee ye ehwili nwo ninyɛne.+ 13  Ɔbamaa bɛ mra mraalɛ ayɛ ye nwole evuanlɛ, ado ye aleɛ na bɛado ye paano.+ 14  Ɔbalie bɛ ɛya, bɛ vanye egyinli nee bɛ ɔlivi mbaka mgbalɛ ne mɔ+ na yeava yeamaa ye sonvolɛma. 15  Ɔbalie bɛ ɛya nee bɛ vanye egyinli nu ninyɛne ngyɛnu bulu anu ko na yeava yeamaa ye suakunlu mgbanyima nee ye sonvolɛma. 16  Ɔbalie bɛ azonvolɛ mrenyia nee mraalɛ, bɛ nlankɛ mgbalɛ nee bɛ asoaso na yeava yeayɛ ye gyima.+ 17  Ɔbalie bɛ mboane ngyɛnu bulu anu ko,+ na bɛbayɛ ye sonvolɛma. 18  Mekɛ bara mɔɔ bɛ belemgbunli ne mɔɔ bɛnyia ye la ati bɛbazu a,+ noko Gyihova ɛnrɛdie bɛ wɔ mekɛ zɔhane.” 19  Noko menli ne andie mɔɔ Samoɛle hanle hilele bɛ la, na bɛhanle kɛ: “Kyɛkyɛ, yɛbɔ kpɔkɛ kɛ yɛkpondɛ belemgbunli mɔɔ banlea yɛ nwo zo la. 20  Akee yɛbayɛ kɛ maanle maanle kɔsɔɔti mɔɔ ɛha la, na yɛ belemgbunli ne babua yɛ ndɛne na yeali yɛ nyunlu yeaho yɛ konle yeamaa yɛ.” 21  Mɔɔ Samoɛle diele menli ne edwɛkɛ ne amuala la, ɔhanle ɔ muala ɔhilele Gyihova. 22  Gyihova zele Samoɛle kɛ: “Tie bɛ, na ye belemgbunli maa ɔnlea bɛ nwo zo.”+ Akee Samoɛle zele Yizilayɛma kɛ: “Bɛ nuhua ko biala ɛzia ɛhɔ ye sua zo.”

Ɔbodwɛkɛ

Hibulu aneɛ nu, “ɛnee ɔle ɛtane wɔ Samoɛle anye zo.”