Samoɛle Mɔɔ Limoa 7:1-17

  • Bɛvale Ɛlɛka ne bɛrale Keleate-gyialem (1)

  • Samoɛle dule bɛ folɛ kɛ: ‘Bɛzonle Gyihova angomekye’ (2-6)

  • Yizilayɛma lile konim wɔ Mezepa (7-14)

  • Samoɛle buale Yizilayɛ ndɛne (15-17)

7  Yemɔti menli mɔɔ wɔ Keleate-gyialem la ravale Gyihova Ɛlɛka ne hɔle Abenadabe mɔɔ de boka ne azo la sua nu,+ na bɛdele ɔ ra Ɛlieza anwo kɛ ɔnlea Gyihova Ɛlɛka ne azo.  Ɔvi kenle mɔɔ bɛvale Ɛlɛka ne bɛrale Keleate-gyialem la, ɛvolɛ 20 kpalɛ pɛle nu, na akee Yizilayɛma kɔsɔɔti bɔle ɔ bo kɛ bɛkpondɛ* Gyihova.+  Akee Samoɛle zele Yizilayɛma kɔsɔɔti kɛ: “Saa bɛfa bɛ ahonle muala bɛazia bɛara Gyihova ɛkɛ a,+ ɛnee bɛye adalɛ nyamenle ne mɔ+ nee Ahyetɔlɛte ananze ne mɔ+ bɛvi bɛ avinli na bɛva bɛ ahonle muala bɛmaa Gyihova na bɛzonle ɔ ngomekye,+ na ɔbalie bɛ yeavi Filisitiama asa anu.”+  Ɔti Yizilayɛma vuandinle Beeyale nee Ahyetɔlɛte ananze ne mɔ guale ye lɔ na bɛzonlenle Gyihova angomekye.+  Akee Samoɛle hanle kɛ: “Bɛboɔboa Yizilayɛma kɔsɔɔti anloa wɔ Mezepa,+ na mebazɛlɛ Gyihova meamaa bɛ.”+  Ɔti bɛboɔboale bɛ nloa wɔ Mezepa, na bɛzale nzule bɛwolale bɛguale aze wɔ Gyihova anyunlu na bɛhyele ɛhɔne kenle ko ne.+ Bɛhanle ye wɔ ɛkɛ ne kɛ: “Yɛyɛ ɛtane yɛtia Gyihova.”+ Na Samoɛle bɔle ɔ bo buale Yizilayɛma ndɛne+ wɔ Mezepa.  Mɔɔ Filisitiama dele kɛ Yizilayɛma ɛboɔboa bɛ nloa wɔ Mezepa la, Filisitia arelemgbunli ne mɔ+ hɔle Yizilayɛma anwo zo. Mekɛ mɔɔ Yizilayɛma dele ɛhye la, Filisitiama ati, bɛ ahonle dule.  Yemɔti Yizilayɛma zele Samoɛle kɛ: “Mmagyakyi kɛ ɛbazɛlɛ Gyihova yɛ Nyamenle ne kɛ ɔboa yɛ+ na ɔlie yɛ ɔvi Filisitiama asa anu.”  Akee Samoɛle vale boaneralɛ mɔɔ tɛno nyɛfonlɛ la na ɔbɔle ɛyelalɛ afɔle+ ɔmaanle Gyihova; na Samoɛle zɛlɛle Gyihova kɛ ɔboa Yizilayɛma na Gyihova buale ye.+ 10  Mekɛ mɔɔ Samoɛle ɛlɛbɔ ɛyelalɛ afɔle ne la, Filisitiama vale konle doale Yizilayɛma. Akee Gyihova maanle ezule hulule kpole+ guale Filisitiama anwo zo na ɔmaanle bɛ nye zo danle bɛ,+ na Yizilayɛma lile bɛ nwo zo konim.+ 11  Ɔti Yizilayɛma vi Mezepa vindele na bɛvoanle Filisitiama ndinlizo, na bɛhunle bɛ too bɛhɔdwule Bɛte-kaa nyiakɛ. 12  Akee Samoɛle vale bolɛ+ kpɔnlanle Mezepa nee Gyɛhyena avinli na ɔvɛlɛle ye Ɛbɛnizɛ,* na ɔhanle kɛ: “Gyihova ɛboa yɛ too badwu ɛnɛ.”+ 13  Yemɔti bɛlile Filisitiama anwo zo konim, na bɛamba Yizilayɛma azɛlɛ ne azo bieko;+ na Gyihova asa hɔle zo homonle Filisitiama anwo zo wɔ Samoɛle ngoane mekɛ kɔsɔɔti anu.+ 14  Eza Filisitiama vale azua mɔɔ bɛliele bɛvile Yizilayɛma ɛkɛ ne la maanle bɛ, ɔvi Ɛkelɔn kɔdwu Gate, na Yizilayɛma asa hanle bɛ azɛlɛ ne mɔɔ wɔ Filisitiama asa anu la bieko. Anzodwolɛ eza rale Yizilayɛma nee Amɔlema avinli.+ 15  Samoɛle hɔle zo buale Yizilayɛma ndɛne wɔ ye ngoane mekɛ kɔsɔɔti anu.+ 16  Ɛvolɛ biala ɔkɔkpɔla Bɛtɛle,+ Gelegale+ nee Mezepa,+ na ɔbuale Yizilayɛma ndɛne wɔ ɛleka ɛhye mɔ amuala. 17  Noko ɛnee ɔsia ɔkɔ Releema,+ ɔluakɛ ye sua wɔ ɛkɛ na ɛkɛ ne noko a ɔbuale Yizilayɛma ndɛne a. Ɔzile afɔlemokyea wɔ ɛkɛ ne ɔmaanle Gyihova.+

Ɔbodwɛkɛ

Anzɛɛ “bɛsu bɛavɛlɛ.”
Ɔ bo kile “Moalɛ Bolɛ.”