Samoɛle Mɔɔ Limoa 5:1-12

  • Bɛva Ɛlɛka ne bɛhɔ Filisitia azɛlɛ zo (1-12)

    • Bɛbɔ Deegɔn anyiemgba (1-5)

    • Bɛdeanle Filisitiama (6-12)

5  Mekɛ mɔɔ Filisitiama vale nɔhalɛ Nyamenle ne Ɛlɛka ne la,+ bɛ nee ye vi Ɛbɛnizɛ hɔle Ahyedɔdo.  Filisitiama vale nɔhalɛ Nyamenle ne Ɛlɛka ne hɔle Deegɔn sua* ne anu na bɛvale bɛziele Deegɔn+ anwo ɛkɛ.  Aleɛ hyenle mɔɔ Ahyedɔdoma dwazole nwonlomɔ mangyee ne la, ɛnee Deegɔn ɛdɔ aze na ɔ nyunlu butu aze wɔ Gyihova Ɛlɛka ne anyunlu.+ Ɔti bɛvale Deegɔn bɛziele ɔ bo zo ne bieko.+  Aleɛ hyenle bieko mɔɔ bɛdwazole nwonlomɔ mangyee ne la, ɛnee Deegɔn ɛdɔ aze na ɔ nyunlu butu aze wɔ Gyihova Ɛlɛka ne anyunlu. Ɛnee Deegɔn ati nee ɔ sa amu nwiɔ ɛbubu ɛgua na ɔla anlenkɛ ne anloa. Ye ɛleka ne mɔɔ ɔle kɛ fɛlɛ la* ala a hale a.  Ɛhye ati a badwu ɛnɛ, Deegɔn ɛsɔfoma nee menli kɔsɔɔti mɔɔ kɔ Deegɔn sua ne anu wɔ Ahyedɔdo la ɛntia Deegɔn anlenkɛ ne anloa la.  Gyihova asa yɛle ɛlomboɛ wɔ Ahyedɔdoma anwo zo, na ɔmaanle ekoko fifile Ahyedɔdo nee azua mɔɔ zuozua ye la azo amra.+  Mɔɔ Ahyedɔdoma nwunle mɔɔ ɛlɛkɔ zo la, bɛhanle kɛ: “Bɛmmamaa Yizilayɛ Nyamenle ne Ɛlɛka ne ka yɛ nwo ɛke, ɔluakɛ yedua yɛ nee yɛ nyamenle Deegɔn kakɛ.”  Ɔti bɛzoanle bɛmaanle bɛhɔboɔboale Filisitia arelemgbunli kɔsɔɔti anloa na bɛbizale bɛ kɛ: “Kɛ yɛyɛ Yizilayɛ Nyamenle ne Ɛlɛka ne ɛ?” Bɛbuale kɛ: “Bɛmaa bɛva Yizilayɛ Nyamenle ne Ɛlɛka ne bɛhɔ Gate.”+ Yemɔti bɛvale Yizilayɛ Nyamenle ne Ɛlɛka ne bɛhɔle ɛkɛ.  Mɔɔ bɛvale bɛhɔle ɛkɛ ne la, Gyihova duale sua ne azo amra kakɛ, ɔmaanle ɛzulolɛ kpole hanle bɛ. Ɔmaanle ekoko fifile sua ne azo amra kɔsɔɔti, ɔvi ngakula kɔdwu mgbanyinli nwo zo.+ 10  Ɔti bɛvale nɔhalɛ Nyamenle ne Ɛlɛka ne bɛhɔle Ɛkelɔn,+ nɔhalɛ Nyamenle ne Ɛlɛka ne dwule Ɛkelɔn ala la, Ɛkelɔnoma bɔle ɔ bo deɛdeanle nu kɛ: “Bɛva Yizilayɛ Nyamenle ne Ɛlɛka ne bɛrɛlɛ yɛ kɛ ɔrahu yɛdayɛ nee yɛ menli ne!”+ 11  Akee bɛzoanle bɛmaanle bɛhɔboɔboale Filisitia arelemgbunli kɔsɔɔti anloa na bɛhanle kɛ: “Bɛva Yizilayɛ Nyamenle ne Ɛlɛka ne bɛhɔ; bɛmaa ɔzia ɔhɔ ɔ bo zo ne amaa yɛdayɛ nee yɛ menli ne anwu.” Ɔluakɛ ɛnee sua ne azo amra sulo kɛ bɛbawu; ɛnee nɔhalɛ Nyamenle ne asa ɛyɛ ɛlomboɛ wɔ ɛkɛ,+ 12  na menli mɔɔ anwu la, ekoko fifile bɛ. Ɔti sua ne azo amra ɛzunlɛ dwule anwuma lɔ.

Ɔbodwɛkɛ

Anzɛɛ “ɛzonlenlɛsua.”
Hibulu aneɛ nu, “Deegɔn ne.”