Samoɛle Mɔɔ Limoa 30:1-31

  • Amalɛkema rawuale ninyɛne wɔ Zekelage na bɛdonle senle wɔ zolɛ (1-6)

    • Devidi nyianle anwosesebɛ vile Nyamenle ɛkɛ (6)

  • Devidi lile Amalɛkema anwo zo konim (7-31)

    • Devidi liele menli mɔɔ bɛhyele bɛ la (18, 19)

    • Devidi lile ninyɛne mɔɔ bɛkɛnyia ye konle nu la anwo mɛla (23, 24)

30  Mɔɔ Devidi nee ye menli ne rale Zekelage+ wɔ kenle nsa ne azo la, ɛnee Amalɛkema+ ɛrava nyiakɛ afoa nu* nee Zekelage, na bɛhɔle Zekelage anwo zo na bɛdole senle wɔ zolɛ.  Bɛhyele mraalɛ+ nee menli kɔsɔɔti mɔɔ wɔ zolɛ la, ɔvi ekyi kɔdwu kpole nwo zo na bɛ nee bɛ hɔle. Bɛangu awie biala, emomu bɛhyele bɛ na bɛ nee bɛ hɔle.  Mɔɔ Devidi nee ye menli ne rale sua ne azo la, bɛnwunle kɛ bɛyela sua ne na bɛhye bɛ ye mɔ nee bɛ mra mrenyia nee bɛ mra mraalɛ bɛhɔ.  Ɔti Devidi nee ye menli ne zunle kpole kpalɛ hɔkpulale kɛ ɛnee bɛnlɛ anwosesebɛ mɔɔ bɛfa bɛazu bieko a.  Bɛhyele Devidi aye mɔ nwiɔ ne, Ahenoam mɔɔ vi Gyɛzeɛle nee Abegɛle mɔɔ Kamɛlenli Neebale gyale ye bie la noko bɛhɔle.+  Ɔgyegyele Devidi kpalɛ, ɔluakɛ ɛnee menli ne ɛlɛka kɛ bɛsi ye awolɛ, ɔboalekɛ ɛnee menli ne kɔsɔɔti* ɛva ɛya kpole kɛ bɛhye bɛ mra mrenyia nee bɛ mra mraalɛ bɛhɔ la. Noko Devidi kpondɛle anwosesebɛ vile Gyihova ye Nyamenle ne ɛkɛ.+  Akee Devidi zele Ahemɛlɛke ara ɛsɔfo Abayata kɛ:+ “Mesɛlɛ wɔ, fa yifɔdo ne bɛla ɛke.”+ Ɔti Abayata vale yifɔdo ne rɛlɛle Devidi.  Devidi bizale Gyihova kɛ:+ “Mendoa sogyama nwule ekpunli ne ɔ? Mebado bɛ ɔ?” Na Nyamenle zele ye kɛ: “Toa bɛ ɔluakɛ ɛbahɔdo bɛ na wɔalie bɛ nee debie biala.”+  Ɛkɛ ne ala, Devidi nee mrenyia 600 ne+ mɔɔ nee ye lua la zile nu, na bɛhɔle too bɛhɔdwule Bisɔ Azudenle* ne anloa, na menli ne bie mɔ hale ɛkɛ. 10  Devidi nee menli 400 voanle sogyama ne ndinlizo, noko menli 200 ne mɔɔ ɛnee ɛvɛ somaa la ati bɛangola bɛampɛ Bisɔ Azudenle ne la hale ɛkɛ.+ 11  Bɛnwunle Yigyibiti nrenyia bie wɔ kpɔkɛ ne anu na bɛvale ye bɛhɔmaanle Devidi. Bɛmaanle ye aleɛ ɔlile na bɛmaanle ye nzule ɔnlonle, 12  eza bɛmaanle ye keeki mɔɔ bɛva feege ma bɛyɛ la ekyi yɛɛ vanye ma welera nwiɔ. Mɔɔ ɔlile ɔwiele la, ɔnyianle anwosesebɛ,* ɔluakɛ ɛnee ɔtɛdile aleɛ anzɛɛ ɔtɛnonle nzule biala too kenle nsa, alehyenlɛ nee aledwolɛ. 13  Na Devidi bizale ye kɛ: “Ɛ menle a le nwane, yɛɛ ɛvi ni?” Na ɔbuale kɛ: “Mele Yigyibitinli, mele Amalɛkenli bie akɛlɛ, noko ɛnɛ le kenle nsa me nwo dole me yɛɛ me menle gyakyile me ɛke a. 14  Yɛhɔle Kɛlɛtema+ nyiakɛ nee Dwuda azɛlɛ zo yɛɛ Keelɛbe nyiakɛ,+ na yɛdole senle wɔ Zekelage sua ne azo.” 15  Na Devidi bizale ye kɛ: “Ɛbali me nyunlu wɔahɔhile me sogyama nwule ekpunli ɛhye ɔ?” Ɔbuale kɛ: “Saa ɛfa Nyamenle ɛka ndane ɛkile me kɛ ɛnrɛhu me yɛɛ ɛnrɛye me ɛnrɛwula me menle asa anu a, mebali ɛ nyunlu meahɔhile wɔ sogyama nwule ekpunli ɛhye mɔ.” 16  Yemɔti ɔlile ɔ nyunlu ɔ nee ye hɔle ɛleka mɔɔ menli ne ɛde ɛkponde wɔ azɛlɛ ne azo amuala, na kɛmɔ bɛsesale ninyɛne dɔɔnwo bɛvile Filisitiama nee Dwuda azɛlɛ zo la ati, bɛlɛdi bɛanlo na bɛalie bɛ nye la. 17  Akee Devidi hunle bɛ ɔvi aleɛbahye ɔhɔkpulale nɔsolɛ nu; bɛ nuhua ko bɔbɔ anga+ kɛ menli 400 mɔɔ dɛnlanle afunlumu zo nriandile la ala. 18  Devidi liele debie biala mɔɔ Amalɛkema vale la,+ na Devidi liele ɔ ye mɔ nwiɔ ne. 19  Bɛliele bɛ debie biala, ɔvi mɔɔ le ekyi kɔdwu mɔɔ le kpole la anwo zo. Bɛ sa hanle bɛ mra mrenyia nee bɛ mra mraalɛ yɛɛ bɛ ninyɛne mɔɔ bɛvale la;+ Devidi liele debie biala mɔɔ bɛvale la. 20  Ɔti Devidi vale mboane nee nlankɛ kɔsɔɔti, na ye menli ne mɔ hanle bɛ lile bɛ nyɛmoa ɛdeɛ ne mɔ anyunlu. Bɛhanle kɛ: “Ninyɛne mɔɔ Devidi ɛnyia ye konle nu la ɛne.” 21  Akee Devidi rale menli 200 ne mɔɔ ɛnee bɛvɛ somaa la ati bɛangola bɛ nee Devidi angɔ na bɛhale Bisɔ Azudenle ne anloa la anwo ɛkɛ,+ na bɛrayiale Devidi nee menli mɔɔ nee ye lua la. Mɔɔ Devidi dwule bɛ nwo ɛkɛ ne la, ɔbizale kɛzi bɛ nwo de la. 22  Noko sonlatane nee sonlamgbane biala mɔɔ wɔ menli mɔɔ Devidi nee bɛ hɔle la avinli la hanle kɛ: “Kɛmɔ bɛ nee yɛ angɔ la ati, yɛnrɛmaa bɛ ninyɛne mɔɔ yɛhɔliele la bie, bɛ nuhua ko biala ɛva ɔ ye nee ɔ mra ala na ɔhɔ.” 23  Noko Devidi hanle kɛ: “Me mediema, bɛmmayɛ ɛhye wɔ debie mɔɔ Gyihova ɛva ɛmaa yɛ la anwo. Ɔbɔle yɛ nwo bane na ɔvale sogyama nwule ekpunli ne mɔɔ rale yɛ nwo zo la ɔwulale yɛ sa nu.+ 24  Nwane a nee bɛ bayɛ adwenle wɔ ɛhye anwo a? Mɔɔ hɔle konle ne bie la kyɛfoa nee mɔɔ dɛnlanle ninyɛne ne anwo la kyɛfoa bayɛ ko.+ Awie biala banyia bie.”+ 25  Na ɔvi kenle zɔhane mɔɔ kɔ la, ɔmaanle ɔyɛle ngyehyɛleɛ nee mɛla wɔ Yizilayɛ too badwu ɛnɛ. 26  Mɔɔ Devidi ziale rale Zekelage la, ɔvale ninyɛne mɔɔ bɛnyianle la bie ɔhɔmaanle ɔ gɔnwo mɔ Dwuda mgbanyima na ɔhanle kɛ: “Ninyɛne mɔɔ yɛnyianle yɛvile Gyihova agbɔvolɛ ɛkɛ la, bɛdabɛ noko bɛ ahyɛlɛdeɛ* ɛne.” 27  Ɔvale bie ɔhɔmaanle bɛdabɛ mɔɔ bɛwɔ Bɛtɛle,+ bɛdabɛ mɔɔ bɛwɔ Releemɔto mɔɔ wɔ Nɛgɛbe* nehane la, bɛdabɛ mɔɔ bɛwɔ Gyatɛ,+ 28  bɛdabɛ mɔɔ bɛwɔ Alowɛ, bɛdabɛ mɔɔ bɛwɔ Sefemɔto, bɛdabɛ mɔɔ bɛwɔ Ɛhyetɛmowa,+ 29  bɛdabɛ mɔɔ bɛwɔ Relekale, bɛdabɛ mɔɔ bɛwɔ Gyilameyɛlema azua ne mɔ azo,+ bɛdabɛ bɛwɔ Kinama azua ne mɔ azo,+ 30  bɛdabɛ mɔɔ bɛwɔ Hɔɔma,+ bɛdabɛ mɔɔ bɛwɔ Bolahyan, bɛdabɛ mɔɔ bɛwɔ Etake, 31  bɛdabɛ mɔɔ bɛwɔ Hibulɔn,+ yɛɛ ɛleka kɔsɔɔti mɔɔ ɛnee Devidi nee ye menli ne ta kɔ ɛkɛ ne la.

Ɔbodwɛkɛ

Anzɛɛ “Nɛgɛbe.”
Anzɛɛ “menli ne kɔsɔɔti ɛkɛla.”
Anzɛɛ “Bɔnza.” Nea Edwɛkɛbohilelɛ.
Hibulu aneɛ nu, “ye sunsum ziale rale ye nu.”
Hibulu aneɛ nu, “nyilalɛ.”
Anzɛɛ “nyiakɛ.”