Samoɛle Mɔɔ Limoa 28:1-25

  • Sɔɔlo hɔle awie mɔɔ tendɛ sunsum ɛtane nloa zo anwo ɛkɛ wɔ Ɛn-dɔɔ (1-25)

28  Mekɛ zɔhane, Filisitiama boɔboale bɛ ɛlɔne ne anloa kɛ bɛ nee Yizilayɛma kaho.+ Ɔti Ekehye zele Devidi kɛ: “Ɛze ye wienyi kɛ ɛdawɔ nee wɔ menli ne nee me bahɔ konle.”+  Na Devidi zele Ekehye kɛ: “Ɛze mɔɔ wɔ sonvolɛ bayɛ la wienyi.” Ekehye zele Devidi kɛ: “Ɛhye ati a mebakpa wɔ kɛ me sinzavolɛ dahuu la.”*+  Ɛnee Samoɛle ɛwu, na Yizilayɛma kɔsɔɔti ɛzu ye na bɛzie ye wɔ ye sua zo Releema.+ Ɛnee Sɔɔlo ɛdu menli mɔɔ tendɛ sunsum ɛtane nloa zo nee bɛdabɛ mɔɔ bɛka mɔɔ bazi kenle bie la ɛvi azɛlɛ ne azo.+  Filisitiama boɔboale bɛ nloa na bɛhɔyɛle azokoɛleɛ wɔ Hyunɛm.+ Ɔti Sɔɔlo boɔboale Yizilayɛma kɔsɔɔti anloa na bɛhɔyɛle azokoɛleɛ wɔ Gelebowa.+  Mɔɔ Sɔɔlo nwunle Filisitiama ɛlɔne ne la, ɛzulolɛ hanle ye na ye ahonle dule kpole.+  Sɔɔlo bizale nwolɛ edwɛkɛ wɔ Gyihova ɛkɛ ɛdeɛ,+ noko Gyihova anlua ɛlalɛ anzɛɛ Yulem+ anzɛɛ ngapezoma ne anwo zo ambua ye ɛlɛ.  Akee Sɔɔlo zele ye azonvolɛ ne mɔ kɛ: “Bɛkpondɛ raalɛ mɔɔ tendɛ sunsum ɛtane nloa zo la+ bɛmaa me na mengɔnwu ye.” Ye azonvolɛ ne mɔ buale kɛ: “Nea! Raalɛ bie mɔɔ tendɛ sunsum ɛtane nloa zo la wɔ Ɛn-dɔɔ.”+  Yemɔti Sɔɔlo hakyile ɔ nwo na ɔwulale adɛladeɛ gyɛne na ɔ nee ye menli ne nwiɔ hɔle raalɛ ne ɛkɛ nɔɔzo. Ɔhanle kɛ: “Mesɛlɛ wɔ, dua tumi mɔɔ maa ɛkola ɛ nee sunsum ɛtane tendɛ la azo ka mɔɔ bazi kenle bie la kile me+ na fɛlɛ ahenle mɔɔ mebahile wɔ la maa me.”  Noko raalɛ ne zele ye kɛ: “Ɛdawɔ ɛze mɔɔ Sɔɔlo yɛle la, kɛzi ɔdule menli mɔɔ tendɛ sunsum ɛtane nloa zo nee bɛdabɛ mɔɔ bɛka kenle bie edwɛkɛ la ɔvile azɛlɛ ne azo la.+ Ɛnee duzu ati a ɛlɛbɔ mɔdenle kɛ ɛsua me* ɛhane wɔamaa bɛahu me ɛ?”+ 10  Sɔɔlo vale Gyihova hanle ndane hilele ye kɛ: “Mekɛ ala mɔɔ Gyihova de aze la, ɛnrɛli fɔlɛ biala wɔ edwɛkɛ ɛhye anu!” 11  Na raalɛ ne bizale ye kɛ: “Nwane a menvɛlɛ ye memaa wɔ a?” Ɔbuale kɛ: “Fɛlɛ Samoɛle maa me.” 12  Mɔɔ raalɛ ne nwunle “Samoɛle”* la,+ ɔmaanle ɔ ne zo ɔdeanle nu na ɔzele Sɔɔlo kɛ: “Duzu ati a wɔbɛlɛbɛla me a? Ɛdawɔ Sɔɔlo ɔ!” 13  Belemgbunli ne zele ye kɛ: “Mmasulo, duzu a ɛnwu ye a?” Raalɛ ne buale Sɔɔlo kɛ: “Menwu awie mɔɔ le kɛ nyamenle bie la kɛ ɔvi azɛlɛ ne anu ɔlɛfinde.” 14  Ɛkɛ ne ala ɔbizale raalɛ ne kɛ: “Kɛzi ɔde ɛ?” na ɔhanle kɛ: “Nrenyia kpanyinli bie a ɛlɛfinde ara a, na ɔwula tɛladeɛ tendenle mɔɔ ɛnlɛ ɔ sa la.”+ Na Sɔɔlo nwunle kɛ “Samoɛle” ɔ, na ɔhotole ɔbutule ɔ nyunlu aze na ɔlale azɛlɛ nwo. 15  Akee “Samoɛle” zele Sɔɔlo kɛ: “Duzu ati a wɔmaa bɛvɛlɛ me na wɔgyegye me ɛ?” Sɔɔlo buale kɛ: “Edwɛkɛ kpole ɛdo me. Filisitiama nee me ɛlɛko, na Nyamenle ɛhwe ɔ nwo ɛvi me nwo yɛɛ ɔnlua ngapezoma anzɛɛ ɛlalɛ zo ɔmbua me edwɛkɛ bieko;+ ɛhye ati a melɛfɛlɛ wɔ kɛ ɛmaa menwu mɔɔ ɔwɔ kɛ meyɛ la.”+ 16  Na “Samoɛle” hanle kɛ: “Kɛkala mɔɔ Gyihova ɛhwe ɔ nwo ɛvi ɛ nwo+ na yeyɛ wɔ kpɔvolɛ la, duzu ati a ɛbiza me debie a? 17  Gyihova bayɛ mɔɔ ɔluale me nwo zo ɔhanle ɔdole ɛkɛ ne la: Gyihova balie belemgbunlililɛ ne avi ɛ sa nu na yeava yeamaa ɛ gɔnwo nrenyia, Devidi.+ 18  Kɛmɔ wɔandie Gyihova ane na wɔanli ye ɛya wuluwulu ne mɔɔ tia Amalɛkema la anwo gyima la ati a+ Gyihova ɛlɛfa ɛhye ayɛ wɔ ɛnɛ a. 19  Eza Gyihova bava Yizilayɛma nee ɛdawɔ awula Filisitiama asa anu,+ na ɛhyema,+ ɛdawɔ nee ɛ mra mrenyia ne mɔ+ baraboka me nwo. Gyihova bava Yizilayɛ ɛlɔne ne noko awula Filisitiama asa anu.”+ 20  Ɛkɛ ne ala, Sɔɔlo pɛle finle na ye ahonle dule kpole ɔlua “Samoɛle” edwɛkɛ ne ati. Ɛnee anwosesebɛ biala ɛnle ye nu ɔluakɛ ɛnee ɔtɛdile aleɛ alehyenlɛ nee aledwolɛ ne anu amuala. 21  Mɔɔ raalɛ ne rale Sɔɔlo anwo ɛkɛ na ɔnwunle kɛ edwɛkɛ ne ɛgyegye ye kpole la, ɔzele ye kɛ: “Nea, wɔ sonvolɛ ɛdie mɔɔ ɛhanle la na meva me ngoane medo esiane nu*+ meyɛ mɔɔ ɛhanle kɛ menyɛ la. 22  Ɔti mesɛlɛ wɔ, tie mɔɔ wɔ sonvolɛ lɛ ye ka la. Maa menva paano ekyi menzie ɛ nyunlu na di amaa wɔanyia anwosesebɛ wɔahɔ.” 23  Noko ɔkpole na ɔhanle kɛ: “Menrɛli debie.” Na ye azonvolɛ ne mɔ nee raalɛ ne hɔle zo bodole ye. Akee ɔdiele bɛ na ɔvi azɛlɛ ne anwo ɔdwazole ɔdɛnlanle ɛkpa ne azo. 24  Ɛnee raalɛ ne lɛ ɛnlankɛ ralɛ bie mɔɔ ɛhye la wɔ sua nu ɛkɛ, ɔti ndɛndɛ ne ala ɔhunle ye* na ɔvale esamo ɔfetele ɔdonle paano mɔɔ mgbɔvonle ɛnle nu la. 25  Ɔvale ɔmaanle Sɔɔlo nee ye azonvolɛ ne mɔ na bɛlile. Akee bɛdwazole na bɛvile ɛkɛ ne nɔe ne.+

Ɔbodwɛkɛ

Hibulu aneɛ nu, “ɛbazinza me ti mekɛ biala la.”
Anzɛɛ “me ɛkɛla.”
Anzɛɛ “nwunle debie mɔɔ zɔho Samoɛle.”
Anzɛɛ “me ɛkɛla medo me sa nu.”
Anzɛɛ “ɔvale ɔbɔle afɔle.”