Samoɛle Mɔɔ Limoa 27:1-12

  • Filisitiama vale Zekelage maanle Devidi (1-12)

27  Na Devidi hanle ye wɔ ɔ ti anu kɛ: “Kenle ko dedee Sɔɔlo asa baha me na yeahu me. Mɔɔ ɔle kpalɛ kɛ meyɛ la a le kɛ mebanriandi meahɔ+ Filisitiama azɛlɛ zo; akee Sɔɔlo bagyakyi me ɛkpondɛlɛ wɔ Yizilayɛ azɛlɛ ne kɔsɔɔti azo+ na meanriandi meavi ɔ sa nu.”  Ɔti Devidi dwazole na ɔ nee mrenyia 600 ne+ mɔɔ nee ye lua la hɔle Meeyɔko ara Ekehye,+ Gate belemgbunli ne ɛkɛ.  Devidi dɛnlanle Ekehye anwo ɛkɛ wɔ Gate, ɔdaye nee ye menli ne, sonla ko biala nee ye sua nu amra. Ɛnee Devidi aye mɔ nwiɔ ne, Ahenoam+ mɔɔ vi Gyɛzeɛle nee Kamɛlenli Abegɛle+ mɔɔ Neebale gyale ye bie la boka ɔ nwo.  Mɔɔ bɛbɔle Sɔɔlo amaneɛ kɛ Devidi ɛnriandi ɛhɔ Gate la, ɔgyakyile ye ɛkpondɛlɛ.+  Akee Devidi zele Ekehye kɛ: “Saa menyia ɛ nyunlu ɛlolɛ a, maa bɛmaa me ɛleka wɔ namunamu ne mɔ ko azo, amaa meadɛnla ɛkɛ. Duzu ati a ɔwɔ kɛ wɔ sonvolɛ nee wɔ tɛnla dehelɛ suakpole ye azo ɛ?”  Yemɔti kenle zɔhane, Ekehye vale Zekelage+ maanle ye. Ɛhye ati a Zekelage ɛyɛ Dwuda arelemgbunli ɛdeɛ badwu ɛnɛ la.  Mekɛ tendenle* mɔɔ Devidi vale dɛnlanle Filisitiama namule ne anu la le ɛvolɛ ko siane nna.+  Ɛnee Devidi nee ye menli ne kɔ Gɛhyɛma,+ Gɛzaema yɛɛ Amalɛkema+ anwo zo, ɔluakɛ ɛnee bɛde azɛlɛ ne mɔɔ ɔvi Tilam ɔkɔ Hyɔɔ+ too ɔkɔdwu Yigyibiti azɛlɛ zo la azo.  Saa Devidi kɔ azɛlɛ ne azo a, ɔngyakyi nrenyia anzɛɛ raalɛ ɔmmaa ɔndɛnla ngoane nu,+ noko ɔfa mboane, nlankɛ, asoaso, afunlumu yɛɛ adɛladeɛ na ɔsia ɔkɔ Ekehye anwo lɔ. 10  Akee Ekehye biza ye kɛ: “Nienwu a bɛhɔle ye ɛnɛ a?” Devidi bua kɛ: “Yɛhɔle Dwuda nyiakɛ”*+ anzɛɛ “Gyilameyɛlema nyiakɛ”+ anzɛɛ “Kinama nyiakɛ.”+ 11  Devidi angyakyi nrenyia anzɛɛ raalɛ ko bɔbɔ anyewɔzo kɛ ɔfa ye yeara Gate, na ɔhanle kɛ: “Amaa bɛanga yɛ nwo edwɛkɛ bɛangile bɛ kɛ, ‘Mɔɔ Devidi yɛle la ɛne.’” (Mekɛ tendenle mɔɔ ɔdɛnlanle Filisitiama namule ne anu la, ɛbɛla mɔɔ ɔbɔle la ɛne.) 12  Yemɔti Ekehye liele Devidi lile na ɔhanle ye ɔ ti anu kɛ: ‘Kɛkala ye menli Yizilayɛma kyi ye bɔkɔɔ, ɔti ɔbayɛ me sonvolɛ dahuu.’

Ɔbodwɛkɛ

Hibulu aneɛ nu, “Kenle dodo.”
Anzɛɛ “Nɛgɛbe.”