Samoɛle Mɔɔ Limoa 26:1-25

  • Devidi eza angu Sɔɔlo (1-25)

    • Devidi bule ahenle mɔɔ Gyihova ɛkpokpa ye la (11)

26  Mekɛ guale nu la, Zefema+ rale Sɔɔlo anwo ɛkɛ wɔ Gebeya+ rahanle kɛ: “Asoo Devidi ɛnvea Hakaela boka ne mɔɔ nee Gyehyaemɔn* anye bɔ zolɛ la azo ɔ?”+  Ɔti Sɔɔlo dwazole hɔle Zefe fienemgbole ne anu, ɔvale menli 3,000 mɔɔ bɛkpa bɛ bɛvi Yizilayɛma anu la ɔbokale ɔ nwo kɛ bɛkakpondɛ Devidi wɔ Zefe fienemgbole ne anu.+  Sɔɔlo yɛle ye azokoɛleɛ wɔ Hakaela boka ne mɔɔ nee Gyehyaemɔn anye bɔ zolɛ wɔ adenle ne anloa la azo. Ɛnee Devidi wɔ fienemgbole ne anu na ɔdele kɛ Sɔɔlo ɛra fienemgbole ne anu kɛ ɔbakpondɛ ye.  Yemɔti Devidi zoanle menli kɛ bɛhɔnlea kɛ Sɔɔlo ɛra ɛkɛ ne amgba a.  Nzinlii, Devidi hɔle ɛleka mɔɔ Sɔɔlo ɛyɛ ye azokoɛleɛ ne la, na Devidi nwunle ɛleka mɔɔ Sɔɔlo nee Nɛɛ ara Abenɛɛ,+ mɔɔ le ye ɛlɔnema kpanyinli la ɛla la; ɛnee Sɔɔlo la azokoɛleɛ ne avinli na sogyama ne amuala ɛbɔ ɔ nwo mgbɔlɔka ɛyia.  Akee Devidi zele Hɛtenli+ Ahemɛlɛke nee Zɛluaya+ ara Abehyae,+ Dwowabe adiema nrenyia ne kɛ: “Nwane a nee me bahɔ Sɔɔlo azokoɛleɛ ɛkɛ ne a?” Abehyae buale kɛ: “Me nee wɔ bahɔ.”  Ɔti Devidi nee Abehyae hɔle sogyama ne anwo ɛkɛ ne nɔe ne, na bɛnwunle kɛ Sɔɔlo ɛla wɔ azokoɛleɛ ne avinli na ye atwɛ ne kpɔnla ɔ ti sɔlɔ; ɛnee Abenɛɛ nee sogyama ne ɛdeda ɛbɔ ɔ nwo mgbɔlɔka ɛyia.  Na Abehyae zele Devidi kɛ: “Nyamenle ɛva wɔ kpɔvolɛ ɛwula ɛ sa nu ɛnɛ.+ Yemɔti mesɛlɛ wɔ, maa menva atwɛ ne menwɔ ye wɔ azɛlɛ ne anwo kokye, ɔngyia kɛ metia ye zo nwiɔ.”  Noko Devidi zele Abehyae kɛ: “Mmafa ɛ sa ɛka ye, ɔluakɛ nwane a kɛhola kɛva ɔ sa kɛha awie mɔɔ Gyihova ɛkpokpa ye la+ na ɔkɛva ɔ nwo ɔkɛli a?”+ 10  Devidi hanle doale zo kɛ: “Mekɛ ala mɔ Gyihova de aze la, Gyihova mumua ne babɔ ye ahu ye,+ anzɛɛ ye mekɛ badwu+ na yeawu anzɛɛ ɔbahɔ konle na yeawu.+ 11  Ɔnrɛzi ɛlɛ wɔ Gyihova anye zo kɛ mekɛva me sa mekɛha awie mɔɔ Gyihova ɛkpokpa ye la!+ Yemɔti mesɛlɛ wɔ, fa atwɛ ne nee nzule buakɛ ne mɔɔ gyi ɔ ti sɔlɔ la, na maa yɛhɔ.” 12  Ɔti Devidi vale atwɛ ne nee nzule buakɛ ne mɔɔ gyi Sɔɔlo ati sɔlɔ la na bɛhɔle. Awie biala annwu+ bɛ anzɛɛ ande bɛ nganeɛ anzɛɛ andwazo, ɔluakɛ ɛnee bɛ muala bɛlafe, ɔboalekɛ ɛnee Gyihova ɛye nafelɛ botoo ɛdo bɛ nwo. 13  Akee Devidi pɛle nu hɔle foa ko nehane na ɔhɔgyinlanle boka ne azo wɔ moamoa, ɛnee bɛ avinli twe. 14  Devidi deanle nu vɛlɛle sogyama ne nee Nɛɛ ara Abenɛɛ+ kɛ: “Abenɛɛ, bua me ɛ?” Abenɛɛ buale kɛ: “Ɛdawɔ nwane a ɛlɛtea nu wɔavɛlɛ belemgbunli la?” 15  Devidi zele Abenɛɛ kɛ: “Ɛnle nrenyia ɔ? Na nwane a le kɛ ɛdawɔ wɔ Yizilayɛ a? Ɛnee duzu ati a wɔanzinza ɛ menle belemgbunli ne a? Ɔluakɛ sogyama ne mɔ ko rale ɛkɛ ne kɛ ɔbahu ɛ menle belemgbunli ne.+ 16  Mɔɔ wɔyɛ la ɛnle kpalɛ. Mekɛ ala mɔɔ Gyihova de aze la, ɛfɛta ewule, ɔluakɛ wɔanzinza ɛ menle mɔɔ Gyihova ɛkpokpa ye la.+ Akee to ɛ nye nea! Belemgbunli ne atwɛ ne nee ye nzule buakɛ ne+ mɔɔ gyi ɔ ti sɔlɔ la wɔ ni?” 17  Akee Sɔɔlo dele Devidi ane na ɔhanle kɛ: “Me ra Devidi, ɛ ne a mete la ɔ?”+ Devidi buale kɛ: “Me menle belemgbunli, me ne ɔ.” 18  Ɔvale ɔzɔle zo kɛ: “Duzu ati a me menle ɛlɛfoa ye sonvolɛ a,+ duzu a meyɛ a, yɛɛ duzu a medi nwolɛ fɔlɛ a?+ 19  Me menle belemgbunli, tie wɔ sonvolɛ edwɛkɛ ɛhye: Saa Gyihova a ɛlɛmaa wɔadwazo wɔatia me a, maa ɔlie* me ma afɔlebɔdeɛ ne. Na saa menli a ɛlɛmaa wɔayɛ zɔ a,+ ɛnee bɛbɔ munzule wɔ Gyihova anyunlu, ɔluakɛ ɛnɛ, bɛvoa me bɛvi Gyihova agyapadeɛ+ ne anwo na bɛha kɛ, ‘Kɔzonle nyamenle gyɛne!’ 20  Noko mmamaa me mogya twi gua aze wɔ ɛleka mɔɔ ɛmbikye Gyihova anyunlu la, ɔluakɛ Yizilayɛ belemgbunli ne ɛvinde kɛ ɔkakpondɛ ɛzozoa kokye,+ kɛ asɛɛ ɔdoa kandalɛ wɔ awoka zo la.” 21  Na Sɔɔlo hanle kɛ: “Meyɛ ɛtane.+ Me ra Devidi, sia bɛla ɔluakɛ menrɛyɛ wɔ ɛtane bieko, ɔboalekɛ ɛnɛ kenle ye, wɔbu me ngoane* kɛ ɔsonle bolɛ.+ Meli ngoaseasɛm yɛɛ meyɛ nvonleɛ kpole.” 22  Devidi buale kɛ: “Belemgbunli atwɛ ne ɛne. Maa mgbavolɛ ne mɔ ko ɛralie. 23  Gyihova a badua awie biala tenleneyɛlɛ+ nee ye nɔhalɛlilɛ nwo kakɛ a, ɔluakɛ ɛnɛ Gyihova vale wɔ wulale me sa nu noko meangulo kɛ mekɛva me sa mekɛha awie mɔɔ Gyihova ɛkpokpa ye la.+ 24  Nea! Kɛ mɔɔ ɛnee wɔ ngoane* sonle bolɛ maa me ɛnɛ kenle ye la, zɔhane ala a me ngoane* ɛzonle bolɛ wɔ Gyihova anye zo na ɔlie me ɔvi ngyegyelɛ kɔsɔɔti anu a.”+ 25  Sɔɔlo buale Devidi kɛ: “Me ra Devidi, nyilalɛ ɛha wɔ. Ɛbayɛ ninyɛne mgbole amgba na ɛbali konim wɔ nu.”+ Akee Devidi hɔle ye ɛleka bie na Sɔɔlo ziale hɔle sua nu.+

Ɔbodwɛkɛ

Anzɛɛ ɔkola ɔkile, “ɛsɛlɛ ne; fienemgbole ne.”
Hibulu aneɛ nu, “ɔvunvoa.”
Anzɛɛ “me ɛkɛla.”
Anzɛɛ “ɛkɛla.”
Anzɛɛ “ɛkɛla.”