Samoɛle Mɔɔ Limoa 25:1-44

  • Samoɛle ewule (1)

  • Neebale andie Devidi menli ne (2-13)

  • Abegɛle yɛle nrɛlɛbɛ debie (14-35)

    • Gyihova bakyekye ye “wɔ ngoane baage ne anu” (29)

  • Gyihova bɔle Neebale koasea hunle ye (36-38)

  • Abegɛle rayɛle Devidi aye (39-44)

25  Mekɛ guale nu la Samoɛle wule;+ na Yizilayɛma kɔsɔɔti boɔboale bɛ nloa razunle ye na bɛziele ye wɔ ye sua nu wɔ Releema.+ Akee Devidi dwazole hɔle Peelan fienemgbole ne anu.  Ɛnee nrenyia bie wɔ Meeyɔn+ mɔɔ ye gyima wɔ Kamɛle.*+ Ɔle sukoavolɛ kpole kpalɛ; ɛnee ɔlɛ mboane 3,000 nee mbɔnkye 1,000 na ɛnee ɔlɛpepɛ ye mboane nwo enrinli wɔ Kamɛle.  Bɛfɛlɛ nrenyia ne Neebale,+ yɛɛ bɛfɛlɛ ɔ ye Abegɛle.+ Raalɛ ne le nrɛlɛbɛvolɛ yɛɛ ɔ nwo yɛ fɛ, noko ɔ hu mɔɔ vi Keelɛbe+ abusua nu la edwɛkɛ yɛ se yɛɛ ɔnlɛ subane.+  Devidi dele ye wɔ fienemgbole ne anu kɛ, Neebale ɛlɛpepɛ ye mboane nwo enrinli.  Ɔti Devidi zoanle mgbavolɛ bulu wɔ ɔ nwo ɛkɛ, na Devidi zele mgbavolɛ ne mɔ kɛ: “Bɛhɔ Kamɛle, na saa bɛdwu Neebale anwo lɔ a, bɛbiza kɛzi ɔ nwo de la wɔ me duma nu.  Akee bɛha kɛ, ‘Anzodwolɛ ɛha wɔ nee wɔ sua nu amra nee debie biala mɔɔ ɛlɛ la na nyi kyɛ.  Kɛkala mede kɛ ɛlɛpepɛ wɔ mboane nwo enrinli. Mekɛ mɔɔ wɔ mboaneneavolɛma ne wɔ yɛ nwo ɛkɛ la, yɛanyɛ bɛ ɛtane+ yɛɛ mekɛ kɔsɔɔti mɔɔ bɛwɔ Kamɛle la, bɛannwu kɛ bɛ debie minlinle.  Biza wɔ mgbavolɛ ne mɔ na bɛbaha bɛahile wɔ. Maa me mgbavolɛ ne mɔ ɛnyia ɛ nyunlu ɛlolɛ ɔluakɛ yɛra anyelielɛ mekɛ* nu. Mesɛlɛ wɔ, maa wɔ sonvolɛma nee ɛ ra Devidi debie biala mɔɔ ɛ sa kɛdɔ zo la.’”+  Yemɔti Devidi mgbavolɛ ne mɔ hɔhanle ɛhye amuala hilele Neebale wɔ Devidi duma nu. Mɔɔ bɛwiele la, 10  Neebale buale Devidi azonvolɛ ne mɔ kɛ: “Devidi a le nwane, yɛɛ Gyɛsi ara ne a le nwane? Kenlensa ye azonvolɛ dɔɔnwo ɛlɛnriandi avi bɛ menle mɔ anwo.+ 11  Menva me paano nee me nzule nee me nane mɔɔ mehu ye memaa me menli mɔɔ pepɛ me mboane nwo enrinli la memaa menli mɔɔ menze ɛleka mɔɔ bɛvi la ɔ?” 12  Ɔti Devidi mgbavolɛ ne mɔ ziale hɔhanle edwɛkɛ ɛhye mɔ kɔsɔɔti hilele ye. 13  Ɛkɛ ne ala Devidi zele ye menli ne kɛ: “Awie biala ɛva ye konle dadeɛ ɛzia ɔ nwo!”+ Ɔti bɛ muala bɛvale bɛ konle dadeɛ bɛziale bɛ nwo na Devidi noko vale ye konle dadeɛ ɛdeɛ ziale ɔ nwo, na mrenyia kɛyɛ 400 nee Devidi hɔle, yɛɛ mrenyia 200 dɛnlanle ninyɛne ne anwo. 14  Na azonvolɛ ne mɔ ko hɔbɔle Neebale aye Abegɛle amaneɛ kɛ: “Nea! Devidi zoanle menli maanle bɛvile fienemgbole ne anu bɛrabizale yɛ menle akpɔkɛ nu noko ɔdeɛdeanle bɛ nu ɔbɔle bɛ aholoba.+ 15  Menli ɛhye mɔ yɛle yɛ boɛ. Bɛanyɛ yɛ ɛtane, yɛɛ mekɛ kɔsɔɔti mɔɔ yɛ nee bɛ wɔ kpɔkɛ ne anu la yɛ debie ko bɔbɔ amminli.+ 16  Bɛyɛle kɛ bane la bɛbɛngale yɛ nwo bɛyiale alehyenlɛ nee aledwolɛ wɔ mekɛ kɔsɔɔti mɔɔ yɛ nee bɛ wɔ ɛkɛ yɛlɛnea yɛ mboane ne mɔ la. 17  Kɛkala si mɔɔ ɛbayɛ la anwo kpɔkɛ, ɔluakɛ ɛhye bamaa munzule ado yɛ menle nee ye sua nu amra kɔsɔɔti,+ yɛɛ ɔle sonlamgbane*+ la ati awie ɛnga ye edwɛkɛ.” 18  Ɔti ndɛndɛ ne ala Abegɛle+ vale paano 200, nwanye mbuakɛ mgbole nwiɔ, mboane nnu mɔɔ bɛhu bɛ, abɛlɛ ngyehye siya ɛzuzudeɛ* nnu, vanye ma welera 100, yɛɛ keeki mɔɔ bɛva feege ma bɛyɛ la 200, na ɔvale ɔ muala ɔguale asoaso ne mɔ anwo zo.+ 19  Akee ɔzele ye azonvolɛ ne mɔ kɛ: “Bɛlimoa me nyunlu na mebali bɛ nzi.” Noko yeanga ɛhwee yeangile ɔ hu Neebale. 20  Mekɛ mɔɔ ɔde asoaso ne azo ɔlɛkɔ la, boka ne ammaa Devidi nee ye menli ne mɔ mɔɔ ɛlɛba la annwu ye, na ɔ nee bɛ yiale. 21  Ɛnee Devidi ɛlɛka kɛ: “Membɔle debie biala mɔɔ sonla ɛhye lɛ la anwo bane mgbane wɔ fienemgbole ne anu. Ye debie ko bɔbɔ amminli,+ noko yeva ɛtane yedua kpalɛ mɔɔ menyɛle la kakɛ.+ 22  Saa ɔkadwu nwonlomɔ na memaa ye mrenyia* ne mɔ ko bɔbɔ ka a, Nyamenle ɛli Devidi kpɔvolɛma nzenralɛ na ɔgua bɛ bie zo.” 23  Mɔɔ Abegɛle nwunle Devidi ala la, ɔvi asoaso ne azo ɔdwule aze ndɛndɛ na ɔbutule Devidi anyunlu ɛkɛ na ɔbɔle ɔ ti aze. 24  Akee ɔdule ɔdɔle ɔ gyakɛ anu na ɔhanle kɛ: “Me menle, fa somolɛ ne bɔ me; maa wɔ sonvolɛ bɛlɛra ye ɛdendɛ ɛhile wɔ, na tie wɔ sonvolɛ bɛlɛra edwɛkɛ. 25  Mesɛlɛ wɔ, mmamaa me menle dwenle Neebale sonlamgbane ɛhye anwo,+ ɔluakɛ ɔle kɛ mɔɔ ye duma kile la. Bɛfɛlɛ ye Neebale,* na koasea wɔ ɔ nwo. Noko mame, wɔ sonvolɛ bɛlɛra, meannwu mgbavolɛ ne mɔ mɔɔ me menle zoanle bɛ la. 26  Ɔti me menle, mekɛ ala mɔɔ Gyihova de aze yɛɛ mekɛ ala mɔɔ ɛde aze* la, Gyihova a yeammaa+ wɔanli mogya nwo fɔlɛ+ na wɔanva ɛ sa wɔanli nzenralɛ* a. Maa wɔ kpɔvolɛma nee menli mɔɔ kulo kɛ bɛyɛ me menle ɛtane la ɛyɛ kɛ Neebale la. 27  Maa bɛva ahyɛlɛdeɛ ɛhye+ mɔɔ wɔ sonvolɛ bɛlɛra ɛva ɛrɛlɛ me menle la bɛmaa mgbavolɛ ne mɔ mɔɔ li me menle anzi la.+ 28  Mesɛlɛ wɔ, fa wɔ sonvolɛ bɛlɛra ɛtane kyɛ ye, ɔluakɛ kɛ ɔde ye biala la, Gyihova bamaa me menle abusua ne ahyɛ,+ ɔboalekɛ me menle ɛlɛko Gyihova konle,+ yɛɛ bɛtɛnwunle ɛtane biala wɔ ɛ nwo wɔ wɔ mekɛ kɔsɔɔti anu.+ 29  Saa awie dwazo toa wɔ kɛ ɔku wɔ* a, Gyihova wɔ Nyamenle ne bakyekye me menle ngoane* gyɛlɛɛnye wɔ ngoane baage ne anu, noko wɔ kpɔvolɛma ngoane* ɛdeɛ, ɔbavuandi ye yeado ye lɔ kɛ bolɛ mɔɔ bɛva totoabɔ bɛdo* la. 30  Na saa Gyihova yɛ ninyɛne mgbalɛ kɔsɔɔti mɔɔ yebɔ nwolɛ ɛwɔkɛ la maa me menle na ɔkpa wɔ kɛ adekilevolɛ wɔ Yizilayɛ a,+ 31  ɛnrɛli nyane anzɛɛ ɛnrɛnlu ɛ nwo wɔ wɔ ahonle nu kɛ wɔha mogya wɔgua mgbane na me menle ɛmaa ɔ sa ɛli nzenralɛ* la.+ Saa Gyihova maa ɔwie me menle boɛ a, kakye wɔ sonvolɛ bɛlɛra ye.” 32  Na Devidi zele Abegɛle kɛ: “Ayɛlɛyelɛ ɛha Gyihova, Yizilayɛ Nyamenle ne mɔɔ zoanle wɔ kɛ ɛrayia me ɛnɛ la! 33  Nyilalɛ ɛha wɔ nrɛlɛbɛ ne! Nyilalɛ ɛha wɔ kɛ ɛnɛ kenle ye, wɔammaa meanli mogya nwo fɔlɛ+ na meanva me sa meanli nzenralɛ* la. 34  Mekɛ ala mɔɔ Gyihova, Yizilayɛ Nyamenle ne mɔɔ yeammaa meanyɛ wɔ ɛtane la+ de aze la, saa wɔambanyia me ndɛndɛ a,+ anrɛɛ ɔkadwu nwonlomɔ la, nrenyia* ko bɔbɔ ɛnrɛha Neebale sua nu.”+ 35  Akee Devidi liele ninyɛne mɔɔ ɔvale ɔrale la na ɔzele ye kɛ: “Kɔ sua nu anzodwolɛ nu. Nea, medie wɔ, na mebayɛ mɔɔ wɔbiza la.” 36  Nzinlii, Abegɛle ziale hɔle Neebale anwo lɔ, na ɛnee yedo ɔ nwo ɛkponle kɛ belemgbunli la wɔ ye sua nu, na ɛnee Neebale* anye ɛlie na yebo kpole kpalɛ. Abegɛle anga edwɛkɛ biala angile ye too aleɛ hyenle. 37  Nwonlomɔ ne mɔɔ Neebale anye zo tetele ye la, ɔ ye hanle edwɛkɛ ne hilele ye. Na ye ahonle yɛle kɛ sonla mɔɔ ɛwu la, na ɔlale ɛleka ko kɛ bolɛ la. 38  Kenle bulu anzi, Gyihova bɔle Neebale na ɔwule. 39  Mɔɔ Devidi dele kɛ Neebale ɛwu la, ɔhanle kɛ: “Ayɛlɛyelɛ ɛha Gyihova mɔɔ ɛli me edwɛkɛ+ na yeye Neebale aholoba ne yevi me nwo zo+ na yeammaa ye sonvolɛ anyɛ ɛtane la,+ na Gyihova ɛmaa Neebale ɛtane ne ɛragua ɔdaye ɔ ti zo!” Akee Devidi zoanle maanle bɛhɔbizale Abegɛle agyalɛ bɛmaanle ye. 40  Ɔti Devidi azonvolɛ ne mɔ hɔle Abegɛle anwo lɔ wɔ Kamɛle na bɛzele ye kɛ: “Devidi ɛzoa yɛ kɛ yɛrava wɔ yɛrɛla na ɛrayɛ ɔ ye.” 41  Ndɛndɛ ne ala ɔdwazole na ɔbutule ɔ nyunlu aze na ɔhanle kɛ: “Wɔ akɛlɛ ɛne, na mebayɛ sonvolɛ meawowo me menle azonvolɛ ne mɔ agyakɛ anwo.”+ 42  Akee Abegɛle+ dwazole ndɛndɛ na ɔdɛnlanle ye asoaso ne azo na ɔmaanle ye sonvolɛ mraalɛ nnu lile ɔ nzi; ɔ nee menli mɔɔ Devidi zoanle bɛ la hɔle na ɔhɔyɛle ɔ ye. 43  Ɛnee Devidi ɛgya Ahenoam+ mɔɔ vi Gyɛzeɛle la,+ na bɛ mu nwiɔ bɛrayɛle ɔ ye mɔ.+ 44  Noko ɛnee Sɔɔlo ɛva ɔ ra raalɛ Maekale+ mɔɔ le Devidi aye la ɛmaa Leeyehye ara Pɔletae+ mɔɔ vi Galem la ɛgya ye.

Ɔbodwɛkɛ

Ɔle sua wɔ Dwuda; tɛ yemɔ a le Kamɛle Boka ne.
Hibulu aneɛ nu, “kenle kpalɛ.”
Anzɛɛ “nvasoɛ ɛnle ɔ nwo zo.”
Siya ko le L 7.33. Nea Mok. B14.
Hibulu aneɛ nu, “memaa awie mɔɔ bie bane nwo la.” Ɔle Hibulu edwɛkɛ mɔɔ ɛngile ɛbulɛ ɛmmaa mrenyia.
Ɔ bo kile “Ɔnze Nrɛlɛbɛ; Koasea.”
Anzɛɛ “wɔ ɛkɛla de aze.”
Anzɛɛ “wɔanlie ngoane.”
Anzɛɛ “ɔkpondɛ wɔ ɛkɛla.”
Anzɛɛ “ɛkɛla.”
Anzɛɛ “ɛkɛla.”
Anzɛɛ “bolɛ mɔɔ vi totoabɔ tokule nu.”
Anzɛɛ “ɛlie ngoane.”
Anzɛɛ “meanlie ngoane.”
Hibulu aneɛ nu, “awie mɔɔ bie bane nwo la.” Ɔle Hibulu edwɛkɛ mɔɔ ɛngile ɛbulɛ ɛmmaa mrenyia.
Hibulu aneɛ nu, “Neebale ahonle.”