Samoɛle Mɔɔ Limoa 23:1-29

  • Devidi liele suakpole Kaela (1-12)

  • Sɔɔlo kpondɛle Devidi (13-15)

  • Dwɔnatan maanle Devidi anwosesebɛ (16-18)

  • Ɔhale ekyii na Sɔɔlo asa aha Devidi (19-29)

23  Mekɛ guale nu la, bɛhanle bɛhilele Devidi kɛ: “Filisitiama nee Kaelama+ ɛlɛko, na bɛlɛsesa aleɛ mɔɔ wɔ bɛ ma ɛwosolɛ ɛleka ne la.”  Ɔti Devidi bizale Gyihova kɛ:+ “Mengɔngu Filisitiama ɛhye mɔ ɔ?” Gyihova zele Devidi kɛ: “Kɔhu Filisitiama ne na die Kaela.”  Noko menli mɔɔ nee Devidi lua la zele ye kɛ: “Nea! Dwuda+ ɛke bɔbɔ mɔɔ yɛwɔ la yɛsulo, na akee yɛkɔ Kaela na yɛ nee Filisitiama ahɔho!”+  Ɔti Devidi bizale Gyihova bieko.+ Akee Gyihova buale ye kɛ: “Dwazo kɔ Kaela, ɔboalekɛ mebava Filisitiama meawula ɛ sa nu.”+  Yemɔti Devidi nee ye menli ne hɔle Kaela na ɔ nee Filisitiama hɔhonle; ɔvale bɛ nyɛmoa ne mɔ ɔhɔle na ɔhunle bɛ nuhua dɔɔnwo, na Devidi liele Kaelama.+  Mekɛ mɔɔ Ahemɛlɛke ara Abayata+ nriandi ahɔ Devidi anwo lɔ wɔ Kaela la, ɔvale yifɔdo ɔhɔle.  Bɛhanle bɛhilele Sɔɔlo kɛ: “Devidi ɛhɔ Kaela.” Akee Sɔɔlo hanle kɛ: “Nyamenle ɛye ye ɛmaa me,*+ ɔluakɛ yezua ɔ nwo ɛhane kɛ yehɔ suakpole mɔɔ nlenkɛ mgbole deda ɔ nloa na mbulalɛ gua bɛ nzi la azo.”  Ɔti Sɔɔlo vɛlɛle menli ne amuala kɛ bɛhɔ konle wɔ Kaela na bɛhɔbɛnga Devidi nee ye menli ne bɛyia.  Mɔɔ Devidi dele kɛ Sɔɔlo ɛlɛbɔ ɔ nwo kpɔkɛ ɛtane la, ɔzele ɛsɔfo Abayata kɛ: “Fa yifɔdo ne bɛla ɛke.”+ 10  Akee Devidi hanle kɛ: “O Gyihova, Yizilayɛ Nyamenle, wɔ sonvolɛ ɛde kɛ medame ti, Sɔɔlo kulo kɛ ɔba Kaela na ɔbasɛkye sua ye.+ 11  Asoo Kaela mgbanyima* baye me awula ɔ sa nu ɔ? Asoo Sɔɔlo bara ɛke kɛ mɔɔ wɔ sonvolɛ ɛde la ɔ? O Gyihova, Yizilayɛ Nyamenle, mesɛlɛ wɔ ka kile wɔ sonvolɛ.” Ɔti Gyihova zele ye kɛ: “Ɔbara ɛke.” 12  Devidi bizale kɛ: “Asoo Kaela mgbanyima baye me nee me menli ne awula Sɔɔlo asa anu ɔ?” Gyihova buale kɛ: “Bɛbaye bɛ bɛamaa bɛ.” 13  Ɛkɛ ne ala, Devidi nee ye menli ne mɔɔ bɛ dodo kɛyɛ 600 la+ dwazole na bɛvile Kaela bɛhɔle ɛleka biala mɔɔ bɛbahola la. Mɔɔ bɛhanle bɛhilele Sɔɔlo kɛ Devidi ɛnriandi ɛvi Kaela la, yeandoa ye. 14  Devidi hɔdɛnlanle fienemgbole ne anu ɛleka mɔɔ ye ɛhɔlɛ yɛ se la, wɔ Zefe+ fienemgbole ne awoka ne mɔ azo. Sɔɔlo hɔle zo kpondɛle ye,+ noko Gyihova anva ye anwula ɔ sa nu. 15  Mekɛ mɔɔ Devidi wɔ Zefe fienemgbole ne mɔɔ wɔ Hɔlɛhye anu la, ɛnee Devidi ze kɛ* Sɔɔlo ɛlɛkpondɛ ye ahu ye.* 16  Akee Sɔɔlo ara Dwɔnatan hɔle Devidi anwo lɔ wɔ Hɔlɛhye, na ɔboale ye ɔmaanle ɔnyianle anwosesebɛ* wɔ Gyihova anu.+ 17  Ɔzele ye kɛ: “Mmasulo, ɔluakɛ me papa Sɔɔlo ɛnrɛnwu wɔ; ɛbayɛ Yizilayɛ belemgbunli,+ na medame a mebayɛ awie mɔɔ tɔ zo nwiɔ a; na me papa Sɔɔlo noko ze ye zɔ.”+ 18  Akee menli nwiɔ ne yɛle ngyekyeleɛ+ wɔ Gyihova anyunlu; Devidi dɛnlanle Hɔlɛhye na Dwɔnatan ziale hɔle sua nu. 19  Nzinlii, Zefema hɔle Sɔɔlo anwo ɛkɛ wɔ Gebeya+ na bɛhanle kɛ: “Asoo Devidi ɛnvea yɛ nwo ɛke ala bie+ wɔ Hɔlɛhye+ ɛleka mɔɔ ye ɛhɔlɛ yɛ se la, wɔ Hakaela+ boka ne mɔɔ wɔ Gyehyaemɔn* nyiakɛ la azo* ɔ?+ 20  O belemgbunli, mekɛ biala mɔɔ ɛkulo* la, bɛla, na yɛbaye ye yɛawula belemgbunli asa anu.”+ 21  Yemɔti Sɔɔlo hanle kɛ: “Gyihova ɛyila bɛ, ɔluakɛ bɛze me anwunvɔne. 22  Mesɛlɛ bɛ, bɛbɔ mɔdenle bɛhɔkpondɛ ɛleka fɔɔnwo mɔɔ ɔwɔ nee ahenle mɔɔ nwunle ye wɔ ɛkɛ la, ɔluakɛ mede kɛ ɔ nye ɛde kpalɛ. 23  Bɛdo bɛ rɛle aze bɛhɔkpondɛ ɛleka mɔɔ ɔfeɛvea la amuala na bɛva nwolɛ daselɛ bɛrɛlɛ me. Akee me nee bɛ bahɔ, na saa ɔwɔ azɛlɛ ne azo a, mebakpondɛ ye wɔ Dwudama apenle apenle* ne kɔsɔɔti anu.” 24  Ɔti bɛvile ɛkɛ ne na bɛlimoale Sɔɔlo anyunlu bɛhɔle Zefe+ wɔ mekɛ mɔɔ Devidi nee ye menli ne wɔ Meeyɔn fienemgbole ne anu,+ wɔ Alaba ne+ mɔɔ wɔ Gyehyaemɔn nyiakɛ anu la. 25  Akee Sɔɔlo nee ye menli ne hɔle kɛ bɛkakpondɛ ye.+ Mekɛ mɔɔ bɛhanle bɛhilele Devidi la, ɛkɛ ne ala ɔhɔveale bodane ne anu+ na ɔdɛnlanle Meeyɔn fienemgbole ne anu. Mɔɔ Sɔɔlo dele ɛhye la, ɔdoale Devidi wɔ Meeyɔn fienemgbole ne anu. 26  Mɔɔ Sɔɔlo rale boka ne foa ko la, ɛnee Devidi nee ye menli ne noko wɔ boka ne foa ko. Mɔɔ Devidi ɛlɛyɛ ye ndɛndɛ anriandi+ Sɔɔlo la, ɛnee Sɔɔlo nee ye menli ne ɛlɛbikye Devidi nee ye menli ne kɛ bɛkye bɛ.+ 27  Noko bɛzoanle awie bɛmaanle ɔrabɔle Sɔɔlo amaneɛ kɛ: “Yɛ ye ndɛndɛ na bɛla, ɔluakɛ Filisitiama ɛrava azɛlɛ ne!” 28  Ɔti Sɔɔlo gyakyile Devidi+ ɛvoanlɛ na ɔziale ɔ nee Filisitiama hɔhonle. Ɛhye ati a bɛvɛlɛle ɛkɛ ne Avinlitetelɛ Bodane la. 29  Akee Devidi vile ɛkɛ ne na ɔhɔdɛnlanle ɛleka mɔɔ ye ɛhɔlɛ yɛ se la wɔ Ɛn-gidae.+

Ɔbodwɛkɛ

Hibulu aneɛ nu, “ɛdɔne ye ɛwula me sa nu.”
Anzɛɛ ɔkola ɔkile, “azɛlɛ menlema.”
Anzɛɛ ɔkola ɔkile, “sulo ɔluakɛ.”
Anzɛɛ “ɛlɛkpondɛ ye ɛkɛla.”
Hibulu aneɛ nu, “na ɔmianle ɔ sa nu.”
Anzɛɛ ɔkola ɔkile, “ɛsɛlɛ ne; fienemgbole ne.”
Hibulu aneɛ nu, “fema zo.”
Anzɛɛ “wɔ ɛkɛla kulo.”
Anzɛɛ “mbusua.”