Samoɛle Mɔɔ Limoa 22:1-23

  • Devidi hɔle Adulam nee Mezepɛ (1-5)

  • Sɔɔlo maanle bɛhunle Nɔɔbo ɛsɔfo ne mɔ (6-19)

  • Abayata nriandile (20-23)

22  Ɔti Devidi vi ɛkɛ ne+ nriandile hɔveale Adulam bolɛ bɔne ne anu.+ Mɔɔ ɔ mediema mrenyia ne mɔ nee ye papa abusua ne amuala dele nwolɛ bie la, bɛhɔle ɔ nwo ɛkɛ.  Na bɛdabɛ mɔɔ bɛwɔ anwongyelelɛ nu, bɛdabɛ mɔɔ bɛtua kakɛ anzɛɛ bɛ kunlu ɛndwo bɛ nwo* la rayiale ɔ nwo ɛkɛ na ɔyɛle bɛ kpanyinli. Ɛnee mrenyia kɛyɛ 400 a wɔ ɔ nwo ɛkɛ a.  Nzinlii, Devidi vile ɛkɛ ne hɔle Mezepɛ mɔɔ wɔ Mowabe la na ɔhɔhanle ɔhilele Mowabe belemgbunli ne kɛ:+ “Mesɛlɛ wɔ, maa me papa nee me mame ɛdɛnla ɛ nwo ɛke kɔkpula kɛ mebanwu mɔɔ Nyamenle bayɛ amaa me la.”  Ɔti ɔgyakyile bɛ wɔ Mowabe belemgbunli ne anwo ɛkɛ, na bɛdɛnlanle ɔ nwo ɛkɛ ne wɔ mekɛ kɔsɔɔti mɔɔ ɛnee Devidi wɔ ɛvealeka ne la.+  Mekɛ guale nu la, ngapezonli Gaade+ zele Devidi kɛ: “Mmatɛnla ɛvealeka ne bieko. Fi ɛkɛ ne kɔ Dwuda azɛlɛ zo.”+ Yemɔti Devidi vile ɛkɛ ne na ɔhɔle Hɛlɛte kpɔkɛ nu.  Sɔɔlo dele kɛ bɛnwu Devidi nee mrenyia mɔɔ nee ye lua la. Ɛnee Sɔɔlo de tamaleseke baka ne mɔɔ gyi boka bie azo la abo wɔ Gebeya,+ ɛnee ɔlɛ ye atwɛ ne ɔ sa nu, yɛɛ ye azonvolɛ ne mɔ kɔsɔɔti gyigyi ɔ nwo ɛkɛ.  Akee Sɔɔlo zele ye azonvolɛ mɔɔ gyigyi ɔ nwo ɛkɛ ne la kɛ: “Bɛmɛ Bɛngyamanema, mesɛlɛ bɛ, bɛdie. Asoo Gyɛsi+ ara ne noko bamaa bɛ muala ɛya nee vanye egyinli ɔ? Ɔbayɛ bɛ menli apenle apenle nee menli ɛya ɛya nwo zo mgbanyima ɔ?+  Bɛ muala bɛbɔ kpɔkɛ kɛ bɛko bɛatia me! Bɛ nuhua biala ambɔ me amaneɛ wɔ mekɛ mɔɔ me ra ne nee Gyɛsi ara ne yɛle ngyekyeleɛ la!+ Bɛ nuhua ko bɔbɔ andwenle me nwo anga angile me kɛ medame mumua ne me ra ɛmaa me sonvolɛ anwosesebɛ kɛ ɔbu ɔzia me kɛ mɔɔ ɔlɛyɛ ye ɛnɛ la.”  Akee Yidɔmenli Dowɛge+ mɔɔ nea Sɔɔlo azonvolɛ ne mɔ anwo zo la buale kɛ:+ “Menwunle kɛ Gyɛsi ara ne ɛra Ahaetɛbe+ ara Ahemɛlɛke anwo ɛkɛ wɔ Nɔɔbo. 10  Na ɔbizale debie wɔ Gyihova ɛkɛ ne ɔmaanle ye na ɔmaanle ye aleɛ. Ɔvale Filisitianli Golayate konle dadeɛ ne bɔbɔ ɔmaanle ye.”+ 11  Ɛkɛ ne ala belemgbunli ne zoanle kɛ bɛhɔvɛlɛ Ahaetɛbe ara ɛsɔfo Ahemɛlɛke nee ɛsɔfoma kɔsɔɔti mɔɔ bɛwɔ ye papa sua nu wɔ Nɔɔbo la bɛrɛla. Ɔti bɛ muala bɛrale belemgbunli ne ɛkɛ. 12  Akee Sɔɔlo hanle kɛ: “Wɔmɔ Ahaetɛbe ara, mesɛlɛ wɔ, tie!” Na ɔbuale kɛ: “Melɛtie, me menle.” 13  Sɔɔlo hanle kɛ: “Duzu ati a ɛdawɔ nee Gyɛsi ara ne ɛbɔ me nwo kpɔkɛ, bɔbɔ wɔmaa ye paano nee konle dadeɛ na wɔbiza debie wɔ Nyamenle ɛkɛ ne wɔmaa ye ɛ? Ɔdwazo ɔtia me na ɔbu ɔsia me kɛ mɔɔ ɔlɛyɛ ye ɛnɛ la.” 14  Na Ahemɛlɛke buale belemgbunli ne kɛ: “Wɔ azonvolɛ ne mɔ boni a di nɔhalɛ kɛ Devidi a?+ Ɔle belemgbunli ase+ nee wɔ sinzavolɛma kpanyinli yɛɛ bɛdi ye eni wɔ wɔ sua nu.+ 15  Asoo ɛnɛ a le mekɛ mɔ limoa mɔɔ mebiza Nyamenle ɛkɛ ne debie memaa ye ɔ?+ Menrɛyɛ mɔɔ ɛlɛka la ɛlɛ! Mmamaa belemgbunli fa ye sonvolɛ nee ye sonvolɛ papa sua nu amra amuala anwo ɛya, ɔluakɛ ɛnee wɔ sonvolɛ ɛnze ɛhye anwo ɛhwee.”+ 16  Noko belemgbunli ne hanle kɛ: “Ahemɛlɛke, ɛdawɔ nee wɔ papa sua nu amra kɔsɔɔti, ɔwɔ kɛ bɛku bɛ.”+ 17  Ɔti belemgbunli ne zele sinzavolɛma* mɔɔ gyigyi ɔ nwo ɛkɛ ne la kɛ: “Bɛhakyi bɛ nwo bɛhu Gyihova ɛsɔfo ne mɔ kɔsɔɔti, ɔluakɛ bɛva bɛ nwo bɛbɔnle Devidi! Ɛnee bɛze kɛ ɔlɛnriandi noko bɛambɔ me amaneɛ!” Noko belemgbunli ne azonvolɛ ne mɔ angulo kɛ bɛkɛva bɛ sa bɛkɛha Gyihova ɛsɔfo ne mɔ. 18  Akee belemgbunli ne zele Dowɛge kɛ:+ “Kakyi ɛ nwo na ku ɛsɔfo ne mɔ!” Ɛkɛ ne ala Yidɔmenli Dowɛge+ hɔhunle ɛsɔfo ne mɔ. Kenle zɔhane, ɔhunle mrenyia 85 mɔɔ ɛnee wula lenen yifɔdo la.+ 19  Eza ɔvale konle dadeɛ ɔhunle ɛsɔfo ne mɔ sua Nɔɔbo+ azo mrenyia nee mraalɛ, ngakula nee mbɔdɔma, nlankɛ, asoaso yɛɛ mboane kɔsɔɔti. 20  Noko Ahaetɛbe ara Ahemɛlɛke ara nrenyia ko mɔɔ bɛfɛlɛ ye Abayata+ la nriandile na ɔhɔlile Devidi anzi. 21  Abayata zele Devidi kɛ: “Sɔɔlo ɛhu Gyihova ɛsɔfo ne mɔ.” 22  Na Devidi zele Abayata kɛ: “Menwunle Yidɔmenli Dowɛge wɔ ɛkɛ ne kenle zɔhane la,+ ɛnee meze kɛ ɔbaha yeahile Sɔɔlo. Medi awie* biala mɔɔ bɛhu ye wɔ wɔ papa sua nu la anwo ɛzonle. 23  Tɛnla me nwo ɛke. Mmasulo, ɔluakɛ awie biala mɔɔ kulo kɛ ɔku wɔ* la, kulo kɛ ɔku me;* mebabɔ ɛ nwo bane.”+

Ɔbodwɛkɛ

Anzɛɛ “bɛ ɛkɛla ɛlɛdi nyane.”
Hibulu aneɛ nu, “ɛnriandilɛma.”
Anzɛɛ “ɛkɛla.”
Anzɛɛ “kpondɛ wɔ ɛkɛla.”
Anzɛɛ “kpondɛ me ɛkɛla.”