Samoɛle Mɔɔ Limoa 2:1-36

  • Hana asɔneyɛlɛ ne (1-11)

  • Yilae amra mrenyia nwiɔ ne ɛtane ne (12-26)

  • Gyihova ɛbua Yilae sua nu amra ndɛne (27-36)

2  Akee Hana yɛle asɔne kɛ: “Me ahonle di fɛlɛko wɔ Gyihova anu;+Gyihova ɛkpogya me mɛne* ne zo. Mebuke me nloa mebua me kpɔvolɛma,Ɔluakɛ medi fɛlɛko wɔ wɔ ngoanelielɛ nu.   Awie biala ɛnle nwuanzanwuanza kɛ Gyihova,Awie biala ɛnle ɛkɛ kɛ ɛdawɔ ala,+Yɛɛ bodane biala ɛnle kɛ yɛ Nyamenle ne la.+   Bɛmmafa anwomemaazo bɛtendɛ;Bɛmmamaa adubɛnwo edwɛkɛ biala fi bɛ nloa anu finde,Ɔluakɛ Gyihova le Nyamenle mɔɔ ze debie biala,+Na ɔdaye a ɔsuzu nyɛleɛ biala pɛpɛɛpɛ a.   Bɛbubu katakyiema ɛda ne mɔ,Noko bɛmaa menli mɔɔ ɛlɛtɔ aze la anwosesebɛ.+   Menli mɔɔ ako ɛyi la bali ɛkpa akpondɛ aleɛ,Noko ɛhɔne ɛngu menli mɔɔ ɛhɔne ku bɛ la bieko.+ Mota ɛwo mralɛ nsuu,+Noko raalɛ mɔɔ ɛwo mralɛ mrenyia dɔɔnwo la anwo ɛyɛ ye koonwu.*   Gyihova a ku a, yɛɛ ɔdaye a ɔbɔ ngoane nwo bane a;*Ɔmaa menli kɔ Nla* nu yɛɛ ɔmaa bɛdwazo.+   Gyihova maa bɛdi ehyia yɛɛ ɔmaa bɛnyia bɛ nwo;+Ɔbɛlɛ sonla aze yɛɛ ɔkpogya sonla zo.+   Ɔkpogya koahweabane zo ɔfi ndɛtɛlɛ nu;Ɔmaa ehyianli zo ɔfi nzonle* edukue nu,+Ɔmaa bɛ nee tumivolɛma tɛnla,Ɔmaa bɛtɛnla enililɛ ebia zo. Azɛlɛ ye adiabo ne mɔ le Gyihova ɛdeɛ.+Na ɔfa azɛlɛ ne ɔsie zolɛ.   Ɔbɔ ye nɔhavoma agyakɛ ɛdudulɛ nwo bane,+Noko bɛbamaa amumuyɛma ayɛ koonwu wɔ awozinli nu,+Ɔluakɛ tɛ anwosesebɛ a maa sonla di konim a.+ 10  Gyihova bazɛkye bɛdabɛ mɔɔ bɛlɛko bɛatia ye la,*+Ɔbahulu wɔ anwuma lɔ yeagua bɛ nwo zo.+ Gyihova babua azɛlɛ ye amuala ndɛne,+Ɔbamaa ye belemgbunli ne tumi+Na yeakpogya ahenle mɔɔ yekpokpa ye la mɛne* ne zo.”+ 11  Akee Ɛlekeena hɔle sua nu wɔ Releema, na kakula ne yɛle Gyihova sonvolɛ*+ wɔ ɛsɔfo Yilae anyunlu. 12  Ɛnee Yilae amra mrenyia ne mɔ le amumuyɛma;+ ɛnee bɛmbu Gyihova. 13  Ɛnee kɛ bɛyɛ ɛsɔfo ne mɔ kyɛfoa ne mɔɔ bɛdie bɛfi menli ne ɛkɛ la ɛne:+ Mekɛ biala mɔɔ awie ɛlɛbɔ afɔle la, ɛsɔfo ne sonvolɛ fa faka agye nsa ba wɔ mekɛ mɔɔ nane ne gyi senle zo la, 14  na ɔfa ɔwula kyɛnze, danesɛne asa nwiɔ, siase yɛɛ danesɛne asa ko ne anu. Debie biala mɔɔ faka ne kɛva la ɛsɔfo ne fa. Ɛhye a bɛvale bɛyɛle Yizilayɛma kɔsɔɔti mɔɔ ɛnee ba Hyaelo la a. 15  Eza kolaa na ahenle mɔɔ ɛlɛbɔ afɔle ne ayela ɛnlome ne la,+ ɛsɔfo ne sonvolɛ ba ɛkɛ na ɔka ɔkile ye kɛ: “Maa ɛsɔfo ne nane maa ɔdondo. Ɔnrɛlie mɔɔ wɔdo la, ɔkulo ye amolɛ ne ala.” 16  Saa ahenle ka kile ye kɛ: “Maa bɛlimoa bɛyela ɛnlome ne+ na wɔava mɔɔ ɛkulo* la” a, ɔka kɛ: “Kyɛkyɛ, fa maa me kɛkala; saa tɛ ye zɔ a, medame mebava bie!” 17  Yemɔti azonvolɛ ne mɔ ɛtane ne yɛle kpole wɔ Gyihova anyunlu,+ ɔluakɛ bɛambu Gyihova afɔlebɔdeɛ ne bie. 18  Ɛnee Samoɛle le kakula ɛdeɛ, noko ɛnee ɔwula lenen yifɔdo*+ na ɔsonle wɔ Gyihova anyunlu.+ 19  Ɛnee eza ye mame nwo tɛladeɛ ekyi mɔɔ ɛnlɛ ɔ sa la na ɔfa ɔbɛlɛ ye ɛvolɛ biala wɔ mekɛ mɔɔ ɔ nee ɔ hu kɛhɔ kɛ bɛkabɔ ɛvolɛ biala afɔle ne la.+ 20  Na Yilae yilale Ɛlekeena nee ɔ ye na ɔhanle kɛ: “Gyihova ɛmaa ɛ ye ɛwo kakula ɛva ɛzie ko ne mɔɔ yeva yemaa Gyihova la agyakɛ anu.”+ Akee bɛziale bɛhɔle sua nu. 21  Gyihova dole ɔ nye nleanle Hana, ɔti ɔnrenzɛle;+ na ɔwole mralɛ mrenyia nsa yɛɛ mralɛ mraalɛ nwiɔ ɔbokale nwo. Na kakula Samoɛle hɔle zo nyinle wɔ Gyihova anyunlu.+ 22  Ɛnee Yilae ɛyɛ kpanyinli, noko ɔdele debie biala mɔɔ ɔ mra ne mɔ ɛlɛfa ayɛ Yizilayɛma la kɔsɔɔti+ nee kɛzi bɛ nee mraalɛ mɔɔ sonle wɔ nyianu ɛdanlɛsua ne anuhɔlɛ da la.+ 23  Ɛnee ɔta ɔka ɔkile bɛ kɛ: “Duzu ati a bɛkɔ zo bɛyɛ ninyɛne ɛhye mɔ a? Bɛ nwo edwɛkɛ ɛtane ala a mete mefi menli ne amuala ɛkɛ a. 24  Kyɛkyɛ, me mra, edwɛkɛ mɔɔ mete kɛ bɛlɛkeha wɔ Gyihova menli ne avinli la ɛnle kpalɛ. 25  Saa sonla yɛ ɛtane tia ɔ gɔnwo a, awie bahola abodo Gyihova amaa ye;* noko saa sonla yɛ ɛtane tia Gyihova a,+ nwane a bahola azɛlɛ amaa ye a?” Noko bɛandie bɛ papa ane, ɔluakɛ ɛnee Gyihova ɛbɔ kpɔkɛ kɛ ɔku bɛ.+ 26  Mekɛ zɔhane, Samoɛle hɔle zo nyinle na ɔnyianle Gyihova nee menli nyunlu ɛlolɛ.+ 27  Nyamenle sonla bie rale Yilae ɛkɛ na ɔzele ye kɛ: “Edwɛkɛ mɔɔ Gyihova ɛha la ɛne: ‘Asoo meanye me nwo meangile wɔ papa abusua ne wɔ mekɛ mɔɔ bɛwɔ Yigyibiti na bɛle ngɛkɛlɛ wɔ Falo sua nu la?+ 28  Na menyele ye menvile Yizilayɛ mbusua kɔsɔɔti anu+ kɛ ɔyɛ me ɛsɔfo na ɔhɔ me afɔlemokyea ne anwo ɔhɔbɔ afɔle,+ ɔkpu ayilevuanlɛ* na ɔwula yifɔdo ne ɔgyinla me nyunlu; na menvale afɔle mɔɔ Yizilayɛma* fa senle bɔ la kɔsɔɔti memaanle wɔ nenyia abusua ne.+ 29  Duzu ati a bɛmɛ bɛmbu* me afɔlebɔdeɛ mɔɔ meha kɛ bɛva bɛrɛla me tɛnlabelɛ ɛkɛ ne la ɛ?+ Duzu ati a ɛdi ɛ mra ne mɔ eni ɛtɛla me na bɛdi ninyɛne mɔɔ me menli Yizilayɛma fa babɔ afɔle la anu kpalɛ ne bɛyɛ mbelane ɛ?+ 30  “‘Zɔhane ati, edwɛkɛ mɔɔ Gyihova Yizilayɛ Nyamenle ne ɛha la ɛne: “Nɔhalɛ nu, menganle kɛ wɔ abusua ne nee wɔ nenyia abusua ne balua me nyunlu dahuu.”+ Noko kɛkala Gyihova se: “Menrɛyɛ ye zɔ bieko, ɔluakɛ mebali menli mɔɔ di me eni la eni+ noko menli mɔɔ ɛmbu me la, menrɛva bɛ menrɛyɛ ɛhwee.” 31  Nea! Mekɛ ɛlɛba mɔɔ mebaye ɛdawɔ nee wɔ papa abusua ne anwosesebɛ* meavi ɛkɛ a, amaa wɔ abusua ne anu sonla ko bɔbɔ anyɛ ɛrelera.+ 32  Ninyɛne mgbalɛ kɔsɔɔti mɔɔ bɛyɛ bɛmaa Yizilayɛ la anu, ɛbanwu kpɔvolɛ bie wɔ me tɛnlabelɛ ɛkɛ,+ na bɛnrɛnwu ɛrelera bieko wɔ wɔ abusua ne anu ɛlɛ. 33  Wɔ abusua ne anu sonla mɔɔ menrɛye ye menrɛvi me afɔlemokyea ne anwo la bamaa ɛ nye azɛkye na wɔali nyane,* noko wɔ abusua ne anu amra dɔɔnwo badɔ dadeɛ nloa.+ 34  Mɔɔ bado ɛ mra mrenyia nwiɔ ne, Hɔfenae nee Fenɛhaze la bayɛ sɛkɛlɛneɛ amaa wɔ: Bɛ mu nwiɔ bɛbawu kenle ko.+ 35  Akee mebakpa ɛsɔfo mɔɔ di nɔhalɛ la.+ Ɔbayɛ mɔɔ me ahonle kulo la;* na mebazi sua mɔɔ wɔ ɛkɛ ne dahuu la meamaa ye na ɔbalua ahenle mɔɔ mekpokpa ye la anyunlu dahuu. 36  Awie biala mɔɔ kɛha wɔ abusua ne anu la barabɔ ɔ ti aze amaa ye alie ezukoa nee paano, na yeaha kɛ: “Mesɛlɛ wɔ, fa me wula ɛsɔfo gyima ne ko anu amaa meanyia aleɛ ekyi meali.”’”+

Ɔbodwɛkɛ

Anzɛɛ “me anwosesebɛ.” Nea Edwɛkɛbohilelɛ.
Hibulu aneɛ nu, “ɛnwoso.”
Anzɛɛ “ɔmaa bɛba ngoane nu a.”
Anzɛɛ “Sheol,” ɛhye kile, alesama nla. Nea Edwɛkɛbohilelɛ.
Anzɛɛ ɔkola ɔkile, “ɛwula.”
Anzɛɛ ɔkola ɔkile, “Ɛzulolɛ baha bɛdabɛ mɔɔ bɛlɛko bɛatia Gyihova la.”
Anzɛɛ “anwosesebɛ.” Nea Edwɛkɛbohilelɛ.
Anzɛɛ “na ɛnee kakula ne ɛlɛsonle Nyamenle.”
Anzɛɛ “mɔɔ wɔ ɛkɛla kulo.”
Hibulu aneɛ nu, “ɛnee ɔfa lenen yifɔdo ɔkye ɔ bo.”
Anzɛɛ ɔkola ɔkile, “Nyamenle baziezie edwɛkɛ ne amaa ye.”
Anzɛɛ ɔkola ɔkile, “ɔbɔ afɔle ɔmaa ɔkpu esike ɔhɔ anwuma.”
Hibulu aneɛ nu, “Yizilayɛ amra mrenyia.”
Hibulu aneɛ nu, “bɛfa bɛ gyakɛ bɛbɔ.”
Hibulu aneɛ nu, “asa.”
Anzɛɛ “na wɔ ɛkɛla nwo abubu ye.”
Anzɛɛ “mɔɔ wɔ me ahonle nee me ɛkɛla nu la.”