Samoɛle Mɔɔ Limoa 17:1-58

  • Devidi lile Golayate anwo zo konim (1-58)

    • Golayate golole Yizilayɛma anwo (8-10)

    • Devidi hanle kɛ ɔ nee ye baho (32-37)

    • Devidi honle wɔ Gyihova duma nu (45-47)

17  Na Filisitiama+ boɔboale bɛ ɛlɔne* ne anloa kɛ bɛkɔ konle. Bɛboɔboale bɛ nloa wɔ Soko,+ mɔɔ wɔ Dwuda la na bɛyɛle bɛ azokoɛleɛ wɔ Soko nee Azika avinli+ wɔ Yifɛse-damem.+  Sɔɔlo nee Yizilayɛma boɔboale bɛ nloa na bɛyɛle bɛ azokoɛleɛ wɔ Yilaa Bɔnza ne anu,+ na bɛhyehyɛle bɛ nwo kɛ bɛ nee Filisitiama kaho.  Ɛnee Filisitiama wɔ boka ko azo yɛɛ Yizilayɛma noko wɔ boka ko azo, na ɛnee bɔnza la bɛ avinli.  Akee katakyie bie vi Filisitiama azokoɛleɛ ne vindele; bɛfɛlɛ ye Golayate,+ ɔvi Gate,+ ye tendenle le kubit nsia yɛɛ waa ko.*  Ɔzo kɔbele kyɛlɛ yɛɛ ɔwula kɔbele konle tɛladeɛ.* Ye kɔbele konle tɛladeɛ ne ɛlomboɛ+ le hyikɛle 5,000.*  Ɔ gyakɛ enyinlike ne le kɔbele yɛɛ kɔbele atwɛ ezinra*+ gyela ɔ bati.  Ye atwɛ baka ne le kɛ menli mɔɔ nwo ndanlɛ la mgbunla,+ yɛɛ ye atwɛ ne ati bulalɛ ne ɛlomboɛ le hyikɛle 600;* ɛnee ye sonvolɛ ne mɔɔ lɛ ye enyinlike ne la li ɔ nyunlu.  Akee ɔragyinlanle ɛkɛ na ɔdeanle nu ɔvɛlɛle Yizilayɛma mɔɔ ɛra baho la+ na ɔzele bɛ kɛ: “Duzu ati a bɛhyehyɛ bɛ nwo kɛ bɛbaho a? Menle Filisitianli, yɛɛ bɛdabɛ noko bɛnle Sɔɔlo sonvolɛma ɔ? Bɛye sonla bɛrɛla na me nee ye ɛbɔ ye zo.  Saa ɔkola ɔ nee me ko na ɔku me a, yɛbayɛ bɛ sonvolɛma. Noko saa medi ɔ nwo zo konim na meku ye a, bɛbayɛ yɛ sonvolɛma na bɛazonle yɛ.” 10  Akee Filisitianli ne hanle kɛ: “Megolo Yizilayɛma mɔɔ ɛra baho la+ anwo ɛnɛ kenle ye. Bɛmaa me sonla, na me nee ye ɛho!” 11  Mɔɔ Sɔɔlo nee Yizilayɛma dele Filisitianli ne edwɛkɛ ne la, ɛzulolɛ hanle bɛ na bɛ ahonle dule kpole. 12  Devidi le Ɛfelatanli+ bie mɔɔ vi Bɛtelɛhɛm+ mɔɔ wɔ Dwuda, mɔɔ bɛfɛlɛ ye Gyɛsi+ la ara. Ɛnee ɔlɛ mralɛ mrenyia mɔtwɛ+ na Sɔɔlo mekɛ zo ɛnee yeyɛ ɛrelera. 13  Gyɛsi amra mrenyia mgbanyinli nsa ne doale Sɔɔlo hɔle konle ne.+ Ɔ mra nsa ne mɔɔ hɔle konle ne la, bɛfɛlɛ kpanyinli ne Ɛlayabe,+ mɔɔ tɔ zo nwiɔ la a le Abenadabe+ yɛɛ mɔɔ tɔ zo nsa la a le Hyamaa.+ 14  Devidi a le kakula kpalɛ a,+ na mgbanyinli nsa ne doale Sɔɔlo. 15  Ɛnee ɔyɛ a Devidi fi Sɔɔlo anwo ɛkɛ na ɔsia ɔkɔnea ye papa mboane ne mɔ+ wɔ Bɛtelɛhɛm. 16  Ɛnee Filisitianli ne bagyinla ɔ bo zo ne nwonlomɔ nee nɔsolɛ biala too kenle 40. 17  Akee Gyɛsi zele ɔ ra Devidi kɛ: “Mesɛlɛ wɔ, fa abɛlɛ ngyehye yifa* ko nee paano bulu ɛhye na yɛ ye ndɛndɛ fa kɔmaa ɛ mediema ne mɔ wɔ azokoɛleɛ nehane. 18  Na fa kyiisi* bulu ɛhye kɔmaa kpanyinli ne mɔɔ nea menli apenle nwo zo la; eza nea kɛzi ɛ mediema ne mɔ anwo de la na fa debie fi bɛ nwo lɔ bahile kɛ bɛte kpɔkɛ.” 19  Ɛnee bɛ nee Sɔɔlo yɛɛ Yizilayɛma kɔsɔɔti mɔɔ ɛha la wɔ Yilaa Bɔnza ne anu+ na bɛ nee Filisitiama ɛlɛko.+ 20  Ɔti Devidi dwazole nwonlomɔ mangyee ne na ɔvale mboane ne mɔ ɔwulale awie asa anu; akee ɔboɔboale ɔ nwo na ɔhɔle kɛ mɔɔ Gyɛsi hanle hilele ye la. Mɔɔ ɔdwule azokoɛleɛ ɛkɛ ne la, ɛnee ɛlɔne ne ɛlɛkɔ konle ne anloa na bɛlɛto konle edwɛne. 21  Yizilayɛma nee Filisitiama boɔboale bɛ ɛlɔne ne mɔ anloa bɛmaanle bɛ nye bɔle zolɛ. 22  Ɛkɛ ne ala Devidi gyakyile ye ninyɛne ne maanle ahenle mɔɔ nea ninyɛne ne azo la, na ɔnriandile ɔhɔle ɛlɔne ne anu. Mɔɔ ɔdwule ɛkɛ ne la, ɔbizale kɛzi ɔ mediema ne mɔ anwo de la.+ 23  Mɔɔ ɔ nee bɛ ɛlɛtendɛ la, katakyie ne mɔɔ bɛfɛlɛ ye Golayate,+ Filisitianli ne mɔɔ ɔvi Gate la rale. Ɔvi Filisitiama ɛlɔne ne anu ɔvindele, na ɔhanle edwɛkɛ ko ne ala mɔɔ ɔka ye dɛba la,+ na Devidi dele. 24  Mɔɔ Yizilayɛma kɔsɔɔti nwunle nrenyia ne la, bɛ ahonle dule na bɛnriandile.+ 25  Yizilayɛma ne hanle kɛ: “Bɛnwu nrenyia ɛhye mɔɔ ɛlɛba la? Ɔba yearagolo Yizilayɛma anwo.+ Awie mɔɔ kɛhu ye la belemgbunli ne bamaa ye anwonyia dɔɔnwo, ɔbava ɔ ra raalɛ yeamaa ye,+ na bɛbaye ye papa sua nu amra bɛavi ninyɛne bie mɔ anu wɔ Yizilayɛ.” 26  Devidi bizale menli mɔɔ gyigyi ɔ nwo ɛkɛ ne la kɛ: “Duzu a bɛbayɛ bɛamaa awie mɔɔ kɛhu Filisitianli ne mɔɔ gyi nehane na ɔkɛye Yizilayɛ ɔkɛvi anyiemgba ɛhye anu la ɛ? Ɔluakɛ Filisitianli ɛhye mɔɔ bɛtɛpɛle ye mrenyiazo la a le nwane mɔɔ ɔwɔ kɛ ɔgolo tease Nyamenle ne ɛlɔne mɔɔ ɛra baho la anwo a?”+ 27  Na menli ne hanle edwɛkɛ ko ne ala hilele ye kɛ: “Ɛhye a bɛbayɛ bɛamaa awie mɔɔ kɛhu ye la.” 28  Mɔɔ ɔ diema kpanyinli Ɛlayabe+ dele kɛ ɔ nee menli ne ɛlɛtendɛ la, ɔvale Devidi anwo ɛya na ɔhanle kɛ: “Duzu ati a wɔra ɛke a? Nwane a ɛgyakyile mboane ekyi ne ɛmaanle ye wɔ fienemgbole ne anu a?+ Meze wɔ anwomemaazo* ne nee adwenle ɛtane mɔɔ wɔnyia la; ɛrale kɛ ɛbanlea konle ne bie.” 29  Na Devidi hanle kɛ: “Duzu a meyɛ a? Edwɛkɛ ala a melɛbiza a!” 30  Ɔti ɔgyakyile ye na ɔhakyile ɔ nye wɔ sonla fofolɛ ɛkɛ na ɔbizale edwɛkɛ ko ne ala,+ na mualɛ ko ne ala a menli ne vale maanle ye a.+ 31  Bɛdele Devidi edwɛkɛ ne mɔɔ ɔhanle la na bɛbɔle Sɔɔlo amaneɛ. Ɔti Sɔɔlo maanle bɛhɔvɛlɛle ye bɛrɛlɛle ye. 32  Devidi zele Sɔɔlo kɛ: “Awie biala mmamaa ye ahonle tu* ɔlua ɔdaye ti. Wɔ sonvolɛ bahɔ na ɔ nee Filisitianli ɛhye ahɔho.”+ 33  Noko Sɔɔlo zele Devidi kɛ: “Ɛnrɛhola ɛ nee Filisitianli ɛhye ɛnrɛho, ɔluakɛ ɛle kakula,+ na yemɔ, sumunli ye mgbavolɛ nu amuala, ɔle sogyanli.”* 34  Devidi zele Sɔɔlo kɛ: “Mekɛ mɔɔ wɔ sonvolɛ nea ye papa mboane ne la, awenade rale bɛ nwo zo,+ yɛɛ ezizile noko rale bɛ nwo zo, na bɛ nuhua ko biala hyele mboane ne mɔ bie. 35  Mendoale ye na membɔle ye na menliele boane ne menvile ɔ nloa anu. Mɔɔ ɔdwazole ɔrale me nwo zo la, menzɔle ye awudwolɛ* ne anu na membɔle ye mengunle ye. 36  Wɔ sonvolɛ ɛhu awenade nee ezizile, na Filisitianli ɛhye mɔɔ bɛtɛpɛle ye mrenyiazo la bayɛ kɛ bɛ nuhua ko la, ɔluakɛ yegolo tease Nyamenle ne ɛlɔne ne mɔɔ ɛra baho la anwo.”+ 37  Akee Devidi doale zo hanle kɛ: “Gyihova mɔɔ liele me vile awenade nee ezizile sa nu la, ɔdaye a ɔbalie me yeavi Filisitianli ɛhye asa anu a.”+ Na Sɔɔlo zele Devidi kɛ: “Kɔ, Gyihova nee wɔ ɛhɔ.” 38  Akee Sɔɔlo vale ye tɛladeɛ wulale Devidi. Ɔvale kɔbele kyɛlɛ ɔzoale ye na ɔvale konle tɛladeɛ ɔwulale ye. 39  Devidi vale ye konle dadeɛ ne hendanle na ɔbɔle mɔdenle kɛ ɔkɔ noko yeangola, ɔluakɛ ɛnee ɔtɛwulale bie ɛlɛ. Devidi zele Sɔɔlo kɛ: “Menrɛhola menrɛwula ɛhye mɔ menrɛhɔ, ɔluakɛ metɛwulale bie ɛlɛ.” Yemɔti Devidi yeyele guale ɛkɛ. 40  Ɔvale ye kpɔma ne ɔlɛle ye ɔ sa nu na ɔsesale awolɛ nnu mɔɔ nwolɛ le tonlotonlo la ɔvile azudenle* ne anu ɔguale ye mboaneneavolɛ baage ne anwo kodoku ne anu na ɔvale ye totoabɔ ne+ ɔlɛle ye ɔ sa nu. Akee ɔbɔle ɔ bo kɛ ɔbikye Filisitianli ne. 41  Filisitianli ne rale ɔ nyunlu na ɔbikyele Devidi kpalɛ, na ɛnee ye sonla ne mɔɔ lɛ ye enyinlike ne la li ɔ nyunlu. 42  Mɔɔ Filisitianli ne dole ɔ nye na ɔnwunle Devidi la, yeambu ye bie, ɔluakɛ ɔnwunle kɛ ɔle kakula mɔɔ ɔbolo na ɔ nwo yɛ fɛ ala.+ 43  Ɔti Filisitianli ne zele Devidi kɛ: “Mele twea+ la ati a ɛlɛfa mbaka wɔara me nwo zo a?” Na Filisitianli ne vale ye nyamenle ne mɔ wale Devidi amonle. 44  Filisitianli ne zele Devidi kɛ: “Wɔmɔ bɛla, na mebava wɔ nwonane meamaa anwomanyunlu nloma nee ɛbɔ nu nane ali.” 45  Devidi buale Filisitianli ne kɛ: “Ɛlɛfa konle dadeɛ nee atwɛ tendenle yɛɛ atwɛ ezinra*+ a wɔara me nwo zo a, noko mame, ɛlɔne Gyihova, Yizilayɛ ɛlɔne ne mɔɔ ɛra baho la Nyamenle ne, mɔɔ wɔgolo ɔ nwo* la+ duma nu a melɛba ɛ nwo zo a.+ 46  Ɛnɛ kenle ye, Gyihova bava wɔ awula me sa nu,+ mebahu wɔ na meapɛ ɛ ti; na ɛnɛ kenle ye, mebava Filisitiama ɛlɔne ne avunli meamaa anwomanyunlu nloma nee ɛbɔ nu nane ali; na azɛlɛ ye azo amra amuala banwu kɛ Nyamenle bie wɔ Yizilayɛ.+ 47  Na menli kɔsɔɔti mɔɔ ɛyia ɛke la banwu kɛ, tɛ konle dadeɛ anzɛɛ atwɛ a Gyihova dua zo die ngoane a,+ ɔluakɛ konle ne le Gyihova ɛdeɛ,+ na ɔbava bɛ muala yeawula yɛ sa nu.”+ 48  Akee Filisitianli ne zieziele ɔ nwo na ɔyɛle ye ngyikyi ngyikyi kɛ ɔba Devidi anwo zo, noko Devidi nriandile ndɛndɛ hɔle ɛlɔne ne anyunlu hɔyiale Filisitianli ne. 49  Devidi vale ɔ sa wulale ye baage ne anu na ɔyele bolɛ ko na ɔvale ɔwulale totoabɔ ne anu ɔdole. Ɔbɔle Filisitianli ne anwoma zo na ɔminle ɔhɔle nu, ɔdɔle aze na ɔ nyunlu butule aze.+ 50  Yemɔti Devidi vale bolɛ nee totoabɔ lile Filisitianli ne anwo zo konim; ɔbɔle Filisitianli ne na ɔhunle ye, wɔ mekɛ bɔbɔ mɔɔ ɔnlɛ konle dadeɛ biala wɔ ɔ sa nu la.+ 51  Devidi nriandile hɔgyinlanle ɔ nwo zo. Akee ɔzɔle Filisitianli ne konle dadeɛ ne anu+ na ɔhwenle ɔvile ye boa ne anu ɔvale ɔpɛle ɔ ti amaa yeanwu kɛ amgba yewu. Mɔɔ Filisitiama nwunle kɛ bɛ katakyie ne ɛwu la, bɛnriandile.+ 52  Na Yizilayɛma nee Dwudama dwazole na bɛwudole kpole na bɛvoanle Filisitiama ndinlizo wɔ bɔnza ne anu+ too bɛhɔdwule Ɛkelɔn nlenkɛ mgbole ne mɔ anloa,+ na bɛhunle Filisitiama bɛguale adenle ne anu ɔvi Hyaleeyem+ too kɔdwu Gate nee Ɛkelɔn. 53  Mɔɔ Yizilayɛma gyakyile Filisitiama ɛvoanlɛ na bɛziale bɛrale la, bɛhɔsesale bɛ azokoɛleɛ ɛkɛ ne ninyɛne ne mɔ. 54  Akee Devidi vale Filisitianli ne ati ne hɔle Gyɛlusalɛm, noko ɔvale Filisitianli ne konle ninyɛne ne mɔ ɔguale ye ɛdanlɛsua ne anu.+ 55  Mekɛ mɔɔ Sɔɔlo nwunle kɛ Devidi ɛlɛkɔ ahɔyia Filisitianli ne la, ɔbizale Abenɛɛ,+ ɛlɔnema kpanyinli ne kɛ: “Abenɛɛ, nwane ara a le kakula ɛhye?”+ Abenɛɛ buale kɛ: “O belemgbunli, mekɛ ala mɔɔ ɛde aze la, menze!” 56  Belemgbunli ne hanle kɛ: “Kpondɛ ahenle mɔɔ ɔ ra a le kpavolɛ ne la.” 57  Ɔti mɔɔ Devidi hunle Filisitianli ne na ɔziale ɔrale ala la, Abenɛɛ vale ye hɔle Sɔɔlo anyunlu, ɛnee ɔlɛ Filisitianli ne+ ati ne wɔ ɔ sa nu. 58  Akee Sɔɔlo bizale ye kɛ: “Kakula, nwane ara a le wɔ?” Na Devidi hanle kɛ: “Mele wɔ sonvolɛ Bɛtelɛhɛmenli+ Gyɛsi+ ara.”

Ɔbodwɛkɛ

Hibulu aneɛ nu, “azokoɛleɛ.”
Ye tendenle le kɛyɛ M 2.9 (fuutu 9 enkyi 5.75). Nea Mok. B14.
Konle tɛladeɛ ɛhye le kɛ fɛlɛ nwo abonle la.
Kɛyɛ kg 57. Nea Mok. B14.
Anzɛɛ “gyavelin.”
Kɛyɛ kg 6.84. Nea Mok. B14.
Kɛyɛ L 22. Nea Mok. B14.
Hibulu aneɛ nu, “meleke.”
Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
Anzɛɛ “mmamaa ɛzulolɛ ka ye.”
Anzɛɛ “ɔle sonla mɔɔ kɔ konle.”
Hibulu aneɛ nu, “ɔ kɛsa.”
Anzɛɛ “bɔnza.”
Anzɛɛ “gyavelin.”
Anzɛɛ “mɔɔ ɛ nee ye ɛdwudwu.”