Samoɛle Mɔɔ Limoa 15:1-35

  • Sɔɔlo yɛle anzosesebɛ gyakyile Egage (1-9)

  • Samoɛle hwile Sɔɔlo anyunlu (10-23)

    • “Tieyɛ le kpalɛ tɛla afɔlebɔlɛ” (22)

  • Bɛkpo Sɔɔlo kɛ belemgbunli (24-29)

  • Samoɛle hunle Egage (30-35)

15  Akee Samoɛle zele Sɔɔlo kɛ: “Gyihova zoanle me kɛ memkpokpa wɔ kɛ belemgbunli wɔ ye menli Yizilayɛma anwo zo;+ akee tie mɔɔ Gyihova lɛ ye ka la.+  Edwɛkɛ mɔɔ ɛlɔne Gyihova ɛha la ɛne: ‘Mebamaa Amalɛkema abu mɔɔ bɛvale bɛyɛle Yizilayɛma wɔ mekɛ mɔɔ bɛvi Yigyibiti bɛlɛba na bɛdwazole bɛtiale bɛ wɔ adenle nu la anwo mgbonda.+  Yemɔti kɔ na kɔhu Amalɛkema,+ na sɛkye bɛ+ nee debie biala mɔɔ bɛlɛ la. Mmagyakyi bɛ;* ɔwɔ kɛ ɛku bɛ,+ mrenyia nee mraalɛ, ngakula nee mbɔdɔma, nlankɛ nee mboane, afunlumu nee asoaso kɔsɔɔti.’”+  Sɔɔlo vɛlɛle menli ne na ɔdianle bɛ wɔ Tileeyam: Ɛnee sogyama mɔɔ dua aze la le 200,000 yɛɛ Dwudama le 10,000.+  Sɔɔlo hɔle too ɔhɔdwule Amalɛke suakpole ne azo na bɛhɔziale bɔnza* ne anwo.  Akee Sɔɔlo zele Kinama kɛ:+ “Bɛhwe bɛ nwo bɛvi Amalɛkema anwo, amaa meanzɛkye bɛ meamboka bɛ nwo.+ Ɔluakɛ mekɛ mɔɔ Yizilayɛma vi Yigyibiti ɛlɛba la bɛlale ɛlɔlɛ kpundii ali bɛhilele bɛ.”+ Ɔti Kinama yele bɛ nwo vile Amalɛkema avinli.  Akee Sɔɔlo hunle Amalɛkema+ ɔvi Havelaa+ too ɔhɔdwule Hyɔɔ+ mɔɔ bikye Yigyibiti la.  Ɔhyele Amalɛke Belemgbunli Egage+ anyewɔzo, noko ɔvale konle dadeɛ ɔhunle menli mɔɔ ɛha la kɔsɔɔti.+  Noko Sɔɔlo nee menli ne gyakyile Egage* nee mboane, nlankɛ, nane mɔɔ ɛlɔ nee mboane nyinli anu mgbalɛ ne yɛɛ ninyɛne kɔsɔɔti mɔɔ le kpalɛ la.+ Ɛnee bɛngulo kɛ bɛsɛkye bɛ. Noko ninyɛne kɔsɔɔti mɔɔ ɛnle kpalɛ na bɛngulo la ɛdeɛ bɛzɛkyele bɛ. 10  Akee Gyihova zele Samoɛle kɛ: 11  “Menlu me nwo* kɛ menyɛle Sɔɔlo belemgbunli la, ɔluakɛ yehwe ɔ nwo yevi me nwo yɛɛ yeanli me edwɛkɛ zo.”+ Samoɛle vale ɛya kpole, na ɔzunle ɔvɛlɛle Gyihova nɔe ne amuala.+ 12  Mɔɔ Samoɛle dwazole nwonlomɔ mangyee kɛ ɔkayia Sɔɔlo la, bɛhanle bɛhilele Samoɛle kɛ: “Sɔɔlo ɛhɔ Kamɛle,+ na yehɔzi ngakyedeɛ wɔ ɛkɛ yemaa ɔ nwo.+ Akee yedoa zo yehɔ Gelegale.” 13  Mɔɔ Samoɛle hɔdole ye la, Sɔɔlo zele ye kɛ: “Gyihova ɛyila wɔ. Meli Gyihova edwɛkɛ ne azo.” 14  Noko Samoɛle hanle kɛ: “Ɛnee mboane ɛzunlɛ ne mɔɔ mete wɔ me nzo nu nee nlankɛ ɛzunlɛ ne mɔɔ mete la ɛ?”+ 15  Na Sɔɔlo hanle kɛ: “Bɛ nee bɛ vi Amalɛkema lɔ a rale a, ɔluakɛ menli ne gyakyile mboane nee nlankɛ mgbalɛ ne mɔ* kɛ bɛfa bɛabɔ afɔle bɛamaa Gyihova wɔ Nyamenle ne; noko mɔɔ hale la yɛzɛkyele bɛ.” 16  Na Samoɛle zele Sɔɔlo kɛ: “Gyinla! Maa menga edwɛkɛ mɔɔ Gyihova hanle hilele me nɔe la mengile wɔ.”+ Ɔti ɔzele ye kɛ: “Tendɛ!” 17  Samoɛle doale zo kɛ: “Tɛ ɛdawɔ a ɛnee ɛle ekyi wɔ ɛ nye zo+ wɔ mekɛ mɔɔ bɛyɛle wɔ Yizilayɛ mbusua ne mɔ kpanyinli na Gyihova kpokpale wɔ kɛ belemgbunli wɔ Yizilayɛ la ɔ?+ 18  Nzinlii Gyihova zoanle wɔ na ɔhanle kɛ, ‘Kɔ na kɔzɛkye Amalɛkema ɛtanevolɛma bɔkɔɔ.+ Ɛ nee bɛ ɛho kɔkpula kɛ ɛbabɔ bɛ bo zo la.’+ 19  Ɛnee duzu ati a wɔandie Gyihova ane ɛ? Emomu ɛ nye bolole bɛ ninyɛne ne na ɛsesale,+ na ɛyɛle ɛtane wɔ Gyihova anye zo!” 20  Noko Sɔɔlo zele Samoɛle kɛ: “Na se medie Gyihova ane! Mengɔle ɛleka mɔɔ Gyihova zoanle me la, yɛɛ meva Amalɛke Belemgbunli Egage mera na mezɛkye Amalɛkema bɔkɔɔ.+ 21  Noko menli ne vale mboane nee nlankɛ mɔɔ wɔ ninyɛne mɔɔ bɛnyianle la anu, ninyɛne mɔɔ ɔwɔ kɛ bɛsɛkye bɛ la anu mgbalɛ ne kɛ bɛfa bɛabɔ afɔle bɛamaa Gyihova wɔ Nyamenle ne wɔ Gelegale.”+ 22  Akee Samoɛle hanle kɛ: “Asoo Gyihova anye die ɛyelalɛ afɔlebɔdeɛ nee afɔlebɔlɛ nwo kpole+ tɛla kɛ bɛkɛdie Gyihova ane ɔ? Nea! Tieyɛ le kpalɛ tɛla afɔlebɔlɛ,+ yɛɛ ɛyɛ ɛnzolɛ ɛtie edwɛkɛ a ɔtɛla mboane nyinli ɛnlome;+ 23  ɔluakɛ atuadelɛ+ le ɛtane kɛ abisadeɛ ɛhɔlɛ ala la,+ yɛɛ anwomemaazo* ɛyɛlɛ le kɛ ngonyia nee awozonlezonlenlɛ* ala la. Kɛmɔ wɔkpo Gyihova edwɛkɛ ne la ati,+ ɔdaye noko yekpo wɔ kɛ belemgbunli.”+ 24  Akee Sɔɔlo zele Samoɛle kɛ: “Meyɛ ɛtane ɔluakɛ meanli Gyihova mɛla ne nee wɔ edwɛkɛ zo, ɔboalekɛ menzulole menli ne na mendiele mɔɔ bɛhanle la. 25  Yemɔti mesɛlɛ wɔ, fa me ɛtane kyɛ me, na ɛ nee me ɛzia ɛhɔ amaa meabɔ me ti aze meamaa Gyihova.”+ 26  Noko Samoɛle zele Sɔɔlo kɛ: “Me nee wɔ ɛnrɛzia ɔluakɛ wɔkpo Gyihova edwɛkɛ ne, na Gyihova noko ɛkpo wɔ kɛ ɛnrɛyɛ Yizilayɛ belemgbunli bieko.”+ 27  Mɔɔ Samoɛle hakyile ɔ nwo kɛ ɔkɔ la, Sɔɔlo zɔle ye tɛladeɛ ne mɔɔ ɛnlɛ ɔ sa la anloa, na ɔdele. 28  Na Samoɛle hanle kɛ: “Gyihova ɛlie* Yizilayɛ belemgbunlililɛ ne ɛvi ɛ sa nu ɛnɛ, na ɔbava yeamaa ɛ gɔnwo nrenyia mɔɔ le kpalɛ tɛla wɔ la.+ 29  Yizilayɛ Anyunlunyianli ne+ noko ɛnrɛbɔ adalɛ+ anzɛɛ ɛnrɛhakyi ye adwenle,* ɔluakɛ ɔnle kɛ sonla na yeahakyi ye adwenle.”+ 30  Na ɔhanle kɛ: “Meyɛ ɛtane. Noko mesɛlɛ wɔ, di me eni wɔ me menli ne mgbanyima ne mɔ nee Yizilayɛma anyunlu. Ɛ nee me ɛzia ɛhɔ na mengɔmbɔ me ti aze memaa Gyihova wɔ Nyamenle ne.”+ 31  Yemɔti Samoɛle lile Sɔɔlo anzi ɔ nee ye hɔle, na Sɔɔlo hɔbɔle ɔ ti aze maanle Gyihova. 32  Na Samoɛle hanle kɛ: “Bɛva Amalɛke Belemgbunli Egage bɛrɛlɛ me.” Na Egage hwenlehwenlenle ɔ bo aze* hɔle ɔ nwo ɛkɛ, ɔluakɛ Egage hanle ye ɔ ti anu kɛ: ‘Nɔhalɛ nu, ewule nwo ɛzulolɛ* ɛpɛ nu.’ 33  Noko Samoɛle hanle kɛ: “Kɛ mɔɔ wɔ konle dadeɛ ne ɛmaa mrɛladane amra ɛvi bɛ sa la, zɔhane ala a wɔ mame noko amra bavi ɔ sa adɛla mrɛladane kɔsɔɔti a.” Na Samoɛle pepɛle Egage nzokanzoka wɔ Gyihova anyunlu wɔ Gelegale.+ 34  Samoɛle hɔle Releema, na Sɔɔlo hɔle ye sua zo Gebeya. 35  Samoɛle annwu Sɔɔlo bieko hɔkpulale kenle mɔɔ ɔwule la, ɔluakɛ Samoɛle lile Sɔɔlo anwo nyane kpole.+ Na Gyihova nlunle ɔ nwo kɛ ɔyɛle Sɔɔlo belemgbunli wɔ Yizilayɛ la.+

Ɔbodwɛkɛ

Anzɛɛ “Mmase bɛ anwunvɔne.”
Anzɛɛ “azudenle.”
Anzɛɛ “zele Egage anwunvɔne.”
Anzɛɛ “Meli nyane.”
Anzɛɛ “menli ne zele mboane nee nlankɛ mgbalɛ ne mɔ anwunvɔne.”
Hibulu edwɛkɛkpɔkɛ ne eza kile akɛnrasesebɛ mɔɔ ɛnle kpalɛ mɔɔ bɛfa bɛyɛ debie anzɛɛ awie mɔɔ yɛ debie mɔɔ ɔnlɛ adenle ɔnyɛ la.
Hibulu aneɛ nu, “tɛlafem ananze,” ɛhye kile, abusua nyamenle.
Hibulu aneɛ nu, “ɛde.”
Anzɛɛ “ɛnrɛnlu ɔ nwo.”
Anzɛɛ ɔkola ɔkile, “vale anwodozo.”
Hibulu aneɛ nu, “ɛnwonle.”