Samoɛle Mɔɔ Limoa 13:1-23

  • Sɔɔlo kpale ɛlɔne (1-4)

  • Sɔɔlo yɛle anwomemaazo (5-9)

  • Samoɛle hwile Sɔɔlo anyunlu (10-14)

  • Yizilayɛma ɛnlɛ akodeɛ (15-23)

13  Sɔɔlo lile ɛvolɛ . . .* la yɛɛ ɔrayɛle belemgbunli a,+ na ɔlile ebia ɛvolɛ nwiɔ wɔ Yizilayɛ.  Sɔɔlo yele mrenyia 3,000 vile Yizilayɛma anu; ɛnee bɛ nuhua 2,000 boka Sɔɔlo anwo wɔ Mekemahye nee Bɛtɛle awoka ne mɔ azo yɛɛ 1,000 boka Dwɔnatan+ anwo wɔ Bɛngyamanema sua Gebeya+ azo. Sɔɔlo gyakyile menli mɔɔ ɛha la amuala adenle, na ko biala hɔle ye ɛdanlɛsua nu.  Na Dwɔnatan hunle Filisitia sogyama ekpunli bie+ mɔɔ wɔ Giba la,+ na Filisitiama dele nwolɛ edwɛkɛ. Sɔɔlo maanle bɛbɔle aweɛne+ wɔ azɛlɛ ne azo amuala kɛ: “Bɛmaa Hibuluma ɛdie!”  Yizilayɛma kɔsɔɔti dele kɛ: “Sɔɔlo ɛhu Filisitia sogyama ekpunli bie, na kɛkala Filisitiama kpɔ Yizilayɛma ɛsesebɛ.” Ɔti bɛvɛlɛle menli kɛ bɛrali Sɔɔlo anzi wɔ Gelegale.+  Filisitiama noko boɔboale bɛ nloa kɛ bɛ nee Yizilayɛma kaho, bɛvale konle ehwili 30,000 nee menli 6,000 mɔɔ ka mgbɔnwɔ la yɛɛ sogyama mɔɔ bɛ nwo zonle kɛ ɛnweazo ɛnwea la;+ na bɛhɔyɛle bɛ azokoɛleɛ wɔ Mekemahye wɔ Bɛte-eevɛn aduduleɛ.+  Na Yizilayɛma nwunle kɛ edwɛkɛ ɛdo bɛ, ɔluakɛ ɛnee bɛ nwo ɛhyele bɛ; yemɔti menli ne hɔveale awolɛ mbɔne nu,+ adokule nu, awolɛ nu, ahuma nu yɛɛ bula nu.  Hibuluma bie mɔ bɔbɔ pɛle Dwɔdan ne hɔle Gaade nee Geleade azɛlɛ zo.+ Noko ɛnee Sɔɔlo tɛbɔ Gelegale, na ɛnee menli mɔɔ li ɔ nzi la kɔsɔɔti anwo ɛlɛwoso bɛ.  Ɔhendɛle too kenle nsuu ɔhɔkpulale mekɛ mɔɔ Samoɛle hilele la, noko Samoɛle amba Gelegale, na ɛnee menli ne ɛlɛgyakyi ye ɛkɛ ahɔ.  Akee Sɔɔlo hanle kɛ: “Bɛva ɛyelalɛ afɔlebɔdeɛ ne nee anzodwolɛ afɔlebɔdeɛ ne mɔ bɛrɛlɛ me.” Na ɔbɔle ɛyelalɛ afɔle ne.+ 10  Noko mɔɔ ɔbɔle ɛyelalɛ afɔle ne ɔwiele ala la, yɛɛ Samoɛle radwule ɛkɛ a. Ɔti Sɔɔlo hɔle kɛ ɔkayia ye na yeayila ye. 11  Na Samoɛle hanle kɛ: “Duzu a wɔyɛ la?” Sɔɔlo buale kɛ: “Menwunle kɛ menli ne ɛlɛgyakyi me ɛkɛ ahɔ,+ yɛɛ wɔamba mekɛ mɔɔ ɛhilele la anu, yɛɛ Filisitiama noko ɛlɛboɔboa bɛ nloa wɔ Mekemahye.+ 12  Yemɔti menganle mengilele me nwo kɛ, ‘Filisitiama bara me nwo zo wɔ Gelegale, yɛɛ metɛkpondɛle Gyihova anyunlu ɛlolɛ.’* Ɔti mendele nganeɛ kɛ ɔwɔ kɛ mebɔ ɛyelalɛ afɔle ne.” 13  Na Samoɛle zele Sɔɔlo kɛ: “Wɔli ngoaseasɛm. Wɔanli mɛla mɔɔ Gyihova wɔ Nyamenle ne vale maanle wɔ la azo.+ Saa ɛlile zo a, anrɛɛ Gyihova bamaa wɔ belemgbunlililɛ ne agyinla wɔ Yizilayɛ dahuu. 14  Noko kɛkala wɔ belemgbunlililɛ ne ɛnrɛhyɛ.+ Gyihova bakpondɛ awie mɔɔ la ye ahonle nwo la,+ na Gyihova bakpa ye yeamaa yeayɛ ye menli ne adekilevolɛ,+ ɔluakɛ wɔanli edwɛkɛ mɔɔ Gyihova hanle hilele wɔ la azo.”+ 15  Akee Samoɛle dwazole na ɔvile Gelegale ɔhɔle Bɛngyamanema sua Gebeya azo, na Sɔɔlo dianle menli ne; ɛnee menli mɔɔ tɛbɔ ɔ nwo ɛkɛ la kɛyɛ mrenyia 600.+ 16  Ɛnee Sɔɔlo, ɔ ra Dwɔnatan yɛɛ menli mɔɔ tɛbɔ ɔ nwo ɛkɛ la de Bɛngyamanema sua Giba+ azo, na ɛnee Filisitiama ɛyɛ azokoɛleɛ wɔ Mekemahye.+ 17  Ɛnee Filisitia sogyama ekpunli nsa a fi bɛ azokoɛleɛ ne kɔ a. Ɛnee ekpunli ko fa Ɔfela adenle ne azo kɔ Hyuale azɛlɛ zo; 18  ekpunli ko noko bɔ ɔ ti wɔ Bɛte-hɔlɔn adenle zo;+ yɛɛ ekpunli ne mɔɔ tɔ zo nsa la bɔ ɔ ti wɔ adenle ne mɔɔ kɔ ɛweɛne ne mɔɔ nee Zɛboyem bɔnza ne anye bɔ zolɛ wɔ fienemgbole nu lɔ la azo. 19  Ɛnee bulalɛ dwinvolɛ biala ɛnle Yizilayɛ azɛlɛ ne kɔsɔɔti azo, ɔluakɛ Filisitiama hanle kɛ: “Yɛngulo kɛ Hibuluma yɛ konle dadeɛ anzɛɛ atwɛ biala.” 20  Ɛnee Yizilayɛma kɔsɔɔti kɔ Filisitiama ɛkɛ ne kɛ bɛkazi bɛ funduazɛlɛ, pingase, akuma yɛɛ ɛdedadeɛ ne mɔ. 21  Saa bɛsi funduazɛlɛ, pingase, faka agye nsa, akuma, anzɛɛ bɛyɛ baka mɔɔ bɛfa bɛka nlankɛ la boɛ a bɛdie pim ko.* 22  Kenle biala mɔɔ konle kɛzi la, bɛnnwu konle dadeɛ anzɛɛ atwɛ wɔ menli mɔɔ boka Sɔɔlo nee Dwɔnatan anwo la asa anu;+ Sɔɔlo nee ɔ ra Dwɔnatan angomekye a lɛ konle ninyɛne a. 23  Filisitia sogyama* ekpunli bie vindele hɔvale Mekemahye bɔnza ne adenle ne azo.+

Ɔbodwɛkɛ

Bɛangile ɛvolɛ ne dodo ne wɔ Hibulu ngɛlɛlera ne anu.
Anzɛɛ “metɛmaanle Nyamenle ahonle ɛtɛtɔle ye azule nu.”
Tete ɛzuzudeɛ, ɔbayɛ kɛ ɔle hyikɛle ngyɛnu nsa anu nwiɔ.
Anzɛɛ “sinzavolɛma.”