Samoɛle Mɔɔ Limoa 12:1-25

  • Samoɛle nee bɛ lile nrɛlaleɛ (1-25)

    • ‘Bɛmmakɔdi ninyɛne mgbane nzi’ (21)

    • Gyihova ɛnrɛkpo ye menli (22)

12  Akee Samoɛle zele Yizilayɛma kɔsɔɔti kɛ: “Meyɛ debie biala mɔɔ bɛvale bɛdole me nyunlu la,* yɛɛ meye belemgbunli kɛ ɔnlea bɛ nwo zo.+  Kɛkala belemgbunli ne mɔɔ bali* bɛ nyunlu la ɛne!+ Mame meyɛ ɛrelera yɛɛ me ti zo ɛyɛ egyɛne, na me mra ne mɔ wɔ bɛ nwo ɛke,+ yɛɛ sumunli me mgbavolɛ nu meli bɛ nyunlu too badwu ɛnɛ kenle ye.+  Medame ɛne. Bɛha mɔɔ meyɛ la wɔ Gyihova nee ahenle mɔɔ yekpokpa ye la anyunlu:+ Nwane a melie ye ɛnlankɛ anzɛɛ ye asoaso a?+ Yɛɛ nwane a mesisi ye anzɛɛ metinlitinli ɔ nwo zo a? Nwane a melie belaebo mevi ye ɛkɛ* na medo me nye ɛbɔ nu a?+ Saa meyɛ zɔ a, mebava bie meazie ɔ bo zo.”+  Na bɛhanle kɛ: “Ɛtɛsisile yɛ yɛɛ ɛtɛtinlitinlinle yɛ nwo zo yɛɛ ɛtɛdiele debie biala ɛtɛfile awie asa anu.”  Ɔti ɔzele bɛ kɛ: “Gyihova nee ahenle mɔɔ yekpokpa ye la di me daselɛ ɛnɛ kenle ye kɛ, bɛnlɛ debie biala mɔɔ bɛbabɔ me nwolɛ somolɛ a.” Na bɛhanle kɛ. “Ɔdi daselɛ.”  Yemɔti Samoɛle zele menli ne kɛ: “Gyihova mɔɔ luale Mosisi nee Aalɔn anwo zo yele bɛ nenyia mɔ vile Yigyibiti azɛlɛ zo la+ di daselɛ.  Akee bɛgyinla ɛkɛ na membua bɛ ndɛne wɔ Gyihova anyunlu wɔ tenlene nyɛleɛ kɔsɔɔti mɔɔ Gyihova ɛyɛ ɛmaa bɛ nee bɛ nenyia mɔ la anwo.  Mekɛ mɔɔ Gyekɔbo rale Yigyibiti+ na bɛ nenyia mɔ zunle vɛlɛle Gyihova ala la,+ Gyihova zoanle Mosisi+ nee Aalɔn maanle bɛyele bɛ nenyia mɔ bɛvile Yigyibiti na bɛmaanle bɛradɛnlanle ɛke.+  Noko bɛ rɛle vile Gyihova bɛ Nyamenle ne, na ɔdɔnenle bɛ+ ɔwulale Sesɛla,+ Heezɔ ɛlɔnema kpanyinli ne nee Filisitiama+ yɛɛ Mowabe belemgbunli ne+ asa anu na bɛ nee bɛ honle. 10  Na bɛzunle bɛvɛlɛle Gyihova+ na bɛhanle kɛ, ‘Yɛyɛ ɛtane,+ ɔluakɛ yɛgyakyi Gyihova na yɛhɔzonle Beeyale+ nee Ahyetɔlɛte+ ananze ne mɔ; ɔti die yɛ fi yɛ kpɔvolɛma asa anu amaa yɛazonle wɔ.’ 11  Akee Gyihova zoanle Gyɛlubeeyale+ nee Bidan nee Gyɛfeta+ yɛɛ Samoɛle+ ɔmaanle bɛliele bɛ bɛvile bɛ kpɔvolɛma mɔɔ ɛbɛnga bɛ ɛyia la kɔsɔɔti asa anu amaa bɛahola bɛadɛnla anzodwolɛ nu.+ 12  Mekɛ mɔɔ bɛnwunle kɛ Amɔnoma Belemgbunli Neehahye+ ɛra bɛ nwo zo la, bɛhɔle zo bɛzele me kɛ, ‘Kyɛkyɛ, yɛbɔ kpɔkɛ kɛ yɛkpondɛ belemgbunli anlea yɛ nwo zo!’+ wɔ mekɛ bɔbɔ mɔɔ Gyihova bɛ Nyamenle ne le bɛ Belemgbunli la.+ 13  Bɛ belemgbunli ne mɔɔ bɛye ye, ahenle mɔɔ bɛbizale la ɛne. Bɛnlea! Gyihova ɛye belemgbunli kɛ ɔnlea bɛ nwo zo.+ 14  Saa bɛsulo Gyihova+ na bɛsonle ye+ na bɛtie ɔ ne+ na bɛande Gyihova edwɛkɛ nwo atua na bɛ nee bɛ belemgbunli ne mɔɔ banlea bɛ nwo zo la di Gyihova bɛ Nyamenle ne anzi a, edwɛkɛ kpalɛ ɔ. 15  Noko saa bɛandie Gyihova ane na bɛte Gyihova edwɛkɛ nwo atua a, Gyihova asa bara bɛdabɛ nee bɛ papa mɔ anwo zo.+ 16  Akee bɛgyinla ɛkɛ na bɛnlea deɛ kpole ɛhye mɔɔ Gyihova ɛlɛyɛ ye wɔ bɛ nye zo la. 17  Ɛnɛ ɛnle hwiiti ɛdelɛ mekɛ ɔ? Noko mebazɛlɛ Gyihova meamaa yeamaa maanle nu ahulu na ezule adɔ; na bɛnwu ye kɛ bɛyɛ ɛtane kpole wɔ Gyihova anye zo kɛ bɛbizale bɛliele belemgbunli la.”+ 18  Na Samoɛle zɛlɛle Gyihova na Gyihova maanle maanle nu hulule na ezule dɔle kenle zɔhane, yemɔti menli ne kɔsɔɔti zulole Gyihova nee Samoɛle kpole kpalɛ. 19  Na menli ne kɔsɔɔti zele Samoɛle kɛ: “Sɛlɛ Gyihova wɔ Nyamenle ne maa wɔ sonvolɛma+ ɔluakɛ yɛmkpondɛ kɛ yɛwu, ɔboalekɛ yɛ ɛtane kɔsɔɔti anzi, yɛyɛ ɛtane bieko kɛ yɛbizale yɛliele belemgbunli la.” 20  Yemɔti Samoɛle zele menli ne kɛ: “Bɛmmasulo. Bɛyɛ ɛtane ɛhye mɔ kɔsɔɔti ɛdeɛ. Noko bɛmmatwe bɛ nwo bɛfi Gyihova anwo,+ emomu bɛva bɛ ahonle muala bɛzonle Gyihova.+ 21  Bɛmmakɔdi ninyɛne mgbane mɔɔ nvasoɛ biala ɛnle bɛ nwo zo+ na bɛnrɛhola bɛnrɛlie bɛ la anzi,+ ɔluakɛ bɛle mgbane. 22  Ye duma kpole ne ati,+ Gyihova ɛnrɛkpo ye menli,+ ɔluakɛ Gyihova ɛbɔ kpɔkɛ kɛ ɔbava bɛ yeayɛ ye menli.+ 23  Na mame, ɔnrɛra ye ɛlɛ kɛ mekɛyɛ ɛtane mekɛtia Gyihova na mekɛgyakyi kɛ mekɛyɛ asɔne mekɛmaa bɛ, na mebahɔ zo meahilehile bɛ adenle mɔɔ le kpalɛ na ɔtenrɛ la. 24  Bɛzulo Gyihova+ na bɛva bɛ ahonle muala bɛzonle ye nɔhalɛ nu, bɛhakye ninyɛne mgbole mɔɔ yeyɛ yemaa bɛ la.+ 25  Noko saa bɛyɛ anzosesebɛ na bɛkɔ zo bɛyɛ ɛtane a,+ ɔbakpoa bɛ nee bɛ belemgbunli ne yeagua bɛ lɔ.”+

Ɔbodwɛkɛ

Hibulu aneɛ nu, “Medie bɛ ne wɔ debie biala anu.”
Hibulu aneɛ nu, “balua.”
Anzɛɛ “mevea melie ye ezukoa.”