Samoɛle Mɔɔ Limoa 1:1-28

  • Ɛlekeena nee ɔ ye mɔ (1-8)

  • Hana mɔɔ ɛnlɛ ralɛ la zɛlɛle ralɛ nrenyia (9-18)

  • Bɛwo Samoɛle na bɛva ye bɛmaa Gyihova (19-28)

1  Ɛnee nrenyia bie mɔɔ bɛfɛlɛ ye Ɛlekeena+ la de Releematem-zofem*+ wɔ Yifelaem+ awoka ne mɔ azo, ɔle Zɛfe ara Tohu ara Ɛlaehu ara Gyɛloham ara, ɔle Yifelaemenli.  Ɛnee ɔgya mraalɛ nwiɔ; bɛfɛlɛ ko Hana yɛɛ bɛfɛlɛ ko ne noko Pɛnena. Pɛnena wole mralɛ, noko Hana anwo ralɛ.  Ɛvolɛ biala nrenyia ɛhye vi ye sua zo kɔsonle* na ɔbɔ afɔle ɔmaa ɛlɔne Gyihova wɔ Hyaelo.+ Ɛnee Yilae amra mrenyia nwiɔ ne, Hɔfenae nee Fenɛhaze+ le Gyihova ɛsɔfoma wɔ ɛkɛ.+  Kenle ko bie mɔɔ Ɛlekeena bɔle afɔle la, ɔvale ɔ ye Pɛnena nee ɔ mra mrenyia yɛɛ ɔ mra mraalɛ ne mɔ kɔsɔɔti kyɛfoa ɛdeɛ ɔmaanle bɛ,+  noko Hana ɛdeɛ, ɔmaanle ye kyɛfoa titili bie, ɔluakɛ ɛnee Hana a ɔkulo ye kpalɛ a; noko Gyihova ammaa yeanwo ralɛ.*  Ɛnee ɔ hola noko kɔ zo ka ye ahyi kɛ ɔmaa yeava ɛya ɔluakɛ Gyihova ammaa yeanwo ralɛ.  Ɛhye a ɔyɛ ye ɛvolɛ biala a; mekɛ biala mɔɔ Hana kɛhɔ Gyihova sua nu la,+ ɔ hola ne ka ye ahyi kpalɛ ɔmaa ɔsu too mɔɔ ɔnli debie a.  Yemɔti ɔ hu Ɛlekeena bizale ye kɛ: “Hana, duzu ati a ɛsu, duzu ati a ɛnli debie yɛɛ duzu ati a ɛdi nyane a?* Asoo me nwo ɛnlɛ nvasoɛ ɛmmaa wɔ ɛndɛla mralɛ mrenyia bulu ɔ?”  Akee mɔɔ bɛlile na bɛnlonle wɔ Hyaelo bɛwiele la, Hana dwazole. Mekɛ zɔhane, ɛnee ɛsɔfo Yilae de ebia ne mɔɔ wɔ Gyihova ɛzonlenlɛsua* ne+ anlenkɛ ne anloa la azo. 10  Ɛnee Hana ɛlɛdi nyane kpalɛ,* na ɔbɔle ɔ bo kɛ ɔsɛlɛ Gyihova,+ na ɔzunle kpole kpalɛ. 11  Na ɔbɔle ɛwɔkɛ kɛ: “O ɛlɔne Gyihova, saa ɛnea nyane mɔɔ wɔ sonvolɛ ɛlɛdi na ɛkakye me na ɛ rɛle anvi wɔ sonvolɛ na ɛmaa wɔ sonvolɛ ralɛ nrenyia a,+ mebava ye meamaa Gyihova wɔ ye ngoane mekɛ kɔsɔɔti anu, na biledi* ɛnrɛha ɔ ti enrinli.”+ 12  Mɔɔ ɔlɛyɛ asɔne mekɛ tendenle wɔ Gyihova anyunlu la, ɛnee Yilae ɛlɛnea ɔ nloa. 13  Ɛnee Hana ɛlɛtendɛ wɔ ye ahonle nu, ɔ nloa ala a ɔbukebuke a, noko bɛnde ɔ ne. Ɔti ɛnee Yilae dwenle kɛ yebo. 14  Yilae bizale ye kɛ: “Mekɛ tendenle nyɛ a ɛkɔ zo wɔabo a? Gyakyi wɔ nwanye ɛnlonlɛ ne.” 15  Na Hana buale kɛ: “Ɔnle zɔ me menle! Mele raalɛ mɔɔ melɛdi nyane kpole;* metɛnonle nwanye anzɛɛ nza biala, me ahonle nu edwɛkɛ a melɛka meahile Gyihova a.*+ 16  Mmabu wɔ sonvolɛ raalɛ kɛ ɔle sonlamgbane, ɔluakɛ me nyanelilɛ kpole nee abodelɛ a ɛmaa medendɛ too yeradwu kɛkala a.” 17  Akee Yilae buale kɛ: “Kɔ anzodwolɛ nu, na Yizilayɛ Nyamenle ne ɛbua wɔ nzɛlɛlɛ ne mɔɔ wɔva wɔdo ɔ nyunlu la ɛmaa wɔ.”+ 18  Na Hana hanle kɛ: “Maa wɔ sonvolɛ ɛnyia ɛ nyunlu ɛlolɛ.” Akee Hana hɔle na ɔhɔlile debie, na ɔ nyunlu anyɛ alɔbɔlɛ bieko. 19  Akee bɛdwazole nwonlomɔ mangyee ne na bɛbɔle bɛ ti aze wɔ Gyihova anyunlu na bɛziale bɛhɔle bɛ sua nu wɔ Releema.+ Ɛlekeena nee ɔ ye Hana lale na Gyihova hakyele ye.+ 20  Wɔ ɛvolɛ ko anu,* Hana nrenzɛle na ɔwole ralɛ nrenyia na ɔdonle ye Samoɛle,*+ ɔluakɛ ɔhanle kɛ, “menzɛlɛle ye menvile Gyihova ɛkɛ.” 21  Mekɛ guale nu la, Ɛlekeena nee ye sua nu amra amuala hɔle kɛ ɔkabɔ ɛvolɛ biala afɔle ne yeamaa Gyihova+ na yeava ye ɛwɔkɛ afɔlebɔdeɛ ne yeahɔ. 22  Noko Hana angɔ bie,+ ɔluakɛ ɔzele ɔ hu kɛ: “Saa kakula ne pɛ nyɛfonlɛ ala a, mebava ye meahɔ; akee ɔbahɔ Gyihova anyunlu na yeadɛnla ɛkɛ ne dahuu.”+ 23  Akee ɔ hu Ɛlekeena zele ye kɛ: “Yɛ mɔɔ ɛnea a ɔle kpalɛ la.* Tɛnla sua nu kɔkpula kɛ ɛkɛpɛ ye nyɛfonlɛ la. Gyihova ɛmaa mɔɔ wɔha la ɛyɛ zɔ.” Yemɔti Hana dɛnlanle sua nu na ɔnleanle kakula ne ɔhɔkpulale kɛ ɔpɛle ye nyɛfonlɛ la. 24  Mɔɔ ɔpɛle ye nyɛfonlɛ ala la, ɔvale ye ɔhɔle Hyaelo; ɔvale ɛnlankɛ nyinli mɔɔ ɛli ɛvolɛ nsa, esamo yifa ko* yɛɛ nwanye toba kpole ko+ na ɔvale kakula ne ɔbokale nwo ɔhɔle Gyihova sua nu wɔ Hyaelo.+ 25  Akee bɛhunle ɛnlankɛ nyinli ne na bɛvale kakula ne bɛrɛlɛle Yilae. 26  Na Hana hanle kɛ: “Me menle mebodo wɔ! Mekɛ ala mɔɔ ɛde aze la, me menle, medame a mele raalɛ ne mɔɔ ragyinlanle ɛ nwo ɛke vale asɔneyɛlɛ dole Gyihova anyunlu la.+ 27  Kakula ɛhye a menyɛle nwolɛ asɔne a, na Gyihova ɛbua me nzɛlɛlɛ ne mɔɔ menvale mendole ɔ nyunlu la.+ 28  Kɛkala medame noko mefa ye meamaa Gyihova. Ye ngoane mekɛ kɔsɔɔti, ɔle Gyihova ɛdeɛ.” Na ɔbɔle* ɔ ti aze wɔ ɛkɛ ne ɔmaanle Gyihova.

Ɔbodwɛkɛ

Anzɛɛ “Releema, ɔle Zɛfenli.”
Anzɛɛ “kɔbɔ ɔ ti aze.”
Hibulu aneɛ nu, “ɛdo ye awodeɛ ne anu.”
Anzɛɛ “yɛɛ duzu ati a ɛdi nyane wɔ wɔ ahonle nu a?”
Ɛhye kile, ɛdanlɛsua ne.
Anzɛɛ “ɛkɛla ɛlɛdi nyane.”
Anzɛɛ “dadeɛ dɛma.”
Anzɛɛ “me sunsum anwo ɛbubu ye.”
Hibulu aneɛ nu, “me ɛkɛla a melɛwola meagua Nyamenle anyunlu a.” Nea Edwɛkɛbohilelɛ.
Anzɛɛ ɔkola ɔkile, “Mekɛ dwule la.”
Ɔ bo kile “Nyamenle Duma.”
Hibulu aneɛ nu, “mɔɔ le kpalɛ wɔ ɛ nye zo la.”
Kɛyɛ L 22. Nea Mok. B14.
Ɔbayɛ kɛ Ɛlekeena ɔ.