Mɔɔ Limoa Kɔmaa Kɔlentema 2:1-16
2 Ɔti mediema, mekɛ mɔɔ membale bɛ nwo lɔ la, meanva edwɛkɛ mgbole+ anzɛɛ sonla nrɛlɛbɛ meanga Nyamenle fealeranu edwɛkɛ nwuanzanwuanza ne+ meangile bɛ.
2 Ɔluakɛ mekɛ mɔɔ mewɔ bɛ nwo lɔ la membɔle kpɔkɛ kɛ menrɛha debie biala anwo edwɛkɛ kyesɛ Gyisɛse Kelaese nee baka ne azo mɔɔ bɛhunle ye la ala.+
3 Na menvale bɛtɛɛyɛlɛ nee ɛzulolɛ nee anwowosolɛ kpole a membale bɛ nwo lɔ a;
4 na meanva sonla nrɛlɛbɛ nee edwɛkɛ mɔɔ bɛfa bɛbɛlɛbɛla la a menganle edwɛkɛ ne a, emomu menluale sunsum nee tumi zo a mengale a,+
5 amaa bɛ diedi ne angyinla sonla nrɛlɛbɛ zo, emomu yeagyinla Nyamenle tumi ne azo.
6 Na yɛka nrɛlɛbɛ nwo edwɛkɛ yɛkile menli mɔɔ ɛnyi+ wɔ sunsum nu la, noko tɛ ewiade ɛhye* anu nrɛlɛbɛ anzɛɛ ewiade tumivolɛma mɔɔ bɛbaye bɛ bɛavi ɛkɛ ne la+ ɛdeɛ ne ɔ.
7 Emomu, yɛka Nyamenle nrɛlɛbɛ ne mɔɔ wɔ fealeranu edwɛkɛ nwuanzanwuanza bie anu,+ nrɛlɛbɛ ne mɔɔ vea, mɔɔ Nyamenle vale ziele ɛkɛ ne kolaa na yeabɔ ewiade kɛ ɔbava yeawula yɛ anyunlunyia la anwo edwɛkɛ.
8 Nrɛlɛbɛ ɛhye, ewiade ɛhye* tumivolɛma ne anu biala annwu ye,+ ɔluakɛ saa bɛnwunle ye a anrɛɛ bɛangu anyunlunyia Awulae ne.*
9 Emomu, kɛ mɔɔ bɛhɛlɛ ala la: “Ninyɛne mɔɔ Nyamenle ɛziezie ɛmaa bɛdabɛ mɔɔ bɛkulo ye la, ɛnyelɛ ɛtɛnwunle ye yɛɛ ɛnzolɛ ɛtɛtele yɛɛ awie biala ɛtɛdwenlenle nwolɛ.”+
10 Na yɛdayɛ a Nyamenle ɛlua ye sunsum ne azo ɛye ɛhile yɛ a,+ ɔluakɛ sunsum ne neɛnlea ninyɛne kɔsɔɔti anu, bɔbɔ Nyamenle ninyɛne mɔɔ anu le kuloonwu la.+
11 Na sonla boni a kɛhola kɛnwu awie ninyɛne nu kɛ sonla mumua ne sunsum* ne mɔɔ wɔ ye nu la ala ɛ? Zɔhane ala noko a awie biala ɛnze Nyamenle ninyɛne nu kɛ Nyamenle sunsum ne ala a.
12 Na tɛ ewiade sunsum a yɛnyianle a, emomu sunsum ne mɔɔ vi Nyamenle ɛkɛ la,+ amaa yɛahola yɛanwu ninyɛne mɔɔ Nyamenle ɛva ɛlo yɛ la.
13 Yɛka ninyɛne ɛhye mɔ noko anwo edwɛkɛ, na yɛnva edwɛkɛ mɔɔ bɛva sonla nrɛlɛbɛ+ bɛhilehile la yɛnga, emomu yɛfa mɔɔ bɛva sunsum ne+ bɛhilehile la a yɛka a, yɛfa sunsum nu edwɛkɛ yɛkilehile sunsum nu ninyɛne nu.
14 Na sonla mɔɔ di ye atiakunluwɔzo nzi la* ɛnlie ninyɛne mɔɔ vi Nyamenle sunsum ne la ɛndo nu, bɛle ngoaseasɛm bɛmaa ye; na ɔnrɛhola ɔnrɛde ɔ bo, ɔluakɛ kyesɛ sunsum nwuanzanwuanza ne boa ye na yeahola yeanleɛnlea nu.
15 Noko, sonla mɔɔ Nyamenle sunsum ne kile ye adenle la* neɛnlea ninyɛne kɔsɔɔti anu,+ na yemɔ awie biala ɛnneɛnlea ye nu.
16 Na “nwane a ɛnwu Gyihova* adwenle mɔɔ ɔbahola yeahilehile ye a?”+ Noko yɛmɛ, yɛlɛ Kelaese adwenle.+
Ɔbodwɛkɛ
^ Anzɛɛ “mekɛ ɛhye.” Nea Edwɛkɛbohilelɛ.
^ Anzɛɛ “mekɛ ɛhye.” Nea Edwɛkɛbohilelɛ.
^ Anzɛɛ “anrɛɛ bɛangu ye wɔ baka zo.”
^ Anzɛɛ “ye ahonle.”
^ Giliki aneɛ nu, “nwonane nu sonla.”
^ Giliki aneɛ nu, “sunsum nu sonla.”
