Mɔɔ Limoa Kɔmaa Kɔlentema 14:1-40

  • Ngapezo nee aneɛ ngakyile ahyɛlɛdeɛ (1-25)

  • Kilisienema ayia nwo ngyehyɛleɛ (26-40)

    • Mraalɛ gyinlabelɛ wɔ asafo ne anu (34, 35)

14  Bɛkpondɛ ɛlɔlɛ, noko bɛhɔ zo bɛkpondɛ sunsum nu ahyɛlɛdeɛ ne mɔ ɛsesebɛ, titili ngapezo ɛhanlɛ.+  Awie mɔɔ ka aneɛ ngakyile la ɛndendɛ ɛngile menli, emomu ɔtendɛ ɔkile Nyamenle, ɔluakɛ awie biala ɛnde mɔɔ ɔka la abo,+ emomu ɔdua sunsum ne azo ɔka fealeranu edwɛkɛ nwuanzanwuanza.+  Noko sonla mɔɔ ka ngapezo la ɛdendɛlɛ maa menli anwosesebɛ, ɔboa bɛ na ɔkyekye bɛ rɛle.  Mɔɔ ka aneɛ ngakyile la boa ɔ ngomekye ɔ nwo, na mɔɔ ka ngapezo la boa asafo ne.  Me kunlu a anrɛɛ bɛ muala bɛka aneɛ ngakyile,+ noko mekulo kɛ bɛka ngapezo.+ Nɔhalɛ nu, ɔle kpalɛ kɛ awie kɛha ngapezo tɛla kɛ ɔkɛha aneɛ ngakyile, kyesɛ ɔkile ɔ bo amaa yeaboa asafo ne.  Noko mediema, saa kɛkala meba bɛ nwo lɔ na mebaka aneɛ ngakyile mekile bɛ, na meanga yekile,+ nrɛlɛbɛ edwɛkɛ,+ anzɛɛ ngapezo nee ngilehilelɛ mɔɔ menyia ye mevi Nyamenle ɛkɛ la meangile bɛ a, nvasoɛ boni a bɛbanyia ye bɛavi me ɛkɛ a?  Zɔhane ala a ɔde wɔ ninyɛne mɔɔ ngoane ɛnle bɛ nu mɔɔ bɛ ne dielie kɛ fulutu anzɛɛ haape la anwo a. Noko saa ngakyile mɔɔ wɔ ɛnelɛ ne mɔ anu la anvinde kpalɛ a, kɛ ɔkɛyɛ na bɛanwu mɔɔ bɛlɛbɔ ye wɔ fulutu anzɛɛ haape ne azo la ɛ?  Na saa ahenle mɔɔ ɛlɛbɔ konle aweɛne ne la ambɔ ye kpalɛ a, nwane a kɛboɔboa ɔ nwo kɛ ɔkɔ konle a?  Zɔhane ala a bɛdabɛ noko saa bɛanva bɛ nloa bɛanga edwɛkɛ mɔɔ bɛte ɔ bo wienyi la a, kɛ ɔkɛyɛ na awie anwu mɔɔ bɛlɛka la ɛ? Nɔhalɛ nu, ɔbayɛ kɛ bɛlɛtendɛ bɛagua anwoma nu la. 10  Aneɛ ngakyile dɔɔnwo wɔ ewiade ye anu ɛdeɛ, noko nuhua ko bɔbɔ ɛnle ɛkɛ ne mɔɔ bɛnde ɔ bo a. 11  Na saa mende aneɛ ne abo a, mebayɛ ɛyɛvolɛ wɔ ahenle mɔɔ ɛlɛka la anye zo, na ahenle mɔɔ ɛlɛka la noko bayɛ me nye zo ɛyɛvolɛ. 12  Ɔti bɛdabɛ noko, kɛ mɔɔ bɛ nye ɛbolo kɛ bɛkpondɛ sunsum nu ahyɛlɛdeɛ ne mɔ la, bɛbɔ mɔdenle kɛ bɛbanyia ahyɛlɛdeɛ ne mɔ dɔɔnwo amaa asafo ne anyia anwosesebɛ.+ 13  Ɛhye ati, bɛmaa mɔɔ ka aneɛ ngakyile la ɛyɛ asɔne kɛ ɔbahola yeahile ɔ bo.+ 14  Na saa mefa aneɛ ngakyile meyɛ asɔne a, me sunsum nu ahyɛlɛdeɛ ne a ɛlɛyɛ asɔne a, noko me adwenle ɛnde ɔ bo. 15  Ɛnee duzu a menyɛ a? Mebava sunsum nu ahyɛlɛdeɛ ne meayɛ asɔne, na meava me adwenle noko meayɛ asɔne. Mebava sunsum nu ahyɛlɛdeɛ ne meado ayɛlɛyelɛ edwɛne, na meava me adwenle noko meado ayɛlɛyelɛ edwɛne. 16  Yeamba ye zɔ na ɛfa sunsum nu ahyɛlɛdeɛ ne ɛye ayɛlɛ a, kɛ ɔkɛyɛ na awie gyɛne mɔɔ wɔ bɛ avinli la alie wɔ moyɛlɛ ne azo kɛ “Amen” wɔ mekɛ mɔɔ ɔnze edwɛkɛ mɔɔ ɛlɛka la ɛ? 17  Nɔhalɛ nu, wɔ moyɛlɛ ne le kpalɛ ɛdeɛ, noko yeamboa sonla zɔhane. 18  Meyɛ Nyamenle mo kɛ meka aneɛ ngakyile dɔɔnwo metɛla bɛ muala la. 19  Noko akee, wɔ asafo ne anu, anrɛɛ mekulo kɛ mefa me adwenle* meka edwɛkɛ agbɔkɛ nnu amaa meava meahilehile awie mɔ, tɛla kɛ mebaha edwɛkɛ agbɔkɛ apenle bulu wɔ aneɛ mɔɔ bɛnde ɔ bo la anu.+ 20  Mediema, bɛmmadwenle ngakula adwenle,+ emomu bɛyɛ bɛ nwo kɛ mbɔdɔma wɔ ɛtane nwo;+ na bɛdwenle kɛ mgbanyinli la.+ 21  Bɛhɛlɛ ye wɔ Mɛla ne anu kɛ: “‘Mebalua menli mɔɔ ka aneɛ ngakyile la nee nyɛvolɛ nwo zo meadendɛ meahile menli ɛhye mɔ, noko yemɔ bɔbɔ bɛnrɛdie me edwɛkɛ,’ Gyihova* a se a.”+ 22  Ɛhye ati, aneɛ ngakyile ɛhanlɛ ɛnle sɛkɛlɛneɛ ɛmmaa diedima, ɔle sɛkɛlɛneɛ ɔmaa bɛdabɛ mɔɔ bɛnle diedima la,+ noko ngapezo ɛnle bɛdabɛ mɔɔ bɛnle diedima la ɛdeɛ, emomu ɔle diedima ɛdeɛ. 23  Ɔti saa asafo ne anu amra amuala yia ɛleka ko na bɛ muala bɛka aneɛ ngakyile, na menli gyɛne anzɛɛ bɛdabɛ mɔɔ bɛnle diedima la ba bie a, asoo bɛnrɛha kɛ bɛbɔ ɛlane ɔ? 24  Noko saa bɛ muala bɛka ngapezo na awie mɔɔ ɛnle diedinli anzɛɛ awie gyɛne ba bie a, bɛ muala bɛbahwi ɔ nyunlu na bɛanleɛnlea ye nu. 25  Ye ahonle nu edwɛkɛ mɔɔ vea la bala ali, amaa yeabɔ ɔ ti aze yeazonle Nyamenle yeaha kɛ: “Amgba Nyamenle nee bɛ de.”+ 26  Mediema, duzu a ɔwɔ kɛ bɛyɛ a? Saa bɛyia nu a, bie lɛ edwɛne, bie kilehile, bie lɛ yekile, bie ka aneɛ ngakyile yɛɛ bie kile edwɛkɛ bo.+ Bɛyɛ debie biala bɛva bɛmaa bɛ nwo anwosesebɛ. 27  Na saa awie ka aneɛ ngakyile a, bɛmaa ɔyɛ menli nwiɔ anzɛɛ yebo zolɛ la nsa, na bɛha ye ngoko ngoko, na bɛmaa awie ɛhile ɔ bo.+ 28  Noko saa awie ɛnle ɛkɛ mɔɔ ɔbahile ɔ bo a, ɔwɔ kɛ ɔyɛ koonwu wɔ asafo ne anu na ɔtendɛ ɔkile ɔ nwo nee Nyamenle. 29  Bɛmaa ngapezoma nwiɔ anzɛɛ nsa+ ɛdendɛ, na mɔɔ ɛha la ɛnwu mɔɔ ɔkile la. 30  Noko saa awie gyɛne mɔɔ de ɛkɛ ne la nyia yekile a, bɛmaa mɔɔ ɛlɛtendɛ la ɛmua ɔ nloa. 31  Ɔluakɛ bɛ muala bɛkola bɛka ngapezo bɛ ti ngoko, amaa bɛ muala bɛazukoa na bɛ muala bɛanyia anwosesebɛ.+ 32  Na ngapezoma ne mɔ a ɔwɔ kɛ yɛ kɛzi bɛfa sunsum nu ahyɛlɛdeɛ ne mɔ bɛdi gyima la anwo ngyehyɛleɛ a. 33  Ɔluakɛ Nyamenle ɛnle basabasa Nyamenle, emomu ɔle anzodwolɛ Nyamenle.+ Kɛ mɔɔ ɔde ye wɔ nwuanzanwuanzama asafo ne mɔ amuala anu la, 34  bɛmaa mraalɛ ɛmua bɛ nloa wɔ asafo ne mɔ anu, ɔluakɛ bɛnlɛ adenle kɛ bɛkɛdendɛ.+ Emomu, bɛmaa bɛbɛlɛ bɛ nwo aze+ kɛ mɔɔ Mɛla ne noko ka la. 35  Saa bɛkulo kɛ bɛbiza edwɛkɛ bie a, bɛbiza bɛ hu mɔ wɔ sua nu, ɔluakɛ ɔle anyiemgba kɛ raalɛ kɛdendɛ wɔ asafo ne anu. 36  Asoo bɛ ɛkɛ ne a Nyamenle edwɛkɛ ne vi rale a, anzɛɛ bɛ ngome a yera bɛ ɛkɛ a? 37  Saa awie dwenle kɛ ɔle ngapezonli anzɛɛ ɔlɛ sunsum nu ahyɛlɛdeɛ a, ɛnee ɔwɔ kɛ ɔdie ɔto nu kɛ mɔɔ melɛkɛlɛ mearɛlɛ bɛ la le Awulae mɛla. 38  Noko saa awie bu ɔ nye gua ɛhye azo a, bɛbabu bɛ nye bɛagua ɔ nwo zo.* 39  Zɔhane ati, me mediema, bɛbɔ mɔdenle bɛha ngapezo,+ noko bɛmmatua aneɛ ngakyile ɛhanlɛ.+ 40  Noko bɛmaa debie biala ɛhɔ zo kɛnlɛma mɔɔ ngyehyɛleɛ wɔ nwo a.*+

Ɔbodwɛkɛ

Anzɛɛ “me ndelebɛbo.”
Anzɛɛ ɔkola ɔkile, “saa awie ɛnde ɔ bo a, bɛgyakyi ye.”
Anzɛɛ “wɔ adenle kpalɛ zo; pɛpɛɛpɛ.”