Mɔɔ Limoa Kɔmaa Kɔlentema 12:1-31

  • Sunsum ahyɛlɛdeɛ ne mɔ (1-11)

  • Sonlabaka ko, nvɛyeba dɔɔnwo (12-31)

12  Mediema, mekulo kɛ bɛnwu sunsum nu ahyɛlɛdeɛ ne mɔ+ kpalɛ.  Bɛdabɛ bɛze kɛ mekɛ mɔɔ ɛnee bɛle maanle maanle ne anu amra* la, awie mɔ luale ndenle dɔɔnwo azo maanle bɛzonlenle awozonle* mɔɔ ɛndendɛ la.+  Akee mekulo kɛ bɛnwu kɛ awie biala ɛnle ɛkɛ mɔɔ ɔlua Nyamenle sunsum ne azo ɔlɛtendɛ a ɔka kɛ: “Munzule ɛha Gyisɛse!” yɛɛ awie biala ɛngola ɛnga kɛ: “Gyisɛse le Awulae!” kyesɛ ɔlua sunsum nwuanzanwuanza ne azo.+  Ahyɛlɛdeɛ ne mɔ le ngakyile, noko sunsum ko ne ala a wɔ ɛkɛ a;+  na ɛzonlenlɛ gyima ne mɔ le ngakyile,+ noko Awulae kokye a wɔ ɛkɛ a;  yɛɛ gyima* ne mɔ le ngakyile, noko Nyamenle ko ne ala a boa menli kɔsɔɔti maa bɛkola bɛyɛ ninyɛne ɛhye mɔ amuala a.+  Na sunsum ne da ɔ nwo ali wɔ awie ko biala anu wɔ bodane kpalɛ bie ati.+  Na sunsum ne maa bie ka nrɛlɛbɛ edwɛkɛ,* yɛɛ ɔlua sunsum ko ne ala anwo zo bie ɛdendɛlɛ da ndelebɛbo ali,  sunsum ko ne ala maa bie nyia diedi,+ sunsum ko ne ala maa bie nyia ayileyɛlɛ ahyɛlɛdeɛ,+ 10  ɔmaa bie noko yɛ nwanwane gyima,+ bie ka ngapezo, bie te sunsum nu edwɛkɛ bo,+ bie ka aneɛ ngakyile,+ na bie kile aneɛ ngakyile bo.+ 11  Noko sunsum ko ne ala a yɛ gyima ɛhye mɔ amuala a, na ɔkyɛ ɔmaa awie biala kɛ mɔɔ ɔkulo la. 12  Na sonlabaka ne le ko noko ɔlɛ nvɛyeba dɔɔnwo, na kɛ mɔɔ sonlabaka zɔhane nvɛyeba ne mɔ zonle noko ɔle sonlabaka ko la,+ zɔhane ala a Kelaese noko de a. 13  Na bɛluale sunsum ko ne ala azo a bɛzɔnenle* yɛ muala bɛyɛle yɛ sonlabaka ko a, Dwuuma o, Gilikima o, ngɛkɛlɛ o, alehelɛ o, na bɛmaanle yɛ muala yɛnlonle sunsum ko. 14  Nɔhalɛ nu, sonlabaka ne ɛnlɛ nvɛyeba kokye, bɛzonle.+ 15  Saa egyakɛ ka kɛ, “Menle ɛsalɛ la ati, memboka sonlabaka ne anwo a,” ɛhye ɛngile kɛ ɔmboka sonlabaka ne anwo. 16  Na saa ɛnzolɛ ka kɛ, “Menle ɛnyelɛ la ati, memboka sonlabaka ne anwo a,” ɛhye ɛngile kɛ ɔmboka sonlabaka ne anwo. 17  Saa sonlabaka ne amuala le ɛnyelɛ a, anrɛɛ kɛ ɔkɛyɛ na yɛade edwɛkɛ ɛ? Saa ɔ muala le ɛnzolɛ a, anrɛɛ kɛ ɔkɛyɛ na yɛade nvoanle ɛ? 18  Noko Nyamenle ɛva nvɛyeba ko biala ɛdua sonlabaka ne anwo kɛ mɔɔ ɔkulo la. 19  Saa bɛ muala bɛle nvɛyeba ko a, anrɛɛ sonlabaka ne wɔ ni? 20  Nvɛyeba ne mɔ zonle, noko ɔle sonlabaka kokye. 21  Ɛnyelɛ ɛngola ɛnga ɛngile ɛsalɛ kɛ, “Ɛ nwo ɛngyia me,” anzɛɛ etile noko ɛngola ɛnga ɛngile egyakɛ kɛ, “Ɛ nwo ɛngyia me.” 22  Emomu, sonlabaka nvɛyeba ne mɔ mɔɔ ɔzɔho kɛ bɛle bɛtɛɛ la a nwolɛ hyia a, 23  na sonlabaka ne nvɛyeba ne mɔ mɔɔ yɛdwenle kɛ bɛmbu bɛ kpalɛ la, bɛmɛ a yɛdi bɛ eni kpole a,+ yemɔti yɛ nvɛyeba ne mɔ mɔɔ ɛnle ngɛnlɛma la a yɛnea bɛ boɛ kpalɛ a, 24  wɔ mekɛ mɔɔ yɛ nvɛyeba ngɛnlɛma ne mɔ ɛngyia ɛhwee la. Noko akee, Nyamenle ɛhyehyɛ sonlabaka ne na yemaa mɔɔ bɛmbu ye la ɛnyia enililɛ kpole, 25  amaa mgbakyemgbakyenu amba sonlabaka ne anu, emomu ɔwɔ kɛ ye nvɛyeba ne mɔ dwenle bɛ nwo ngoko ngoko.+ 26  Saa nvɛyeba ko nwu amaneɛ a, mɔɔ ɛha la amuala nee ye nwu amaneɛ;+ saa bɛwula ko anyunlunyia a, mɔɔ ɛha la amuala nee ye di fɛlɛko.+ 27  Kɛkala bɛle Kelaese sonlabaka,+ na bɛ nuhua ko biala le nvɛyeba.+ 28  Na Nyamenle ɛmaa awie biala gyinlabelɛ wɔ asafo ne anu: mɔɔ limoa la, ɛzoanvolɛma;+ mɔɔ tɔ zo nwiɔ, ngapezoma;+ mɔɔ tɔ zo nsa, kilehilevolɛma;+ akee nwanwane gyima;+ ayileyɛlɛ ahyɛlɛdeɛ;+ bɛdabɛ mɔɔ bɛboa awie mɔ; kɛzi bɛtoto ninyɛne boɛ;+ yɛɛ aneɛ ngakyile.+ 29  Asoo bɛ muala a bɛle ɛzoanvolɛma a? Asoo bɛ muala a bɛle ngapezoma a? Asoo bɛ muala a bɛle kilehilevolɛma a? Asoo bɛ muala a bɛyɛ nwanwane gyima a? 30  Asoo bɛ muala a bɛlɛ ayileyɛlɛ ahyɛlɛdeɛ a? Asoo bɛ muala a bɛka aneɛ ngakyile a?+ Asoo bɛ muala a bɛkile edwɛkɛ bo a?+ 31  Noko bɛbɔ mɔdenle bɛkpondɛ ahyɛlɛdeɛ mgbole kpalɛ ne mɔ.+ Na mebahile bɛ adenle mɔɔ tɛla ndenle mɔɔ ɛha amuala la.+

Ɔbodwɛkɛ

Ɛhye kile, bɛnle diedima.
Giliki aneɛ nu, “ananze.”
Anzɛɛ “gyimalilɛ.”
Anzɛɛ “nrɛlaleɛ.”
Anzɛɛ “bɛnlomanle.”