Edwɛkɛsisilɛ Mɔɔ Limoa 29:1-30

  • Ɛzonlenlɛsua ne anwo ndoboa (1-9)

  • Devidi asɔneyɛlɛ (10-19)

  • Menli ne lile fɛlɛko; Sɔlɔmɔn belemgbunlililɛ ne (20-25)

  • Devidi ewule (26-30)

29  Akee Belemgbunli Devidi zele asafo ne amuala kɛ: “Me ra Sɔlɔmɔn mɔɔ Nyamenle ɛkpa ye+ la le kakula yɛɛ ɔnlɛ anwubielɛ,*+ na gyima ne le kpole, ɔluakɛ ɔnle sonla ɛzonlenlɛsua,* emomu ɔle Gyihova Nyamenle ne ɛdeɛ.+  Na mebɔ mɔdenle kpalɛ meboɔboa ninyɛne nloa memaa me Nyamenle ne sua ne, nvutuke mɔɔ bɛbava bɛayɛ nvutuke gyima, dwɛtɛ fufule mɔɔ bɛbava bɛayɛ dwɛtɛ fufule gyima, kɔbele mɔɔ bɛbava bɛayɛ kɔbele gyima, mbulalɛ mɔɔ bɛbava bɛayɛ mbulalɛ gyima,+ mbaka+ mɔɔ bɛbava bɛayɛ ndaboa gyima, ɔnekese awolɛ yɛɛ awolɛ mɔɔ bɛbava mɔta bɛasosɔ ye, awolɛ ngyikyi ngɛnlɛma mɔɔ bɛfa bɛdi adwinli, awolɛ mɔɔ sonle bolɛ la biala bie yɛɛ alabaseta awolɛ dɔɔnwo kpalɛ.  Bieko, kɛmɔ me nye die me Nyamenle ne sua ne anwo la ati, melɛye medame mumua ne me ti anwo+ nvutuke nee dwɛtɛ fufule meavi me ninyɛnezielɛ ɛleka+ ne meamaa me Nyamenle ne sua ne, meava meaboka ninyɛne mɔɔ meboɔboa ɔ nloa memaa sua nwuanzanwuanza ne la amuala anwo,  Ofɛ nvutuke talɛnte* 3,000+ yɛɛ dwɛtɛ fufule mɔɔ bɛdu nuhua la talɛnte 7,000 mɔɔ bɛbaholo bɛagua azua ne mɔ bane ne mɔ anwo la boka nwo,  nvutuke mɔɔ bɛbava bɛayɛ nvutuke gyima yɛɛ dwɛtɛ fufule mɔɔ bɛbava bɛayɛ dwɛtɛ fufule gyima nee gyima mɔɔ dwinvolɛma ne bayɛ la amuala la. Kɛkala nwane mɔ a fi bɛ ɛhulolɛ nu ara bɛ nyunlu ɛnɛ na bɛava bɛ sa nu ahyɛlɛdeɛ bɛamaa Gyihova a?”+  Ɔti mbusua mgbanyima ne mɔ, Yizilayɛ mbusua ekpunli zo mgbanyima, mgbanyima mɔɔ nea menli apenle apenle nee ɛya ɛya nwo zo+ yɛɛ mgbanyima mɔɔ nea belemgbunli ne gyima zo+ la vile bɛ ɛhulolɛ nu rale bɛ nyunlu.  Na bɛvale ninyɛne ɛhye mɔ bɛmaanle kɛ bɛva bɛyɛ gyima wɔ nɔhalɛ Nyamenle ne sua ne anwo, nvutuke talɛnte 5,000, daleke* 10,000, dwɛtɛ fufule talɛnte 10,000, kɔbele talɛnte 18,000 yɛɛ bulalɛ talɛnte 100,000.  Awie biala mɔɔ lɛ awolɛ mɔɔ sonle bolɛ la vale guale Gyihova sua nu ɛkɛ ninyɛnezielɛ ɛleka ne mɔɔ Gɛhyɔnonli+ Gyɛhayɛle+ a nea zolɛ la anu.  Menli ne anye liele kɛ bɛvile bɛ ɛhulolɛ nu bɛbɔle afɔle ɛhye mɔ la, ɔluakɛ bɛvile ahonle mɔɔ di munli+ la anu a bɛbɔle afɔle ne bɛmaanle Gyihova a, na Belemgbunli Devidi noko anye liele kpole. 10  Akee Devidi yele Gyihova ayɛlɛ wɔ asafo ne amuala anyunlu. Devidi hanle kɛ: “O Gyihova, yɛ ze Yizilayɛ Nyamenle, ayɛlɛyelɛ ɛha wɔ dahuu.* 11  O Gyihova, kpoleyɛlɛ+ nee tumi+ nee kɛnlɛma nee anyunlunyia yɛɛ enililɛ+ le wɔ ɛdeɛ, ɔluakɛ debie biala mɔɔ wɔ anwuma nee azɛlɛ ye azo la le wɔ ɛdeɛ.+ O Gyihova,+ belemgbunlililɛ ne le wɔ ɛdeɛ. Ɛdawɔ a ɛkpogya ɛ nwo zo wɔ debie biala azo a. 12  Anwonyia nee anyunlunyia+ vi wɔ ɛkɛ, na ɛdi debie biala azo belemgbunli+ yɛɛ tumi+ nee kpoleyɛlɛ+ wɔ ɛ sa nu, na ɛ sa kola maa awie yɛ sonlakpole+ na ɛmaa menli kɔsɔɔti anwosesebɛ.+ 13  Ɔti, O yɛ Nyamenle, yɛyɛ wɔ mo, na yɛaye wɔ duma kɛnlɛma ne ayɛlɛ. 14  “Noko, medame a le nwane, yɛɛ me menli ne a le nwane mɔ mɔɔ yɛnyia nwolɛ adenle yɛlɛfi yɛ ɛhulolɛ nu yɛabɔ afɔle mɔɔ le kɛ ɛhye a? Ɔluakɛ debie biala vi wɔ ɛkɛ, yɛɛ yɛva mɔɔ vi ɛdawɔ mumua ne ɛ sa nu la yɛmaa wɔ. 15  Ɔluakɛ yɛle nyɛvolɛ nee adendulɛma wɔ ɛ nyunlu, kɛ mɔɔ ɛnee yɛ nenyia mɔ amuala de la.+ Ɔluakɛ yɛ mekɛ wɔ azɛlɛ ye azo le kɛ ɛlawolɛ+—yɛnlɛ anyelazo. 16  O Gyihova yɛ Nyamenle, anwonyia ɛhye mɔ mɔɔ yɛboɔboa ɔ nloa kɛ yɛfa yɛazi sua yɛamaa wɔ duma nwuanzanwuanza ne la, vi wɔ ɛkɛ, na ɔ muala le wɔ ɛdeɛ. 17  O me Nyamenle, meze ye bɔkɔɔ kɛ ɛneɛnlea ahonle nu+ yɛɛ ɛ nye die nɔhalɛlilɛ* nwo.+ Mevi me ahonle mɔɔ le tenlene* nee me ɛhulolɛ nu a meva ninyɛne ɛhye mɔ amuala memaa a, na me nye ɛlie kpole kɛ menwu kɛ wɔ menli mɔɔ wɔ ɛke la ɛvi bɛ ɛhulolɛ nu ɛva ninyɛne ɛbɔ afɔle ɛmaa wɔ la. 18  O Gyihova, yɛ nenyia mɔ Ebileham, Ayezeke nee Yizilayɛ Nyamenle, maa adwenle nee nzuzulɛ ɛhye mɔ ɛdɛnla wɔ menli ne ahonle nu dahuu, na kile bɛ ahonle ne mɔ adenle bɛla ɛ nwo ɛkɛ.+ 19  Na maa me ra Sɔlɔmɔn ahonle mɔɔ di munli,*+ amaa yeali wɔ mɛla,+ wɔ ngakyelɛ yɛɛ wɔ ngyehyɛleɛ ne mɔ azo na yeayɛ ninyɛne ɛhye mɔ amuala na yeazi ɛzonlenlɛsua* ne mɔɔ meboɔboa nwolɛ ninyɛne nloa la.”+ 20  Akee Devidi zele asafo ne amuala kɛ: “Kɛkala bɛye Gyihova bɛ Nyamenle ne ayɛlɛ, na asafo ne amuala yele Gyihova bɛ nenyia mɔ Nyamenle ne ayɛlɛ na bɛbɔle bɛ ti aze na bɛbutubutule bɛ nyunlu aze wɔ Gyihova nee belemgbunli ne anyunlu. 21  Na bɛhɔle zo bɛbɔle afɔle bɛmaanle Gyihova yɛɛ bɛbɔle ɛyelalɛ afɔle+ noko bɛmaanle Gyihova wɔ ye alehyenlɛ nu, nlankɛ nyinli mralɛ 1,000, mboane nyinli 1,000, mboane nyinli mralɛ 1,000 nee nwolɛ nza afɔlebɔdeɛ;+ bɛbɔle afɔle dɔɔnwo bɛmaanle Yizilayɛma amuala.+ 22  Bɛvale anyelielɛ kpole bɛhɔle zo bɛlile na bɛnlonle wɔ Gyihova anyunlu wɔ kenle zɔhane,+ na bɛziele Devidi ara Sɔlɔmɔn belemgbunli bieko na bɛkpokpale ye wɔ Gyihova anyunlu kɛ adekilevolɛ,+ yɛɛ bɛyɛle Zeedɔko noko ɛsɔfo.+ 23  Na Sɔlɔmɔn lile ye papa Devidi agyakɛ anu dɛnlanle Gyihova belemgbunli ebia ne azo+ lile belemgbunli, na ɔwiele ye boɛ, yɛɛ Yizilayɛma amuala diele ye. 24  Mgbanyima ne mɔ amuala,+ konle nu katakyiema ne+ yɛɛ Belemgbunli Devidi amra ne mɔ amuala+ noko bɛlɛle bɛ nwo aze maanle Belemgbunli Sɔlɔmɔn. 25  Na Gyihova maanle Sɔlɔmɔn yɛle sonlakpole kpalɛ wɔ Yizilayɛma amuala anye zo na ɔmaanle ɔnyianle anyunlunyia wɔ ye belemgbunlililɛ ne anu mɔɔ Yizilayɛ belemgbunli biala ɛtɛnyianle bie ɛlɛ a.+ 26  Ɛhye ati Gyɛsi ara Devidi lile tumi wɔ Yizilayɛma amuala anwo zo, 27  na mekɛ tendenle* mɔɔ ɔvale ɔlile belemgbunli wɔ Yizilayɛ la le ɛvolɛ 40. Ɔlile belemgbunli ɛvolɛ 7 wɔ Hibulɔn+ yɛɛ ɔlile belemgbunli ɛvolɛ 33 wɔ Gyɛlusalɛm.+ 28  Na ɔnyinle ɔyɛle ɛrelera kpalɛ na yeawu,+ ɔnyianle ngoane* tendenle, anwonyia nee anyunlunyia; na ɔ ra Sɔlɔmɔn ralile ɔ gyakɛ anu lile belemgbunli.+ 29  Belemgbunli Devidi anwo tetedwɛkɛ, ɔvi ye mɔlebɛbo kɔdwu ye awieleɛ, bɛhɛlɛ ye wɔ ɛnyelɛzodeɛnwunlɛnli* Samoɛle, ngapezonli Neetan+ yɛɛ ɛnyelɛzodeɛnwunlɛnli Gaade+ edwɛkɛ ne mɔ anu, 30  ɔ nee ye belemgbunlililɛ ne amuala, ye tumi kpole ne yɛɛ edwɛkɛ mɔɔ sisile ɔ nee Yizilayɛma yɛɛ arelemgbunlililɛ mɔɔ zuozua bɛ amuala mekɛ zo la.

Ɔbodwɛkɛ

Anzɛɛ “ɔtɛsieziele ɔ nwo.”
Anzɛɛ “suakunlu; belemgbunli sua.”
Talɛnte ko le kg 34.2. Nea Mok. B14.
Daleke le Pɛhyea nvutuke ezukoa bulalɛ. Nea Mok. B14.
Anzɛɛ “ɔvi dahuu ɔhɔdwu dahuu.”
Anzɛɛ “munlililɛ.” Nea Edwɛkɛbohilelɛ.
Anzɛɛ “anu te.”
Anzɛɛ “ɛdu ɔ nwo ɛmaa bɔkɔɔ la.”
Anzɛɛ “suakunlu; belemgbunli sua.”
Hibulu aneɛ nu, “kenle dodo.”
Hibulu aneɛ nu, “kenle.”
Hibulu edwɛkɛkpɔkɛ ne mɔɔ bɛvale bɛlile gyima wɔ ɛke la kile awie mɔɔ Nyamenle boa ye maa ɔnwu Ye ɛhulolɛdeɛ la.