Ɛzɛdɔso 18:1-27

  • Gyɛtulo nee Zepɔla rale (1-12)

  • Gyɛtulo dule folɛ kɛ bɛkpa ndɛnebuavolɛma (13-27)

18  Mosisi ase Gyɛtulo mɔɔ le Medean ɛsɔfo la,+ dele mɔɔ Nyamenle ɛyɛ ɛmaa Mosisi nee ye menli Yizilayɛma nee kɛzi Gyihova yele Yizilayɛma vile Yigyibiti la amuala.+  Mosisi ase Gyɛtulo nleanle Zepɔla, Mosisi aye ne, wɔ mekɛ mɔɔ ɔmaanle ɔziale ɔrale ɔ nwo ɛkɛ ne la,  nee Zepɔla amra mrenyia nwiɔ ne.+ Mosisi donle ɔ ra ne ko Gɛhyɔm,*+ ɔluakɛ ɔhanle kɛ, “Mele ɛyɛvolɛ wɔ azɛlɛ ɛhye azo,”  yɛɛ ɔdonle ko noko Ɛleyizɛ,* ɔluakɛ ɔhanle kɛ, “Me papa Nyamenle ne le me boavolɛ, ɔdaye a ɔliele me ɔvile Falo konle dadeɛ ne anloa a.”+  Yemɔti, Mosisi ase Gyɛtulo nee Mosisi amra ne mɔ yɛɛ ɔ ye rale Mosisi anwo ɛkɛ wɔ fienemgbole ne anu wɔ nɔhalɛ Nyamenle ne boka ne anwo, ɛleka mɔɔ ɔyɛle ye azokoɛleɛ ne la.+  Akee ɔdole Mosisi nrɛlaleɛ kɛ: “Medame, wɔ ase Gyɛtulo,+ me nee ɛ ye yɛɛ ɔ mra nwiɔ ne ɛlɛba ɛ nwo lɔ.”  Ɛkɛ ne ala, Mosisi hɔyiale ye ase, ɔbɔle ɔ ti aze na ɔvole ɔ nloa anwo. Bɛ nuhua ko biala bizale ɔ gɔnwo akpɔkɛ nu, na akee bɛhɔwolole ɛdanlɛsua ne anu.  Mosisi hanle debie biala mɔɔ ɔlua Yizilayɛma ati Gyihova ɛva ɛyɛ Falo nee Yigyibiti la,+ amaneɛ mɔɔ bɛnwunle ye wɔ adenle nu+ nee kɛzi Gyihova liele bɛ la amuala hilele ye ase.  Gyɛtulo lile fɛlɛko wɔ kpalɛ mɔɔ Gyihova yɛle maanle Yizilayɛma na ɔliele bɛ ɔvile Yigyibiti* la anwo. 10  Akee Gyɛtulo hanle kɛ: “Ayɛlɛyelɛ ɛha Gyihova mɔɔ liele bɛ vile Yigyibiti nee Falo asa anu, na ɔliele menli ne ɔvile Yigyibiti tumi bo la. 11  Kɛkala menwu kɛ Gyihova le kpole tɛla nyamenle mɔɔ ɛha la amuala,+ ɔlua mɔɔ ɔvale ɔyɛle menli mɔɔ memaanle bɛ nwo zo tiale ye menli ne la ati.” 12  Akee Mosisi ase Gyɛtulo vale ɛyelalɛ afɔlebɔdeɛ nee afɔlebɔdeɛ gyɛne rɛlɛle Nyamenle, na Aalɔn nee Yizilayɛ mgbanyima kɔsɔɔti nee Mosisi ase ne ralile debie wɔ nɔhalɛ Nyamenle ne anyunlu. 13  Aleɛ hyenle la, Mosisi dɛnlanle aze kɛ mɔɔ ɔyɛ ye dɛba la kɛ ɔdi menli ne edwɛkɛ, na menli ne hɔle zo ragyinlanle Mosisi anyunlu ɔvi nwonlomɔ kɔdwu nɔsolɛ. 14  Mɔɔ Mosisi ase ne nwunle mɔɔ ɔlɛyɛ yeamaa menli ne amuala la, ɔhanle kɛ: “Duzu a ɛlɛyɛ wɔamaa menli ne la? Duzu ati a ɛ ngomekye ɛkɛdɛnla ɛke na ɛkɛmaa menli ne amuala kɛgyinla ɛ nyunlu ɔvi nwonlomɔ kɔdwu nɔsolɛ ɛ?” 15  Mosisi buale ye kɛ: “Ɛralɛ ala a menli ne ba me nwo ɛke kɛ membiza debie wɔ Nyamenle ɛkɛ memaa bɛ a. 16  Saa edwɛkɛ bie si menli nwiɔ avinli a, bɛfa bɛbɛlɛ me kɛ menli memaa bɛ, na memaa bɛnwu nɔhalɛ Nyamenle ne kpɔkɛzilɛ nee ye mɛla ne mɔ.”+ 17  Mosisi ase ne zele ye kɛ: “Tɛ adenle kpalɛ mɔɔ ɔwɔ kɛ ɛdua zo ɛdi edwɛkɛ la ɛne. 18  Ɛ nee menli mɔɔ wɔ ɛ nwo ɛke la amuala bavɛ, ɔluakɛ adesoa ne bo ɛ nwo zo na ɛ ngomekye ɛnrɛhola ye soa. 19  Akee tie me. Metu wɔ folɛ, na Nyamenle nee wɔ balua.+ Wɔmɔ gyinla menli ne agyakɛ anu wɔ nɔhalɛ Nyamenle ne anyunlu,+ na fa edwɛkɛ biala to nɔhalɛ Nyamenle ne anyunlu.+ 20  Ɔwɔ kɛ ɛkilehile bɛ ngyehyɛleɛ nee mɛla ne mɔ,+ na ɛmaa bɛnwu adenle mɔɔ ɔwɔ kɛ bɛdua nu yɛɛ gyima mɔɔ ɔwɔ kɛ bɛyɛ la. 21  Noko ɔwɔ kɛ ɛkpa mrenyia mɔɔ fɛta+ na bɛsulo Nyamenle, bɛdi nɔhalɛ na bɛmkpondɛ nvasoɛ ɛtane la+ wɔ menli ne avinli na ɛyɛ bɛ mgbanyima ɛmaa bɛnea menli apenle apenle, menli ɛya ɛya, menli abulanlu abulanlu nee menli bulu bulu nwo zo.+ 22  Saa edwɛkɛ si menli ne avinli* a, ɔwɔ kɛ bɛsiezie. Bɛbava edwɛkɛ mɔɔ bo bɛ nwo zo la bɛarɛlɛ wɔ,+ na bɛali edwɛkɛ ngyikyi mɔɔ bara la. Maa bɛzoa wɔ adesoa ne bie na wɔ ɛvɛlɛ ne azo ɛde.+ 23  Saa ɛyɛ ɛhye na Nyamenle die to nu a, ɛbahola wɔazoa adesoa ne, na awie biala bava ahunlundwolɛ ahɔ sua nu.” 24  Mosisi diele ye ase edwɛkɛ ne na ɔyɛle mɔɔ ɔhanle ɔhilele ye la amuala ndɛndɛ. 25  Mosisi kpale mrenyia mɔɔ fɛta la wɔ Yizilayɛ amuala na ɔyɛle bɛ mgbanyima ɔmaanle bɛnleanle menli apenle apenle, menli ɛya ɛya, menli abulanlu abulanlu nee menli bulu bulu nwo zo. 26  Yemɔti bɛbuale menli ne ndɛne wɔ mekɛ mɔɔ edwɛkɛ bie kɛzi la. Bɛvale edwɛkɛ mɔɔ bo bɛ nwo zo la bɛrɛlɛle Mosisi+ na bɛdabɛ mumua ne bɛlile edwɛkɛ ngyikyi mɔɔ kɛra la. 27  Ɛhye anzi, Mosisi gyakyile ye ase ne adenle,+ na ɔmaanle ɔhɔle ye azɛlɛ zo.

Ɔbodwɛkɛ

Ɔ bo kile “Mele Ɛyɛvolɛ Wɔ Ɛkɛ.”
Ɔ bo kile “Me Nyamenle Ne Le Boavolɛ.”
Hibulu aneɛ nu, “ɔvile Yigyibiti asa anu.”
Hibulu aneɛ nu, “mekɛ biala.”