Ɛseta 8:1-17

  • Mɔdekae ɛnyia gyinlabelɛ kpole (1, 2)

  • Ɛseta zɛlɛle belemgbunli ne (3-6)

  • Belemgbunli ne lile mɛla fofolɛ (7-14)

  • Dwuuma anwo dɔle bɛ na bɛlile fɛlɛko (15-17)

8  Kenle zɔhane, Belemgbunli Ahazelɔse vale Heeman,+ Dwuuma kpɔvolɛ ne+ agyapadeɛ ne amuala maanle Ɔbahyema* Ɛseta; na Mɔdekae rale belemgbunli ne anyunlu, ɔluakɛ Ɛseta maanle ɔnwunle kɛzi ɔ nee ye bɔ abusua la.+  Akee belemgbunli ne yele ye tumi kpɔdelera ne+ mɔɔ ɔliele ɔvile Heeman ɛkɛ la na ɔvale ɔmaanle Mɔdekae. Na Ɛseta maanle Mɔdekae nleanle Heeman agyapadeɛ ne amuala azo.+  Ɛseta nee belemgbunli ne dendɛle bieko. Ɔdule ɔdɔle ɔ gyakɛ anu, ɔzunle na ɔzɛlɛle ye kɛ ɔye ngyegyelɛ mɔɔ Agagenli Heeman ɛva ɛra nee adwenle ɛtane mɔɔ ɔvale wɔ Dwuuma anwo la ɔvi ɛkɛ.+  Belemgbunli ne dendenle ye nvutuke kpɔma ne wɔ Ɛseta anwo zo,+ na Ɛseta dwazole gyinlanle belemgbunli ne anyunlu.  Ɔhanle kɛ: “Saa belemgbunli ne anye die nwo na menyia ɔ nyunlu ɛlolɛ, yɛɛ saa ɔle kpalɛ ɔmaa belemgbunli ne na ɔ nye ɛlie me nwo a, ɔmaa bɛhɛlɛ mɛla bɛhɔpɛ ngɛlata mɔɔ Agagenli+ Hamɛdeeta ara Heeman+ vale adwenle ɛtane hɛlɛle kɛ ɔmaa bɛazɛkye Dwuuma mɔɔ wɔ belemgbunli ne maanzinli ne mɔ amuala anu la anu.  Ɔluakɛ kɛ ɔkɛyɛ na meanlea ngyegyelɛ mɔɔ bara me menli ne anwo zo, yɛɛ kɛ ɔkɛyɛ na meanlea ɛzɛkyelɛ mɔɔ bado me mbusuafoɔ la ɛ?”  Yemɔti Belemgbunli Ahazelɔse zele Ɔbahyema Ɛseta nee Dwuunli Mɔdekae kɛ: “Bɛnlea! Meva Heeman agyapadeɛ ne amuala memaa Ɛseta+ yɛɛ memaa bɛhenda ye wɔ baka zo+ ɔlua adwenle ɛtane mɔɔ ɔvale kɛ ɔku* Dwuuma la ati.  Akee bɛbahola bɛahɛlɛ edwɛkɛ biala mɔɔ bɛnea a ɔbaboa Dwuuma la wɔ belemgbunli ne duma nu na bɛava belemgbunli ne tumi kpɔdelera ne bɛasisi zolɛ, ɔluakɛ bɛngola bɛmpɛ mɛla biala mɔɔ bɛhɛlɛ ye wɔ belemgbunli ne duma nu na bɛva belemgbunli ne tumi kpɔdelera ne bɛzi zolɛ la anu.”+  Yemɔti bɛvɛlɛle belemgbunli ne kɛlɛhɛlɛvolɛma bɛmaanle bɛrale wɔ zɔhane mekɛ ne, wɔ siane nsa ne, mɔɔ le Sivan* siane ne kenle mɔɔ tɔ zolɛ 23 la azo; bɛhɛlɛle edwɛkɛ biala mɔɔ Mɔdekae hanle la bɛhɔmaanle Dwuuma, maanzinli zo neavolɛma,+ amɛnladoma yɛɛ mgbanyima mɔɔ wɔ maanzinli ne mɔ anu la,+ ɔvi Yindia kɔdwu Yiteyopea, maanzinli 127; bɛvale aneɛ mɔɔ menli ne ka wɔ maanzinli biala anu yɛɛ bɛ ngɛlɛlera* a bɛhɛlɛle bɛ ngɛlata ne mɔ a, yɛɛ bɛvale Dwuuma aneɛ nee bɛ ngɛlɛlera* a bɛhɛlɛle bɛ ɛdeɛ ne a. 10  Ɔhɛlɛle ye wɔ Belemgbunli Ahazelɔse duma nu na ɔvale belemgbunli ne tumi kpɔdelera ne ɔsisile zolɛ+ na ɔvale ngɛlata ne mɔ mɔɔ bɛhɛlɛ la ɔzoanle soanvolɛma mɔɔ ka mgbɔnwɔ la; bɛvale belemgbunli sua nu mgbɔnwɔ mɔɔ anwo yɛ ndɛ la a bɛhɔle a. 11  Wɔ ngɛlata ɛhye mɔ anu, belemgbunli ne maanle Dwuuma mɔɔ wɔ azua ngakyile ne mɔ amuala azo la adenle kɛ bɛboɔboa bɛ nloa na bɛho bɛlie bɛ nwo;* bɛhu aneɛ anzɛɛ maanzinli biala anu ɛlɔne mɔɔ bara bɛ nwo zo la, bɛzɛkye bɛ na bɛbɔ bɛ bo zo bɔkɔɔ, mraalɛ nee ngakula, na bɛva bɛ agyapadeɛ.+ 12  Ɛnee ɛhye bazi kenle ko ne ala wɔ Belemgbunli Ahazelɔse maanzinli ne mɔ amuala anu, siane 12 ne, mɔɔ le Eda* siane ne kenle mɔɔ tɔ zo 13 la azo.+ 13  Ɛnee ngɛlata ne mɔ anu edwɛkɛ ne bayɛ mɛla wɔ maanzinli ne mɔ amuala anu. Ɛnee ɔwɔ kɛ bɛbɔ ye nolo bɛkile menli ne amuala amaa Dwuuma aziezie bɛ nwo wɔ kenle zɔhane na bɛaho bɛatia bɛ agbɔvolɛ.+ 14  Soanvolɛma ne mɔɔ ka mgbɔnwɔ la vale belemgbunli sua nu mgbɔnwɔ ne mɔ na bɛhanle bɛ nwo bɛhɔle ndɛndɛ kɛ mɔɔ belemgbunli ne hanle la. Eza bɛlile mɛla ne wɔ Hyuhyan*+ belemgbunli sua nu ɛkɛ.* 15  Akee Mɔdekae vi belemgbunli ne anyunlu hɔle mɔɔ ɛnee ɔwula belemgbunli tɛladeɛ mɔɔ bɛva ɛdanlɛ buluwu nee fufule bɛnwo la, ɔbɔ nvutuke abotile kɛnlɛma bie yɛɛ ye tɛladeɛ aguzo ne le ɛdanlɛ kpalɛ anye kɔkɔlɛ nee buluwu afonla.+ Na menli mɔɔ wɔ Hyuhyan* la vale anyelielɛ deɛdeanle nu. 16  Akee Dwuuma anwo dɔle bɛ,* bɛ nye liele na bɛlile fɛlɛko, yɛɛ bɛlile bɛ eni. 17  Wɔ maanzinli ne mɔ anu nee azua mɔɔ bɛdele belemgbunli ne mɛla ne wɔ zo la kɔsɔɔti azo, Dwuuma anye liele na bɛlile fɛlɛko, bɛdole ɛkponle mgbole na bɛliele bɛ nye. Maanle ne anu menli dɔɔnwo hanle kɛ bɛle Dwuuma+ ɔluakɛ Dwuuma anwo ɛzulolɛ dɔle bɛ nwo zo.

Ɔbodwɛkɛ

Anzɛɛ “Belemgbunli Raalɛ.”
Hibulu aneɛ nu, “ɔluakɛ ɔvale ɔ sa ɔhanle.”
Anzɛɛ “yɛɛ kɛzi bɛkɛlɛ bɛ edwɛkɛ la.”
Anzɛɛ “nee kɛzi bɛkɛlɛ bɛ edwɛkɛ la.”
Anzɛɛ “ɛkɛla.”
Anzɛɛ “Susa.”
Anzɛɛ “aranemgbole ne anu.”
Anzɛɛ “Susa.”
Hibulu aneɛ nu, “wienyi dale Dwuuma anwo zo.”