Ɛseta 3:1-15

  • Belemgbunli ne kpogyale Heeman zo (1-4)

  • Heeman ɛva adwenle kɛ ɔsɛkye Dwuuma (5-15)

3  Nzinlii, Belemgbunli Ahazelɔse kpogyale Agagenli Hamɛdeeta ara Heeman+ zo na ɔmaanle ye gyinlabelɛ titili ɔdɛlale mgbanyima mɔɔ ɛha la kɔsɔɔti.+  Na ɛnee belemgbunli ne sonvolɛma mɔɔ wɔ belemgbunli anlenkɛ kpole ne anloa la kɔsɔɔti bɔ bɛ ti aze maa Heeman na bɛkoto ye, ɔluakɛ zɔhane a belemgbunli ne hanle kɛ bɛyɛ bɛmaa ye a. Noko Mɔdekae ambɔ ɔ ti aze ammaa ye yɛɛ yeangoto ye.  Ɔti belemgbunli sonvolɛma mɔɔ wɔ belemgbunli anlenkɛ kpole ne anloa la zele Mɔdekae kɛ: “Duzu ati a ɛnli belemgbunli ne mɛla ne azo a?”  Bɛbizale ye alehyenlɛ biala, noko yeandie bɛ. Akee bɛhanle bɛhilele Heeman amaa bɛanlea saa Mɔdekae bahola ahɔ zo ayɛ mɔɔ ɔlɛyɛ la a;+ ɔluakɛ ɛnee yeha yehile bɛ kɛ ɔle Dwuunli.+  Mɔɔ Heeman nwunle kɛ Mɔdekae ɛmbɔ ɔ ti aze ɛmmaa ye na ɔngoto ye la, ɔvale ɛya kpole.+  Noko ɔ kunlu andwo nwolɛ kɛ ɔbahu* Mɔdekae angomekye, ɔluakɛ ɛnee bɛha Mɔdekae menli ne anwo edwɛkɛ bɛhile ye. Yemɔti Heeman bɔle ɔ bo kɛ ɔkpondɛ adenle mɔɔ ɔbalua zo yeabɔ Dwuuma kɔsɔɔti mɔɔ wɔ Ahazelɔse belemgbunlililɛ ne amuala anu la abo zo, Mɔdekae menli ne amuala.  Wɔ siane ne mɔɔ limoa la anu, mɔɔ le Naesan* siane ne, wɔ Belemgbunli Ahazelɔse ɛvolɛ 12+ ne anu, bɛguale Pulu+ (mɔɔ le Ma Ɛgualɛ)* wɔ Heeman anyunlu kɛ bɛnea kenle ne nee siane ne, na ɔbɔle siane 12 ne, mɔɔ le Eda*+ la.  Akee Heeman zele Belemgbunli Ahazelɔse kɛ: “Menli bie mɔɔ bɛ mɛla le ngakyile fi menli mɔɔ ɛha la kɔsɔɔti ɛdeɛ ne anwo la, ɛde ɛkponde menli mɔɔ wɔ maanzinli ne mɔ mɔɔ wɔ wɔ belemgbunlililɛ ne amuala anu la anu;+ bɛnli belemgbunli ne mɛla zo, na ɔnle kpalɛ kɛ belemgbunli ne kɛgyakyi bɛ.  Saa belemgbunli ne anye kɛlie nwo a, ɔmaa bɛhɛlɛ mɛla bie kɛ bɛzɛkye bɛ. Mebadua dwɛtɛ fufule talɛnte* 10,000 meamaa mgbanyima ne mɔ ava agua belemgbunli ne gya nu.”* 10  Ɛhye ati belemgbunli ne yele ye tumi kpɔdelera+ ne ɔ sa na ɔvale ɔmaanle Agagenli+ Hamɛdeeta ara Heeman+ mɔɔ ɛnee le Dwuuma kpɔvolɛ la. 11  Belemgbunli ne zele Heeman kɛ: “Dwɛtɛ fufule ne nee menli ne wɔ ɛ sa nu, fa mɔɔ ɛnea a ɔfɛta la yɛ bɛ.” 12  Akee bɛvɛlɛle belemgbunli ne kɛlɛhɛlɛvolɛma+ ne mɔ wɔ siane ne mɔɔ limoa la kenle ne mɔɔ tɔ zolɛ 13 la azo. Bɛhɛlɛle+ Heeman edwɛkɛ ne amuala bɛhɔmaanle belemgbunli ne maanzinli zo neavolɛma, amɛnladoma mɔɔ nea maanzinli ne mɔ azo nee aneɛ ngakyile ne mɔ anu mgbanyima; aneɛ mɔɔ menli ne ka wɔ maanzinli biala anu nee bɛ ngɛlɛlera* a bɛvale bɛhɛlɛle ngɛlata ne mɔ a. Bɛhɛlɛle ye wɔ Belemgbunli Ahazelɔse duma nu na bɛvale ye tumi kpɔdelera ne bɛsisile zolɛ.+ 13  Bɛvale ngɛlata ne mɔ bɛzoanle soanvolɛma bɛmaanle bɛvale bɛhɔle belemgbunli ne maanzinli ne amuala anu kɛ bɛhu Dwuuma amuala, bɛzɛkye bɛ na bɛbɔ bɛ bo zo bɔkɔɔ, mgbavolɛ nee mgbanyinli, ngakula nee mraalɛ, wɔ kenle ko pɛ anu wɔ siane 12 ne, mɔɔ le Eda siane ne+ kenle mɔɔ tɔ zo 13 la azo na bɛsesa bɛ nwo ninyɛne.+ 14  Bɛmaanle kɛlata ne anu edwɛkɛ ne yɛle mɛla wɔ maanzinli biala anu na bɛbɔle ye nolo bɛhilele menli ne amuala, amaa bɛaziezie bɛ nwo bɛamaa kenle zɔhane. 15  Soanvolɛma ne hɔle ndɛndɛ+ kɛ mɔɔ belemgbunli ne hanle la; bɛlile mɛla ne wɔ Hyuhyan*+ belemgbunli sua nu ɛkɛ.* Akee belemgbunli ne nee Heeman dɛnlanle aze kɛ bɛno nwanye, noko ɛnee suakpole Hyuhyan* azo ɛyɛ begyebegye.

Ɔbodwɛkɛ

Hibulu aneɛ nu, “kɛ ɔ sa baha.”
Talɛnte ko le kg 34.2. Nea Mok. B14.
Anzɛɛ ɔkola ɔkile, “Mebadua talɛnte 10,000 meagua belemgbunli ne gya nu meamaa menli mɔɔ bɛbayɛ gyima ɛhye la.”
Anzɛɛ “nee kɛzi bɛkɛlɛ bɛ edwɛkɛ la.”
Anzɛɛ “Susa.”
Anzɛɛ “aranemgbole ne anu.”
Anzɛɛ “Susa.”