Ɛseta 2:1-23

  • Ɔbahyema fofolɛ ɛkpondɛlɛ (1-14)

  • Ɛseta ɛyɛ ɔbahyema (15-20)

  • Mɔdekae maanle adwenle ɛtane bie lale ali (21-23)

2  Nzinlii mɔɔ Belemgbunli Ahazelɔse+ ɛya ne hanle aze la, ɔhakyele mɔɔ Vahyetae yɛle+ nee mɔɔ bɛhanle kɛ bɛbava bɛayɛ ye la.+  Akee belemgbunli mumua ne azonvolɛ ne mɔ hanle kɛ: “Ɔwɔ kɛ bɛkpondɛ mbɛlɛra mɔɔ bɛ nwo yɛ fɛ na bɛnze mrenyia la bɛmaa belemgbunli ne.  Maa belemgbunli ne ɛkpa menli wɔ maanzinli mɔɔ wɔ ye belemgbunlililɛ ne amuala anu+ la ɔmaa bɛboɔboa mbɛlɛra mɔɔ bɛ nwo yɛ fɛ na bɛnze mrenyia la amuala anloa bɛrɛla Hyuhyan* belemgbunli sua nu ɛkɛ* mraalɛ sua ne anu. Bɛmaa bɛva bɛ bɛwula Higae+ mɔɔ le belemgbunli ne sonvolɛ* na ɔnea mraalɛ ne mɔ anwo zo la asa nu na bɛmaa bɛva nwole bɛkpokpa bɛ bɛmaa bɛ nwo ɛyɛ fɛ.  Na bɛlɛra ne mɔɔ belemgbunli ne anye balie ɔ nwo kpalɛ la bayɛ ɔbahyema* azie Vahyetae abo zo.”+ Belemgbunli ne anye liele nzuzulɛ ne anwo na zɔhane a ɔyɛle a.  Ɛnee Dwuunli nrenyia bie wɔ Hyuhyan*+ belemgbunli sua nu ɛkɛ,* bɛfɛlɛ ye Mɔdekae,+ ɔle Gyeeyɛ ara, Hyemɛyae ara, Bɛngyamanli+ Kehye ara,  ɔboka menli mɔɔ Babelɔn Belemgbunli Nɛbukadenɛza vale bɛ nee Dwuda Belemgbunli Gyɛkonaya*+ vile Gyɛlusalɛm hɔle akɛlɛzonlenlɛ nu la anwo.  Ɔdaye a ɔtetele* Hadasa,* mɔɔ le Ɛseta, ye papa adiema nrenyia ara raalɛ ne a,+ ɔluakɛ ɛnee ɔnlɛ ye papa anzɛɛ ye mame. Ɛnee bɛlɛra ne anwo yɛ fɛ yɛɛ ɔgyi zo sengɔɔnwo. Mɔɔ ye papa nee ye mame wule la, Mɔdekae vale ye kɛ ɔ ra raalɛ.  Mɔɔ bɛbɔle belemgbunli ne edwɛkɛ ne nee ye mɛla ne nolo la, bɛboɔboale mbɛlɛra dɔɔnwo anloa bɛrale Hyuhyan* belemgbunli sua nu* na bɛvale bɛ bɛwulale Higae asa.+ Bɛvale Ɛseta noko bɛhɔle belemgbunli ne sua nu na bɛvale ye bɛwulale Higae mɔɔ nea mraalɛ ne mɔ anwo zo la asa anu.  Higae hulole bɛlɛra ne edwɛkɛ na ɔnyianle ɔ nyunlu ɛlolɛ,* yemɔti ɔyɛle ye nwole ɛkpokpalɛ+ nee ye aleɛlilɛ nwo ngyehyɛleɛ ndɛndɛ, na ɔkpale mbɛlɛra nsuu wɔ belemgbunli sua nu ɛkɛ ne ɔmaanle ye. Eza ɔyele ye nee ye mbɛlɛra mɔɔ sonle ye la ɔhɔle mraalɛ sua nu ɛleka kpalɛ ne. 10  Ɛseta anga ye menli ne anzɛɛ ye mbusuafoɔ anwo edwɛkɛ biala,+ ɔluakɛ Mɔdekae+ hanle hilele ye kɛ ɔmmaka ɔkile awie biala.+ 11  Alehyenlɛ biala Mɔdekae kɔfa mraalɛ sua ne anyunlu kɛ ɔnea kɛzi Ɛseta anwo de nee mɔɔ ɛlɛsi ɔ nwo zo la. 12  Saa bɛlɛra biala wie ye siane 12 nwole ne mɔɔ ɔwɔ kɛ mraalɛ ne mɔ kpokpa la a, ɔwɔ kɛ ɔfa ɔ nwo ɔkɔkile Belemgbunli Ahazelɔse, ɔluakɛ zɔhane a bɛhyehyɛle kɛ bɛkpokpa bɛ nwole a—bɛkpokpa bɛ alufuanlɛ+ nwole siane nsia yɛɛ balesam nwole+ nee nwole gyɛne noko siane nsia. 13  Ɛnee akee mekɛ ɛdwu mɔɔ ɔwɔ kɛ bɛlɛra ne kɔ belemgbunli ne ɛkɛ a, na debie biala mɔɔ ɔbabiza la bɛbava bɛamaa ye wɔ mekɛ mɔɔ ɔlɛfi mraalɛ sua ne anu yeahɔ belemgbunli ne sua nu la. 14  Ɔkɔ ɛkɛ ne nɔsolɛ nu, na nwonlomɔ nu yeazia yeahɔ mraalɛ sua ne mɔɔ tɔ zo nwiɔ mɔɔ Hyeeyahyegaze, belemgbunli sonvolɛ*+ mɔɔ nea ye nwewe* ne mɔ anwo zo la a nea zolɛ la anu. Ɔngɔ belemgbunli ne ɛkɛ bieko, kyesɛ belemgbunli ne anye liele ɔ nwo kpalɛ na ɔbɔ ye duma ɔfɛlɛ ye bieko.+ 15  Na mɔɔ Mɔdekae papa adiema Abeheli ara raalɛ Ɛseta, mɔɔ ɛnee yeva ye kɛ ɔ ra raalɛ+ la mekɛ dwule kɛ ɔkɔ belemgbunli ne ɛkɛ la, yeambiza debie biala kɛ mɔɔ Higae, belemgbunli ne sonvolɛ mɔɔ nea mraalɛ ne mɔ anwo zo la hanle kɛ ɔva la ala. (Mekɛ zɔhane amuala anu, Ɛseta nyianle awie biala mɔɔ nwunle ye la anyunlu ɛlolɛ.) 16  Bɛvale Ɛseta bɛhɔle Belemgbunli Ahazelɔse sua nu ɛkɛ wɔ siane ne mɔɔ tɔ zo bulu, mɔɔ le Tibɛte* siane ne, wɔ ye tumililɛ ne ɛvolɛ mɔɔ tɔ zo nsuu+ la anu. 17  Na belemgbunli ne hulole Ɛseta kpalɛ dɛlale mraalɛ mɔɔ ɛha la amuala na ɔnyianle ɔ nyunlu ɛlolɛ na ɔliele ye ɔdole nu* ɔdɛlale mbɛlɛra mɔɔ ɛha la. Yemɔti ɔvale abotile ne ɔzoale ye na ɔyɛle ye ɔbahyema+ ɔziele Vahyetae agyakɛ anu.+ 18  Na belemgbunli ne dole ɛkponle kpole kpalɛ maanle ye mgbanyima nee ye sonvolɛma kɔsɔɔti, Ɛseta ɛkponledolɛ ne. Akee belemgbunli ne maanle maanzinli ne mɔ nyianle fanwodi na ɔnleanle mɔɔ ɔlɛ la anwo ɔhyɛle ninyɛne dɔɔnwo. 19  Na ye fane nwiɔ ne azo mɔɔ bɛboɔboale mbɛlɛra mɔɔ bɛnze mrenyia+ anloa la, ɛnee Mɔdekae de belemgbunli anlenkɛ kpole ne anloa. 20  Ɛseta anga ye mbusuafoɔ nee ye menli ne anwo edwɛkɛ biala,+ kɛ mɔɔ Mɔdekae hanle hilele ye la; Ɛseta hɔle zo yɛle mɔɔ Mɔdekae hanle la kɛ mekɛ mɔɔ ɛnee ɔ nee ye de ala la.+ 21  Mekɛ zɔhane mɔɔ ɛnee Mɔdekae de belemgbunli ne anlenkɛ kpole ne anloa la, Begetan nee Tilɛhye, belemgbunli ne mgbanyima nwiɔ mɔɔ sinza nlenkɛ ne mɔ la vale ɛya na bɛbɔle adwenle kɛ bɛku Belemgbunli Ahazelɔse. 22  Noko Mɔdekae dele edwɛkɛ ne anwo bie, na ɔbɔle Ɔbahyema Ɛseta amaneɛ ndɛndɛ. Akee Ɛseta gyinlanle Mɔdekae agyakɛ anu hanle edwɛkɛ ne hilele belemgbunli ne. 23  Yemɔti bɛnleɛnleanle edwɛkɛ ne anu na bɛnwunle kɛ ɔle nɔhalɛ la, bɛhendanle mrenyia nwiɔ ne wɔ baka zo. Bɛhɛlɛle ɛhye mɔ amuala wɔ bɛ mekɛ zo tetedwɛkɛ buluku nu wɔ belemgbunli ne anyunlu.+

Ɔbodwɛkɛ

Anzɛɛ “Susa.”
Anzɛɛ “aranemgbole ne anu.”
Wɔ Hibulu aneɛ nu sonvolɛ ɛhye kile awie mɔɔ bɛza ye la.
Anzɛɛ “belemgbunli raalɛ.”
Anzɛɛ “Susa.”
Anzɛɛ “aranemgbole ne anu.”
Bɛvɛlɛle ye Gyɛhɔyaken wɔ 2Ar 24:8.
Anzɛɛ “ɔnleanle.”
Ɔ bo kile “Mɛtɛle.”
Anzɛɛ “Susa.”
Anzɛɛ “aranemgbole ne anu.”
Anzɛɛ “ɛlɔlɛ kpundii.”
Hibulu aneɛ nu sonvolɛ ɛhye kile awie mɔɔ bɛza ye la.
Nea Gyn 22:24 ɔbdw.
Anzɛɛ “nee ɛlɔlɛ kpundii.”