Yekile 13:1-18

  • Nane anwo ɛzulolɛ ati nsuu vi nyevile nu finde (1-10)

  • Nane mɔɔ lɛ mɛne nwiɔ vi azɛlɛ ne anu finde (11-13)

  • Nane ati nsuu ne ananze (14, 15)

  • Nane ne nzonlɛyɛlɛ nee ye nɔma (16-18)

13  Na ɔhɔgyinlanle* nyevile ne anloa ɛnwea ne azo. Na menwunle nane anwo ɛzulolɛ bie kɛ ɔvi nyevile ne anu ɔlɛfinde, ɔlɛ mɛne bulu yɛɛ ɔ ti le nsuu, na abotile bulu bobɔ ye mɛne ne anwo, na munzule aluma bobɔ ɔ ti anwo.  Na nane ne mɔɔ menwunle ye la le kɛ sobolɛ, ɔ gyakɛ le kɛ ezizile gyakɛ, yɛɛ ɔ nloa le kɛ awenade nloa. Na ɛwɔlɛ ne vale ye anwosesebɛ nee ye belemgbunli ebia ne nee tumi kpole ne maanle nane ne.  Menwunle kɛ ɔ ti ne ko zɔho kɛ bɛbodale ye kpole bie, noko hanlɛ ne ɛhɔ, na azɛlɛ ye azo amra amuala dule doale nane ne na ɔ nwo yɛle bɛ ɛzulolɛ.  Na bɛzonlenle ɛwɔlɛ ne ɔluakɛ ɔmaanle nane anwo ɛzulolɛ ne tumi, na bɛzonlenle nane ne na bɛhanle kɛ: “Nwane a le kɛ nane ne a, na nwane a kɛhola nee ye kɛho a?”  Bɛmaanle ye ɛnloanlɛ mɔɔ ka edwɛkɛ mgbole nee munzule edwɛkɛ, na bɛmaanle ye tumi kɛ ɔyɛ mɔɔ ɔkulo la siane 42.  Na ɔbukele ɔ nloa ɔhanle munzule edwɛkɛ ɔtiale Nyamenle, ye duma nee ɛleka mɔɔ ɔde, bɔbɔ bɛdabɛ mɔɔ bɛwɔ anwuma lɔ la.  Bɛmaanle ye adenle kɛ ɔ nee nwuanzanwuanzama ne ɛho na ɔli bɛ nwo zo konim, na bɛmaanle ye tumi wɔ mbusua nee menli nee aneɛ nee maanle biala anwo zo.  Na menli mɔɔ de azɛlɛ ye azo la amuala bazonle ye. Bɛangɛlɛ bɛ nuhua biala duma wɔ Boaneralɛ ne mɔɔ bɛhunle ye la ngoane buluku ne anu, ɔvi mekɛ mɔɔ bɛbɔle ewiade la.  Saa awie lɛ ɛnzolɛ a, maa ɔdie. 10  Saa ɔwɔ kɛ awie kɔ akɛlɛzonlenlɛ nu a, ɔbahɔ akɛlɛzonlenlɛ nu. Saa awie bava dadeɛ ahu awie a,* ɔwɔ kɛ bɛfa dadeɛ bɛku ye. Ɛke a abotane* nee diedi nwo hyia wɔ nwuanzanwuanzama ne afoa nu a. 11  Akee menwunle nane anwo ɛzulolɛ bieko kɛ ɔvi azɛlɛ ne anu ɔlɛfinde, ɛnee ɔlɛ mɛne nwiɔ kɛ boane, noko ɔbɔle ɔ bo ɔdendɛle kɛ ɛwɔlɛ la. 12  Ɔfa alimoa nane anwo ɛzulolɛ ne tumi ne amuala ɔyɛ gyima wɔ ɔ nyunlu. Na ɔmaa azɛlɛ ye nee menli mɔɔ de zo la sonle alimoa nane ne mɔɔ bɛyɛle ye hanlɛ ne ayile la. 13  Na ɔyɛ nwanwane ninyɛne mgbole, ɔmaa senle bɔbɔ fi anwuma ba azɛlɛ ye azo wɔ alesama anyunlu. 14  Ɔlua sɛkɛlɛneɛ mɔɔ bɛmaa ɔyɛ ye wɔ nane ne anyunlu la ati, ɔbɛlɛbɛla menli mɔɔ de azɛlɛ ne azo la kɛ bɛyɛ ananze bɛmaa nane ne mɔɔ dadeɛ pɛle ye noko yenyia anwosesebɛ bieko la. 15  Na bɛmaanle ye adenle kɛ ɔva ɛnwomenle* ɔmaa nane ne ananze ne, amaa nane ne ananze ne adendɛ na yeamaa bɛahu menli kɔsɔɔti mɔɔ bɛkɛkpo kɛ bɛkɛzonle nane ne ananze ne la. 16  Ɔyɛle ye kyengye kɛ menli kɔsɔɔti—mgbole nee ngyikyi, sukoavolɛma nee ehyiavolɛma, alehelɛ nee ngɛkɛlɛ—ɛmaa bɛyɛ bɛ nzonlɛ wɔ bɛ sa fema ne anwo anzɛɛ bɛ nwoma azo, 17  na awie biala ɛngola ɛndɔ anzɛɛ ɛndɔne debie, kyesɛ mɔɔ lɛ nzonlɛyɛlɛ ne bie, nane ne duma anzɛɛ ye duma ne nɔma ne la. 18  Ɛke a nrɛlɛbɛ nwo hyia a: Bɛmaa mɔɔ lɛ nwunu la ɛbu nane ne nɔma ne anwo mgbonda, ɔluakɛ ɔle sonla nɔma, na ye nɔma ne le 666.

Ɔbodwɛkɛ

Ɛhye kile, ɛwɔlɛ ne hɔgyinlanle.
Anzɛɛ ɔkola ɔkile, “Saa ɔwɔ kɛ bɛfa dadeɛ bɛku awie a.”
Anzɛɛ “kpundiigyinlanlɛ.”
Anzɛɛ “sunsum.”