Yekile 11:1-19

  • Alasevolɛ nwiɔ ne (1-13)

    • Bɛhedale ɛrele bɛhanle ngapezo kenle 1,260 (3)

    • Bɛhunle bɛ yɛɛ bɛanzie bɛ (7-10)

    • Bɛdwazole bɛ kenle nsa nee foa anzi (11, 12)

  • Gyakɔ mɔɔ tɔ zo nwiɔ ɛpɛ nu, mɔɔ tɔ zo nsa ɛlɛba (14)

  • Aweɛne tendenle mɔɔ tɔ zo nsuu (15-19)

    • Yɛ Awulae nee ye Kelaese Belemgbunlililɛ (15)

    • Bɛbazɛkye bɛdabɛ mɔɔ bɛlɛsɛkye azɛlɛ ne la (18)

11  Na bɛvale ndɔ baka* mɔɔ le kɛ kpɔma* la bɛmaanle me na ɔhanle kɛ: “Dwazo na suzu Nyamenle ɛzonlenlɛ sua ne nee afɔlemokyea ne nee menli mɔɔ ɛlɛsonle wɔ ɛkɛ la.  Noko alienwo ne mɔɔ wɔ ɛzonlenlɛ sua ne anzi la ɛdeɛ, ye fi nu na mmasuzu, ɔluakɛ bɛva bɛmaa maanle maanle ne na bɛbatietia sua nwuanzanwuanza ne azo siane 42.  Mebamaa me alasevolɛ nwiɔ aheda ɛrele na bɛaha ngapezo kenle 1,260.”  Ɛhye mɔ a bɛva ɔlivi mbaka nwiɔ ne nee kɛnlaneɛ mbaka nwiɔ ne bɛyɛ bɛ nwo sɛkɛlɛneɛ a, na bɛgyigyi azɛlɛ Menle ne anyunlu.  Saa awie kpondɛ kɛ ɔsɛkye bɛ a, senle vi bɛ nloa anu finde basɛkye bɛ agbɔvolɛ. Saa awie kpondɛ kɛ ɔsɛkye bɛ a, kɛ ɔwɔ kɛ bɛku ye la ɛne.  Ɛhye mɔ lɛ tumi to anwuma nu mɔɔ ezule ɛndɔ wɔ mekɛ mɔɔ bɛlɛka bɛ ngapezo ne la, yɛɛ bɛlɛ nzule zo tumi bɛkola bɛmaa ɔkakyi mogya na bɛfa ewulenzane biala bɛba azɛlɛ ye azo wɔ mekɛ biala mɔɔ bɛkulo la.  Saa bɛwie bɛ daselɛlilɛ ne a, nane anwo ɛzulolɛ ne mɔɔ vi kuma kuloonwu ne anu bavinde la nee bɛ baho na yeali bɛ nwo zo konim na yeahu bɛ.  Na bɛ avunli badeda suakpole ne gua ne mɔɔ bɛfɛlɛ ye Sodɔm nee Yigyibiti wɔ sunsum nu la azo, ɛleka mɔɔ bɛhunle bɛ Awulae wɔ baka zo la.  Na menli nee mbusua nee aneɛ nee maanle maanle banlea bɛ avunli kenle nsa nee foa, na bɛnrɛmaa bɛnrɛzie bɛ. 10  Na menli mɔɔ de azɛlɛ ne azo la lile bɛ nwo fɛlɛko na bɛ nye liele, na bɛbava ahyɛlɛdeɛ bɛamaa bɛ nwo ngoko, ɔluakɛ ngapezoma nwiɔ ɛhye mɔ hilele menli mɔɔ de azɛlɛ ne azo la nyane. 11  Kenle nsa nee foa ne anzi, ngoane sunsum vi Nyamenle ɛkɛ rawolole bɛ nu, na bɛdwazole bɛgyinlanle bɛ gyakɛ azo, na ɛzulolɛ kpole hanle menli mɔɔ nwunle bɛ la. 12  Na bɛdele kɛ ɛnelɛ kpole bie vi anwuma ɛlɛka ahile bɛ kɛ: “Bɛvo bɛrɛla ɛke.” Na bɛvole bɛhɔle anwuma wɔ amungu ne anu, na bɛ agbɔvolɛ nwunle bɛ.* 13  Mekɛ ne anu ala, azɛlɛkpusulɛ kpole bie zile, na sua ne ngyɛnu bulu anu ko zɛkyele; na azɛlɛkpusulɛ ne hunle menli 7,000 na menli mɔɔ hale la ahonle dule na bɛwulale Nyamenle mɔɔ wɔ anwuma la anyunlunyia. 14  Gyakɔ mɔɔ tɔ zo nwiɔ la ɛpɛ nu. Nea! Munzule ne mɔɔ tɔ zo nsa la ɛlɛba ndɛndɛ. 15  Anwumabɔvolɛ ne mɔɔ tɔ zo nsuu la bɔle ye aweɛne tendenle ne. Na ɛnelɛ mgbole bie vi anwuma hanle kɛ: “Ewiade belemgbunlililɛ ne ɛyɛ yɛ Awulae nee ye Kelaese ne Belemgbunlililɛ, na ɔbali belemgbunli dahuu.” 16  Na mgbanyima 24 ne mɔɔ dede bɛ arelemgbunli mbia zo wɔ anwuma la butubutule bɛ nyunlu aze bɛzonlenle Nyamenle, 17  bɛhanle kɛ: “Yɛyɛ wɔ mo, Gyihova* Nyamenle, Tumivolɛ Bedevinli, mɔɔ ɛnee ɛwɔ ɛkɛ na ɛtɛbɔ ɛkɛ, ɔluakɛ wɔva wɔ tumi kpole ne na wɔbɔ ɔ bo ɛlɛdi belemgbunli. 18  Noko maanle maanle ne vale ɛya na wɔ ɛya ne rale, na mekɛ dwule kɛ ɛbua mowuamra ndɛne na ɛmaa wɔ ngɛkɛlɛ ngapezoma nee nwuanzanwuanzama ne mɔ nee bɛdabɛ mɔɔ bɛsulo wɔ duma, mgbole nee ngyikyi ahatualɛ, na ɛsɛkye bɛdabɛ mɔɔ bɛlɛsɛkye azɛlɛ ne la.” 19  Na bɛbukele Nyamenle ɛzonlenlɛ sua ne mɔɔ wɔ anwuma lɔ la, na bɛnwunle ye ngyekyeleɛ ɛlɛka ne wɔ ɛzonlenlɛ sua ne anu. Na ɛsɛlɛmanye kpakyele yɛɛ bɛdele ɛnelɛ nee ezulehululɛ na azɛlɛ kpusule yɛɛ ezuawolɛ mgbole dɔle.

Ɔbodwɛkɛ

Nea Edwɛkɛbohilelɛ.
Anzɛɛ “ɛzuzulɛ baka.”
Anzɛɛ “nleanle bɛ.”
Nea Edwɛkɛbohilelɛ.