Wulomuma 13:1-14

  • Mɛlɛbɛnwoaze maa tumivolɛma (1-7)

    • Adwuledualɛ (6, 7)

  • Ɛlɔlɛ maa bɛdi Mɛla ne azo (8-10)

  • Bɛbɔ bɛ ɛbɛla kɛ bɛwɔ alehyenlɛ nu (11-14)

13  Bɛmaa awie* biala ɛbɛlɛ ɔ nwo aze ɛmaa tumivolɛma ne, ɔluakɛ tumi biala ɛnle ɛkɛ mɔɔ Nyamenle ɛnze nu a; na tumivolɛma mɔɔ bɛwɔ ɛkɛ ne la, Nyamenle a ɛva bɛ ɛzie bɛ gyinlabelɛ ne mɔ a.  Yemɔti awie biala mɔɔ dwazo tia tumi ne la dwazo tia ngyehyɛleɛ mɔɔ Nyamenle ɛyɛ la; bɛdabɛ mɔɔ bɛdwazo bɛtia bɛ la fa ndɛnebualɛ ba bɛ nwo zo.  Na tumivolɛma ne anwo ɛnyɛ ɛzulolɛ ɛmmaa bɛdabɛ mɔɔ bɛdi boɛ la, emomu, bɛdabɛ mɔɔ bɛnli boɛ la. Ɛngulo kɛ ɛsulo tumi ne ɔ? Ɛnee kɔ zo yɛ kpalɛ na ɛbanyia nganvolɛ wɔavi nu;  ɔluakɛ ɔle Nyamenle sonvolɛ wɔ wɔ boɛyɛlɛ ti. Noko saa ɛlɛyɛ ɛtane a sulo ɔluakɛ ɔnlɛ dadeɛ ne mgbane. Ɔle Nyamenle sonvolɛ mɔɔ twe awie mɔɔ kɛyɛ ɛtane la anzo a.  Ɛhye ati, ɔhyia kɛ bɛbɛlɛ bɛ nwo aze, tɛ anzohwenlɛ ne angome ati ɔ, emomu bɛ adwenle ne noko ati ɔ.  Yemɔti a bɛtua adwule a; tumivolɛma ne sonle menli kɔsɔɔti dahuu; wɔ adenle ɛhye azo bɛle Nyamenle sonvolɛma.  Bɛva awie biala ɛdeɛ mɔɔ fɛta ye la bɛmaa ye: bɛdua adwule bɛmaa mɔɔ adwule fɛta ye la; bɛdua ninyɛne nwo adwule bɛmaa mɔɔ ninyɛne nwo adwule fɛta ye la; bɛzulo mɔɔ ɔwɔ kɛ bɛsulo ye la; bɛli mɔɔ fɛta enililɛ la eni.  Ɔnle kɛ bɛtua awie biala kakɛ kyesɛ ɛlɔlɛ mɔɔ ɔwɔ kɛ bɛnyia bɛmaa bɛ nwo la ala; ɔluakɛ awie biala mɔɔ kulo ɔ gɔnwo la ɛli mɛla ne azo kpalɛ.  Na mɛla ne mɔɔ se, “Mmasɛkye agyalɛ, mmayɛ kodiawu, mmawua, mmayɛ anyebolo” nee mɛla biala mɔɔ ɛha la amuala, bɛbɔ ye kpɔkɛ ko kɛ: “Kulo ɛ gɔnwo kɛ ɛ nwo.” 10  Ɛlɔlɛ ɛnyɛ ɔ gɔnwo ɛtane; yemɔti awie mɔɔ kulo ɔ gɔnwo la ɛli mɛla ne azo kpalɛ. 11  Na bɛyɛ ɛhye ɔluakɛ bɛze mekɛ ne, kɛ mekɛ mɔɔ ɔwɔ kɛ bɛfi nafelɛ nu bɛdwazo la ɛdwu dɛbadɛba, ɔluakɛ kɛkala yɛ ngoanelielɛ ɛbikye ɛdɛla mekɛ mɔɔ yɛrayɛle diedima la. 12  Aledwolɛ ne ɛhɔ moa; alehyenlɛ ɛbikye. Yemɔti bɛmaa yɛye awozinli nu gyima biala yɛgua na yɛva wienyi nu akodeɛ ne mɔ yɛwula. 13  Bɛmaa yɛbɔ yɛ ɛbɛla kɛnlɛma kɛ menli mɔɔ wɔ alehyenlɛ nu la, mɔɔ anyelielɛ mgbane mgbane nee nzabolɛ nee adwɔmanebɔlɛ nee anyiemgba ɛbɛla* nee konle nee nungulehwenlɛ ɛnle nu a. 14  Na bɛzukoa Awulae Gyisɛse Kelaese,* na bɛmmadimoa bɛyɛ ngyehyɛleɛ bɛto ɛkɛ bɛmaa nwonane nu atiakunluwɔzo ne mɔ.

Ɔbodwɛkɛ

Anzɛɛ “ɛkɛla.”
Giliki, a·selʹgei·a. Nea Edwɛkɛbohilelɛ.
Giliki aneɛ anu, “bɛwula Awulae Gyisɛse Kelaese.”