Mateyu 5:1-48

  • BOKA ZO EDWƐKƐ NE (1-48)

    • Gyisɛse bɔ ɔ bo kilehile wɔ boka ne azo (1, 2)

    • Anyelielɛ ngɔnla (3-12)

    • Ngyenle nee kɛnlaneɛ (13-16)

    • Gyisɛse maa Mɛla ne ara nu (17-20)

    • Folɛdulɛ wɔ ɛyavalɛ (21-26), agyalɛzɛkyelɛ (27-30), ewolebɔlɛ (31, 32), ndanehanlɛ (33-37), nzenralɛlilɛ (38-42), kpɔvolɛma ɛhulolɛ nwo (43-48)

5  Mekɛ mɔɔ ɔnwunle menli dɔɔnwo ne la, ɔhɔle boka ne azo; na mɔɔ ɔdɛnlanle aze la, ye ɛdoavolɛma ne rale ɔ nwo ɛkɛ.  Na ɔbɔle ɔ bo ɔhilehilele bɛ kɛ:  “Anyelielɛ a le bɛdabɛ mɔɔ bɛze bɛ sunsum nu ngyianlɛ* la, ɔluakɛ anwuma Belemgbunlililɛ ne le bɛ ɛdeɛ.  “Anyelielɛ a le bɛdabɛ mɔɔ bɛdi nyane la, ɔluakɛ bɛbakyekye bɛ rɛle.  “Anyelielɛ a le bɛdabɛ mɔɔ bɛle bɛlɛvo la, ɔluakɛ bɛbanyia azɛlɛ ne.  “Anyelielɛ a le bɛdabɛ mɔɔ tenleneyɛlɛ nwo ɛhɔne nee nzuhɔne ɛlɛku bɛ la, ɔluakɛ bɛbamaa bɛ kunlu adwo bɛ nwo.  “Anyelielɛ a le anwunvɔnezelɛma, ɔluakɛ bɛbaze bɛ anwunvɔne.  “Anyelielɛ a le bɛdabɛ mɔɔ bɛ ahonle nu te la, ɔluakɛ bɛbanwu Nyamenle.  “Anyelielɛ a le bɛdabɛ mɔɔ bɛkpondɛ anzodwolɛ* la, ɔluakɛ bɛbavɛlɛ bɛ Nyamenle amra. 10  “Anyelielɛ a le bɛdabɛ mɔɔ tenleneyɛlɛ ti bɛyɛ bɛ kpɔdekpɔde la, ɔluakɛ anwuma Belemgbunlililɛ ne le bɛ ɛdeɛ. 11  “Anyelielɛ ɛha bɛ kɛ medame ti menli bɔ bɛ aholoba na bɛyɛ bɛ kpɔdekpɔde na bɛbɔ adalɛ bɛfa edwɛkɛ bɛto bɛ nwo zo la. 12  Bɛmaa bɛ nye ɛlie na bɛli fɛlɛko, ɔluakɛ bɛ ahatualɛ le kpole wɔ anwuma, zɔhane ala a bɛyɛle ngapezoma mɔɔ limoale bɛ nyunlu la kpɔdekpɔde a. 13  “Bɛmɛ a bɛle azɛlɛ ye azo ngyenle a, noko saa ngyenle menlemenle ne fi nu a, kɛ ɔkɛyɛ na yeanyia ye menlemenle ne bieko ɛ? Bɛnrɛhola bɛnrɛva bɛnrɛyɛ debie bieko kyesɛ bɛgua ye lɔ na menli tietia zo. 14  “Bɛmɛ a bɛle ewiade kɛnlaneɛ a. Suakpole mɔɔ gua boka zo la ɛngola ɛnvea. 15  Menli sɔ kɛnlaneɛ a, bɛnva kɛndɛne* bɛmbutu zo, emomu bɛfa bɛsie kɛnlaneɛ baka zo amaa yeada yeamaa menli mɔɔ wɔ sua nu ɛkɛ ne la amuala. 16  Zɔhane ala a, bɛmaa bɛ kɛnlaneɛ ɛda wɔ menli nyunlu a, amaa bɛanwu bɛ gyima kpalɛ ne na bɛawula bɛ Ze mɔɔ wɔ anwuma la anyunlunyia. 17  “Bɛmmadwenle kɛ membale kɛ mebazɛkye Mɛla ne anzɛɛ mɔɔ Ngapezoma ne hɛlɛle la. Meamba bɛ ɛzɛkyelɛ, emomu membale kɛ memaa bɛara nu. 18  Nɔhalɛ nu, meka meahile bɛ kɛ saa anwuma nee azɛlɛ bapɛ nu aze bɔbɔ a, ngɛlɛlerakpɔkɛ nretee ko anzɛɛ kpɔkɛ ko ɛnrɛvi Mɛla ne anu, kɔkpula kɛ ninyɛne ɛhye mɔ amuala kɛra nu la. 19  Yemɔti, awie biala mɔɔ ɛnli mɛla ngyikyi ɛhye mɔ ko azo na ɔkilehile awie mɔ ɔmaa bɛyɛ zɔhane la bɛbavɛlɛ ye ekyi wɔ anwuma Belemgbunlililɛ ne anu.* Na awie biala mɔɔ di zo na ɔkilehile awie mɔ la bɛbavɛlɛ ye kpole wɔ anwuma Belemgbunlililɛ ne anu.* 20  Na meka meahile bɛ kɛ saa bɛ tenleneyɛlɛ andɛla mɛla kilehilevolɛma nee Falasiima ɛdeɛ ne a, bɛnrɛhɔ anwuma Belemgbunlililɛ ne anu. 21  “Bɛde kɛ bɛhanle bɛhilele tete amra kɛ: ‘Mmayɛ kodiawu, na awie biala mɔɔ kɛyɛ kodiawu la bali fɔlɛ wɔ kɔɔto.’ 22  Noko meka meahile bɛ kɛ awie biala mɔɔ kɔ zo fa ɔ diema anwo ɛya la bali fɔlɛ wɔ kɔɔto; na awie biala mɔɔ ka edwɛkɛ ɛtane kile ɔ diema la bali fɔlɛ wɔ Kɔɔto Kpole nu; yɛɛ bɛbava awie biala mɔɔ kɛha kɛ, ‘Ɛle koasea!’ la, bɛado Gehenna* senle woonwu ne anu. 23  “Zɔhane ati, saa ɛlɛfa wɔ ahyɛlɛdeɛ wɔara afɔlemokyea ne anwo na ɛkakye ye wɔ ɛkɛ ne kɛ ɛ diema nee wɔ lɛ edwɛkɛ a, 24  gyakyi wɔ ahyɛlɛdeɛ ne wɔ afɔlemokyea ne anyunlu na kɔ. Dimoa ɛ nee ɛ diema ne ɛziezie bɛ avinli na ɛsia ɛba a, akee wɔabɔ wɔ afɔle ne. 25  “Saa awie sɛma wɔ, na ɛ nee ye lua adenle nu ɛlɛkɔ a, ɛ nee ye bɛziezie edwɛkɛ ne ndɛndɛ, na ahenle mɔɔ ɛsɛma wɔ la anva wɔ ammaa ndɛnebuavolɛ ne, na ndɛnebuavolɛ ne anva wɔ ammaa kɔɔto sonvolɛ ne kɛ ɔdo wɔ efiade. 26  Nɔhalɛ nu, meka meahile wɔ kɛ, ɛnrɛvi ɛkɛ kyesɛ ɛtua ezukoa ne amuala mɔɔ ekyi* bɔbɔ ɛnga a. 27  “Bɛde kɛ bɛhanle kɛ: ‘Mmasɛkye agyalɛ.’* 28  Noko meka meahile bɛ kɛ awie biala mɔɔ kɔ zo nea raalɛ na ɔnyia ɔ nwo ɛhulolɛ la ɛzɛkye agyalɛ wɔ ye ahonle nu dɛbadɛba. 29  Yemɔti, saa ɛ nye fema ɛlɛmaa wɔayɛ ɛtane a, tu ye to ye lɔ. Ɔluakɛ ɔle kpalɛ kɛ ɛ nye kɛha ko tɛla kɛ bɛkɛvuandi wɔ sonlabaka ne amuala bɛkɛdo Gehenna.* 30  Na saa ɛ sa fema ɛlɛmaa wɔayɛ ɛtane a, pɛ ye to ye lɔ. Ɔle kpalɛ kɛ ɛ sa kɛha ko tɛla kɛ wɔ sonlabaka ne amuala kɛhɔ Gehenna.* 31  “Bɛha ye bieko kɛ: ‘Awie biala mɔɔ kɛbɔ ɔ ye ewole la, ɔmaa ye ewolebɔlɛ kɛlata.’ 32  Noko meka meahile bɛ kɛ awie biala mɔɔ tɛ adwɔmane ɛbɛla* ti ɔkɛbɔ ɔ ye ewole la, kola maa raalɛ ne sɛkye agyalɛ, yɛɛ awie biala mɔɔ kɛgya raalɛ mɔɔ bɛbɔ ye ewole la, ɛzɛkye agyalɛ. 33  “Eza bɛde kɛ bɛhanle bɛhilele tete amra kɛ: ‘Mmaka ndane adalɛ, na emomu ɛbɔ Gyihova* ɛwɔkɛ a di zo.’ 34  Noko meka meahile bɛ kɛ: Bɛmmaka ndane fee, bɛmmaka anwuma ɔluakɛ ɔle Nyamenle belemgbunli ebia; 35  bɛmmaka azɛlɛ ye ɔluakɛ ɔle Nyamenle agyakɛ abo ebia; anzɛɛ Gyɛlusalɛm, ɔluakɛ ɔle Belemgbunli kpole ne suakpole. 36  Mmaka ɛ ti, ɔluakɛ ɛnrɛhola ɛnrɛhakyi wɔ enrinli ko fufule anzɛɛ bile. 37  Yemɔ ala a le kɛ bɛmaa bɛ ‘Ɛhɛe’ ɛyɛ ɛhɛe, bɛ ‘Kyɛkyɛ’ ɛyɛ kyɛkyɛ, ɔluakɛ edwɛkɛ ngakyile biala vi ɛtanevolɛ ne. 38  “Bɛde kɛ bɛhanle kɛ: ‘Ɛnyelɛ ɛzie ɛnyelɛ bo zo na egyele ɛzie egyele bo zo.’ 39  Noko, meka meahile bɛ kɛ: Bɛmmadwazo bɛtia ɛtanevolɛ, na awie biala mɔɔ kɛbɔ ɛ nzo fema ne anu la, kakyi ko ne noko maa ye. 40  Na saa awie kulo kɛ ɔ nee wɔ kɔ kɔɔto na ɔkɔdie wɔ tɛladeɛ ne mɔɔ vea ɔ bo la a, fa aguzo ne noko maa ye; 41  yɛɛ saa awie mɔɔ lɛ tumi la ka ye kyengye kɛ ɛ nee ye ɛhɔ mayɛlɛ ko a, ɛ nee ye ɛhɔ mayɛlɛ nwiɔ. 42  Awie biza wɔ debie a fa maa ye, na mmakakyi ɛ nzi ɛsi awie mɔɔ kpondɛ kɛ ɛbɔ ye bosea* la. 43  “Bɛde kɛ bɛhanle kɛ: ‘Kulo ɛ gɔnwo na kpɔ wɔ kpɔvolɛ.’ 44  Noko, meka meahile bɛ kɛ: Bɛhɔ zo bɛhulo bɛ kpɔvolɛma na bɛzɛlɛ bɛmaa menli mɔɔ yɛ bɛ kpɔdekpɔde la, 45  amaa bɛahile kɛ bɛle bɛ Ze mɔɔ wɔ anwuma la amra, ɔluakɛ ɔmaa ye ewia fi maa ɛtanevolɛma nee kpalɛma yɛɛ ɔmaa ezule tɔ gua tenlenema nee amumuyɛma anwo zo. 46  Na saa bɛkulo menli mɔɔ kulo bɛ la ala a, duzu ahatualɛ a bɛnyia a? Asoo tɛ zɔhane ala a adwuledievolɛma yɛ a? 47  Yɛɛ saa bɛbiza bɛ mediema angome ahye a, duzu debie ngakyile a bɛlɛyɛ a? Asoo tɛ zɔhane a maanle maanle ne anu amra yɛ a? 48  Yemɔti, kɛ mɔɔ bɛ Ze mɔɔ wɔ anwuma la di munli la, bɛdabɛ noko bɛli munli.

Ɔbodwɛkɛ

Anzɛɛ “bɛdabɛ mɔɔ bɛsɛlɛ Nyamenle kɛ ɔmaa bɛ ye sunsum ne.”
Anzɛɛ “bɛkulo anzodwolɛ.”
Anzɛɛ “kɛndɛne mɔɔ bɛfa bɛsuzu debie la.”
Ɔkile kɛ, ɔnfɛta kɛ ɔkɔ nu.
Ɔkile kɛ, ɔfɛta kɛ ɔkɔ nu.
Ɛleka mɔɔ bɛyela ewula wɔ Gyɛlusalɛm sua ne anzi la. Nea Edwɛkɛbohilelɛ.
Giliki aneɛ nu, “koadelane.”
Anzɛɛ “Mmafa awuvolɛ.”
Nea Edwɛkɛbohilelɛ.
Nea Edwɛkɛbohilelɛ.
Giliki, por·neiʹa. Nea Edwɛkɛbohilelɛ.
Nea Edwɛkɛbohilelɛ.
Ɔkile, bosea mɔɔ bɛnlie mpaefoa.