Maake 5:1-43

  • Gyisɛse maa sunsum ɛtane ne mɔ kɔwolo agbolike nu (1-20)

  • Gyeeyaelɛse ara raalɛ; raalɛ bie fa ɔ sa ka Gyisɛse tɛladeɛ (21-43)

5  Akee bɛrale nyevile ne anzi wɔ Gɛlasa maanzinli nu.  Na Gyisɛse vi ɛlɛne ne anu dwule aze ala la, nrenyia bie mɔɔ sunsum ɛtane wɔ ɔ nwo la vi azie* ne azo rayiale ye.  Yeva azie ne azo yeyɛ ye sua nu, na badwu zɔhane mekɛ ne, awie biala ɛngola ɛnva kyeenyi* bɔbɔ ɛnkyekye ye ɛndɛnla ɛleka ko.  Mekɛ dɔɔnwo ne ala bɛvale mbulalɛ nee kyeenyi bɛkyekyele ye, noko ɔbubule mbulalɛ ne na ɔtetele kyeenyi ne anu; na awie biala angola ye sɔ.  Alehyenlɛ nee aledwolɛ muala, ɔteɛdea nu wɔ azie ne nee awoka ne mɔ azo na ɔfa awolɛ ɔpepɛ ɔ nwo.  Na mɔɔ ɔnwunle Gyisɛse wɔ moamoa nehane la, ɔnriandile ɔhɔhotole ɔ nyunlu ɛkɛ.  Akee ɔdeanle nu kpole kɛ: “Duzu a ɛkpondɛ wɔavi me ɛkɛ a, Gyisɛse, Anwuma Anwumanli Nyamenle ne Ara? Fa Nyamenle ka ndane kɛ ɛnrɛdea me.”  Ɔluakɛ ɛnee Gyisɛse ɛha ɛhile ye kɛ: “Sunsum ɛtane, ɛvi nrenyia ne anwo tu.”  Na Gyisɛse bizale ye kɛ: “Kɛ bɛfɛlɛ wɔ ɛ?” Na ɔbuale kɛ: “Bɛfɛlɛ me Ɛlɔne, ɔluakɛ yɛ nwo zonle.” 10  Na ɔhɔle zo ɔbodole Gyisɛse kɛ ɔmmatu sunsum ne mɔ ɔfi maanle ne anu. 11  Ɛnee agbolike dɔɔnwo bie ɛlɛdidi boka bie azo wɔ ɛkɛ ne. 12  Yemɔti sunsum ne mɔ zɛlɛle ye kɛ: “Maa yɛ adenle maa yɛhɔwolo agbolike ne mɔ anu.” 13  Na ɔmaanle bɛ adenle. Yemɔti sunsum ɛtane ne mɔ vindele na bɛhɔwolole agbolike ne mɔ, na agbolike mɔɔ kɛyɛ 2,000 la dule twi pianle bɛ nwo wɔ boka ne azo na bɛhɔguale nyevile ne anu bɛnlomanle. 14  Na menli mɔɔ ɛlɛnea agbolike ne mɔ la nriandile hɔbɔle amaneɛ wɔ sua ne nee namunamu ne mɔ azo, na menli ranleanle mɔɔ ɛzi la. 15  Yemɔti bɛrale Gyisɛse anwo ɛkɛ na bɛnwunle nrenyia ne mɔɔ ɛnee sunsum ɛtane Ɛlɔne ne wɔ ɔ nwo la kɛ, ɔwula tɛladeɛ na ɔde ɛkɛ ne mɔɔ ɔ nye zo ɛtete ye a, na ɔyɛle bɛ ɛzulolɛ. 16  Menli mɔɔ nwunle ye la hanle mɔɔ dole nrenyia ne mɔɔ ɛnee sunsum ɛtane wɔ ɔ nwo nee agbolike ne mɔ la hilele bɛ. 17  Yemɔti bɛzɛlɛle Gyisɛse kɛ ɔvi bɛ maanzinli ne anu ɔhɔ. 18  Mekɛ mɔɔ ɔlɛfo ɛlɛne ne anu la, nrenyia ne mɔɔ ɛnee sunsum ɛtane ne wɔ ɔ nwo la bodole ye kɛ ɔ nee ye ɛhɔ. 19  Noko, yeammaa ye adenle na ɔzele ye kɛ: “Kɔ sua nu, wɔ mbusuafoɔ ɛkɛ, na ka ninyɛne kɔsɔɔti mɔɔ Gyihova* ɛyɛ ɛmaa wɔ nee anwunvɔne mɔɔ yeze wɔ la kile bɛ.” 20  Nrenyia ne vile ɛkɛ ne hɔle na ɔbɔle ɔ bo kɛ ɔka mɔɔ Gyisɛse ɛyɛ ɛmaa ye la amuala anwo edwɛkɛ wɔ Dɛkapɔlese,* na ɔzinle menli ne amuala anwo. 21  Mɔɔ Gyisɛse vale ɛlɛne pɛle rale azule ne anzi bieko la, menli dɔɔnwo rayiale ɔ nwo ɛkɛ, na ɛnee ɔwɔ nyevile ne anloa. 22  Nyianu sua ne anu mgbanyima ne mɔ ko mɔɔ bɛfɛlɛ ye Gyeeyaelɛse la rale, na mɔɔ ɔnwunle ye la, ɔdule ɔdɔle ɔ gyakɛ anu. 23  Ɔbodole ye fane dɔɔnwo kɛ: “Me ra raalɛ ekyi ne ɛnde kpɔkɛ fee.* Mesɛlɛ wɔ bava ɛ sa to ɔ nwo zo maa ɔde kpɔkɛ na ɔnyia ngoane.” 24  Na Gyisɛse nee ye hɔle, menli dɔɔnwo doale ye na bɛhyelele ɔ nwo zo. 25  Ɛnee raalɛ bie wɔ ɛkɛ, yedudu mogya too ɛvolɛ 12. 26  Yenwu amaneɛ dɔɔnwo wɔ menli dɔɔnwo mɔɔ yɛ ayile la asa nu na ɔ nwo ezukoa amuala ɛwie, noko ɔnde kpɔkɛ, ye ewule ne ɔ nyunlu ala a ɔkɔ a. 27  Mekɛ mɔɔ ɔdele Gyisɛse anwo edwɛkɛ la, ɔralile ɔ nzi wɔ menli ne anu na ɔvale ɔ sa ɔhanle ye tɛladeɛ ne, 28  na ɛnee ɔlɛka kɛ: “Saa mefa me sa meka ye tɛladeɛ ne bɔbɔ a, mebade kpɔkɛ.” 29  Na ɛkɛ ne ala mogya ne mɔɔ ɛlɛtu ye la pɛle, na ɔdele ye wɔ ye nu kɛ yede kpɔkɛ. 30  Ɛkɛ ne ala Gyisɛse nwunle kɛ tumi ɛvi ye nu, na ɔhakyile ɔ nye wɔ menli ne anu na ɔbizale kɛ: “Nwane a vale ɔ sa hanle me tɛladeɛ ne a?” 31  Na ye ɛdoavolɛma ne zele ye kɛ: “Wɔnwu kɛ menli ɛhyele ɛ nwo zo, akee ɛse, ‘Nwane a vale ɔ sa hanle me a?’” 32  Noko ɛnee ɔlɛtoto ɔ nye kɛ ɔbanwu ahenle mɔɔ yɛle zɔ la. 33  Raalɛ ne nwunle mɔɔ ɛdo ye la, ɔvale ɛzulolɛ nee anwowozolɛ ɔrahotole ɔ nyunlu ɛkɛ na ɔhanle edwɛkɛ ne anu nɔhalɛ ne amuala ɔhilele ye. 34  Ɔzele ye kɛ: “Me ra raalɛ, wɔ diedi ɛmaa wɔde kpɔkɛ. Fa anzodwolɛ kɔ na ɛ nwo ɛdɔ wɔ bɔkɔɔ.” 35  Mekɛ mɔɔ ɔ nloa wɔ zo ɔlɛtendɛ la, menli bie vi nyianu sua ne anu kpanyinli ne sua nu rahanle kɛ: “Ɛ ra raalɛ ne ɛwu! Duzu ati a ɛtɛgyegye kilehilevolɛ ne a?” 36  Noko Gyisɛse dele bɛ edwɛkɛ ne na ɔzele nyianu sua ne anu kpanyinli ne kɛ: “Mmasulo,* wɔmɔ nyia diedi ala.” 37  Yeammaa awie biala andoa ye kɛ Pita, Gyemise, yɛɛ Gyemise adiema Dwɔn ala. 38  Yemɔti bɛrale nyianu sua ne kpanyinli ne sua nu, na ɔnwunle menli mɔɔ ɛlɛsu adeɛdea nu ayɛ dede ne la. 39  Mekɛ mɔɔ ɔwolole ɛkɛ la, ɔzele bɛ kɛ: “Duzu ati a bɛlɛsu bɛayɛ dede ɛ? Kakula ne ɛtɛwule na yelafe.” 40  Yemɔti bɛbɔle ɔ bo bɛzelele ye. Akee ɔmaanle bɛ muala bɛvindele, ɔvale kakula ne papa nee ye mame yɛɛ menli mɔɔ boka ɔ nwo la, na bɛhɔle ɛleka mɔɔ kakula ne wɔ la. 41  Akee ɔzɔle kakula ne asa na ɔzele ye kɛ: “Talita kumi,” ɛhye kile: “Kakula raalɛ, mese, ‘dwazo!’” 42  Na ɛkɛ ne ala kakula raalɛ ne dwazole na ɔbɔle ɔ bo ɔdiale. (Ɛnee yeli ɛvolɛ 12.) Bɛnwunle ɛhye la, ɔyɛle bɛ nwanwane kpole. 43  Na ɔzele bɛ kɛ* bɛmmaka bɛkile awie biala, na ɔhanle kɛ bɛmaa ye debie ɔli.

Ɔbodwɛkɛ

Anzɛɛ “ngakyelɛ nla.”
Anzɛɛ “nwɔnzɔnwɔnzɔ.”
Nea Edwɛkɛbohilelɛ.
Anzɛɛ “Azuamgbole Bulu Maanzinli ne anu.”
Anzɛɛ “ɛlɛdie ewule awu.”
Anzɛɛ “Mmamaa wɔ ahonle tu.”
Anzɛɛ “ɔduale bɛ kɛ.”