Maake 14:1-72

  • Ɛsɔfoma ne bɔ kpɔkɛ kɛ bɛku Gyisɛse (1, 2)

  • Bɛwolale nwole evuanlɛ bɛguale Gyisɛse anwo (3-9)

  • Dwudase ye Gyisɛse amaa (10, 11)

  • Akpabɛnwo mɔɔ li awieleɛ (12-21)

  • Bɛvale Awulae Nɔsolɛ Aleɛlilɛ ne bɛziele ɛkɛ (22-26)

  • Bɛhanle Pita ɛkpolɛ ne bɛdole ɛkɛ (27-31)

  • Gyisɛse yɛ asɔne wɔ Gɛtesɛmani (32-42)

  • Bɛhye Gyisɛse (43-52)

  • Edwɛkɛlilɛ wɔ Sanhedelin ne anyunlu (53-65)

  • Pita kpo Gyisɛse (66-72)

14  Ɛnee yeha kenle nwiɔ na Akpabɛnwo nee Paano Mɔɔ Mgbɔvonle Ɛnle Nu Ɛvoyia ne adwu. Na ɛnee ɛsɔfo mgbanyinli nee mɛla kilehilevolɛma ne mɔ ɛlɛkpondɛ nrɛlɛbɛ adenle alua zo ahye ye ahu ye;  ɔluakɛ ɛnee bɛlɛka kɛ: “Ɔnle kɛ ɔyɛ ɛvoyialilɛ ne abo; anrɛɛ menli ne kɛyɛ basabasa.”  Na mɔɔ ɔwɔ Saemɔn mɔɔ anrɛɛ le kokobɛvolɛ sua nu wɔ Bɛtani na ɔlɛdi debie la, raalɛ bie vale alabaseta toba mɔɔ nwole evuanlɛ, naade kpalɛ bie, mɔɔ ye bolɛ yɛ se wɔ nu la rale. Ɔbukele alabaseta toba ne azo na ɔbɔle ɔ bo ɔwolale ɔguale ɔ ti zo.  Na bie mɔ vale ɛya na bɛhanle bɛhilele bɛ nwo ngoko kɛ: “Duzu ati a bɛzɛkye nwole evuanlɛ ɛhye a?  Ɔluakɛ anrɛɛ bɛbahola bɛadɔne nwole evuanlɛ ɛhye bɛamaa yeabo denale 300 na bɛava ezukoa ne bɛamaa ehyiavolɛma!” Na bɛvale ɔ nwo ɛya kpole.*  Noko Gyisɛse hanle kɛ: “Bɛgyakyi ye. Duzu ati a bɛkpondɛ kɛ bɛgyegye ye a? Yeyɛ debie kpalɛ yemaa me.  Bɛ nee ehyiavolɛma de dahuu, na mekɛ biala mɔɔ bɛkulo la bɛbahola bɛayɛ bɛ boɛ, noko mame bɛ nee me ɛnde dahuu.  Yeyɛ mɔɔ ɔbahola la; yelimoa yeva nwole evuanlɛ yegua me nwo yeva yeziezie me wɔ me ɛzielɛ nu.  Nɔhalɛ nu meka meahile bɛ kɛ, ɛleka biala mɔɔ bɛbabɔ edwɛkpa ɛhye nolo wɔ ewiade amuala la, bɛbaha mɔɔ raalɛ ɛhye ɛyɛ la noko bɛava bɛahakye ye.” 10  Na Dwudase Yesekaleɔto mɔɔ le Bulu Nee Nwiɔ ne anu ko la, hɔle ɛsɔfo mgbanyinli ne mɔ ɛkɛ amaa yeaye ye yeamaa bɛ. 11  Mekɛ mɔɔ bɛdele la, bɛ nye liele, na bɛbɔle ɛwɔkɛ kɛ bɛbamaa ye ezukoa.* Yemɔti ɔbɔle ɔ bo ɔkpondɛle adenle mɔɔ ɔbalua zo yeaye ye yeamaa la. 12  Kenle mɔɔ limoa mɔɔ bɛdi Paano Mɔɔ Mgbɔvonle Ɛnle Nu, mɔɔ bɛta bɛbɔ Akpabɛnwo afɔle ne la, ye ɛdoavolɛma ne zele ye kɛ: “Nienwu a ɛkulo kɛ yɛkɔsiezie yɛmaa wɔ na ɛdi Akpabɛnwo ne a?” 13  Na ɔzoanle ye ɛdoavolɛma ne anu nwiɔ na ɔzele bɛ kɛ: “Bɛhɔ sua ne azo, na bɛ nee nrenyia bie mɔɔ zo buakɛ mɔɔ nzule wɔ nu la bayia. Bɛdoa ye, 14  na ɛleka biala mɔɔ ɔkɛwolo la, bɛze suamenle ne kɛ, ‘Kilehilevolɛ ne se: “Nienwu a nyɛvolɛ sua ne mɔɔ me nee me ɛdoavolɛma ne bali Akpabɛnwo ne wɔ nu la wɔ a?”’ 15  Na ɔbahile bɛ ekpumgbunli kpole bie wɔ ɛbolɔnsam zo mɔɔ bɛziezie nu dɛba la. Bɛziezie ɛkɛ ne bɛmaa yɛ.” 16  Yemɔti ɛdoavolɛma ne zile nu hɔle sua ne azo, na bɛhɔnwunle ye kɛ mɔɔ ɔhanle ɔhilele bɛ ala la, na bɛzieziele ninyɛne bɛmaanle Akpabɛnwo ne. 17  Ye nɔsolɛ nu, ɔ nee Bulu Nee Nwiɔ ne rale. 18  Na mɔɔ bɛdede ɛkponle ne anwo bɛlɛdi debie la, Gyisɛse hanle kɛ: “Nɔhalɛ nu meka meahile bɛ kɛ, bɛ nuhua ko mɔɔ ɔ nee me ɛlɛdi aleɛ la baye me amaa.” 19  Ɔyɛle bɛ alɔbɔlɛ na bɛbɔle ɔ bo bɛbizale ye ngoko kɛ: “Asoo medame ɔ?” 20  Ɔzele bɛ kɛ: “Bulu Nee Nwiɔ ne anu ko mɔɔ ɔ nee me ɛlɛto ɛsalɛ wɔ ɛyɛba nu la ɔ. 21  Sonla Ra ne bawu kɛ mɔɔ bɛhɛlɛ ye wɔ ɔ nwo la ɛdeɛ, noko sonla ne mɔɔ bɛbalua ɔ nwo zo bɛaye sonla Ra ne bɛamaa la, ye gyakɔ! Ɔle kpalɛ kɛ anrɛɛ bɛanwo zɔhane sonla ne.” 22  Mɔɔ bɛlɛdi debie la, ɔvale paano, ɔyilale zo, ɔbubule nu, na ɔvale ɔmaanle bɛ, ɔhanle kɛ: “Bɛlie; ɛhye gyi ɛkɛ ne maa me sonlabaka ne.” 23  Na ɔvale kanrɛlɛ, ɔlale ase na ɔvale ɔmaanle bɛ, na bɛ muala bɛnlonle nu. 24  Na ɔzele bɛ kɛ: “Ɛhye gyi ɛkɛ ne maa me ‘mogya ne mɔɔ bɛva bɛyɛ ngyekyeleɛ,’ mɔɔ menli dɔɔnwo ti bɛbahwi bɛagua la. 25  Nɔhalɛ nu meka meahile bɛ kɛ, menrɛnlo nwanye ɛhye bieko kɔkpula kenle mɔɔ mebanlo ye fofolɛ wɔ Nyamenle Belemgbunlililɛ ne anu la.” 26  Akee bɛdole ayɛlɛyelɛ edwɛne na bɛvindele bɛhɔle Ɔlivi Boka ne azo. 27  Na Gyisɛse zele bɛ kɛ: “Bɛ muala bɛbakpo me, ɔluakɛ bɛhɛlɛ kɛ: ‘Mebabɔ mboaneneavolɛ ne na mboane ne babɔ asande.’ 28  Noko saa bɛdwazo me bɛba ngoane nu a, mebalimoa bɛ nyunlu wɔ Galeli.” 29  Na Pita buale ye kɛ: “Saa bɛ muala bɛkpo wɔ bɔbɔ a, me ngome ɛdeɛ, menrɛkpo wɔ ɛlɛ.” 30  Na Gyisɛse zele ye kɛ: “Nɔhalɛ nu meka meahile wɔ kɛ, ɛnɛ nɔe, ɛhɛe, too mɔɔ akɔlɛ kabɔ fane nwiɔ la, ɛnee wɔkpo me fane nsa.” 31  Noko ɔhɔle zo ɔhanle kɛ: “Saa ɔwɔ kɛ me nee wɔ wu bɔbɔ a, menrɛkpo wɔ ɛlɛ.” Ɛdoavolɛma ne mɔɔ ɛha la noko hanle zɔhane ala. 32  Yemɔti bɛhɔle ɛleka bie mɔɔ bɛfɛlɛ ye Gɛtesɛmani la, na ɔzele ye ɛdoavolɛma ne kɛ: “Bɛdɛnla ɛke na mekayɛ asɔne.” 33  Na ɔvale Pita nee Gyemise yɛɛ Dwɔn ɔ nee bɛ hɔle, na alɔbɔlɛ nee nyane kpole bɔle ɔ bo hanle ye.* 34  Ɔzele bɛ kɛ: “Nyane kpole ɛha me kɔdwu ewule nu bɔbɔ. Bɛdɛnla ɛke na bɛzinza.” 35  Na ɔhɔle ɔ nyunlu ekyii la, ɔdule ɔdɔle na ɔbɔle ɔ bo ɔyɛle asɔne kɛ, saa ɔbayɛ boɛ a, anrɛɛ dɔnehwele ne ɛze ɔ nwo ɛhɔ. 36  Na ɔzele kɛ: “Abba,* Egya, ɛkola debie biala yɛ; maa kanrɛlɛ ɛhye ɛze me nwo ɛhɔ. Noko, tɛ mɔɔ mekulo la ɔ, emomu mɔɔ ɛkulo la ɔ.” 37  Ɔziale ɔrale la ɔnwunle kɛ bɛdeda, na ɔzele Pita kɛ: “Saemɔn, wɔlafe? Wɔangola wɔannyia anwosesebɛ wɔanzinza dɔnehwele ko bɔbɔ? 38  Bɛhɔ zo bɛzinza na bɛyɛ asɔne dahuu, amaa bɛangɔ sɔnea nu. Sunsum ne kulo, noko nwonane ne le bɛtɛɛ.” 39  Na ɔhɔle bieko na ɔhɔyɛle asɔne, ɔhanle edwɛkɛ ko ne ala. 40  Na ɔrale bieko la, ɔnwunle kɛ bɛdeda, na bɛte bɛ nye a ɔnde fee, yemɔti ɛnee bɛnnwu kɛzi bɛbua ye a. 41  Na ɔziale ɔrale ye fane nsa ne azo na ɔzele bɛ kɛ: “Mekɛ zɛhae anu bɛlɛda bɛalie bɛ menle! Yeyɛ boɛ! Mekɛ ne ɛdwu! Nea! Bɛlɛye sonla Ra ne bɛawula ɛtanevolɛma asa nu. 42  Bɛdwazo, bɛmaa yɛhɔ. Nea! Mɔɔ ɔbaye me yeamaa la ɛbikye.” 43  Mɔɔ ɔ nloa wɔ zo ɔlɛtendɛ la, Dwudase, Bulu Nee Nwiɔ ne anu ko, nee menli dɔɔnwo bie mɔɔ dedɛ dadeɛ nee ahoholombaka mɔɔ vi ɛsɔfo mgbanyinli nee mɛla kilehilevolɛma nee mgbanyima ne mɔ ɛkɛ la rale. 44  Ɛnee ahenle mɔɔ ɔye ye yeamaa la ɛmaa bɛ sɛkɛlɛneɛ kɛ: “Sonla ne mɔɔ mebavo ɔ nloa anwo la, yemɔ ɛne; bɛhye ye, bɛnlea ye boɛ bɛva ye bɛhɔ.” 45  Na ɔrale Gyisɛse anwo ɛkɛ ne fɔɔnwo na ɔzele ye kɛ, “Relabae!” na ɔvole ɔ nloa anwo. 46  Yemɔti bɛhyele ye na bɛ nee ye hɔle. 47  Noko menli mɔɔ ɛnee gyigyi ɛkɛ ne la anu ko hwenle ye dadeɛ ne pɛle ɛsɔfo kpanyinli ne akɛlɛ ne anzo. 48  Na Gyisɛse buale bɛ kɛ: “Bɛva dadeɛ nee ahoholombaka bɛlɛba bɛarahye me kɛ awule ɔ? 49  Ɛnee dahuu me nee bɛ wɔ ɛzonlenlɛ sua ne anu mekilehile, noko bɛangye me. Noko ɛhye bamaa Ngɛlɛlera ne ara nu.” 50  Na bɛ muala bɛnriandile bɛgyakyile ye. 51  Noko, kpavolɛ bie mɔɔ heda lenen kɛnlɛma bie ala la, bɔle ɔ bo lile ɔ nzi, na bɛbɔle mɔdenle kɛ bɛkye ye, 52  noko ɔgyakyile ye ɛdanlɛ ne anu ɔmaanle bɛ na ɔlɛle ɔ nwo zɔ* ɔnriandile ɔhɔle. 53  Akee bɛvale Gyisɛse bɛhɔmaanle ɛsɔfo kpanyinli ne, na ɛsɔfo mgbanyinli nee mgbanyima nee mɛla kilehilevolɛma ne mɔ amuala rayiale. 54  Noko Pita lile ɔ nzi wɔ moamoa too ɔhɔdwule ɛsɔfo kpanyinli ne alie ne anwo; na ɔdɛnlanle sua nu ɛkɛ ne sonvolɛma ne anwo ɛkɛ ɔdele senle. 55  Ɛnee ɛsɔfo mgbanyinli nee Sanhedelin ne amuala ɛlɛkpondɛ daselɛ atia Gyisɛse amaa bɛalua zo bɛahu ye, noko bɛannyia bie. 56  Menli dɔɔnwo lile daselɛ adalɛ tiale ye, noko bɛ daselɛ ne anyɛ ko. 57  Akee bie mɔ noko dwazole lile daselɛ adalɛ tiale ye kɛ: 58  “Yɛdele kɛ ɔse, ‘Mebabubu ɛzonlenlɛ sua ɛhye mɔɔ bɛvale ɛsalɛ bɛzile la meagua, na meava kenle nsa meazi bie mɔɔ bɛanva ɛsalɛ a bɛzile la.’” 59  Noko wɔ ɛhye anu bɔbɔ, bɛ daselɛ ne anyɛ ko. 60  Akee ɛsɔfo kpanyinli ne dwazole gyinlanle bɛ avinli ɛkɛ na ɔbizale Gyisɛse kɛ: “Ɛnlɛ mualɛ biala ɔ? Asoo ɛnde mɔɔ menli ɛhye mɔ ɛlɛkeha atia wɔ la?” 61  Noko ɔyɛle koonwu, yeammaa mualɛ biala. Yemɔti ɛsɔfo kpanyinli ne bizale ye bieko kɛ: “Wɔmɔ a ɛle Kelaese ne, Tumivolɛ ne Ara ne la ɔ?” 62  Akee Gyisɛse hanle kɛ: “Medame ɔ; na bɛbanwu sonla Ra ne kɛ ɔde Tumivolɛ ne asa fema zo na ɔlua anwuma amungu nu ɔlɛba.” 63  Na ɛsɔfo kpanyinli ne tetele ye tɛladeɛ ne anu na ɔhanle kɛ: “Asoo yɛhyia alasevolɛ bieko? 64  Bɛde munzule edwɛkɛ ne. Kɛzi bɛdwenle nwo ɛ?” Bɛ muala bɛbuale ye fɔlɛ kɛ ɔfɛta ewule. 65  Na bie mɔ bɔle ɔ bo totole nyɛlɛ ɔ nwo na bɛhedale ɔ nyunlu bɛbole ye na bɛzele ye kɛ: “Ka ngapezo!” Bɛpepɛle ɔ nye zo, na kɔɔto sonvolɛma ne vale ye hɔle. 66  Mɔɔ Pita wɔ aze ɛkɛ ne wɔ alienwo ɛkɛ ne la, ɛsɔfo kpanyinli ne sonvolɛ mbɛlɛra ne mɔ ko rale. 67  Mɔɔ ɔnwunle Pita kɛ ɔlɛte senle la, ɔnleanle ye koonwu na ɔhanle kɛ: “Ɛdawɔ noko ɛnee ɛboka Nazalɛtenli, Gyisɛse ɛhye anwo.” 68  Noko yeanlie yeando nu na ɔhanle kɛ: “Menze ye yɛɛ mende mɔɔ ɛlɛka bɔbɔ la abo,” na ɔvindele ɔhɔle anlenkɛ ne anloa lɔ. 69  Ɛkɛ ne noko, sonvolɛ bɛlɛra ne nwunle ye na eza ɔbɔle ɔ bo ɔzele bɛdabɛ mɔɔ bɛgyigyi ɛkɛ ne la kɛ: “Ɛhye boka bɛ.” 70  Eza yeanlie yeando nu. Ɔyɛle ekyii la, menli mɔɔ gyigyi ɛkɛ ne la noko bɔle ɔ bo zele Pita kɛ: “Amgba ɛboka bɛ, ɔluakɛ ɔle nɔhalɛ kɛ ɛle Galelinli.” 71  Noko ɔbɔle ɔ bo ɔhanle ndane ɔlile amonle kɛ: “Menze nrenyia ɛhye mɔɔ bɛlɛka ɔ nwo edwɛkɛ la!” 72  Ɛkɛ ne ala, akɔlɛ bɔle bieko na Pita hakyele mɔɔ Gyisɛse hanle hilele ye la kɛ: “Too mɔɔ akɔlɛ kabɔ fane nwiɔ la, ɛnee wɔkpo me fane nsa.” Na alɔbɔlɛ hunle ye na ɔbɔle ɔ bo ɔzunle.

Ɔbodwɛkɛ

Anzɛɛ “bɛdendɛle ɛya zo bɛhilele ye; bɛdeanle ye.”
Anzɛɛ “dwɛtɛ fufule.”
Anzɛɛ “na ɔyɛle basaa.”
Arelam edwɛkɛkpɔkɛ mɔɔ kile “O Egya!”
Anzɛɛ “na ɔvale ye aze tɛladeɛ ne ala.”