Luku 6:1-49

  • Gyisɛse, ‘Ɛnwomenlelielɛ kenle ne Amenle’ (1-5)

  • Nrenyia bie mɔɔ asa ɛdwe la ayileyɛlɛ (6-11)

  • Ɛzoanvolɛma 12 ne (12-16)

  • Gyisɛse kilehile na ɔyɛ ayile (17-19)

  • Anyelielɛ nee gyakɔyɛlɛ (20-26)

  • Agbɔvolɛ ɛhulolɛ (27-36)

  • Bɛgyakyi ndɛnebualɛ (37-42)

  • Bɛbava ye ma bɛanwu ye (43-45)

  • Sua mɔɔ bɛzi ye boɛ; sua mɔɔ bɛanwula ɔ bo (46-49)

6  Wɔ ɛnwomenlelielɛ kenle bie anu ɔhɔvale hwiiti ɛya nu, na ye ɛdoavolɛma ne tetele hwiiti ne bie, yeyele nwolɛ na bɛlile.  Mɔɔ Falasiima ne nwunle ɛhye la, bɛhanle kɛ: “Duzu ati a bɛlɛyɛ debie mɔɔ mɛla ɛmmaa adenle kɛ bɛyɛ ye Ɛnwomenlelielɛ kenle la ɛ?”  Noko Gyisɛse buale bɛ kɛ: “Bɛtɛkengale mɔɔ Devidi yɛle wɔ mekɛ mɔɔ ɛnee ɛhɔne ɛlɛku ye nee menli mɔɔ ɔ nee bɛ lua la ɛlɛ ɔ?  Kɛzi ɔhɔle Nyamenle sua ne anu ɔhɔliele paano ne mɔɔ bɛfa bɛkile la na ɔlile bie na ɔvale bie ɔmaanle menli mɔɔ ɔ nee bɛ lua, wɔ mekɛ mɔɔ mɛla ɛmmaa adenle kɛ awie biala kɛli bie kyesɛ ɛsɔfo ne mɔ ala la ɔ?”  Akee ɔzele bɛ kɛ: “Sonla Ra ne le Ɛnwomenlelielɛ kenle ne Amenle.”  Ɛnwomenlelielɛ kenle bieko ɔhɔle nyianu sua ne anu na ɔbɔle ɔ bo ɔhilehilele. Ɛnee nrenyia bie mɔɔ ɔ sa fema ne ɛdwe la wɔ ɛkɛ.  Mɛla kilehilevolɛma nee Falasiima ne mɔ nleanle Gyisɛse koonwu saa ɔbayɛ ye ayile wɔ Ɛnwomenlelielɛ kenle ne a bɛanyia debie bɛagyinla zo bɛabɔ ye somolɛ.  Noko ɔnwunle mɔɔ ɛnee bɛlɛsuzu nwolɛ la, yemɔti ɔzele nrenyia ne mɔɔ asa ɛdwe la kɛ: “Dwazo bagyinla avinli ɛke.” Na ɔdwazole ɔgyinlanle ɛkɛ.  Akee Gyisɛse zele bɛ kɛ: “Mebiza bɛ edwɛkɛ ko, Asoo mɛla maa adenle kɛ yɛkɛyɛ kpalɛ anzɛɛ yɛkɛyɛ ɛtane wɔ Ɛnwomenlelielɛ kenle ne, yɛkɛlie ngoane* anzɛɛ yɛkɛzɛkye ye?” 10  Mɔɔ ɔnleanle bɛ muala ɔyiale la, ɔzele nrenyia ne kɛ: “Tenrɛ ɛ sa nu.” Na ɔdenrɛle nu, na ɔ sa ne yɛle kpalɛ bieko. 11  Noko bɛvale ɛya kpole na bɛbɔle ɔ bo bɛzuzule mɔɔ bɛbava bɛayɛ Gyisɛse la anwo. 12  Kenle ko bie wɔ mekɛ zɔhane anu ɔvole boka bie ɔhɔyɛle asɔne, na ɔzɛlɛle Nyamenle nɔe ne amuala. 13  Na mɔɔ aleɛ hyenle la, ɔvɛlɛle ye ɛdoavolɛma ne wɔ ɔ nwo ɛkɛ na ɔkpale nuhua 12 na ɔvɛlɛle bɛ ɛzoanvolɛma: 14  Saemɔn, mɔɔ eza ɔdonle ye duma Pita la, nee ɔ diema Andelu, Gyemise, Dwɔn, Felepe, Baatɔlomiyu, 15  Mateyu, Tɔmase, Afeɛse ara Gyemise, Saemɔn mɔɔ bɛfɛlɛ ye “mɔdenlebɔvolɛ ne” la, 16  Gyemise ara Dwudase, nee Dwudase Yesekaleɔto, mɔɔ yele ye maanle la. 17  Na ɔ nee bɛ vi boka ne azo dwule ragyinlanle azɛlɛ sɛsɛ zo, na ɛnee ye ɛdoavolɛma ne dɔɔnwo kpalɛ wɔ ɛkɛ, na menli dɔɔnwo vi Dwudiya nee Gyɛlusalɛm nee Taya yɛɛ Saedɛn maanzinli ne ɛnweazo rale kɛ bɛbadie ye na yeayɛ bɛ ayile. 18  Ɔyɛle menli mɔɔ ɛnee sunsum ɛtane ɛlɛgyegye bɛ bɔbɔ la ayile. 19  Na menli dɔɔnwo ne amuala bɔle mɔdenle kɛ bɛfa bɛ sa bɛaha ye, ɔluakɛ ɛnee tumi vi ye nu ɛlɛyɛ bɛ kɔsɔɔti ayile. 20  Na ɔmaanle ɔ nye zo ɔnleanle ye ɛdoavolɛma ne na ɔhanle kɛ: “Anyelielɛ a le bɛmɛ ehyiavolɛma, ɔluakɛ bɛmɛ a Nyamenle Belemgbunlililɛ ne le bɛ ɛdeɛ a. 21  “Anyelielɛ a le bɛdabɛ mɔɔ ɛhɔne ɛlɛku bɛ kɛkala la, ɔluakɛ bɛ ko bayi. “Anyelielɛ a le bɛdabɛ mɔɔ bɛlɛsu kɛkala la, ɔluakɛ bɛbazele. 22  “Anyelielɛ ɛha bɛ wɔ mekɛ mɔɔ menli kɛkpɔ bɛ, bɛkɛye bɛ bɛkɛvi bɛ avinli, bɛkɛbɔ bɛ aholoba, na bɛkɛzɛkye bɛ duma ɔlua sonla Ra ne ati la. 23  Bɛmaa bɛ nye ɛlie na bɛli fɛlɛko kenle zɔhane, ɔluakɛ nea! bɛ ahatualɛ le kpole wɔ anwuma, zɔhane ala a bɛ nlenyia mɔ yɛle ngapezoma ne mɔ a. 24  “Noko bɛdabɛ mɔɔ bɛnyia bɛ nwo la, bɛ gyakɔ, ɔluakɛ bɛnyia bɛ arɛlekyekyelɛ muala bɛwie. 25  “Bɛdabɛ mɔɔ bɛ ko ɛyi kɛkala la, bɛ gyakɔ, ɔluakɛ ɛhɔne bahu bɛ. “Bɛdabɛ mɔɔ bɛlɛsele kɛkala la, bɛ gyakɔ, ɔluakɛ bɛbali nyane na bɛazu. 26  “Saa menli kɔsɔɔti ka bɛ nwo edwɛkɛ kpalɛ a bɛ gyakɔ, ɔluakɛ zɔhane ala a bɛ nlenyia mɔ yɛle adalɛ ngapezoma ne a. 27  “Noko meka meahile bɛdabɛ mɔɔ bɛlɛtie me la kɛ: Bɛhɔ zo bɛhulo bɛ kpɔvolɛma, na bɛyɛ kpalɛ bɛmaa menli mɔɔ ɛngulo bɛ edwɛkɛ la, 28  bɛyila menli mɔɔ wa bɛ amonle la, bɛzɛlɛ bɛmaa menli mɔɔ bɔ bɛ aholoba la. 29  Awie mɔɔ kɛbɔ ɛ nzo ko anu la, kakyi ko ne noko maa ye; na awie mɔɔ kɛlie wɔ tɛladeɛ aguzo ne la, mmafa mɔɔ vea ɔ bo la ɛbɔ ye abokɛ. 30  Awie biza wɔ debie a fa maa ye, na saa awie fa wɔ debie a, mmabiza ɔ bo zo bieko. 31  “Eza noko debie biala mɔɔ bɛkulo kɛ menli yɛ maa bɛ la, bɛyɛ ye zɔhane ala bɛmaa bɛ. 32  “Saa bɛkulo menli mɔɔ kulo bɛ la ala a, duzu nvasoɛ a bɛbanyia a? Ɔluakɛ ɛtanevolɛma bɔbɔ kulo menli mɔɔ kulo bɛ la. 33  Na saa bɛyɛ kpalɛ bɛmaa menli mɔɔ yɛ kpalɛ maa bɛ la ala a, duzu nvasoɛ a bɛbanyia a? Ɛtanevolɛma bɔbɔ yɛ zɔhane ala. 34  Na saa bɛbɔ menli mɔɔ bɛ nye la kɛ bɛbadua la angome bosea* a, duzu nvasoɛ a bɛbanyia a? Ɛtanevolɛma bɔbɔ bɔ ɛtanevolɛma bosea na bɛ nye la kɛ bɛbadua bɛ ezukoa ne amuala. 35  Noko, bɛhɔ zo bɛhulo bɛ kpɔvolɛma na bɛyɛ bɛ kpalɛ na bɛbɔ bosea mɔɔ bɛmmaa bɛ nye ɛnla kɛ bɛbanyia debie wɔ ɔ nzi a; na bɛ ahatualɛ bayɛ kpole, na bɛbayɛ Anwuma Anwumanli ne amra, ɔluakɛ ɔyɛ nyele ɔmaa anzeayɛlɛma nee ɛtanevolɛma bɔbɔ. 36  Bɛhɔ zo bɛze anwunvɔne, kɛ mɔɔ bɛ Ze noko se anwunvɔne la. 37  “Bieko, bɛgyakyi ndɛnebualɛ na bɛambua bɛ ndɛne; na bɛgyakyi fɔlɛbualɛ na bɛambua bɛ fɔlɛ. Bɛhɔ zo bɛva ɛtane bɛhyɛ na bɛbava bɛ ɛtane bɛahyɛ bɛ. 38  Bɛhyɛ debie, na menli ahyɛ bɛ debie. Ɛzuzudeɛ mɔɔ bɛmia zo, bɛwoso ye, na yebu zo la yɛɛ bɛbawola bɛagua bɛ ɛdanlɛ nu a. Ɔluakɛ debie mɔɔ bɛfa bɛsuzu bɛmaa awie mɔ la yɛɛ bɛbava bɛazuzu bɛamaa bɛdabɛ noko a.” 39  Akee ɔmaanle bɛ ndonwo bie kɛ: “Anyezinliravolɛ ɛnrɛhola ɛnrɛhile anyezinliravolɛ adenle, ɔnle zɔ ɔ? Bɛ mu nwiɔ bɛbagua kuma nu, ɔnle zɔ ɔ? 40  Sukoavo* ɛndɛla ye kilehilevolɛ, noko awie biala mɔɔ bɛhilehile ye kpalɛ la bayɛ kɛ ye kilehilevolɛ la. 41  Ɛnee duzu ati a ɛnwu baka abonle ekyi ne mɔɔ la ɛ diema anye zo noko ɛnnwu mgbunla ne mɔɔ la ɛ nye zo la ɛ? 42  Kɛzi ɛkola ɛka ɛkile ɛ diema kɛ, ‘Adiema, maa menye abonle ekyi ne mɔɔ la ɛ nye zo,’ wɔ mekɛ mɔɔ ɛnnwu mgbunla ne mɔɔ la ɛdawɔ mumua ne ɛ nye zo la ɛ? Nabalabanli! Dimoa ye mgbunla ne fi ɛ nye zo, na wɔanwu kɛzi ɛbaye abonle ekyi ne wɔavi ɛ diema ne anye zo la. 43  “Ɔluakɛ baka kpalɛ ɛnzo ma ɛtane, yɛɛ baka ɛtane ɛnzo ma kpalɛ. 44  Baka biala ma a bɛfa bɛnwu ye a. Kɛ neazo la, bɛntete feege wɔ kolokolonyɛma zo yɛɛ bɛntete vanye ma wɔ evileni zo. 45  Sonlakpalɛ da ninyɛne mgbalɛ mɔɔ wɔ ye ahonle nu la ali, noko sonlatane da ninyɛndane mɔɔ wɔ ye ahonle nu la ali; ɔluakɛ mɔɔ ɛbu zo wɔ ahonle nu la yɛɛ ɛnloanlɛ ka a. 46  “Ɛnee duzu ati a bɛfɛlɛ me ‘Awulae! Awulae!’ noko bɛnyɛ mɔɔ meka la ɛ? 47  Awie biala mɔɔ ɔba me ɛkɛ na ɔtie me edwɛkɛ na ɔyɛ la, mebahile bɛ kɛzi ɔde la: 48  Ɔle kɛ nrenyia bie mɔɔ ɛnee ɛlɛsi ye sua la, ɔpɛle kuma ne ɔmaanle ɔhɔle kolaa na yeawula sua ne abo wɔ bodane zo. Yemɔti, mekɛ mɔɔ azule ne yile razile sua ne la, yeangola ye kpusu, ɔluakɛ bɛzile ye kpalɛ. 49  Noko awie mɔɔ tie edwɛkɛ ne na ɔnyɛ nwolɛ ɛhwee la le kɛ nrenyia bie mɔɔ zile sua na yeanwula ɔ bo la. Azule ne razile ye, na ɛkɛ ne ala ɔbule ɔguale, na sua zɔhane zɛkyele bɔkɔɔ.”

Ɔbodwɛkɛ

Anzɛɛ “ɛkɛla.”
Ɛhye le bosea mɔɔ bɛnlie mpaefoa.
Anzɛɛ “ɛdoavolɛ.”