Luku 24:1-53

  • Bɛdwazo Gyisɛse (1-12)

  • Ɛmeeyɛse adenle zo (13-35)

  • Gyisɛse ye ɔ nwo ahile ɛdoavolɛma (36-49)

  • Gyisɛse kɔ anwuma (50-53)

24  Na dapɛne ne kenle mɔɔ limoa la, bɛvale nyile evuanlɛ ne mɔɔ bɛziezie la bɛhɔle nla* ne azo nwonlomɔ mangyee ne.  Noko bɛnwunle kɛ bɛhundo bolɛ ne bɛvi nla* ne anloa,  na mɔɔ bɛwolole nu la, bɛannwu Awulae Gyisɛse funli ne.  Mekɛ mɔɔ bɛ adwenle yɛle bɛ kesee wɔ ɛhye anwo la, nea! mrenyia nwiɔ mɔɔ wula adɛladeɛ nwohyee la ragyinlanle bɛ nwo ɛkɛ.  Mraalɛ ne mɔ ahonle dule na bɛzile bɛ ti aze, yemɔti mrenyia ne mɔ zele bɛ kɛ: “Kɛmɔti a bɛlɛkpondɛ mɔɔ de aze la wɔ mowuamra anu ɛ?  Ɔnle ɛke, bɛdwazo ye. Bɛhakye mɔɔ ɔhanle ɔhilele bɛ wɔ mekɛ mɔɔ ɛnee ɔwɔ Galeli la,  kɛ bɛbaye sonla Ra ne bɛamaa ɛtanevolɛma na bɛahu ye wɔ baka zo na ye kenle nsa ne azo yeadwazo.”  Akee bɛhakyele ye edwɛkɛ ne,  na bɛvile nla* ne azo bɛziale bɛhɔle na bɛhanle ɛhye mɔ amuala bɛhilele Bulu Nee Ko ne nee ɛdoavolɛma ne mɔɔ ɛha la. 10  Bɛmɛ a le Mɛle Magedalene, Dwowana, yɛɛ Gyemise mame Mɛle. Eza mraalɛ mɔɔ nee bɛ lua la noko hanle edwɛkɛ ne hilele ɛzoanvolɛma ne. 11  Noko, bɛbule edwɛkɛ ɛhye kɛ ɔle ngoaseasɛm na bɛanlie mraalɛ ne mɔ bɛanli. 12  Noko Pita dwazole na ɔnriandile ɔhɔle nla* ne anwo na mɔɔ ɔbutule ɔnleanle nu la, ɔnwunle lenen ndanlɛ ne ala. Yemɔti ɔhɔle na ɛnee mɔɔ ɛzi la yɛ ye azibɛnwo. 13  Na nea! kenle ko ne ala, ɛnee bɛ nuhua nwiɔ ɛlɛkɔ namule bie mɔɔ bɛfɛlɛ ye Ɛmeeyɛse la azo, ɔ nee Gyɛlusalɛm avinli kɛyɛ mayɛlɛ nsuu,* 14  na ɛnee bɛlɛdi mɔɔ ɛzi la kɔsɔɔti anwo adwelie. 15  Mekɛ mɔɔ bɛlɛka ninyɛne ɛhye mɔ anwo edwɛkɛ la, Gyisɛse mumua ne bikyele bɛ na ɔ nee bɛ luale nwolɛ, 16  noko bɛannwu ye kɛ ɔdaye ɔ. 17  Ɔzele bɛ kɛ: “Duzu a bɛ nye ɛbolo bɛlɛka nwolɛ edwɛkɛ wɔ adenle ye anu la?” Bɛgyinlanle, na bɛ nyunlu yɛle alɔbɔlɛ. 18  Bɛ nuhua ko mɔɔ bɛfɛlɛ ye Kiliopase la buale ye kɛ: “Ɛ ngomekye a ɛle ɛyɛvolɛ wɔ Gyɛlusalɛm a mɔɔ ɛnze edwɛkɛ mɔɔ ɛzi ɛkɛ ne kenlensa ye la ɔ?” 19  Ɔbizale bɛ kɛ: “Edwɛkɛ boni?” Bɛbuale ye kɛ: “Mɔɔ fale Gyisɛse mɔɔ vi Nazalɛte, mɔɔ ɔhilele kɛ ɔle ngapezonli mɔɔ tumi wɔ ye edwɛkɛ nee ye nyɛleɛ nu wɔ Nyamenle nee menli kɔsɔɔti anyunlu la; 20  nee kɛzi yɛ ɛsɔfo mgbanyinli nee mgbanyima ne mɔ yele ye maanle na bɛbuale ye ewule fɔlɛ, na bɛbɔle ye baka nu la. 21  Noko ɛnee yɛ nye la kɛ nrenyia ɛhye a le awie mɔɔ balie Yizilayɛ a. Ɛhɛe, eza yeanga ye zɔ, ninyɛne ɛhye mɔ zile la ye kenle nsa ɛne. 22  Bieko, mraalɛ bie mɔɔ wɔ yɛ avinli la noko ɛdu yɛ ahonle, ɔluakɛ bɛhɔle nla* ne azo ndɛ 23  na mɔɔ bɛannwu ye funli ne la, bɛrahanle kɛ eza bɛnwunle anwumabɔvolɛma mɔɔ hanle kɛ ɔde aze a. 24  Akee yɛ nuhua bie mɔ hɔle nla* ne azo, na bɛhɔnwunle ye kɛ mɔɔ mraalɛ ne mɔ hanle ala la, noko bɛannwu ye.” 25  Yemɔti ɔzele bɛ kɛ: “Bɛmɛ mɔɔ bɛnlɛ adwenle na bɛngola bɛnlie ninyɛne mɔɔ ngapezoma ne hanle la kɔsɔɔti bɛnli a! 26  Asoo ɛnee ɔngyia kɛ Kelaese ne nwu amaneɛ ɛhye mɔ na yeahɔ ye anyunlunyia nu ɔ?” 27  Na ɔbɔle ɔ bo ɔvile Mosisi nee Ngapezoma ne kɔsɔɔti anwo zo, na ɔhilehilele bɛ ninyɛne mɔɔ fale ɔ nwo mɔɔ wɔ Ngɛlɛlera ne kɔsɔɔti anu la. 28  Akee bɛdwule namule ne mɔɔ bɛlɛkɔ zo la azo na ɔyɛle kɛ ɔpɛ nu yeahɔ. 29  Na bɛbodole ye ɛsesebɛ kɛ: “Tɛnla yɛ nwo ɛke, ɔluakɛ asɛɛ aleɛ ɛdwo.” Na ɔ nee bɛ hɔle sua nu. 30  Mɔɔ bɛlɛdi debie la, ɔvale paano, ɔyilale zolɛ, ɔbubule nu, na ɔvale ɔmaanle bɛ. 31  Akee bɛ nye zo dele wienyi na bɛnwunle ye sonla holɛ noko ɔminliminlinle bɛ nye zo. 32  Na bɛhanle bɛhilele bɛ nwo ngoko kɛ: “Asoo mekɛ mɔɔ ɔlɛtendɛ yeahile yɛ wɔ adenle ne anu na ɔlɛkilehile Ngɛlɛlera ne anu yeahile yɛ la, yeanga yɛ ahonle kpole ɔ?” 33  Na ɛkɛ ne ala bɛdwazole na bɛziale bɛhɔle Gyɛlusalɛm, na bɛhɔnwunle Bulu Nee Ko ne nee bɛdabɛ mɔɔ bɛboka bɛ nwo la kɛ bɛyia, 34  na bɛlɛka kɛ: “Amgba bɛdwazo Awulae, na ɔyele ɔ nwo ɔhilele Saemɔn!” 35  Akee bɛhanle edwɛkɛ mɔɔ zile adenle ne anu nee kɛzi paano ne mɔɔ ɔbubule nu la maanle bɛnwunle ye sonla holɛ la. 36  Mɔɔ bɛlɛka ɛhye mɔ anwo edwɛkɛ la, ɔdaye mumua ne ɔragyinlanle bɛ avinli na ɔhanle kɛ: “Anzodwolɛ ɛha bɛ.” 37  Noko kɛmɔ ɛzulolɛ maanle bɛ ahonle dule la ati, bɛzuzule kɛ bɛnwu sunsum bie. 38  Yemɔti ɔzele bɛ kɛ: “Kɛmɔti a bɛyɛ basaa ɛ, na duzu ati a bɛnlie bɛnli wɔ bɛ ahonle nu a? 39  Bɛnlea me sa nee me gyakɛ, na bɛnwu ye kɛ medame mumua ne ɛne; bɛva bɛ sa bɛha me na bɛnlea ɔluakɛ sunsum ɛnlɛ nwonane nee mbowule kɛ mɔɔ bɛnwu kɛ melɛ la.” 40  Mɔɔ ɔhanle ɛhye la, ɔvale ɔ sa nee ɔ gyakɛ ɔhilele bɛ. 41  Noko kɛmɔ anyelielɛ kpole nee azibɛnwo ammaa bɛanlie bɛanli la ati, ɔbizale bɛ kɛ: “Bɛlɛ debie wɔ ɛkɛ mɔɔ bɛbali ɔ?” 42  Ɔti bɛvale fɛlɛ sinli bie mɔɔ bɛdondo la bɛmaanle ye, 43  na ɔliele na ɔlile wɔ bɛ nyunlu ɛkɛ. 44  Akee ɔzele bɛ kɛ: “Ɛhye a le edwɛkɛ mɔɔ menganle mengilele bɛ wɔ mekɛ mɔɔ me nee bɛ de la a, kɛ ninyɛne mɔɔ bɛhɛlɛ ye wɔ Mosisi Mɛla ne nee Ngapezoma ne yɛɛ Edwɛndolɛ ne anu kɔsɔɔti mɔɔ fale me nwo la ɔwɔ kɛ ba nu.” 45  Akee ɔbukele bɛ adwenle nu kpalɛ ɔmaanle bɛdele Ngɛlɛlera ne abo, 46  na ɔzele bɛ kɛ, “Mɔɔ bɛhɛlɛ la ɛne: Kelaese ne banwu amaneɛ na yeadwazo yeavi mowuamra anu wɔ ye kenle nsa ne azo, 47  na bɛbalua ye duma nu bɛabɔ anlubɛnwo nee ɛtanefakyɛ nwo nolo wɔ maanle maanle kɔsɔɔti anu—bɛbabɔ ɔ bo wɔ Gyɛlusalɛm. 48  Bɛdabɛ a bɛbali ninyɛne ɛhye mɔ anwo daselɛ a. 49  Na nea! melɛsoa mɔɔ Egya bɔle nwolɛ ɛwɔkɛ la meamaa yeara bɛ nwo zo. Noko bɛmɛ, bɛdɛnla sua ne azo kɔkpula kɛ tumi vi anwuma bara bɛ nwo zo.” 50  Akee ɔlile bɛ nyunlu too ɔhɔle Bɛtani, na ɔmaanle ɔ sa zo ɔyilale bɛ. 51  Mɔɔ ɔlɛyila bɛ la, ɔhwenle ɔ nwo ɔvile bɛ nwo ɛkɛ ne na bɛvale ye bɛhɔle anwuma. 52  Na bɛhotole ye na bɛvale anyelielɛ kpole bɛziale bɛhɔle Gyɛlusalɛm. 53  Na ɛnee dahuu bɛwɔ ɛzonlenlɛ sua ne anu bɛlɛye Nyamenle ayɛlɛ.

Ɔbodwɛkɛ

Anzɛɛ “ngakyelɛ nla.”
Anzɛɛ “ngakyelɛ nla.”
Anzɛɛ “ngakyelɛ nla.”
Anzɛɛ “ngakyelɛ nla.”
Kɛyɛ kilomita 11.
Anzɛɛ “ngakyelɛ nla.”
Anzɛɛ “ngakyelɛ nla.”