Luku 2:1-52

  • Gyisɛse awolɛ (1-7)

  • Anwumabɔvolɛma ye bɛ nwo kile mboaneneavolɛma (8-20)

  • Mrenyia zo ɛpɛlɛ nee bɛ nwo ɛdelɛ (21-24)

  • Semɛyɔn nwu Kelaese (25-35)

  • Ana ka kakula ne anwo edwɛkɛ (36-38)

  • Bɛziale bɛhɔle Nazalɛte (39, 40)

  • Gyisɛse mɔɔ ɛli ɛvolɛ 12 la wɔ ɛzonlenlɛ sua ne anu (41-52)

2  Mekɛ ne anu Siza Ɔgɛsetɛse lile mɛla kɛ bɛhɛlɛ azɛlɛ ye azo amra amuala aluma.  (Duma ɛhɛlɛlɛ ɛhye mɔɔ limoa la hɔle zo wɔ mekɛ mɔɔ Koyeleneɛse le amɛnlado wɔ Selea la.)  Na menli ne amuala hɔle kɛ bɛkahɛlɛ bɛ aluma, awie biala hɔle ye sua zo.  Dwosefi noko vi Nazalɛte mɔɔ wɔ Galeli la hɔle Dwudiya wɔ Devidi sua zo, mɔɔ bɛfɛlɛ ye Bɛtelɛhɛm la, ɔluakɛ ɔvi Devidi abusua nu.  Ɔ nee ɔ ye Mɛle mɔɔ ɛnee ɔka ekyii ɔwo la hɔle kɛ bɛkahɛlɛ bɛ aluma.  Mekɛ mɔɔ bɛwɔ ɛkɛ ne la, ɔ ko hanle ye.  Na ɔwole ɔ ra nrenyia ne, ye belamunli ralɛ ne, na ɔvale ndanlɛ avuazinli ɔkyekyele ye ɔdole ye nane adidilɛka nu, ɔluakɛ bɛannyia ɛleka biala wɔ nyɛvolɛ sua ne anu.  Ɛnee mboaneneavolɛma noko wɔ maanzinli ko ne ala anu ɛlɛnea bɛ mboane nɔe ne wɔ alienwo.  Arɛlevilɛ nu ala, Gyihova* anwumabɔvolɛ ragyinlanle bɛ nyunlu ɛkɛ, na Gyihova* anyunlunyia dale bɛ nwo zo na ɛzulolɛ kpole hanle bɛ. 10  Na anwumabɔvolɛ ne zele bɛ kɛ: “Bɛmmasulo, nea! melɛfa anyelielɛ kpole mɔɔ menli kɔsɔɔti banyia la anwo edwɛkɛ mearɛlɛ bɛ. 11  Ɔluakɛ ɛnɛ, bɛwo dievolɛ bie mɔɔ le Awulae Kelaese ne la bɛmaa bɛ wɔ Devidi sua zo. 12  Na ɛhye a bayɛ sɛkɛlɛneɛ amaa bɛ a: Bɛbanwu adɔma mɔɔ bɛva ndanlɛ avuazinli bɛkyekye ye la kɛ ɔla nane adidilɛka nu.” 13  Arɛlevilɛ nu ala anwumabɔvolɛma dɔɔnwo* rabokale anwumabɔvolɛ ne anwo bɛyele Nyamenle ayɛlɛ na bɛhanle kɛ: 14  “Anyunlunyia ɛha Nyamenle wɔ anwuma lɔ, na anzodwolɛ ɛha menli mɔɔ ɔdie bɛ ɔto nu wɔ azɛlɛ ye azo la.” 15  Yemɔti mekɛ mɔɔ anwumabɔvolɛma ne vile bɛ nwo ɛkɛ ne hɔle anwuma la, mboaneneavolɛma ne hanle hilele bɛ nwo ngoko kɛ: “Bɛmaa yɛhɔ Bɛtelɛhɛm na yɛhɔnlea mɔɔ ɛzi mɔɔ Gyihova* ɛla ye ali ɛhile yɛ la.” 16  Bɛyɛle ye ndɛndɛ bɛhɔle na bɛnwunle Mɛle nee Dwosefi, yɛɛ kakula ne mɔɔ la nane adidilɛka ne anu la. 17  Mekɛ mɔɔ bɛnwunle ɛhye la, bɛhanle kakula ne anwo edwɛkɛ mɔɔ anwumabɔvolɛ ne hanle la bɛhilele bɛ. 18  Na mɔɔ mboaneneavolɛma ne hanle la zinle menli kɔsɔɔti mɔɔ dele la anwo, 19  noko Mɛle bɔle ɔ bo vale edwɛkɛ ɛhye mɔ amuala ziele, na ɔdwenledwenlenle nwolɛ wɔ ye ahonle nu. 20  Akee mboaneneavolɛma ne ziale hɔle, bɛwulale Nyamenle anyunlunyia na bɛyele ye ayɛlɛ wɔ mɔɔ bɛde nee mɔɔ bɛnwu ye kɔsɔɔti la anwo, kɛ mɔɔ bɛhanle bɛhilele bɛ ala la. 21  Kenle mɔtwɛ ne anzi, mɔɔ mekɛ dwule kɛ bɛpɛ ye mrenyia zo la, bɛdonle ye duma Gyisɛse, duma mɔɔ anwumabɔvolɛ ne vale maanle ye kolaa na banrenzɛ ye la. 22  Eza mɔɔ mekɛ dwule kɛ bɛmaa bɛ nwo ade kɛ mɔɔ Mosisi Mɛla ne kile la, bɛvale ye bɛhɔle Gyɛlusalɛm kɛ bɛkava ye bɛahile Gyihova,* 23  kɛ mɔɔ bɛhɛlɛ ye wɔ Gyihova* Mɛla ne anu la: “Belamunli ralɛ nrenyia biala bayɛ nwuanzanwuanza amaa Gyihova.”* 24  Na bɛbɔle afɔle kɛ mɔɔ Gyihova* Mɛla ne se la: “abubule nwiɔ anzɛɛ mɔlɔnoma nwiɔ.” 25  Na nea! ɛnee nrenyia bie wɔ Gyɛlusalɛm mɔɔ bɛfɛlɛ ye Semɛyɔn, ɔle tenlenenli yɛɛ ɔsulo Nyamenle, na ɔlɛkendɛ mekɛ mɔɔ Nyamenle bakyekye Yizilayɛ arɛle la, na ɛnee sunsum nwuanzanwuanza wɔ ɔ nwo zo. 26  Ɛnee eza Nyamenle ɛlua sunsum nwuanzanwuanza ne azo ɛye ɛhile ye kɛ ɔnrɛwu kɔkpula kɛ ɔbanwu Kelaese ne mɔɔ Gyihova* ɛzoa ye la. 27  Sunsum ne hilele ye adenle maanle ɔhɔle ɛzonlenlɛ sua ne anu, na mekɛ mɔɔ kakula* Gyisɛse awovolɛ vale ye rale kɛ bɛbayɛ mɔɔ Mɛla ne kile la, 28  ɔliele kakula ne ɔdole ɔ sa zo ɔyele Nyamenle ayɛlɛ na ɔhanle kɛ: 29  “Tumivolɛ Awulae, kɛkala, ɛlɛmaa wɔ akɛlɛ ahɔ anzodwolɛ nu kɛ mɔɔ ɛhanle la, 30  ɔboalekɛ menwu mɔɔ ɛbalua ɔ nwo zo wɔalie ngoane 31  mɔɔ wɔva wɔmaa wɔ menli kɔsɔɔti anyunlu la, 32  wienyi mɔɔ baye awozinli mɔɔ ɛheda maanle maanle ne anwo zo na yeayɛ anyunlunyia yeamaa wɔ menli Yizilayɛma la.” 33  Na mɔɔ ɔhanle ye wɔ kakula ne anwo la zinle ye papa nee ye mame anwo. 34  Eza Semɛyɔn yilale bɛ na ɔzele kakula ne mame Mɛle kɛ: “Nea! Bɛye kakula ɛhye bɛmaa Yizilayɛma dɔɔnwo azedɔlɛ nee bɛ ɛdwazolɛ bieko nee sɛkɛlɛneɛ mɔɔ bɛbadendɛ bɛatia la 35  (ɛhɛe, dadeɛ tendenle bawɔ wɔ avinde), amaa mɔɔ wɔ menli dɔɔnwo ahonle nu la ala ali.” 36  Ɛnee ngapezonli raalɛ bie mɔɔ bɛfɛlɛ ye Ana, mɔɔ le Fanuwɛle mɔɔ vi Ahya abusua nu ara raalɛ la wɔ ɛkɛ. Ɛnee raalɛ ɛhye ɛnyi kpalɛ na bɛgyale ye* la ɔ nee ɔ hu dɛnlanle ɛvolɛ nsuu, 37  ɛnee ɔle kunlavolɛ raalɛ mɔɔ yeli ɛvolɛ 84. Ɛnee dahuu ɔwɔ ɛzonlenlɛ sua ne anu, ɔfa ɛhɔnehyelɛ nee modolɛ ɔsonle alehyenlɛ nee aledwolɛ. 38  Wɔ zɔhane mekɛ ne anu, ɔbikyele bɛ na ɔbɔle ɔ bo ɔyɛle Nyamenle mo na ɔhanle kakula ne anwo edwɛkɛ ɔhilele menli kɔsɔɔti mɔɔ bɛlɛkendɛ Gyɛlusalɛm ɛlielɛ ne la. 39  Ɔti mekɛ mɔɔ bɛyɛle debie biala kɛ mɔɔ Gyihova* Mɛla ne kile la, bɛziale bɛhɔle bɛ sua zo Nazalɛte wɔ Galeli. 40  Na kakula ne hɔle zo nyinle na ɔnyianle anwosesebɛ, ɔnwunle nrɛlɛbɛ kpole, na ɔhɔle zo ɔnyianle Nyamenle anyunlu ɛlolɛ. 41  Ɛvolɛ biala ɛnee ye awovolɛ kɔ Gyɛlusalɛm kɔdi Akpabɛnwo ɛvoyia ne. 42  Mekɛ mɔɔ ɔlile ɛvolɛ 12 la, bɛhɔle ɛvoyialilɛ ne kɛ mɔɔ bɛyɛ ye la. 43  Bɛwiele ɛvoyialilɛ ne na bɛlɛsia bɛahɔ la, kakula Gyisɛse hale bɛ nzi wɔ Gyɛlusalɛm, na ye awovolɛ annwu ye. 44  Ɛnee bɛsuzu kɛ ɔboka menli mɔɔ bɛlɛkɔ la anwo, yemɔti bɛdiale kenle ko adenle na akee bɛbɔle ɔ bo kɛ bɛkpondɛ ye wɔ ye mbusuafoɔ nee ɔ gɔnwo mɔ avinli. 45  Noko mɔɔ bɛannwu ye la, bɛziale bɛhɔle Gyɛlusalɛm na bɛbɔle mɔdenle ɛsesebɛ bɛkpondɛle ye. 46  Kenle nsa anzi, bɛnwunle ye wɔ ɛzonlenlɛ sua ne anu kɛ ɔde kilehilevolɛma ne avinli ɔlɛtie bɛ na ɔlɛbizebiza bɛ edwɛkɛ. 47  Na kɛzi ɔte edwɛkɛ bo nee ye nyelebɛnloa ne zinle bɛdabɛ mɔɔ bɛlɛtie ye la anwo. 48  Mɔɔ ye awovolɛ nwunle ye la, ɔzinle bɛ nwo, na ye mame zele ye kɛ: “Me ra, kɛmɔti a wɔyɛ yɛ zɛhae ɛ? Nea kɛzi me nee wɔ papa anye ɛbolo yɛlɛkpondɛ wɔ a.” 49  Noko ɔzele bɛ kɛ: “Duzu ati a bɛlɛkpondɛ me a? Bɛnze kɛ ɔwɔ kɛ metɛnla Egya sua nu ɔ?” 50  Noko, bɛande mɔɔ ɔhanle ɔhilele bɛ la abo. 51  Akee ɔ nee bɛ ziale hɔle Nazalɛte, na ɔhɔle zo ɔbɛlɛle ɔ nwo aze* ɔmaanle bɛ. Ye mame noko vale edwɛkɛ ɛhye mɔ amuala ziele ye ahonle nu kpalɛ. 52  Na Gyisɛse hɔle zo nyianle nrɛlɛbɛ, ɔnyinle na ɔnyianle Nyamenle nee menli nyunlu ɛlolɛ.

Ɔbodwɛkɛ

Nea Edwɛkɛbohilelɛ.
Nea Edwɛkɛbohilelɛ.
Giliki aneɛ nu, “anwuma ɛlɔne dɔɔnwo.”
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Giliki aneɛ nu, “kakula ekyi.”
Giliki aneɛ nu, “ɔgyale wɔ ye mbɛlɛra nu.”
Nea Edwɛkɛbohilelɛ.
Anzɛɛ “ɔhɔle zo ɔyɛle tieyɛ.”