Luku 13:1-35

  • Bɛnlu bɛ nwo na bɛanzɛkye bɛ (1-5)

  • Feege baka ne mɔɔ anzo la anwo ndonwo (6-9)

  • Raalɛ abubura bie ayileyɛlɛ wɔ Ɛnwomenlelielɛ kenle (10-17)

  • Mɛsetade ma nee mgbɔvonle ne anwo ndonwo (18-21)

  • Mɔdenlebɔlɛ hyia na bɛava anlenkɛ ekyi ne anu (22-30)

  • Hɛlɔdo, “zɔhane ɛzonlɛ ne” (31-33)

  • Gyisɛse su Gyɛlusalɛm (34, 35)

13  Zɔhane mekɛ ne, menli bie mɔɔ ɛnee wɔ ɛkɛ la zele ye kɛ Paelɛte hunle Galelima bie mɔ mɔɔ ɛnee bɛlɛbɔ afɔle la.  Ɔbuale bɛ kɛ: “Bɛdwenle kɛ ɛnee Galelima zɔhane ɛtane le kpole tɛla Galelima kɔsɔɔti mɔɔ ɛha la ɔluakɛ ninyɛne ɛhye mɔ dole bɛ la ati ɔ?  Kyɛkyɛ, ɔnle zɔ; noko saa bɛannu bɛ nwo a bɛbazɛkye bɛ muala zɔhane ala.  Anzɛɛ menli 18 ne mɔɔ Saelowam tawa ne bule guale bɛ nwo zo hunle bɛ la—bɛdwenle kɛ bɛ ɛtane le kpole tɛla menli kɔsɔɔti mɔɔ wɔ Gyɛlusalɛm la ɔ?  Kyɛkyɛ, ɔnle zɔ; noko saa bɛannu bɛ nwo a, bɛbazɛkye bɛ muala kɛ mɔɔ bɛzɛkyele bɛ la.”  Akee ɔdoale zo ɔhanle ndonwo ɛhye kɛ: “Ɛnee nrenyia bie lɛ feege baka wɔ ye vanye egyinli nu na ɔhɔle kɛ ɔkakpondɛ ma wɔ zolɛ noko yeannyia bie.  Na ɔzele ahenle mɔɔ nea vanye egyinli ne azo la kɛ, ‘Ɛvolɛ nsa ɛne mɔɔ mera ɛke kɛ mebakpondɛ ma wɔ feege baka ye azo a, noko meannyia bie. Pɛ ye to aze! Kɛmɔti a ɔwɔ kɛ ɔsɛkye azɛlɛ ne mgbane ɛ?’  Ɔbuale ye kɛ, ‘Yɛmenle, gyakyi ye maa ɔgyinla ɛkɛ ɛvolɛ bieko na mebavunduvundu ɔ bo meava ewula meagua ɛkɛ.  Saa ɔso ma kenle bie a, ɛnee edwɛkɛ kpalɛ ɔ; na saa yeanzo a akee wɔapɛ ye wɔado aze.’” 10  Ɛnee ɔlɛkilehile wɔ nyianu sua bie anu wɔ Ɛnwomenlelielɛ kenle. 11  Na nea! ɛnee raalɛ bie wɔ ɛkɛ mɔɔ sunsum ɛtane ɛmaa ɔ nwo ɛdo ye ɛvolɛ 18 na ye avinli ɛkpo mɔɔ ɔngola ɔndenrɛ ɔ nwo fee a. 12  Mɔɔ Gyisɛse nwunle ye la, ɔzele ye kɛ: “Ɔmɔ, ɛ nwo ɛdɔ wɔ ɛvi wɔ anwodolɛ ne anwo.” 13  Ɔvale ɔ sa ɔguale ɔ nwo zo na ɛkɛ ne ala ɔdenrɛle ɔ nwo na ɔbɔle ɔ bo ɔyele Nyamenle ayɛlɛ. 14  Noko nyianu sua ne anu kpanyinli ne vale ɛya ɔluakɛ Gyisɛse ɛyɛ ayile wɔ Ɛnwomenlelielɛ kenle ne, yemɔti ɔzele menli ne kɛ: “Kenle nsia wɔ ɛkɛ mɔɔ ɔwɔ kɛ bɛyɛ gyima a; yemɔti bɛrɛla kenle zɔhane mɔ bɛmaa bɛyɛ bɛ ayile na tɛ Ɛnwomenlelielɛ kenle ne ɔ.” 15  Na Awulae buale ye kɛ: “Nabalabama, asoo bɛ nuhua biala ɛnzianyi ye ɛnlankɛ anzɛɛ ye asoaso wɔ ye tunli nu wɔ Ɛnwomenlelielɛ kenle na ɔngɔmaa ye nzule ɔ? 16  Asoo ɔnle kɛ raalɛ ɛhye mɔɔ le Ebileham ara raalɛ mɔɔ Seetan ɛkyekye ye ɛvolɛ 18 la anwo tɔ ye wɔ ye anwodolɛ nwo wɔ Ɛnwomenlelielɛ kenle ɔ?” 17  Mekɛ mɔɔ ɔhanle ɛhye la, menli kɔsɔɔti mɔɔ dwazo tia ye la bɔle anyiemgba, noko menli ne amuala anye liele nwanwane ninyɛne mɔɔ ɔyɛle la kɔsɔɔti anwo. 18  Yemɔti ɔdoale zo ɔhanle kɛ: “Kɛzi Nyamenle Belemgbunlililɛ ne de ɛ, na duzu a mebahola meava meado nwo a? 19  Ɔle kɛ mɛsetade ma mɔɔ nrenyia bie hɔluale ye wɔ ye tola nu la, ɔnyinle na ɔyɛle baka kpole, na anwomanyunlu nloma yɛle bɛ sane wɔ ye ngane ne mɔ azo.” 20  Eza ɔhanle kɛ: “Duzu a mebahola meava meado Nyamenle Belemgbunlililɛ ne anwo a? 21  Ɔle kɛ mgbɔvonle mɔɔ raalɛ bie vale wulale esamo kilo bulu nu ɔmaanle ɔ muala dule la.” 22  Na ɔdule adenle ɔhɔle azua azua nee namunamu zo, ɔhilehilele na ɔdoale ye adendulɛ ne azo ɔhɔle Gyɛlusalɛm. 23  Akee nrenyia bie bizale ye kɛ: “Awulae, menli ekyi bie a bɛbalie bɛ ngoane ɔ?” Ɔzele bɛ kɛ: 24  “Bɛbɔ mɔdenle kpalɛ bɛva anlenkɛ ekyi ne anu, ɔluakɛ menli dɔɔnwo babɔ mɔdenle kɛ bɛfa nu noko bɛnrɛhola. 25  Saa suamenle ne dwazo na ɔto anlenkɛ ne anu a, bɛbagyinla alienwo bɛabɔ anlenkɛ ne anu kɛ, ‘Yɛmenle, buke yɛ.’ Noko ɔbabua bɛ kɛ: ‘Menze ɛleka mɔɔ bɛvi a.’ 26  Akee bɛbabɔ ɔ bo bɛaha kɛ, ‘Yɛlile na yɛnlonle wɔ ɛ nyunlu ɛkɛ, yɛɛ ɛhilehilele wɔ yɛ awɔdenle mgbole ne mɔ azo.’ 27  Noko ɔbaha yeahile bɛ kɛ, ‘Menze ɛleka mɔɔ bɛvi a. Bɛvi me nwo ɛke bɛhɔ, bɛmɛ mɔɔ bɛyɛ ninyɛne mɔɔ ɛnle kpalɛ a!’ 28  Ɛkɛ ne a bɛbazu na bɛali nyane a, mekɛ mɔɔ bɛkɛnwu Ebileham, Ayezeke, Gyekɔbo, yɛɛ ngapezoma ne amuala wɔ Nyamenle Belemgbunlililɛ ne anu, na akee bɛvuandi bɛmɛ bɛgua alienwo la. 29  Eza menli vi aduduleɛ nee adɔleɛ yɛɛ sɔlɔ nee nyiakɛ bara na bɛadɛnla ɛkponle nwo bɛali debie wɔ Nyamenle Belemgbunlililɛ ne anu. 30  Na nea! menli mɔɔ li amozi la bie mɔ balimoa na menli mɔɔ limoa la bie mɔ aha amozi.” 31  Zɔhane mekɛ ne anu, Falasiima bie mɔ razele ye kɛ: “Ye ɛ nwo ɛke na kɔ, ɔluakɛ Hɛlɔdo kpondɛ kɛ ɔku wɔ.” 32  Na ɔzele bɛ kɛ: “Bɛhɔha bɛhile zɔhane ɛzonlɛ ne kɛ, ‘Nea! melɛtu sunsum ɛtane ne mɔ na meayɛ ayile ɛnɛ nee ɛhyema, na ye kenle nsa ne azo mebawie.’ 33  Noko ɔwɔ kɛ metu adenle ɛnɛ, ɛhyema nee ye alehyenlɛ, ɔluakɛ ɔnle kɛ bɛku ngapezonli wɔ ɛleka gyɛne biala kyesɛ Gyɛlusalɛm. 34  Gyɛlusalɛm, Gyɛlusalɛm, wɔmɔ mɔɔ ɛku ngapezoma na ɛsi menli mɔɔ bɛzoa bɛ wɔ ɛ nwo ɛkɛ awolɛ a—fane nyɛ a ɛnee mekulo kɛ meboɔboa ɛ mra nloa kɛ mɔɔ akɔlɛ ɛrɛladane boɔboa ɔ mra nloa wɔ ɔ ndɛba abo a! Noko wɔangulo. 35  Nea! Bɛgyakyi wɔ sua ne bɛmaa wɔ. Meka meahile bɛ, bɛnrɛnwu me bieko kɔkpula kɛ bɛbaha kɛ: ‘Nyilalɛ ɛha mɔɔ ɛlɛba wɔ Gyihova* duma nu la!’”

Ɔbodwɛkɛ

Nea Edwɛkɛbohilelɛ.