Hibuluma 7:1-28

  • Mɛlekezidɛke, belemgbunli nee ɛsɔfo titili (1-10)

  • Kelaese ɛsɔfolilɛ sonle bolɛ kpalɛ (11-28)

    • Kelaese kola die menli bɔkɔɔ (25)

7  Na Mɛlekezidɛke ɛhye, ɔle Salɛm belemgbunli, Anwuma Anwumanli Nyamenle ne ɛsɔfo, mɔɔ Ebileham hɔhunle arelemgbunli ne mɔ na ɔlɛsia yeara la, ɔhɔyiale ye na ɔyilale ye,  na Ebileham maanle* ye debie biala ngyɛnu bulu ɛkpɔ ko. Mɔɔ limoa la, ye duma ne abo kile “Tenleneyɛlɛ Belemgbunli,” yɛɛ eza ɔle Salɛm belemgbunli, mɔɔ ɔkile “Anzodwolɛ Belemgbunli.”  Kɛmɔ ɔnlɛ ye papa, ɔnlɛ ye mame, ɔnlɛ abusua, ɔnlɛ mekɛ mɔlebɛbo yɛɛ ɔnlɛ ngoane awieleɛ, emomu bɛyɛ ye kɛ Nyamenle Ara la ati, ɔle ɛsɔfo dahuu.  Nea kɛzi nrenyia ɛhye mɔɔ yɛ nlenyia* Ebileham maanle ye ninyɛne mgbalɛ mɔɔ ɔnyianle bɛ konle nu ngyɛnu bulu ɛkpɔ ko la kpole de la.  Nɔhalɛ nu, Mɛla ne kile kɛ ɔwɔ kɛ Livae amra mɔɔ yɛ ɛsɔfo gyima la die ngyɛnu bulu ɛkpɔ ko fi menli ne ɛkɛ, kile kɛ, bɛdie bɛfi bɛ mediema ne mɔ ɛkɛ wɔ mekɛ bɔbɔ mɔɔ bɛle Ebileham abozoamra la.  Noko nrenyia ɛhye mɔɔ ɔnvi bɛ abusua nu la liele ngyɛnu bulu ɛkpɔ ko vile Ebileham ɛkɛ na ɔyilale ahenle mɔɔ bɛbɔle ye ɛwɔkɛ la.  Kpolerazulɛ biala ɛnle nwo kɛ mɔɔ le kpole la a yila mɔɔ le ekyi a.  Na wɔ edwɛkɛ ne ko anu, menli mɔɔ wu la a die ngyɛnu bulu ɛkpɔ ko a, yɛɛ wɔ ko ne noko anu, awie mɔɔ bɛli ɔ nwo daselɛ kɛ ɔde aze la ɔ.  Na yɛkola yɛka kɛ Livae bɔbɔ mɔɔ die ngyɛnu bulu ɛkpɔ ko la luale Ebileham anwo zo vale ngyɛnu bulu ɛkpɔ ko maanle, 10  ɔluakɛ ɛnee ɔtɛbɔ ɔ nlenyia akunlu wɔ mekɛ mɔɔ Mɛlekezidɛke yiale ye la. 11  Ɔti saa Livae ɛsɔfolilɛ ne azo a bɛdua bɛdi munli a (ɔluakɛ ɛnee ɔwɔ Mɛla ne mɔɔ bɛvale bɛmaanle menli ne la anu), asoo anrɛɛ ɔhyia kɛ ɛsɔfo gyɛne kɛra mɔɔ le kɛ Mɛlekezidɛke na ɔnle kɛ Aalɔn la ɔ? 12  Na kɛmɔ bɛlɛkakyi ɛsɔfolilɛ ne la ati, ɔhyia kɛ bɛkakyi Mɛla ne noko. 13  Ɔluakɛ ahenle mɔɔ bɛhanle edwɛkɛ ɛhye wɔ ɔ nwo la vi abusua gyɛne mɔɔ nuhua sonla biala ɛtɛyɛle afɔlemokyea nwo gyima ɛlɛ la anu. 14  Na ɔda ali wienyi kɛ yɛ Awulae vi Dwuda abusua nu, noko Mosisi anga ɛsɔfoma mɔɔ vi zɔhane abusua ne anu la anwo edwɛkɛ biala. 15  Na ɛhye anu da ɛkɛ wienyi wɔ mekɛ mɔɔ ɛsɔfo gyɛne mɔɔ le kɛ Mɛlekezidɛke la kɛvinde, 16  mɔɔ yeanlua mɛla mɔɔ gyi nwonane nu ngyehyɛleɛ zo la azo a ɔyɛle zɔ a, emomu ɔlua ngoane mɔɔ ɛnzɛkye la tumi zo. 17  Ɔluakɛ bɛlile ɔ nwo daselɛ kɛ: “Ɛle ɛsɔfo dahuu kɛ Mɛlekezidɛke la.” 18  Yemɔti bɛye mɛla dɛba ne bɛzie ahane ɔboalekɛ ɔle bɛtɛɛ yɛɛ ɔnli munli. 19  Ɔluakɛ Mɛla ne ammaa debie biala anli munli, emomu anyelazo kpalɛ bie mɔɔ rale la a yɛle zɔ a, na yɛdua zo yɛbikye Nyamenle. 20  Bieko, mekɛ ala mɔɔ bɛhanle ndane na bɛayɛ ɛhye la 21  (nɔhalɛ nu, menli ɛrayɛ ɛsɔfoma mɔɔ ndane ɛnle nwo a, noko awie wɔ ɛkɛ mɔɔ ndane wɔ ye ɛdeɛ ne anwo a, Ahenle mɔɔ hanle ndane ne la hanle ɔ nwo edwɛkɛ kɛ: “Gyihova* ɛha ndane, na ɔnrɛhakyi ye adwenle,* ‘Ɛle ɛsɔfo dahuu’”), 22  zɔhane ala a Gyisɛse ɛrayɛ ngyekyeleɛ kpalɛ agyinlanudivolɛ* a. 23  Bieko, ɛnee ɔwɔ kɛ menli dɔɔnwo toɔdoa zo yɛ ɛsɔfo, ɔluakɛ ewule ammaa bɛandoa zo bɛanyɛ bɛ gyima ne, 24  noko kɛmɔ ɔde aze dahuu la ati, awie ɛnrɛli ye agya kɛ ɛsɔfo. 25  Yemɔti eza ɔkola ɔdie bɛdabɛ mɔɔ bɛdua ɔ nwo zo bɛbikye Nyamenle la bɔkɔɔ, ɔluakɛ ɔde aze dahuu mɔɔ ɔbazɛlɛ yeamaa bɛ a. 26  Na ɔle kpalɛ kɛ yɛlɛ ɛsɔfo kpanyinli zɛhae mɔɔ di nɔhalɛ, edwɛkɛ ɛnle ɔ nwo, evinli ɛnle ɔ nwo, ɔnle kɛ ɛtanevolɛma, na bɛkpogya ye zo bɛdɛla anwuma a. 27  Ɔngyia kɛ alehyenlɛ biala ɔdimoa ɔbɔ ye ɛtane nwo afɔle kolaa na yeabɔ bie yeamaa menli ne kɛ ɛsɔfo mgbanyinli ɛhendeɛ ne mɔ la, ɔluakɛ ɔyɛle ɛhye kokye wɔ mekɛ mɔɔ ɔvale ɔ nwo ɔmaanle la. 28  Na Mɛla ne yele menli mɔɔ bɛlɛ bɛtɛɛyɛlɛ la kɛ ɛsɔfo mgbanyinli, noko ndane edwɛkɛ ne mɔɔ rale Mɛla ne anzi la ɛye ralɛ mɔɔ ɛli munli la dahuu.

Ɔbodwɛkɛ

Giliki aneɛ nu, “hyɛle.”
Giliki aneɛ nu, “abusua tile.”
Nea Edwɛkɛbohilelɛ.
Anzɛɛ “ɔnrɛnlu ɔ nwo.”
Anzɛɛ “bɛva ye bɛwula nwolɛ awoba.”