Hibuluma 1:1-14

  • Nyamenle dua ɔ Ra nwo zo tendɛ (1-4)

  • Ralɛ ne tɛla anwumabɔvolɛma (5-14)

1  Tete ne Nyamenle vale ndenle dɔɔnwo azo luale ngapezoma anwo zo dendɛle hilele yɛ nlenyia mɔ fane dɔɔnwo.  Awieleɛ mekɛ ye anu, yelua ɔ Ra ne mɔɔ yekpa ye kɛ ninyɛne kɔsɔɔti koliagya na ɔluale ɔ nwo zo ɔbɔle ninyɛne mɔɔ wɔ ewiade* la anwo zo yedendɛ yehile yɛ.  Ɔle Nyamenle anyunlunyia ne mɔɔ ta la nee ye ɛsaso pɛpɛɛpɛ, na ɔfa ye tumi edwɛkɛ ne a ɔsɔ ninyɛne kɔsɔɔti anu a. Na mekɛ mɔɔ ɔdele yɛ nwo ɛtane ɔwiele la, ɔhɔdɛnlanle Nyamenle asa fema zo wɔ anwuma.  Ɔti yedɛla anwumabɔvolɛ ne mɔ na yenyia duma mɔɔ tɛla bɛ ɛdeɛ ne la.  Kɛ neazo la, anwumabɔvolɛ ne mɔ anu boni a Nyamenle ɛha ɛhile ye ɛlɛ kɛ: “Ɛle me ra; ɛnɛ meyɛ ɛ ze” a? Bieko: “Mebayɛ ɛ ze na wɔayɛ me ra” ɛ?  Noko saa ɔmaa ye belamunli Ralɛ ne ara azɛlɛ ye azo bieko a, ɔbaha kɛ: “Maa Nyamenle anwumabɔvolɛma amuala ɛhoto ye.”  Eza ɔka anwumabɔvolɛ ne mɔ anwo edwɛkɛ kɛ: “Ɔyɛ ye anwumabɔvolɛ ne mɔ sunsum nee ye sonvolɛma sendɔlɔra.”  Noko ɔka Ralɛ ne anwo edwɛkɛ kɛ: “Nyamenle le wɔ belemgbunli ebia dahuu, na wɔ Belemgbunlililɛ kpɔma ne le pɛlepɛlelilɛ kpɔma.  Ɛhulole tenleneyɛlɛ na ɛhyile mɛladonlɛ. Ɛhye ati a Nyamenle, wɔ Nyamenle ne vale fɛlɛkolilɛ nwole kpokpale wɔ dɛlale ɛ gɔnwo mɔ la.” 10  Bieko: “O Awulae, wɔmɔ a mɔlebɛbo ne ɛwulale azɛlɛ ye adiabo a, na anwuma le ɛ sa anloa gyima. 11  Bɛ muala bɛbapɛ nu, ɛnee wɔmɔ ɛwɔ ɛkɛ; na bɛ muala bɛbatete kɛ tɛladeɛ la, 12  na ɛbabubu bɛ kɛ tɛladeɛ tendenle, kɛ tɛladeɛ aguzo, na bɛbahakyi. Noko wɔmɔ ɛngakyi, yɛɛ wɔ ɛvolɛ ɛmba awieleɛ ɛlɛ.” 13  Na anwumabɔvolɛ ne mɔ anu boni a yeha yehile ye ɛlɛ kɛ: “Tɛnla me sa fema zo kɔkpula kɛ mebava wɔ agbɔvolɛ meawula ɛ gyakɛ abo a”? 14  Asoo bɛ muala bɛnle anwumabɔvolɛma mɔɔ bɛyɛ gyima nwuanzanwuanza, mɔɔ bɛsoa bɛ bɛmaa bɛkɔboa bɛdabɛ mɔɔ bɛbalie bɛ ngoane la ɔ?

Ɔbodwɛkɛ

Anzɛɛ “mekɛ ɛhye anu.” Nea Edwɛkɛbohilelɛ.