Gyima ne 7:1-60

  • Sitivin tendɛ ahile Sanhedelin ne (1-53)

    • Tete selɛma mekɛ (2-16)

    • Mosisi lile bɛ nyunlu; Yizilayɛma awozonlezonlenlɛ (17-43)

    • Nyamenle ɛndɛnla ɛzonlenlɛ sua nu (44-50)

  • Sitivin awolɛzilɛ (54-60)

7  Na ɛsɔfo kpanyinli ne bizale ye kɛ: “Ɛhye mɔ le zɔ ɔ?”  Sitivin buale kɛ: “Mediema nee egya mɔ, bɛdie. Anyunlunyia Nyamenle ne yele ɔ nwo hilele yɛ nlenyia Ebileham wɔ mekɛ mɔɔ ɛnee ɔwɔ Mɛsɔpɔteemea kolaa na yeahɔdɛnla Hɛlan la,  na ɔzele ye kɛ: ‘Ɛvi wɔ maanle nu nee wɔ mbusuafoɔ avinli tu na kɔ azɛlɛ ne mɔɔ mebahile wɔ la azo.’  Akee ɔvile Kaledeama maanle nu ɔhɔdɛnlanle Hɛlan. Na mɔɔ ye papa wule la, Nyamenle maanle ɔradɛnlanle azɛlɛ ne mɔɔ bɛde zo kɛkala la azo.  Noko yeammaa ye bie kɛ ye agyapadeɛ, ɛleka mɔɔ ɔbava ɔ gyakɛ yeazie bɔbɔ la, yeanva yeammaa ye; noko ɔbɔle ye ɛwɔkɛ kɛ ɔbava yeamaa ye kɛ agyapadeɛ, na ɔwu a yeava yeamaa ɔ bo zo amra, noko mekɛ zɔhane ɛnee ɔnlɛ ralɛ.  Eza Nyamenle zele ye kɛ ɔ bo zo amra bayɛ nyɛvolɛ wɔ awie mɔ maanle nu na menli ne bava bɛ ayɛ ngɛkɛlɛ na bɛahile bɛ nyane ɛvolɛ 400.  Nyamenle hanle kɛ, ‘Mebabua maanle ne mɔɔ ɔbava bɛ yeayɛ ngɛkɛlɛ la ndɛne, na ɛhye mɔ anzi bɛbavi ɛkɛ na bɛarazonle me wɔ ɛke.’  “Eza ɔ nee ye yɛle mrenyia zo ɛpɛlɛ nwo ngyekyeleɛ, na ɔwole Ayezeke na ɔpɛle ye mrenyia zo wɔ kenle mɔtwɛ ne azo, na Ayezeke wole Gyekɔbo,* yɛɛ Gyekɔbo wole yɛ nlenyia mɔ 12 ne.*  Na yɛ nlenyia mɔ anye bolole Dwosefi na bɛdɔnenle ye bɛhɔle Yigyibiti. Noko ɛnee Nyamenle nee ye lua, 10  na ɔliele ye wɔ ye amaneɛnwunlɛ kɔsɔɔti anu, ɔmaanle ye nrɛlɛbɛ na ɔmaanle ɔnyianle Yigyibiti belemgbunli Falo anyunlu ɛlolɛ. Na Falo maanle ɔnleanle Yigyibiti nee ye sua nu amra amuala anwo zo. 11  Noko ɛhɔne rale Yigyibiti nee Keena amuala, ɛhɛe, ɔvale anwongyelelɛ kpole ɔrale, na yɛ nlenyia mɔ annyia debie mɔɔ bɛbali a. 12  Noko Gyekɔbo dele kɛ aleɛ wɔ Yigyibiti na ɔzoanle yɛ nlenyia mɔ wɔ mekɛ mɔɔ limoa la. 13  Mɔɔ tɔ zo nwiɔ ne la, Dwosefi lale ɔ nwo ali hilele ɔ mediema ne mɔ na Falo nwunle Dwosefi abusua ne. 14  Dwosefi vale nrɛlaleɛ hɔmaanle ɔ ze Gyekɔbo kɛ ɔ nee ye sua nu amra amuala ɛrɛla, bɛ muala bɛle menli* 75. 15  Yemɔti Gyekɔbo hɔle Yigyibiti, na ɔwule ɛkɛ na ɛkɛ ne a yɛ nlenyia mɔ noko wule a. 16  Bɛvale bɛ bɛhɔle Hyikɛm na bɛziele bɛ wɔ nla ne mɔɔ Ebileham dɔle vile Heemɔ amra ne mɔ asa nu wɔ Hyikɛm la anu. 17  “Ɔka ekyii na ɛwɔkɛ ne mɔɔ Nyamenle bɔle Ebileham ara nu la, ɛnee menli ne anwo ɛzo na bɛyɛ dɔɔnwo kpalɛ wɔ Yigyibiti, 18  kɔkpula kɛ belemgbunli gyɛne mɔɔ ɛnze Dwosefi la ralile Yigyibiti ebia ne. 19  Nrenyia ɛhye luale nrɛlɛbɛ adenle zo maanle egya mɔ kpole bɛ mbɔdɔma bɛmaanle bɛwule. 20  Mekɛ zɔhane a bɛwole Mosisi a, na ɛnee ɔ nwo yɛ fɛ wɔ Nyamenle anyunlu. Bɛnleanle* ye siane nsa wɔ ɔ ze sua nu. 21  Noko mekɛ mɔɔ bɛgyakyile ye wɔ ɛleka bie la, Falo ara raalɛ hɔvale ye na ɔtetele ye kɛ ɔ ra nrenyia. 22  Yemɔti bɛhilele Mosisi Yigyibiti nrɛlɛbɛ kɔsɔɔti. Nɔhalɛ nu, ɛnee ɔtendɛ a tumi wɔ nu yɛɛ ɔyɛle ninyɛne mgbole. 23  “Mekɛ mɔɔ ɔlile ɛvolɛ 40 la, ɔrale ye ahonle nu* kɛ ɔkakpɔla* ɔ mediema Yizilayɛma. 24  Mɔɔ ɔnwunle kɛ bɛlɛyɛ ko amumuyɛ la, ɔliele ye na ɔlile ɔ ti anloma ɔhunle Yigyibitinli ne mɔɔ ɛlɛyɛ ye amumuyɛ la. 25  Ɛnee ɔdwenle kɛ ɔ mediema ne mɔ banwu kɛ Nyamenle balua ɔ nwo zo alie bɛ ngoane, noko bɛannwu ye. 26  Aleɛ hyenle la, ɔhɔdole bɛ kɛ bɛlɛko, na ɔbɔle mɔdenle kɛ ɔkpɔda bɛ wɔ anzodwolɛ nu na ɔhanle kɛ: ‘Ayi mɔ, bɛle mediema. Duzu ati a bɛlɛyɛ bɛ nwo asa ɛ?’ 27  Noko ko ne mɔɔ ɛlɛyɛ ɔ gɔnwo ne asa la zuhunle ye na ɔhanle kɛ: ‘Nwane a yɛle wɔ yɛ neavolɛ nee yɛ ndɛnebuavolɛ a? 28  Ɛkpondɛ kɛ ɛku me kɛ mɔɔ anoma ɛhunle Yigyibitinli ne la ɔ?’ 29  Mɔɔ Mosisi dele ɛhye la, ɔnriandile ɔhɔyɛle ɛyɛvolɛ wɔ Medean azɛlɛ zo, na ɔwole mralɛ mrenyia nwiɔ wɔ ɛkɛ. 30  “Ɛvolɛ 40 pɛle nu la, anwumabɔvolɛ bie yele ɔ nwo hilele ye wɔ fienemgbole ne mɔɔ bikye Boka Saenae la anu wɔ kpɔkɛ bie mɔɔ ɛlɛsɔ la anu. 31  Mɔɔ Mosisi nwunle ye la, ɔzinle ɔ nwo. Noko mekɛ mɔɔ ɔbikyele nwo kɛ ɔnea ye boɛ la, ɔdele Gyihova* ane kɛ; 32  ‘Mame a mele ɛ nlenyia mɔ Nyamenle ne, Ebileham nee Ayezeke nee Gyekɔbo Nyamenle ne a.’ Mosisi anwo bɔle ɔ bo wosole ye na yeangola ye nea bieko. 33  Gyihova* zele ye kɛ: ‘Ye wɔ mgbɔlaboa ne ɔluakɛ ɛleka mɔɔ ɛgyi la le azɛlɛ nwuanzanwuanza. 34  Nɔhalɛ nu, menwu kɛ bɛlɛsi bɛayɛ me menli ne mɔɔ wɔ Yigyibiti la amumuyɛ la, yɛɛ mede bɛ ɛzunlɛ ne noko, na mera kɛ mebalie bɛ. Akee bɛla, maa menzoa wɔ wɔ Yigyibiti.’ 35  Mosisi ɛhye mɔɔ bɛkpole ye na bɛhanle kɛ: ‘Nwane a yɛle wɔ neavolɛ nee ndɛnebuavolɛ la?’ yemɔ ala a Nyamenle luale anwumabɔvolɛ ne mɔɔ ɔyele ɔ nwo ɔhilele ye wɔ kpɔkɛ ne anwo la anwo zo zoanle ye kɛ neavolɛ nee dievolɛ a. 36  Nrenyia ɛhye yele bɛ vile ɛkɛ, ɔyɛle sɛkɛlɛneɛ nee nwanwane ninyɛne wɔ Yigyibiti nee nyevile kɔkɔlɛ ne anloa yɛɛ fienemgbole ne anu ɛvolɛ 40. 37  “Mosisi ɛhye a zele Yizilayɛma kɛ: ‘Nyamenle bamaa ngapezonli bie mɔɔ le kɛ medame la avi bɛ mediema ne mɔ anu ara la.’ 38  Ɛhye a le ahenle mɔɔ ɔ nee Yizilayɛma luale wɔ fienemgbole ne anu na anwumabɔvolɛ ne dendɛle hilele ye nee yɛ nlenyia mɔ wɔ Boka Saenae azo, na bɛvale edwɛkɛ nwuanzanwuanza ne mɔɔ tumi wɔ nu bɛmaanle ye la. 39  Yɛ nlenyia mɔ andie ye, bɛkpole ye, na wɔ bɛ ahonle nu bɛhulole kɛ anrɛɛ bɛkɛzia bɛkɛhɔ Yigyibiti, 40  bɛzele Aalɔn kɛ: ‘Yɛ nyamenle maa yɛ maa ɔli yɛ nyunlu, ɔluakɛ yɛnze mɔɔ ɛzi Mosisi mɔɔ yele yɛ vile Yigyibiti maanle nu la anwo zo a.’ 41  Yemɔti bɛyɛle ɛnlankɛ ralɛ wɔ zɔhane mekɛ ne na bɛbɔle afɔle bɛmaanle ananze ne na bɛliele bɛ nye wɔ debie mɔɔ bɛva bɛ sa bɛyɛ la anwo. 42  Ɔti Nyamenle hwenle ɔ nwo vile bɛ nwo ɔmaanle bɛzonlenle anwomanyunlu ninyɛne, kɛ mɔɔ bɛhɛlɛ ye wɔ Ngapezoma buluku ne anu la: ‘O Yizilayɛma, asoo medame a bɛbɔle afɔle bɛmaanle me wɔ fienemgbole ne anu ɛvolɛ 40 ne la ɔ? 43  Emomu, Molɔko ɛdanlɛsua ne yɛɛ nyamenle Relɛfaa ɛwɔlɔra ne a bɛkpale a, bɛyɛle ananze ɛhye mɔ kɛ bɛsonle bɛ. Yemɔti mebava bɛ meahɔ Babelɔn anzi lɔ.’ 44  “Ɛnee yɛ nlenyia mɔ lɛ daselɛ ɛdanlɛsua ne wɔ fienemgbole ne anu kɛ mɔɔ Ɔtendɛ yeahile Mosisi la ɔhanle kɛ ɔnlea mɔɔ yenwu ye la azo ɔyɛ bie la. 45  Na yɛ nlenyia mɔ mɔɔ liele la nee Dwɔhyua vale rale azɛlɛ ne mɔɔ Nyamenle dule maanle maanle ne mɔ wɔ zolɛ la azo. Ɛnee ɔwɔ bɛ nwo ɛkɛ ne badwu Devidi mekɛ zo. 46  Ɔnyianle Nyamenle anyunlu ɛlolɛ na ɔzɛlɛle ye kɛ ɔmaa ye adenle ɔmaa ɔzi sua ɔmaa Gyekɔbo Nyamenle ne. 47  Noko Sɔlɔmɔn a zile sua maanle ye a. 48  Noko akee, Anwuma Anwumanli ne ɛndɛnla sua mɔɔ bɛva bɛ sa bɛzi la anu, ngapezonli ne hanle kɛ: 49  ‘Gyihova* se, anwuma le me belemgbunli ebia yɛɛ azɛlɛ ye le me gyakɛ abo ebia. Sua boni a bɛsi bɛamaa me a? Anzɛɛ nienwu a me ɛnwomenlelielɛ ɛleka ne wɔ a? 50  Asoo tɛ medame a menyɛle ninyɛne ɛhye mɔ amuala ɔ?’ 51  “Anzosesebɛ menli mɔɔ bɛduodua bɛ nzo na bɛngulo kɛ bɛkakyi bɛ adwenle a, bɛko bɛtia sunsum nwuanzanwuanza ne dahuu; kɛ mɔɔ bɛ ze mɔ yɛle la, zɔhane ala a bɛyɛ a. 52  Ngapezoma ne anu boni a bɛ ze mɔ anyɛ ye kpɔdekpɔde a? Ɛhɛe, bɛhunle bɛdabɛ mɔɔ bɛhanle bɛdole ɛkɛ ne kɛ tenlenenli ne bara la, bɛle kɛ bɛdabɛ ala la ɔluakɛ bɛmɛ a bɛyele ye bɛmaanle na bɛhunle ye a, 53  bɛmɛ a bɛnyianle Mɛla ne mɔɔ anwumabɔvolɛma vale rale la a, noko bɛanli zo.” 54  Mɔɔ bɛdele ɛhye la, bɛvale ɛya kpole* na ɛnee bɛkpondɛ kɛ bɛbo ye. 55  Noko, kɛmɔ ɛnee sunsum nwuanzanwuanza ne ɛyi ye tɛkɛɛ la ati, ɔnleanle anwuma na ɔnwunle Nyamenle anyunlunyia ne nee Gyisɛse kɛ ɔgyi Nyamenle asa fema zo, 56  na ɔhanle kɛ: “Nea! Menwu kɛ anwuma ɛbuke na sonla Ra ne gyi Nyamenle asa fema zo.” 57  Mɔɔ bɛdele ɛhye la bɛvale ɛnelɛ kpole bɛdeanle nu na bɛvale bɛ sa bɛduoduale bɛ nzo, na bɛ muala bɛdule bɛhɔle ɔ nwo zo. 58  Bɛvale ye bɛvindele sua ne kandiba, na bɛbɔle ɔ bo bɛzile ye awolɛ. Alasevolɛ ne mɔ yele bɛ adɛladeɛ aguzo ne guale kpavolɛ bie mɔɔ bɛfɛlɛ ye Sɔɔlo la anwo ɛkɛ. 59  Mɔɔ bɛlɛsi Sitivin awolɛ la, ɔzɛlɛle kɛ: “Awulae Gyisɛse, me ngoane wɔ ɛ sa nu.” 60  Akee ɔhotole na ɔvale ɛnelɛ kpole ɔdeanle nu kɛ: “Gyihova,* mmatwe bɛ nzo wɔ ɛtane ɛhye anwo.” Ɔhanle ɛhye la, ɔwule.

Ɔbodwɛkɛ

Anzɛɛ ɔkola ɔkile, “yɛle Gyekɔbo noko zɔhane ala.”
Anzɛɛ “tete selɛma ne.”
Anzɛɛ “ɛkɛla.”
Anzɛɛ “bɛtetele.”
Anzɛɛ “ɔbɔle kpɔkɛ.”
Anzɛɛ “ɔkanlea.”
Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Anzɛɛ “ɔyɛle bɛ nyane.”
Nea Edwɛkɛbohilelɛ.