Gyima ne 4:1-37

  • Bɛhyele Pita nee Dwɔn (1-4)

    • Diedima dwu mrenyia 5,000 (4)

  • Edwɛkɛlilɛ wɔ Sanhedelin ne anyunlu (5-22)

    • ‘Yɛnrɛhola yɛnrɛgyakyi ye ɛhanlɛ’ (20)

  • Akɛnrasesebɛ nwo asɔneyɛlɛ (23-31)

  • Ɛdoavolɛma hyɛle mɔɔ bɛlɛ la (32-37)

4  Mɔɔ bɛ mu nwiɔ bɛ nee menli ne ɛlɛtendɛ la, ɛsɔfo ne mɔ, ɛzonlenlɛ sua ne azo neavolɛ ne, nee Sadusiima ne ravindele bɛ nwo zo.  Menli ɛhye mɔ vale ɛya ɔluakɛ ɛnee ɛzoanvolɛma ne ɛlɛkilehile menli ne na bɛlɛka Gyisɛse mɔɔ bɛdwazo ye bɛvi mowuamra anu la anwo edwɛkɛ wienyi.*  Yemɔti bɛhyele bɛ na bɛguale bɛ efiade bɛmaanle aleɛ hyenle, ɔluakɛ ɛnee aleɛ ɛdwo.  Noko, bɛdabɛ mɔɔ bɛdiele edwɛkɛ ne la anu dɔɔnwo liele lile, na mrenyia ne mɔ dodo rayɛle 5,000.  Aleɛ hyenle la bɛ mgbanyima ne mɔ nee mɛla kilehilevolɛma ne yiale nu wɔ Gyɛlusalɛm,  ɛnee ɛsɔfo kpanyinli Anase, Kayafase, Dwɔn, Alɛzanda, nee ɛsɔfo kpanyinli ne anwo amra kɔsɔɔti boka nwo.  Bɛmaanle Pita nee Dwɔn ragyinlanle bɛ avinli na bɛbizale bɛ kɛ: “Tumi boni anzɛɛ nwane duma nu a bɛluale bɛyɛle ɛhye a?”  Na Pita mɔɔ ɛnee sunsum nwuanzanwuanza ne ɛyi ye tɛkɛɛ la zele bɛ kɛ: “Yizilayɛ mgbanyima,  saa ɛnɛ bɛlɛdua debie kpalɛ mɔɔ yɛyɛ yɛmaa nrenyia abubura ye la azo bɛanleɛnlea yɛ edwɛkɛ nu na bɛanwu ahenle mɔɔ maanle nrenyia ɛhye dele kpɔkɛ la a, 10  ɛnee bɛ nee Yizilayɛma kɔsɔɔti ɛnwu ye kɛ ɔlua Gyisɛse Kelaese mɔɔ vi Nazalɛte mɔɔ bɛhunle ye wɔ baka zo na Nyamenle ɛdwazo ye ɛvi mowuamra anu la duma nu a nrenyia ɛhye ɛde kpɔkɛ na ɔgyi bɛ nyunlu ɛke a. 11  Ɛhye a le ‘bolɛ ne mɔɔ bɛmɛ suasivoma bɛkpole noko yerayɛ bolɛ mɔɔ anwo hyia kpole kpalɛ a.’* 12  Bieko, ngoanelielɛ ɛnrɛlua awie gyɛne biala anwo zo ɛnrɛra, ɔluakɛ duma bieko ɛnle aleɛabo mɔɔ yɛbalua zo yɛanyia ngoane a.” 13  Mekɛ mɔɔ bɛnwunle Pita nee Dwɔn akɛnrasesebɛ ne na bɛnwunle kɛ bɛnze nwoma* yɛɛ bɛnlɛ dibilɛ la, ɔzinle bɛ nwo. Na bɛnwunle kɛ ɛnee bɛ nee Gyisɛse a lua a. 14  Mɔɔ bɛnwunle kɛ nrenyia ne mɔɔ bɛyɛ ye ayile la gyi bɛ nwo ɛkɛ ne la, bɛangola bɛanga nwolɛ edwɛkɛ biala. 15  Yemɔti bɛmaanle bɛvile Sanhedelin asalo ɛkɛ ne bɛvindele na bɛbɔle ɔ bo bɛzuzule mɔɔ bɛbayɛ la anwo, 16  bɛhanle kɛ: “Kɛ ɔwɔ kɛ yɛyɛ menli ɛhye mɔ ɛ? Ɔluakɛ bɛyɛ nwanwane debie mɔɔ Gyɛlusalɛma kɔsɔɔti ɛnwu ye a, yɛɛ yɛngola yɛnga kɛ ɔnle zɔ. 17  Amaa ɛhye andɛlɛ andwu menli ne anu la, bɛmaa yɛnwunlonwunla bɛ na yɛha yɛhile bɛ kɛ bɛmmadua duma ɛhye azo bɛtendɛ bɛkile awie biala bieko.” 18  Yemɔti bɛvɛlɛle bɛ na bɛhanle bɛhilele bɛ kɛ bɛmmatendɛ anzɛɛ bɛmmadua Gyisɛse duma nu bɛkilehile debie biala. 19  Noko Pita nee Dwɔn buale bɛ kɛ: “Saa ɔle kpalɛ wɔ Nyamenle anyunlu kɛ yɛkɛdie bɛ yɛkɛdɛla Nyamenle a, ɛnee bɛdabɛ bɛbua. 20  Na yɛmɛ yɛnrɛhola yɛnrɛgyakyi kɛ yɛkɛha ninyɛne mɔɔ yɛnwu ye nee mɔɔ yɛde la.” 21  Yemɔti mɔɔ bɛnwunlonwunlanle bɛ bieko la, bɛgyakyile bɛ ɔluakɛ bɛannyia debie biala mɔɔ bɛgyinla zo bɛahwe bɛ nzo a, yɛɛ eza ɔlua menli ne ati, ɔluakɛ ɛnee bɛ muala bɛlɛwula Nyamenle anyunlunyia wɔ mɔɔ ɛzi la anwo. 22  Ɛnee nrenyia ne mɔɔ bɛyɛle ye ayile wɔ nwanwane adenle zo la ɛbo ɛvolɛ 40. 23  Mekɛ mɔɔ bɛgyakyile bɛ la, bɛhɔle bɛ gɔnwo mɔ anwo ɛkɛ na bɛvale mɔɔ ɛsɔfo mgbanyinli nee mgbanyima ne mɔ ɛha ɛhile bɛ la bɛbɔle bɛ amaneɛ. 24  Mɔɔ bɛdele ɛhye la, bɛmaanle bɛ ne zo na bɛbɔle nu bɛzɛlɛle Nyamenle kɛ: “Tumivolɛ Awulae, wɔmɔ a ɛbɔle anwuma nee azɛlɛ nee nyevile nee mɔɔ wɔ nu la amuala a, 25  na ɛluale sunsum nwuanzanwuanza ne azo ɛmaanle yɛ nlenyia Devidi mɔɔ le wɔ sonvolɛ la hanle kɛ: ‘Duzu ati a maanle maanle yɛ basabasa na menli dwenledwenle ninyɛne mgbane nwo a? 26  Azɛlɛ ye azo arelemgbunli dwazole gyinlanle yɛɛ tumivolɛma boɔboale bɛ nloa na bɛdwazole bɛtiale Gyihova* nee mɔɔ yekpokpa ye la.’* 27  Nɔhalɛ nu, Hɛlɔdo nee Pɔnteɛse Paelɛte nee maanle maanle ne mɔ nee Yizilayɛma rayiale nu wɔ sua ɛhye azo na bɛdwazole bɛtiale wɔ sonvolɛ nwuanzanwuanza Gyisɛse mɔɔ ɛkpokpale ye la, 28  amaa bɛayɛ mɔɔ ɛ sa nee wɔ kpɔkɛbɔlɛ hanle dole ɛkɛ ne kɛ ɔbazi la. 29  Yemɔti Gyihova,* nea bɛ ɛnwunlonwunlanlɛ ne na maa wɔ ngɛkɛlɛ ɛhɔ zo ɛva akɛnrasesebɛ ɛha wɔ edwɛkɛ ne, 30  na kile wɔ tumi wɔ ayileyɛlɛ nu na maa sɛkɛlɛneɛ nee nwanwane ninyɛne ɛlua wɔ sonvolɛ nwuanzanwuanza Gyisɛse duma nu ɛrɛla.” 31  Na mɔɔ bɛyɛle nzɛlɛlɛ ɛsesebɛ la, ɛleka mɔɔ bɛyiale la kpusule, na sunsum nwuanzanwuanza ne yile bɛ muala tetɛkɛɛ na bɛvale akɛnrasesebɛ bɛhanle Nyamenle edwɛkɛ ne. 32  Menli dɔɔnwo ne noko mɔɔ liele lile la nyianle ahonle nee adwenle* ko, na bɛ nuhua ko bɔbɔ anga kɛ ninyɛne mɔɔ ɔlɛ la le ɔ ngome ye ɛdeɛ, emomu bɛhyɛle debie biala mɔɔ bɛlɛ la. 33  Na ɛzoanvolɛma ne hɔle zo vale tumi kpole lile Awulae Gyisɛse ewudwazo ne anwo daselɛ, na bɛ kɔsɔɔti bɛnyianle ɛlolɛ dɔɔnwo. 34  Nɔhalɛ nu, bɛ nuhua biala angyia debie, ɔluakɛ bɛdabɛ mɔɔ bɛlɛ azɛlɛ anzɛɛ azua la dɔnenle bɛ na bɛvale mɔɔ bɛnyianle la 35  bɛrɛlɛle ɛzoanvolɛma ne. Akee bɛhyɛle bɛmaanle awie biala kɛ mɔɔ ye ngyianlɛ de la. 36  Yemɔti Dwosefi mɔɔ eza ɛzoanvolɛma ne donle ye Baanabase (ɔ bo kile, “Arɛlekyekyelɛ Ralɛ”), Livaenli bie mɔɔ vi Saepelɛse la, 37  ɛnee lɛ azɛlɛ, ɔdɔnenle ye na ɔvale ezukoa ne ɔrɛlɛle ɛzoanvolɛma ne.

Ɔbodwɛkɛ

Anzɛɛ “Gyisɛse ewudwazo ɛdeɛ ne.”
Bɛfa bolɛ ɛhye bɛto bane nwiɔ ayia zo bɛmaa ɔgyinla kpundii.
Ɔkile kɛ, bɛangɔ relabaema sukulu ne mɔ bie; tɛ kɛ bɛnze kenga anzɛɛ kɛlɛ.
Nea Edwɛkɛbohilelɛ.
Anzɛɛ “ye Kelaese ne.”
Nea Edwɛkɛbohilelɛ.
Giliki aneɛ nu, “ɛkɛla.” Nea Edwɛkɛbohilelɛ.