Gyima ne 27:1-44

  • Pɔɔlo dua nyevile zo ahɔ Wulomu (1-12)

  • Ahumu bɔ atia meli (13-38)

  • Meli ɛzɛkyelɛ (39-44)

27  Mɔɔ akee bɛzile kpɔkɛ kɛ ɔwɔ kɛ yɛkɔ Yetali la, bɛvale Pɔɔlo nee pilizama bie mɔ bɛwulale sogyanli kpanyinli bie mɔɔ bɛfɛlɛ ye Dwuleɛse mɔɔ wɔ Ɔgɛsetɛse sogyama ekpunli ne anu la asa anu.  Yɛhɔvole meli bie mɔɔ vi Adelameteɛm mɔɔ ɛlɛkɔ azua mɔɔ wɔ Ehyea maanzinli ne anu la anu na yɛdule; ɛnee Alesetaakɛse, Masidoneanli bie mɔɔ vi Tɛsalonaeka la boka yɛ nwo.  Aleɛ hyenle la yɛradwule Saedɛn, na Dwuleɛse hilele ye ahunlunyele wɔ Pɔɔlo anwo na ɔmaanle ye adenle ɔmaanle ɔhɔle ɔ gɔnwo mɔ anwo ɛkɛ na bɛboale ye.  Mɔɔ yɛdule yɛvile ɛkɛ ne na yɛvale nyevile ne azo la, yɛhɔvale Saepelɛse, ɛleka mɔɔ yɛbanyia banebɔlɛ la, ɔluakɛ ɛnee anwoma ne ɛlɛbɔ atia yɛ.  Akee yɛhɔvale nyevile ne akunlu lɔ yɛluale Selesea nee Pamefelea yɛrale Maela mɔɔ wɔ Lesea la.  Ɛkɛ ne sogya kpanyinli ne nyianle meli bie mɔɔ vi Alɛzandelea ɛlɛkɔ Yetali la, na ɔmaanle yɛhɔvole nu.  Ɛnee yɛngola kɔ kpalɛ, yemɔti yɛlile kenle dɔɔnwo wɔ adenle nu, yɛ nwo hyelele yɛ kpalɛ na yɛaradwu Kenaedɛse. Kɛmɔ ɛnee anwoma ne ɛlɛbɔ atia yɛ la ati, yɛhɔvale Kiliti mɔɔ wɔ Salemoni la amaa yeabɔ yɛ nwo bane yeavi anwoma ne anwo.  Yɛvɛle dedee na yɛrale ɛleka bie mɔɔ bɛfɛlɛ ye Ahonle Kɛnlɛmazo, mɔɔ bikye Lasia sua zo la.  Yɛhyɛle ɛkɛ ne kpalɛ na ɛnee esiane wɔ nu kɛ yɛbadoa adendulɛ ne azo, ɔluakɛ ɛnee ɛhɔne mɔɔ bɛkye ye Mgbɔdalɛ Kenle ne la mekɛ ne bɔbɔ ɛpɛ nu, yemɔti Pɔɔlo dule bɛ folɛ 10  kɛ: “Ayi mɔ, mekola menwu ye kɛ adendulɛ ɛhye bamaa ninyɛne dɔɔnwo azɛkye anzɛɛ aminli, tɛ meli ne nee nuhua ninyɛne ne angome, emomu yɛ ngoane* noko boka nwo.” 11  Noko, sogya kpanyinli ne diele melikavolɛ ne nee meli menle ne dɛlale edwɛkɛ ne mɔɔ ɛnee Pɔɔlo ɛlɛka la. 12  Kɛmɔ habɔ ɛkɛ ne ɛnle ɛleka mɔɔ bɛdi fɔsɛlɛ wɔ ɛkɛ a ɔyɛ boɛ la ati, bɛ nuhua dɔɔnwo hanle kɛ bɛmaa yɛbɔ mɔdenle yɛhɔ Fonekese, habɔ bie mɔɔ wɔ Kiliti mɔɔ ɔ nye kile sɔlɔ aduduleɛ nee nyiakɛ aduduleɛ la, yɛhɔli fɔsɛlɛ ne wɔ ɛkɛ. 13  Mɔɔ nyiakɛ anwoma ne bɔle bɛtɛɛ la, bɛnyianle adwenle kɛ akee ɔwɔ kɛ bɛkɔ, yemɔti bɛdule sɛkɛ ne na bɛsianlenle aze kɛ bɛkɔ Kiliti ɛnwea zo. 14  Noko bɛandwu ɛleka biala yɛɛ anwoma ɛsesebɛ bie mɔɔ bɛfɛlɛ ye Yulokilo* la dwazole a. 15  Mekɛ mɔɔ ɔbɔle meli ne ɛsesebɛ na yɛyɛ nwolɛ ɛhwee a ɔnyɛ boɛ la, yɛgyakyile nu yɛmaanle ɔvale yɛ ɔhɔle. 16  Akee yɛhɔvale bɔra ekyi bie mɔɔ bɛfɛlɛ ye Kɔda la anwo amaa yɛabɔ yɛ nwo bane wɔ anwoma ne anwo, noko yɛ nwo hyelele yɛ kpalɛ na yɛahola yɛava ɛlɛne ekyi* ne yɛazie boɛ wɔ meli ne anu. 17  Noko mɔɔ bɛkpogyale ye zo la, bɛvale debie bɛsosɔle ɛlɛne ne anu, na kɛmɔ ɛnee bɛsulo kɛ bɛbahɔnwe Sɛtese* ɛnwea ne azo la ati, bɛdwulale avela ne bɛmaanle anwoma ne vale yɛ hɔle. 18  Kɛmɔ ɛnee ahumu ne ɛlɛtu kpole atia yɛ la ati, aleɛ hyenle ala la bɛbɔle ɔ bo bɛvuandinle meli ne anu ninyɛne ne bie bɛguale. 19  Na ye kenle nsa ne azo, bɛyeyele meli ne anwo ninyɛne ne bie bɛguale ye lɔ. 20  Na mɔɔ yɛannwu sɛnzɛne ne anzɛɛ nwɔlɔra ne mɔ wɔ kenle dɔɔnwo anu na ahumu ne bɔle yɛ ɛsesebɛ la, anyelazo mɔɔ yɛlɛ kɛ yɛbanyia ngoane la amuala bɔle ɔ bo kɛ ɔwie. 21  Mɔɔ bɛanli aleɛ wɔ mekɛ tendenle bie anzi la, Pɔɔlo dwazole gyinlanle bɛ avinli na ɔhanle kɛ: “Ayi mɔ, anrɛɛ ɔwɔ kɛ bɛfa me folɛdulɛ ne, na yɛandu yɛanvi Kiliti na yɛannwu amaneɛ kpole ɛhye na yɛamminli ninyɛne dɔɔnwo ɛhye mɔ. 22  Noko kɛkala, mesɛlɛ bɛ bɛzi ahonle, bɛ nuhua ko* bɔbɔ ɛnrɛminli, meli ye ala a bazɛkye a. 23  Nɔe, Nyamenle ne mɔɔ mele ye ɛdeɛ na mesonle ye la anwumabɔvolɛ rale me nwo ɛke 24  na ɔhanle kɛ: ‘Pɔɔlo mmasulo. Ɔwɔ kɛ ɛkɔgyinla Siza anyunlu, na nea! Nyamenle balie bɛdabɛ mɔɔ ɛ nee bɛ lua la amuala ngoane.’ 25  Ɔti ayi mɔ, bɛzi ahonle ɔluakɛ medie Nyamenle medi kɛ mɔɔ bɛha bɛhile me la bayɛ zɔhane. 26  Noko, ɔwɔ kɛ yɛkɔnwe bɔra bie ɛnweanloa.” 27  Yɛlile kenle bulu nee nna, alehyenlɛ nee aledwolɛ wɔ Edelea nyevile ne azo, na mɔɔ bɛbɔle nɔɔzo bulu nee nwiɔ la, gyimayɛvoma ne dele nganeɛ kɛ bɛlɛbikye azɛlɛ bie. 28  Bɛvale debie bɛzuzule na bɛnwunle kɛ kuma ne le mita 36, yemɔti bɛhɔle bɛ nyunlu ekyii na bɛzuzule bieko la bɛnwunle kɛ ɔle mita 27. 29  Na kɛmɔ ɛnee bɛsulo kɛ yɛkɛfofo awolɛ zo la ati, bɛdole sɛkɛ nna wɔ ɛlɛne ne anzi lɔ, na ɛnee bɛ kunlu a anrɛɛ aleɛ ɛhye. 30  Ɛnee gyimayɛvoma ne kpondɛ avi meli ne anu anriandi la ati, bɛdwulale ɛlɛne ekyi ne na bɛyɛle kɛ asɛɛ bɛkado sɛkɛ ne bie wɔ ɛlɛne ne anyunlu lɔ la, 31  Pɔɔlo zele sogya kpanyinli ne nee sogyama ne kɛ: “Saa menli ɛhye mɔ andɛnla meli ye anu a, bɛnrɛnyia ngoane.” 32  Na sogyama ne pɛle nyɛma ne mɔɔ lɛ ɛlɛne ekyi ne anu la anu bɛmaanle ɔhɔle. 33  Ɔka ekyii aleɛ kye la, Pɔɔlo zile bɛ kɔsɔɔti ahonle kɛ bɛli debie na ɔhanle kɛ: “Ɛnɛ le kenle 14 mɔɔ bɛhendɛ dedee mɔɔ bɛtɛdile aleɛ biala a. 34  Ɔti mesɛlɛ bɛ bɛli debie; na ɛhye baboa bɛ ɔluakɛ bɛ biala ati enrinli ko bɔbɔ ɛnrɛminli.” 35  Mɔɔ ɔhanle ɛhye la, ɔvale paano, ɔlale Nyamenle ase wɔ bɛ kɔsɔɔti bɛ nyunlu ɛkɛ, na ɔbɔle ɔ bo kɛ ɔbubu yeali. 36  Yemɔti bɛ muala bɛzile ahonle na bɛdabɛ noko bɛbɔle ɔ bo bɛlile debie. 37  Ɛnee yɛ muala mɔɔ yɛwɔ meli ne anu la yɛlua menli* 276. 38  Mekɛ mɔɔ bɛlile debie bɛ ko yile la, bɛbɔle ɔ bo bɛvuandinle hwiiti ne mɔɔ wɔ meli ne anu la bɛguale nyevile ne anu amaa nuhua ayɛ felafela. 39  Mɔɔ aleɛ hyenle la, ɛnee bɛngola bɛnnwu azɛlɛ mɔɔ bɛra zolɛ la, noko bɛnwunle ɛnwea bie wɔ ɛkɛ ne na bɛyɛle kɛ saa ɔkɛyɛ boɛ a bɛfa meli ne bɛahɔnwe ɛkɛ. 40  Yemɔti bɛpepɛle sɛkɛ ne mɔ amuala na bɛzianyinle ɛdahoma ne mɔ, na mɔɔ bɛvolale avela ne la anwoma ne bɔle bɛ hɔle ɛnwea ne anloa. 41  Mekɛ mɔɔ bɛhɔnwenle ɛnwea dɔɔnwo* bie mɔɔ wɔ nyevile ne anu azo la, meli ne ati minle ɛnwea ne anu maanle ɔhale ɛkɛ, na nyevile azɛlɛkye ne bule zile ɔ bo ne bubule ye. 42  Akee sogyama ne yɛle kɛ bɛku pilizama ne amuala amaa bie anweɛ anvo file zo na yeanriandi. 43  Noko kɛmɔ ɛnee sogya kpanyinli ne kulo kɛ ɔdie Pɔɔlo ngoane la ati, yeammaa bɛanyɛ mɔɔ ɛnee bɛkulo kɛ bɛyɛ la. Ɔhanle kɛ bɛdabɛ mɔɔ bɛze azule weɛ la ɛlimoa ɛgua nyevile ne anu ɛweɛ ɛhɔ file zo, 44  na bɛdabɛ mɔɔ bɛha la ɛdoa bɛ, bie mɔ ɛbutubutu ndaboa zo na bie mɔ noko ɛbutubutu meli ne azinli ne bie mɔ azo. Yemɔti bɛ muala bɛholale bɛdwule aze.

Ɔbodwɛkɛ

Anzɛɛ “ɛkɛla.”
Ɛhye le sɔlɔ aduduleɛ anwoma.
Ɔle ɛlɛne ekyi mɔɔ esiane si a bɛfo nu a.
Nea Edwɛkɛbohilelɛ.
Anzɛɛ “ɛkɛla ko.”
Anzɛɛ “ɛkɛla.”
Anzɛɛ “ese.”