Gyima ne 24:1-27

  • Pɔɔlo ɛzonledolɛ (1-9)

  • Pɔɔlo ka ye edwɛkɛ ahile Filekese (10-21)

  • Bɛdu Pɔɔlo edwɛkɛ bɛzie ɛvolɛ nwiɔ (22-27)

24  Kenle nnu anzi, ɛsɔfo kpanyinli Ananayase nee mgbanyima bie yɛɛ lɔya bie mɔɔ bɛfɛlɛ ye Tɛtɛlɛse la rale, na bɛvale edwɛkɛ mɔɔ bɛlɛ bɛtia Pɔɔlo la bɛdole amɛnlado ne anyunlu.  Mekɛ mɔɔ bɛvɛlɛle Tɛtɛlɛse la, ɔbɔle ɔ bo ɔbɔle ye somolɛ kɛ: “Kɛmɔ ɔlua ɛ nwo zo yɛnyia anzodwolɛ kpole na wɔ ngyehyɛleɛ kpalɛ ɛmaa anyuhɔlɛ ɛra maanle ɛhye anu la ati,  Anyunlunyianli Filekese, dahuu yɛkile ninyɛne ɛhye mɔ anwo anyezɔlɛ wɔ ɛleka biala, yɛyɛ wɔ mo somaa.  Noko amaa meanzɛkye wɔ mekɛ la, mesɛlɛ wɔ si abotane fa mekɛ ekyi tie yɛ.  Yɛnwu kɛ nrenyia ɛhye le gyegyeravolɛ, na ɔmaa Dwuuma mɔɔ wɔ azɛlɛ ye azo amuala la te atua, yɛɛ ɔli Nazalima eku ne anyunlu.  Eza ɔbɔle mɔdenle kɛ ɔgua ɛzonlenlɛ sua ne anwo evinli, yemɔti yɛhyele ye.  ——  Saa ɛbiza ye a ɛbanwu kɛ mɔɔ yɛlɛka la le nɔhalɛ.”  Na Dwuuma ne noko hanle kɛ mɔɔ yeha la le nɔhalɛ. 10  Mekɛ mɔɔ amɛnlado ne yɛle kɛ Pɔɔlo ɛdendɛ la, ɔhanle kɛ: “Meze kɛ wɔyɛ maanle ɛhye ndɛnebuavolɛ ɛvolɛ dɔɔnwo, ɛhye ati ɔyɛ me fɛ kɛ meka me edwɛkɛ meahile wɔ la. 11  Kɛ mɔɔ ɛdawɔ ɛkola ɛnwu ye la, mengɔle Gyɛlusalɛm kɛ mekazonle la, kenle 12 ɛne; 12  na bɛannwu ye kɛ me nee awie ɛlɛsu kpolera wɔ ɛzonlenlɛ sua ne anu, anzɛɛ melɛmaa menli ayɛ basabasa wɔ nyianu azua nu anzɛɛ sua ne azo. 13  Zɔhane ala a bɛnrɛhola bɛnrɛnyia ninyɛne mɔɔ bɛlɛbɔ me nwolɛ somolɛ kɛkala la anwo daselɛ a. 14  Noko medie ɛhye meto nu wɔ ɛ nyunlu kɛ, adenle ne mɔɔ bɛmɛ bɛfɛlɛ ye eku la azo a melua melɛsonle yɛ nlenyia mɔ Nyamenle ne a, ɔluakɛ medie ninyɛne mɔɔ wɔ Mɛla ne anu nee mɔɔ Ngapezoma ne hɛlɛle la amuala medi. 15  Na melɛ anyelazo wɔ Nyamenle anu, kɛ mɔɔ menli ɛhye mɔ noko lɛ la kɛ, bɛbadwazo tenlenema nee bɛdabɛ mɔɔ bɛnle tenlenema la bɛavi ewule nu. 16  Ɔlua ɛhye ati, dahuu mebɔ mɔdenle kɛ mebanyia adwenle mɔɔ anu te la wɔ Nyamenle nee menli nyunlu. 17  Ɛvolɛ dɔɔnwo pɛle nu la, membale kɛ mefa ahyɛlɛdeɛ mearɛlɛ me maanle ne na meabɔ afɔle. 18  Mekɛ mɔɔ melɛyɛ ninyɛne ɛhye mɔ la, bɛnwunle kɛ memaa me nwo ɛde wɔ ɛzonlenlɛ sua ne anu, noko ɛnee menli dɔɔnwo ɛnle ɛkɛ yɛɛ basabasayɛlɛ biala anzi. Emomu, ɛnee Dwuuma bie mɔɔ bɛvi Ehyea maanzinli nu la wɔ ɛkɛ 19  mɔɔ saa bɛlɛ me nwo edwɛkɛ bie a anrɛɛ ɔwɔ kɛ bɛbabɔ me somolɛ wɔ ɛ nyunlu ɛke a. 20  Anzɛɛ maa mrenyia mɔɔ wɔ ɛke la ɛha ɛtane mɔɔ menyɛle wɔ mekɛ mɔɔ ɛnee megyi Sanhedelin ne anyunlu la, 21  edwɛkɛ kokye ɛhye a mendeanle nu menganle wɔ mekɛ mɔɔ ɛnee megyi bɛ avinli la kɛ: ‘Kɛmɔ medie medi kɛ bɛbadwazo mowuamra la ati a bɛlɛbua me ndɛne ɛnɛ wɔ ɛ nyunlu a!’” 22  Noko kɛ mɔɔ Filekese ze Adenle ɛhye anwo edwɛkɛ dɔɔnwo la ati, ɔdule edwɛkɛ ne ɔziele na ɔhanle kɛ: “Mekɛ biala mɔɔ sogyama kpanyinli Lesease kɛra la, mebazi edwɛkɛ ɛhye anwo kpɔkɛ.” 23  Na ɔhanle ɔhilele sogya kpanyinli ne kɛ ɔnlea nrenyia ne boɛ na ɔmaa ɔnyia fanwodi ekyi, amaa ɔ gɔnwo mɔ anyia adenle aboa ye. 24  Mekɛ bie anzi, Filekese nee ɔ ye Dulusela mɔɔ le Dwuunli la rale na ɔmaanle bɛhɔvɛlɛle Pɔɔlo kɛ ɔraha Kelaese Gyisɛse anu diedi nwo edwɛkɛ ɔmaa ɔdie. 25  Mɔɔ Pɔɔlo hanle tenleneyɛlɛ nee bɛ nwo zo ɛhomolɛ nee ndɛnebualɛ mɔɔ bara la anwo edwɛkɛ la, ɛzulolɛ hanle Filekese na ɔbuale kɛ: “Wɔmɔ kɔ, na saa menyia adenle a mebazoa meamaa bɛaravɛlɛ wɔ bieko.” 26  Noko ɛnee ɔ nye la kɛ Pɔɔlo bamaa ye ezukoa. Ɛhye ati ɔzoanle ɔmaanle bɛhɔvɛlɛ ye fane dɔɔnwo na ɔ nee ye lile adwelie. 27  Noko mɔɔ ɛvolɛ nwiɔ pɛle nu la, Pɔseɛse Fɛsetɛse ralile Filekese agyakɛ anu; na kɛmɔ ɛnee Filekese kpondɛ kɛ ɔnyia Dwuuma anyunlu ɛlolɛ la ati, ɔgyakyile Pɔɔlo wɔ efiade ne.

Ɔbodwɛkɛ