Gyima ne 2:1-47

  • Sunsum nwuanzanwuanza wɔ Pɛntekɔso (1-13)

  • Pita ɛdendɛlɛ (14-36)

  • Menli dɔɔnwo diele Pita (37-41)

    • Bɛzɔnenle menli 3,000 (41)

  • Kilisiene mediemayɛlɛ (42-47)

2  Mɔɔ Pɛntekɔso kenle ne dwule la, ɛnee bɛ muala bɛyia ɛleka ko.  Arɛlevilɛ nu ala dede bie vi anwuma kɛ anwoma kpole bie la rayile sua ne mɔɔ bɛwɔ nu la anu.  Na bɛnwunle debie mɔɔ le kɛ senle mɔɔ zɔho ɛtafinlimalɛ la, ɔzandele na bɛrazinzele bɛ nuhua ko biala anwo zo,  na sunsum nwuanzanwuanza ne yile bɛ muala tetɛkɛɛ na bɛbɔle ɔ bo bɛhanle aneɛ ngakyile kɛ mɔɔ sunsum ne vale maanle bɛ kɛ bɛha la.  Mekɛ zɔhane ɛnee Dwuuma mɔɔ vi maanle biala anu ɛra la wɔ Gyɛlusalɛm.  Yemɔti mekɛ mɔɔ bɛdele dede ne la, menli dɔɔnwo rayiale ɛkɛ na ɔzinle bɛ nwo ɔluakɛ bɛ nuhua ko biala dele kɛ bɛlɛka ye sua zo aneɛ.  Nɔhalɛ nu, ɔyɛle bɛ nwanwane kpole na bɛhanle kɛ: “Nea, se menli ɛhye mɔ mɔɔ bɛlɛtendɛ la amuala le Galelima, ɔnle zɔ ɔ?  Ɛnee kɛ ɔyɛ mɔɔ yɛ nuhua ko biala te kɛ bɛlɛka ye sua zo aneɛ ɛ?  Pateama, Medeama, nee Yilama; menli mɔɔ vi Mɛsɔpɔteemea, Dwudiya nee Kapadosea, Pɔntɛse yɛɛ Ehyea maanzinli nu, 10  Felegyea nee Pamefelea, Yigyibiti yɛɛ Lebea maanzinli ne mɔ mɔɔ bikye Saelin; nyɛvolɛ mɔɔ vi Wulomu, Dwuuma nee bɛdabɛ mɔɔ bɛrayɛ Dwuuma la; 11  Kilitima; nee Areleebeama—yɛte kɛ bɛlɛfa yɛ sua zo aneɛ bɛaha ninyɛne mgbole mɔɔ Nyamenle ɛyɛ la anwo edwɛkɛ.” 12  Ɛhɛe, ɔzinle bɛ muala bɛ nwo na bɛbizale kɛ: “Ɛhye abo kile duzu?” 13  Noko bie mɔ golole bɛ nwo hanle kɛ: “Bɛnlo nza* bɛbo.” 14  Na Pita nee Bulu Nee Ko ne dwazole gyinlanle na ɔmaanle ɔ ne zo ɔhanle kɛ: “Dwudiya mrenyia nee bɛdabɛ mɔɔ bɛwɔ Gyɛlusalɛm la amuala, bɛdie me edwɛkɛ ɛhye kpalɛ. 15  Nɔhalɛ nu, menli ɛhye mɔ ɛtɛbole kɛ mɔɔ bɛsuzu la, ɔluakɛ bɛbɔ kɛyɛ nwonlomɔ dɔne ngɔnla* ala. 16  Emomu, ɛhye a bɛluale ngapezonli Dwowɛle anwo zo bɛhanle a: 17  Nyamenle hanle kɛ, ‘“Mekɛ mɔɔ li awieleɛ la anu, mebawola me sunsum ne bie meagua nwonane biala anwo zo na bɛ mra mrenyia nee bɛ mra mraalɛ bɛaha ngapezo yɛɛ bɛ mgbavolɛ banwu ɛnyelɛzodeɛnwunlɛ na bɛ mgbanyima aha ɛlalɛ, 18  na mebawola me sunsum ne bie meagua me ngɛkɛlɛ mrenyia nee mraalɛ bɔbɔ anwo zo wɔ mekɛ ne anu, na bɛaha ngapezo. 19  Na mebayɛ nwanwane ninyɛne wɔ anwuma lɔ na meayɛ sɛkɛlɛneɛ wɔ azɛlɛ ye azo—mogya nee senle nee esike kumɔɔnwo. 20  Sɛnzɛne ne bahakyi awozinli na siane ne ahakyi mogya kolaa na Gyihova* kenle kpole ne mɔɔ tɛla biala la ara. 21  Na awie biala mɔɔ kɛbɔ Gyihova* duma la, bɛbalie ye ngoane.”’ 22  “Yizilayɛma bɛdie edwɛkɛ ɛhye: Nyamenle luale Gyisɛse mɔɔ vi Nazalɛte la anwo zo yɛle nwanwane gyima nee sɛkɛlɛneɛ ngakyile ɔmaanle bɛnwunle ye wɔ mekɛ mɔɔ ɔwɔ bɛ avinli la, kɛ mɔɔ bɛdabɛ mumua ne bɛze la. 23  Ɛnee Nyamenle ze kɛ bɛbahye ye noko ɔkponlenle zolɛ na bɛluale mɛladonlɛma anwo zo bɛhendanle ye baka zo bɛhunle ye. 24  Noko Nyamenle dwazole ye na ɔliele ye ɔvile ewule sa nu, ɔluakɛ ewule ɛnlɛ ɔ nwo zo tumi. 25  Devidi hanle ɔ nwo edwɛkɛ kɛ: ‘Menwu* Gyihova* dahuu ɔluakɛ ɔwɔ me sa fema zo, yemɔti menrɛdɔ aze ɛlɛ. 26  Ɛhye ati, me ahonle di fɛlɛko yɛɛ me tafinlima anye die kpole. Na mebadɛnla anyelazo nu; 27  ɔluakɛ ɛnrɛgyakyi me* wɔ Nla* ne anu anzɛɛ ɛnrɛmaa mɔɔ di nɔhalɛ maa wɔ la nwonane ɛnrɛkpɔlɔ. 28  Wɔmaa menwu ngoane adenle; ɛbamaa meali fɛlɛko kpole wɔ ɛ nyunlu.’ 29  “Mediema, mekola meka yɛ nlenyia Devidi anwo edwɛkɛ wienyi mekile bɛ, kɛ ɔwule na bɛziele ye na ye nla ne tɛbɔ yɛ nwo ɛke badwu ɛnɛ. 30  Ɔluakɛ ɛnee ɔle ngapezonli na ɛnee ɔze kɛ Nyamenle ɛbɔ ye ɛwɔkɛ na yeha ndane yedo zo kɛ ɔbamaa ɔ bo zo amra ne mɔ ko* adɛnla ye ebia ne azo, 31  ɔnwunle Kelaese ewudwazo ne na ɔhanle nwolɛ edwɛkɛ kɛ bɛangyakyi ye wɔ Nla* ne anu anzɛɛ ye nwonane amkpɔlɔ. 32  Nyamenle dwazole Gyisɛse ɛhye na yɛ muala yɛdi ɛhye anwo daselɛ. 33  Yemɔti kɛmɔ Nyamenle ɛkpogya ye zo wɔ ɔ sa fema zo na yenyia sunsum nwuanzanwuanza ne mɔɔ Selɛ ne vale bɔle ye ɛwɔkɛ la ati a yewola mɔɔ bɛnwu ye na bɛde la yegua yɛ nwo zo a. 34  Ɔluakɛ Devidi mumua ne angɔ anwuma, noko ɔhanle kɛ, ‘Gyihova* zele me Awulae kɛ: “Tɛnla me sa fema zo 35  kɔkpula kɛ mebava wɔ agbɔvolɛ meawula ɛ gyakɛ abo.”’ 36  Yemɔti maa Yizilayɛ sua nu amra kɔsɔɔti ɛnwu ye kɛ Gyisɛse ɛhye mɔɔ bɛhunle ye wɔ baka zo la a Nyamenle ɛyɛ ye Awulae nee Kelaese a.” 37  Mɔɔ bɛdele ɛhye la, bɛlile nyane wɔ bɛ ahonle nu na bɛzele Pita nee ɛzoanvolɛma ne mɔɔ ɛha la kɛ: “Mediema, duzu a ɔwɔ kɛ yɛyɛ a?” 38  Pita zele bɛ kɛ: “Bɛnlu bɛ nwo, na bɛ nuhua ko biala ɛmaa bɛzɔne ye wɔ Gyisɛse Kelaese duma nu amaa bɛava bɛ ɛtane bɛahyɛ bɛ na bɛanyia sunsum nwuanzanwuanza ne mɔɔ Nyamenle fa maa mgbane la. 39  Ɔluakɛ ɛwɔkɛ ne wɔ ɛkɛ maa bɛ nee bɛ mra yɛɛ menli mɔɔ wɔ moamoa la kɔsɔɔti, bɛdabɛ mɔɔ Gyihova* yɛ Nyamenle ne kɛvɛlɛ bɛ la amuala.” 40  Na ɔhanle edwɛkɛ dɔɔnwo ɔvale ɔlile bɛ daselɛ bɔkɔɔ na ɔdule bɛ folɛ kɛ: “Bɛhwe bɛ nwo bɛvi awolɛndoazo amumuyɛma ɛhye mɔ anwo.” 41  Yemɔti bɛzɔnenle bɛdabɛ mɔɔ bɛvale anyelielɛ bɛdiele ye edwɛkɛ ne la, na kenle ko zɔhane bɛnyianle menli* kɛyɛ 3,000 bɛbokale bɛ nwo. 42  Na bɛhɔle zo bɛdiele ɛzoanvolɛma ne ngilehilelɛ ne, bɛbɔle nu,* bɛlile debie, na bɛyɛle asɔne. 43  Nɔhalɛ nu, ɛzulolɛ hanle awie* biala na ɛzoanvolɛma ne yɛle nwanwane ninyɛne nee sɛkɛlɛneɛ dɔɔnwo. 44  Bɛdabɛ mɔɔ bɛrayɛle diedima la yiale nu na bɛhyɛle debie biala mɔɔ bɛlɛ la, 45  na bɛdɔnenle bɛ ninyɛne nee bɛ agyapadeɛ na bɛhyɛle ezukoa mɔɔ bɛnyianle bɛvile nuhua la kɛ mɔɔ bɛ nuhua ko biala ngyianlɛ de la. 46  Na alehyenlɛ biala bɛ muala bɛyiale ɛzonlenlɛ sua ne anu, na bɛlile debie wɔ azua ngakyile nu, na bɛvale anyelielɛ nee ahonle kpalɛ bɛhyɛle aleɛ mɔɔ bɛlɛ la, 47  na bɛyele Nyamenle ayɛlɛ na bɛnyianle menli kɔsɔɔti anyunlu ɛlolɛ. Mekɛ ko ne ala Gyihova* hɔle zo vale menli mɔɔ ɔbalie bɛ ngoane la rabokale bɛ nwo alehyenlɛ biala.

Ɔbodwɛkɛ

Anzɛɛ “nza menlemenle.”
Giliki aneɛ nu, kɛyɛ dɔnehwele nsa ne azo.
Nea Edwɛkɛbohilelɛ.
Nea Edwɛkɛbohilelɛ.
Anzɛɛ “me nye dua.”
Nea Edwɛkɛbohilelɛ.
Anzɛɛ “me ɛkɛla.”
Anzɛɛ “Hades,” ɛhye kile, alesama nla. Nea Edwɛkɛbohilelɛ.
Giliki aneɛ nu, “ɔ kunlu ralɛ.”
Anzɛɛ “Hades,” ɛhye kile, alesama nla. Nea Edwɛkɛbohilelɛ.
Nea Edwɛkɛbohilelɛ.
Nea Edwɛkɛbohilelɛ.
Anzɛɛ “ɛkɛla dɔɔnwo.”
Anzɛɛ “bɛhyɛle mɔɔ bɛlɛ la.”
Anzɛɛ “ɛkɛla.”
Nea Edwɛkɛbohilelɛ.