Gyima ne 19:1-41

  • Pɔɔlo wɔ Ɛfɛsɛse; bɛzɔnenle bie mɔ bieko (1-7)

  • Pɔɔlo ngilehilelɛ gyima (8-10)

  • Sunsum ɛtane angola bɛ (11-20)

  • Basabasayɛlɛ wɔ Ɛfɛsɛse (21-41)

19  Mɔɔ Apɔlɔso wɔ Kɔlente la, Pɔɔlo vale aze rale Ɛfɛsɛse. Na ɔnwunle ɛdoavolɛma bie wɔ ɛkɛ  na ɔbizale bɛ kɛ: “Mekɛ mɔɔ bɛrayɛle diedima la, bɛnyianle sunsum nwuanzanwuanza ɔ?” Bɛbuale ye kɛ: “Kyɛkyɛ o, yɛtɛtele ye ɛlɛ kɛ sunsum bie wɔ ɛkɛ.”  Ɔti ɔzele bɛ kɛ: “Ɛnee duzu anu a bɛzɔnenle bɛ a?” Bɛbuale ye kɛ: “Dwɔn ɛzɔnenlɛ ne anu ɔ.”  Pɔɔlo hanle kɛ: “Dwɔn zɔnenle menli vale yɛle anlubɛnwo nwo sɛkɛlɛneɛ, na ɔzele menli ne kɛ bɛlie mɔɔ ɔli ɔ nzi ɔlɛba mɔɔ yemɔ a le Gyisɛse la bɛli.”  Mɔɔ bɛdele ɛhye la, bɛmaanle bɛzɔnenle bɛ wɔ Awulae Gyisɛse duma nu.  Na mekɛ mɔɔ Pɔɔlo vale ɔ sa guale bɛ nwo zo la, sunsum nwuanzanwuanza ne rale bɛ nwo zo na bɛbɔle ɔ bo bɛhanle aneɛ ngakyile nee ngapezo.  Na ɛnee bɛ muala bɛle mrenyia kɛyɛ 12.  Ɔhɔle nyianu sua ne anu ɔvale akɛnrasesebɛ ɔdendɛle siane nsa, ɔmaanle ɛdendɛlɛ na ɔ nee bɛ zuzule Nyamenle Belemgbunlililɛ ne anwo wɔ adenle mɔɔ tɔ ɛnzolɛ nu la azo.  Na mɔɔ bie mɔ anlie anli, na bɛhanle Adenle Ne anwo edwɛkɛ ɛtane wɔ menli ne anyunlu la, ɔhwenle ɔ nwo ɔvile bɛ nwo na ɔ nee ɛdoavolɛma ne hɔle, na ɛnee ɔtendɛ ɔkile bɛ dahuu wɔ Taelanɛse sukulu sua ne anu. 10  Ɛhye hɔle zo ɛvolɛ nwiɔ yemɔti bɛdabɛ mɔɔ bɛwɔ Ehyea maanzinli ne anu la, Dwuuma nee Gilikima amuala, dele Awulae edwɛkɛ ne. 11  Na Nyamenle luale Pɔɔlo anwo zo yɛle nwanwane ninyɛne mgbole dɔɔnwo, 12  yemɔti bɛvale ye adɛladeɛ nee ye aguzo bɔbɔ bɛhɔguale wuliravolɛma anwo zo na bɛ ewule ne mɔ hɔle, yɛɛ sunsum ɛtane ne mɔ vile bɛ nwo dule. 13  Noko Dwuuma bie mɔ mɔɔ luolua nu bɛtu sunsum ɛtane la noko bɔle mɔdenle kɛ bɛbabɔ Awulae Gyisɛse duma wɔ bɛdabɛ mɔɔ sunsum ɛtane wɔ bɛ nwo la anwo zo kɛ: “Mese wɔ wɔ Gyisɛse mɔɔ Pɔɔlo ka ɔ nwo edwɛkɛ la duma nu.” 14  Ɛnee Dwuuma ɛsɔfo kpanyinli bie mɔɔ bɛfɛlɛ ye Siva la amra mrenyia nsuu a yɛ ɛhye a. 15  Noko sunsum ɛtane ne buale bɛ kɛ: “Meze Gyisɛse yɛɛ meze Pɔɔlo; na bɛmɛ bɛle nwane mɔ?” 16  Akee nrenyia ne mɔɔ sunsum ɛtane ne wɔ ɔ nwo la hɔle bɛ nwo zo, ɔlile bɛ nwo zo konim ngoko, yemɔti bɛlɛle bɛ nwo zɔ bɛnriandile bɛvile sua nu ɛkɛ ne mɔɔ ɛnee bɛbodɛboda a. 17  Bɛdele ɛhye wɔ ɛleka biala, Dwuuma nee Gilikima mɔɔ wɔ Ɛfɛsɛse la amuala; na ɛzulolɛ hanle bɛ muala na bɛhɔle zo bɛyele Awulae Gyisɛse duma ne ayɛlɛ. 18  Na bɛdabɛ mɔɔ bɛliele bɛlile la anu dɔɔnwo rahanle bɛ nyɛleɛ bagua nu. 19  Nɔhalɛ nu, ngonyiama bie mɔ vale bɛ mbuluku rayelale bɛ maanle awie biala nwunle ye. Na bɛbule nwolɛ mgbonda la, bɛnwunle kɛ bɛ bolɛ le dwɛtɛ fufule 50,000. 20  Yemɔti Gyihova* edwɛkɛ ne hɔle zo dɛlɛle na ɔnyianle tumi. 21  Mɔɔ ɛhye mɔ zile la anzi, Pɔɔlo zile kpɔkɛ kɛ saa ɔvi Masidonea nee Akaya a, ɔbadoa zo yeahɔ Gyɛlusalɛm. Ɔhanle kɛ: “Saa mekɔ ɛkɛ a, mebahɔ Wulomu noko.” 22  Yemɔti ɔzoanle ye boavolɛma ne mɔ nwiɔ, Timote nee Yilasetɛse wɔ Masidonea, noko yemɔ ɔhale Ehyea maanzinli ne anu ekyii. 23  Mekɛ zɔhane, basabasayɛlɛ kpole bie zile wɔ Adenle Ne anwo. 24  Dwinvolɛ bie mɔɔ bɛfɛlɛ ye Dimiteleɛse la ɛnee fa dwɛtɛ fufule yɛ ɛzonlenlɛ sua ngyikyi mɔɔ le kɛ Aatɛmese ɛzonlenlɛ sua ne la, na ɔmaanle bɛdabɛ mɔɔ bɛdi adwinli la nyianle nvasoɛ dɔɔnwo. 25  Ɔboɔboale bɛ nee awie mɔ mɔɔ bɛyɛ zɔhane gyima ne bie la anloa na ɔhanle kɛ: “Ayi mɔ, bɛ muala bɛze kɛ gyima ɛhye a maa yɛnyia yɛ nwo a. 26  Kɛkala bɛnwu ye yɛɛ bɛde kɛ tɛ Ɛfɛsɛse ɛke angome, emomu asɛɛ Ehyea maanzinli ye anu amuala, Pɔɔlo ɛmaa menli dɔɔnwo ɛlie ɛli kɛ nyamenle mɔɔ bɛva bɛ sa bɛyɛ la ɛnle nyamenle fee. 27  Bieko, saa yɛmaa ɛhye kɔ zo a, tɛ yɛ gyima ɛhye angome a bazɛkye a, emomu, bɛbabu nyamenle raalɛ Aatɛmese mɔɔ le kpole la ɛzonlenlɛ sua ne debie mgbane, na anyunlunyia mɔɔ bɛfa bɛsonle ye wɔ Ehyea maanzinli ye anu nee azɛlɛ ye azo amuala la babɔ ye.” 28  Mɔɔ menli ne dele ɛhye la bɛvale ɛya, na bɛdeɛdeanle nu kɛ: “Ɛfɛsɛsema Aatɛmese ne le kpole!” 29  Yemɔti sua ne azo yɛle begyebegye, na bɛ muala bɛhɔhwenle Gayɛse nee Alesetaakɛse, Masidoneama mɔɔ nee Pɔɔlo lua la bɛhɔle nwɔhoalilɛleka ne. 30  Pɔɔlo ɛdeɛ, ɛnee ɔkpondɛ kɛ ɔkɔ menli ne anu, noko ɛdoavolɛma ne ammaa ye adenle. 31  Mgbanyima mɔɔ nea ɛvoyia nee nwɔhoa zo bie mɔ mɔɔ bɛle ɔ gɔnwo mɔ bɔbɔ la, dole ye nrɛlaleɛ kɛ ɔmmafa ye ngoane ɔto esiane nu ɔkɔ nwɔhoalilɛleka ne. 32  Nɔhalɛ nu, mɔɔ bie mɔ ɛlɛka edwɛkɛ ɛhye la ɛnee bie mɔ noko ɛlɛka edwɛkɛ fofolɛ; basabasayɛlɛ kpole zile, noko ɛnee menli dɔɔnwo ɛnze deɛmɔti bɛrayia ɛkɛ ne la. 33  Ɔti bɛvale Alɛzanda bɛvile menli ne anu bɛvindele, Dwuuma ne hwenle ye rale ɔ nyunlu, na Alɛzanda maanle ɔ sa zo kɛ ɔkpondɛ kɛ ɔkilehile edwɛkɛ nu ɔkile menli ne. 34  Noko mɔɔ bɛnwunle kɛ ɔle Dwuunli la, bɛ muala bɛdeɛdeanle nu kɛyɛ dɔnehwele nwiɔ kɛ: “Ɛfɛsɛsema Aatɛmese ne le kpole!” 35  Mekɛ mɔɔ sua ne azo kpanyinli ne maanle menli ne yɛle koonwu la, ɔhanle kɛ: “Ɛfɛsɛsema, nwane a ɛnze kɛ Ɛfɛsɛse sua ye a nea Aatɛmese kpole ne ɛzonlenlɛ sua ne nee ananze ne mɔɔ vi anwuma radɔle aze la azo a? 36  Kɛmɔ awie biala ɛngola ɛnzu ɛhye anwo kpolera la ati, ɔwɔ kɛ bɛka bɛ ahonle bɛto azule nu na bɛmmapele bɛyɛ debie. 37  Ɔluakɛ bɛva mrenyia ɛhye mɔ mɔɔ bɛtɛwuale debie wɔ ɛzonlenlɛ sua nu anzɛɛ bɛtɛtendɛle bɛtɛtiale yɛ nyamenle raalɛ ne la bɛra ɛke. 38  Yemɔti saa Dimiteleɛse nee dwinvolɛma ne mɔ mɔɔ bɛ nee ye lua la lɛ edwɛkɛ bie tia awie a, kenle mɔɔ bɛfa bɛdi edwɛkɛ wɔ kɔɔto la wɔ ɛkɛ yɛɛ yɛlɛ amɛnladoma;* bɛkola bɛ nee bɛ kɔ lɔ. 39  Na saa bɛkpondɛ debie gyɛne bieko a, ɛnee ɔwɔ kɛ bɛyɛ ye kɛ mɔɔ mɛla ne kile la. 40  Edwɛkɛ ɛhye mɔɔ ɛzi ɛnɛ la bahola ava yɛ ado ngyegyelɛ nu, bɛbahola bɛado yɛ ɛzonle kɛ yɛlɛte atua ɔluakɛ yɛnlɛ debie mɔɔ yɛbagyinla zo yɛahile deɛmɔti basabasayɛlɛ ɛhye ɛra la anu a.” 41  Na mɔɔ ɔhanle ɛhye la, ɔmaanle bɛzandenle.

Ɔbodwɛkɛ

Nea Edwɛkɛbohilelɛ.
Ɔle Wulomu amɛnlado mɔɔ nea maanzinli zo. Nea Edwɛkɛbohilelɛ.